1. მუ რეაქცია უღუდ პეტრეს, მუჟამსით იესოქ სასწაულ აკეთ დო ქიანაშ ჩხომ ოჭოფაფუ?

 ᲞᲔᲢᲠᲔ შხვა მეჩხომეეფწკუმა ართო მთელ სერს ჩხომენდჷ, მარა მუთუნქ ვა ჭოფჷ. თე დროს იესოქ თიშა ქიმერთჷ დო თეცალ სიტყვეფ უწუ: „ტომბას ქიმშანჩურ დო ქაჸათით ბადეეფ ჩხომეფიშ ოჭოფალო“ (ლუკ. 5:4). პეტრე მანგარო გაკვირ თე სიტყვეფიშ მორჩქილაფაქ. მართალ რე, თის იმენდ ვა უღუდ, ნამდა ბადეს ართ ჩხომ ვარა გეშაჸუნუდ, მარა იშენით თეშ მიქცუ, მუჭოთ იესოქ უწუ. პეტრექ დო თიწკუმა ართო რდესინ თი კოჩეფქ თისხი ჩხომ ჭოფეს, ნამდა ბადეეფ უხორცქუდეს. თინეფქ მანგარ გაკვირებულეფქ ქუდოსქიდეს, მუჟამსით გურ ქუგუჩეს, ნამდა გვალო ამარდე იესოქ მუნეფიშ თოლიშ წოხოლე სასწაულ აკეთ. თე დროს პეტრექ იესოშ წოხოლე ბირგულეფს ქაშანთხჷ დო თეცალ სიტყვეფ უწუ: „ვენკმანჭა, უფალ, ცოდამ კოჩ ვორექ!“ (ლუკ. 5:​6—9). მუჭოთ იძირე, პეტრე მუშ დუდის თიშ ღირსო ვა თვალუნდჷ, ნამდა იესოშ გვერდით ჸოფედკო.

2. მუ ჯგირობუას მომღანა პეტრეშ მაგალითიშ გარჩიება?

² პეტრეს ტყურა ვა უთქუალ, მუჟამსით თქუ, ნამდა „ცოდამ კოჩ“ რდჷ. ბიბლიაშე ბგებულენთ, ნამდა მინშა თინა თიცალ მუდგარენეფს იჩიებუდ დო ორთუდ, მუდგას უკულ ნარღენდჷ. თქვა ხოლო ხომ ვა ჸოფეთ თეცალ სიტუაციას? შილებე ბრელ ხან რე, მუთ მუდგარენ სისუსტეშ ჩათხინაფას ოცადუთ ვარდა ცოდამ მიდრეკილებაწკუმა გიხვადუნა ბრძოლა. თე შემთხვევას მანგარო ელაიკინანა გურშა პეტრეშ მაგალითიშ გარჩიება. დეფიქრით, იეჰოვას თავისფალო შეულებუდ ბიბლიას ვენაჭარაფუკო პეტრეშ შემთხვევეფ, მარა თაშ ვა მოქციებე. თიქ ქუგმოგებაფეს პეტრეშ შეცდომეფ, ნამდა ბრელ მუდგარენ დიბგურეთკო თევრეშე (2 ტიმ. 3:​16, 17). პეტრეს ქიანაშ სისუსტეწკუმა უხვადუდ ბრძოლა დო თიცალ გრძნობეფ უღუდ, მუნერით ჩქი მიღნა. ათეშენ, თიშე უმოსიშ გაგება მიმეხვარებნა, ქობძირათ, ნამდა იეჰოვა ჩქინდე სრულყოფილებას ველჷ. თის ოკო, ნამდა დუდ ვემუდვათ ჩქინ სისუსტეეფს დო გუვაგრძელათ თიშ ართგურო მსახურება.

3. მუშენ ოკო ვემუდვათ დუდ სისუსტეეფს?

 ³ სისუსტეეფს დუდის ვემუდვანთ დო ჩქინ დუდიშ გაუჯგუშებას ირნერო ქივეცადებუთ-და, შედეგის ხოლო მიბღენთ. ქიმიპჸონათ თეცალ მაგალით: მიდგაინქ პროფესიონალ პიანსიტო გინირთასინ, წანეფ რე საჭირო. მუშო ოკო რაგად, გურაფაშ დროს შეცდომეფ მალედას იჸი დო ბრელ არასწორ ნოტის ქიმიოგანს, მარა დუდის ვა დაზოგენს დო ბრელს ქივარჯიშენს-და, მუშ მიზანს ქიმიოჭირინუანს. ოკო გეფთვალისწინათ თი ფაქტ ხოლო, ნამდა, მუდგა პროფესიონალო ვეგნირთასინ, პიანინოშ მეგამაშ დროს შეცდომეფქ შილებე ირიათო მურთას. მარა მუშო ოკო რაგად, თე შეცდომეფს დუდის ვემუდვანს დო გაგრძელენს პიანინოშ მეგამას. თაშ ხვადუ ჩქინ შემთხვევას ხოლო. მინშა შილებე თიცალ სისუსტექ ქუგმოშინან დუდ, მუდგაშეთ ფიფქრენდით, ნამდა ჩათხინაფილ მაფდეს. მარა პიანისტცალო სისუსტეეფს დუდის ვემუდვანთ დო ირნერო ვოცადუთ გაუჯგუშებას. კანკალეშა არძა იფჩიებუთ დო ვორთუთ თიცალ მუდგარენს, მუდგას უკულ ბნარღენთ, მარა ჩქინ დუდიშ გაუჯგუშებას მონდომას ვადვარკენთ-და, იეჰოვა აუცილებერო ქიმმეხვარებნა მიზანიშ მენჭირნაფას (1 პეტ. 5:10). თე სტატიაშე ქიგებგენთ, მუ ოხვარუდ პეტრეს, დუდ ვემუდვკო სისუსტეეფს დო ქობძირუნთ, მუჭო უგენდჷ თის იესო თე სისუსტეეფიშ უმკუჯინუო. თე ირფელიშ გარჩიება ხოლო უმოსო გინომჭყვიდრაფუანა, ვემვოტუათ იეჰოვაშ მსახურება.

4. მუჭოთ ლუკაშ 5:5—10-ის ბგებულენთ, მუ თქუ პეტრექ მუშ დუდშე, მარა მუ უწუ იესოქ?

⁴ ბიბლია ვეჩიებ, მუშენ თქუ პეტრექ მუშ დუდშე, ნამდა „ცოდამ კოჩ“ რდჷ დო ვართ თის მოგებაფუანა, მუ ცოდეფს გულისხმენდჷ (წეკითხით ლუკაშ 5:5—10). შილებე თინა მუდგარენეფს სერიოზულო რდჷ მეჩილათირ. იესოქ ქიმეხვად, ნამდა თე სიტყვეფ პეტრეს შიშიქ ორაგადაფუ, მუდგაშ მიზეზ შილებე უღირსობაშ გრძნობა რდუკო. მარა ქრისტეს თინა ხოლო ჯგირო უჩქუდ, ნამდა პეტრეს შეულებუდ ბოლოშა ართგურ ჸოფედკო. ათეშენ გემუანო უწუ თის: „ვა გაშქურნას“. პეტრექ ქიგინ, ნამდა იესო თის ონდუდ, მუდგაქ თიშ მთელ ცხოვრებაშა იმოქმედ დო სერიოზულ ნაბიჯ გინადგუმაფუ. პეტრექ დო თიშ ჯიმა ანდრიაქ მიოტუეს მეჩხომეობა, მუდგათ დუდის ეიჯუმუანდეს, დო იესოშ მიმაჸუნალეფო გინირთეს, მუდგაშ გურშენ იეჰოვაქ კურთხევეფით ეიოფშჷ თინეფ (მარ. 1:​16—18).

5. მუ კურთხევეფ მიღჷ პეტრექ, მუჟამსით გიორჯგინ უარყოფით გრძნობეფს დო გინირთჷ იესოშ მიმაჸუნალო?

⁵ პეტრექ, მუჭოთ ქრისტეშ მიმაჸუნალქ ბრელ სარკო მუდგარენ ძირჷ. მაგალთო, თიქ მუშ თოლით ძირჷ, მუჭო ოსქილიდუანდჷ იესო ხალხის ლახალაშე, ათავისფალენდჷ დემონეფშე დო ათელენდჷ ღურელეფს b (მათ. 8:​14—17; მარ. 5:​37, 41, 42). თეს გეძინელ, ართშა ხილუას სამეფო დიდებულებათ ეფშა იესო ხოლო ძირჷ, მუთ მთელ ცხოვრებას დღას ვა გოჭყოლად (მარ. 9:​1—8; 2 პეტ. 1:​16—18). თაშ ნამდა, პეტრე იესოშ  მიმაჸუნალ ვა ჸოფედკონ დღას ვა ძირუნდჷ თე სარკო მუდგარენეფს. წერმიდგინით, მუ ბედნერ იჸუაფუდ თინა, ნამდა უღირსობაშ გრძნობას დო მუშ დუდიშ გურშენ უარყოფით ფიქრეფს ვემეჩ უფლება, იეჰოვაშე თე კურთხევეფიშ მეღებას ეცილკო.

6. ართუცფას გიორჯგინუო პეტრექ მუშ სისუსტეეფს? გენწყით.

⁶ მართალ რე, პეტრე ბრელ მუდგარენს ორწყედ დო ირჩქილედ იესოშე, მარა იშენით უხვადუდ ბრძოლა მუშ სისუსტეეფშა. მორთ გუვარჩუათ მუსხირენ მაგალით. მაგალთო, მუჟამსით იესოქ მოწაფეეფს უწუ, ნამდა წინასწარმეტყველებაშ თანახმას, ბრელ ოტანჯებელ აჸიდ გინაღალარ დო ბოლოს დოჸვილუნდეს, პეტრექ გუდღან თის (მარ. 8:​31—33). ხვალე თენა ვარინ, ართშა პეტრე შხვა მოწაფეეფწკუმა ართო თიშე ნირზენდჷ, მი რდჷ თინეფ შქას არძაშ უდიდაშ (მარ. 9:​33, 34). თეს გეძინელ, იესოშ ღურაშ წოხოლენ სერს თიქ ემოციეფს გეიაჸუნ დო ჸუჯ ქელათოლ მღვდელმთავარიშ მონას (იოან. 18:10). კინ თიმ სერს პეტრექ შიშის ქინოლ დო სუმშა ივარუ, ნამდა იჩინენდჷ იესოს დო თიშ მეგობარ რდჷ (მარ. 14:​66—72). პეტრექ მუშ საქციელიშ გურშენ თიცალ გლახათ იგინ დუდ, ნამდა ნგარაქ გეუოლ (მათ. 26:75).

7. მუშ შესაძლებლობა მეჩჷ იესოქ პეტრეს?

⁷ თე ირფელიშ უმკუჯინუო, იესოს ვემუტებ მუშ ძვირფას მოციქულ პეტრე, მით მანგარ გურგოტახილ რდჷ დო ვა უფიქრებ, ნამდა თიშე მუთუნ ვეგშეშ. გათელებაშ უკულ თიქ პეტრეს შესაძლებლობა ქიმეჩ, ნამდა ჸოროფა დუმტკიცკო. იესოქ თის მუშ შხურიშ ჭყიშუა დავალ (იოან. 21:​15—17). პეტრე მზათ რდჷ თე დავალებაშ შეიოსრულებერო, ათეშენ, თინა თი მოწაფეეფ შქას რდჷ, მიდგაშა ჟარნეჩდომავითა დღაშ დღახუს წმინდა შურქ გეგნორთჷ.

8. მუ სერიოზულ შეცდომაქ მურთჷ პეტრეს ანტიოქიას?

⁸ პეტრეს მუშ სისუსტეეფწკუმა ბრძოლა თიშ უკულ ხოლო უხვადუდ, მუთ თიშა წმინდა შურქ გეგნორთჷ დო ცხებულ ქრისტიანო გინირთჷ. ახ. წ. 36 წანას ღორონთიქ პეტრე წინადაუცვეთელ უცხოტომელშა, კორნელიუსშა, მიდაშქვჷ. თე უცხოტომელქ იეჰოვაშ წმინდა შურ მიღჷ დო ცხებულ ქრისტიანო გინირთჷ. მუჟამსით პეტრექ თენა ქოძირ, ქიმეხვად, ნამდა ღორონთ ვეგმირჩქინანს გიშაკერძაფას დო უცხოტომელ ქრისტიანეფს ხოლო შეულებნა რდან ქრისტიანულ კრებაშ ნაწილ (საქ. 10:​34, 44, 45). თეშ უკულ, პეტრეს თავისფალო უღუდ ურთიერთობა უცხოტომელეფწკუმა დო თინეფწკუმა ართო ჭკუმუნდჷ ოჭკუმალს, მუდგას აიშახ მუთუნით ვაკეთენდჷ (გალ. 2:12). მარა ნამთინე იუდეველ ქრისტიან ფიქრენდჷ, ნამდა უცხოტომელეფწკუმა ართო ოკო ვა ჭკუმესკო. მუჟამსით თი ქრისტიანეფქ, მიდგას თეცალ დამოკიდებულება უღდეს, ანტიოქიაშა გენორთეს, პეტრექ თინეფიშ შიშით უცხოტომელ და დო ჯიმალეფწკუმა ართო ჭკუმუა მიოტუ. პავლე მოციქულქ პეტრეშ თვალთმაქცობა ქოძირუნ, არძაშ წოხოლე ქიმეჩ შენიშვნა (გალ. 2:​13, 14). მართალ რე, პეტრექ ხოლო ართშა მეჩირთჷ, მარა დუდ ვემუდვალ თეშა დო ვემუტებ სისუსტეეფშა ბრძოლა. ქობძირათ, მუქ მეხვარ თის.

9. სოვრეშე იძირე, ნამდა პეტრე ართგურ პიროვნება რდჷ? (იოან. 6:​68, 69).

⁹ პეტრე ართგურ პიროვნება რდჷ. თინა ირიათო იესოწკუმა ართო მსახურენდჷ დო მუთუნს ვარზენდჷ უფლებას, ეცილკო თეშ კეთებას. თიშ ართგურობაქ ჯგირო ქიძირ, მუჟამსით ართშა მოწაფეეფს ვაგაგინეს იესოშ სიტყვეფქ (წეკითხით იოანეშ 6:​68, 69). თინეფქ იესოს მუთუნიშ ენწყუმა ვაცალეს დო ოჭიშ ქურთინუეს თის, მარა პეტრე თაშ ვა მოქციებე. თის ჯგირო არჩქილედ, ნამდა ხვალე იესოს უღუდ „მარადიულ სიცოცხლეშ სიტყვეფ“.

10. მუჭო ოძირუ იესოქ პეტრეს, ნამდა კინ ონდუდ თის? (ქოძირით სურათ).

¹⁰ იესოქ ხოლო გიმირჩქინ ართგურობა დო დღას ვემუტებ პეტრე. თის ჯგირო უჩქუდ, ნამდა ღურაშ წოხოლენ სერს შხვა მოციქულეფწკუმა ართო პეტრე მიოტენდჷ თის. მარა თიშა ხოლო დარწმუნებულ რდჷ, ნამდა კინ დართუდ მუშ მოძღვარს დო კინ თიშ ართგურ იჸუაფუდ (ლუკ. 22:​31, 32). იესოს ჯგირო არჩქილედ, ნამდა „შურ მონდომებულ რე, მარა ხორც — სუსტ“ (მარ.  14:38). ზუსტას ათეშენ, იესოს თიმწკუმა ხოლო ვა ურთინუაფ ოჭიშ პეტრეშა, მუჟამსით თიქ სუმშა ივარუ, ნამდა იჩინენდჷ ქრისტეს. ხვალე თენა ვარინ, გათელებაშ უკულ, იესოქ პირადო ოძირუ დუდ პეტრეს (მარ. 16:7; ლუკ. 24:34; 1 კორ. 15:5). წერმიდგინით, პეტრეს, მიდგას დაშებულიშ გურშენ გურ დამონკებულ აფუდ, მუჭო ეუქექუანდჷ გურშა იესოშ თე საქციელ.

11. მუჭო დარწმუნ იესოქ პეტრე, ნამდა იეჰოვა ირიათო ელუდირთუდ თის?

¹¹ გათელებურ იესოქ პეტრე თიშა ხოლო დარწმუნ, ნამდა იეჰოვა ირიათო ელუდირთუდ დო იზრუნენდჷ თიშე. მუჟამსით პეტრე დო შხვა მოციქულეფ ოჩხომშა რდეს ულირ, იესოქ კინ სასწაულებრივო ოჭოფაფუ ქიანაშ ჩხომ (იოან. 21:​4—6). მუშო ოკო რაგად, თე სასწაულ პეტრეს დარწმუნენდჷ, ნამდა იეჰოვა აუცილებერო იზრუნენდჷ თიშ მატერიალურ საჭიროებეფშო დო ქუგაშინანდჷ იესოშ სიტყვეფს ხოლო, ნამდა ღორონთ აუცილებერს ვარკენს თინეფს, მით ცხოვრებას პირველ ადგილს თიშ სამეფოს გიორინუანს (მათ. 6:33). ზუსტას ათეშენ, პეტრექ გინოჭყვიდ, ნამდა მუშ ცხოვრებას პირველ ადგილს მეჩხომეობა ვარინ, ღორონთიშ სამეფო ქიგიორინუკო. პეტრე დუდგინოდვალირ მაქადაგებელ რდჷ, მუდგაშ შედეგო ბრელქ გეგჷ სახიოლო ამბე. მაგალთო, ახ. წ. 33 წანას, ჟარნეჩდომავითა დღაშ დღახუს, ანთასობით ადამიანქ მირჩქილუ პეტრეშ ქადაგება დო ინათ (საქ. 2:​14, 37—41). უმოს გვიანო, თიქ სამარიელეფს დო უცხოტომელეფს მეხვარ, გინირთესკო ქრისტეშ მიმაჸუნალეფო (საქ. 8:​14—17; 10:​44—48). არგამა რე, იეჰოვაქ აკურთხჷ პეტრე დო გიმირინუ თიშო, ნამდა არძანერ ადამიანქ ქიგეგკო სახიოლო ამბე.

12. მუჭოთ პეტრეშ შემთხვევაშე იძირ, მუ ოკო ფშუდან, მუდგაინ სისუსტეს ქუვობრძოლუთ-და?

¹² იეჰოვას შეულებ მიმეხვარან, დუდ ვემუდვათ სისუსტეეფს დო ვებრძოლათ თინეფს. შილებე მუდგარენ სისუსტეს ბრელ ხან რე მუთ ვობრძოლუთ. მინშა ჩქინ სისუსტეეფ შილებე უმოს რთულ ჩათხინაფალ რდას, ვინემ თი სისუსტეეფ, ნამუთ პეტრეს უღუდ. მარა შემლებნა დარწმუნებულ ვორდათ, ნამდა იეჰოვა აუცილებერო ქომჩანა ძალეფს თინეფიშ გიორჯგინალო (ფსალმ. 94:​17—19). თეს ჯგირო ოძირანს ართ ჯიმაშ შემთხვევა, მით ჭეშმარიტებაშ გაგებაშახ ჰომოსექსუალ რდჷ. მართალ რე, იეჰოვაშ გაჩინებაფაშ უკულ თიქ სრულას დოთირუ მუშ ცხოვრება დო ღორონთიშ ნორმეფიშ თანახმას ცხოვრება ქიდიჭყჷ, მარა კანკალეშა არასწორ სურვილეფ იშენით ირჩქინანდჷ დუდის. მუქ მეხვარ თის, ვემიოტუკო ბრძოლა დო ვეიაჸუნკო არასწორ სურვილეფს? თინა იჩიებ: „დებრწმუნ, ნამდა იეჰოვა არძას მამანგარენა დო თინა ხოლო ქობძირ, ნამდა სისუსტეეფიშ უმკუჯინუო, იეჰოვაშ წმინდა შურიშ ჭყოლოფათ შეიოლებერ რე თიშ მოსაწონო ცხოვრება. ჩქიმ არასრულყოფილებაშ უმკუჯინუო, ღორონთ მირინუანს მუშ საქმეშ შეიოსრულებერო დო მარზენს ძალეფს“.

13. მუჭოთ საქმეეფიშ 4:13, 29, 31-შე იძირე, მუჭო შემლებნა მივაჸუნათ პეტრეშ მაგალითის? (ქოძირით სურათ).

 ¹³ მუჭოთ ბძირით, პეტრეს ბრელშა მერუ კოჩიშ შიშიქ, მარა ლოცვა ოხვარუდ, გიორჯგინკო თის დო გაბედულება გეგმირჩქინკო (წეკითხით საქმეეფიშ 4:13, 29, 31). იეჰოვაშ მოხვარათ ჩქი ხოლო შემლებნა გივორჯგინათ შიშის. გუვარჩუათ ართ ჯიმაშ, ჰორსტიშ შემთხვევა, მიდგაქ ნაცისტურ გერმანიას მირდჷ. თიქ სკოლას მასწავლებერეფიშ შიშით მუსხირენშა თქუ „ჰაილ ჰიტლერ!“. მარა თეშ გურშენ მშობლეფს ვა გუდღანებნა თიშა. თეშ მანგიორო ჰორსტწკუმა ართო ლოცულენდეს დო იეჰოვას თხინდეს, თის უმოს გაბედულება ქიმეჩკო. მშობლეფიშ მოხვარათ დო იეჰოვაშა მენდებათ, ჰორსტის შეიალებუ გაბედულებაშ გიმორჩქინაქ დო მუშ პოზიციაშ მტკიცას დაცვებაქ. უმოს გვიანო, თიქ თეცალ სიტყვეფ თქუ: „იეჰოვას დღას ვემუტებუქ“. c

14. მუჭო შეულებნა მზრუნველ ჭყიშეფს, გურშა ელუკინან გურგოტახილეფს?

¹⁴ შემლებნა დარწმუნებულ ვორდათ, ნამდა იეჰოვა დო იესო დღას ვა თქუანა ჩქინდე ვარიას. თიშ უკულ, მუთ პეტრექ ივარუ, ნამდა იჩინენდჷ იესოს, მნიშვნელოვან გადაწყვეტილებაშ წოხოლე ქიგედირთჷ — კინ იესოშ მიმაჸუნალ იჸუაფუდ დოვარ ირფელს მიოტენდჷ. იესო იეჰოვას ლოცვას თხინდჷ, ნამდა პეტრექ რწმენა ვადინუკო დო თიშა ხოლო აფუდ რაგადებულ: „მა იბლოც სქანო, ნამდა რწმენა ვადინუე დო მუჟამსით მიკირთუქ, გამანგარე სქან ჯიმალეფ“ (ლუკ. 22:​31, 32). მუშო ოკო რაგად, ირო, მუჟამსით პეტრე იესოშ თე სიტყვეფს ქიგიშინანდჷ ძალეფით ეიფშაფუდ. პეტრეცალო, მუჟამსით ჩქი ხოლო ცხოვრებას მნიშვნელოვან გადაწყვეტილებაშ წოხოლე ქიგებდირთუთ, იეჰოვაქ შილებე მზრუნველ ჭყიშეფ გიმირინუას თიშო, ნამდა გურშა ელამკინან დო ქიმმეხვარან, ვა ვოდინუათ ართგურობა (ეფეს. 4:​8, 11). ართ ჯიმა, სახელო პოლ, მით წანეფ რე, მუთ უხუცესო მსახურენს, ირნერო ოცად, გურშა ელუკინას თი და დო ჯიმალეფს, მიდგას მუნეფიშ სისუსტეეფწკუმა ბრძოლაშ გაგრძელება უჭირს. თინა თე და დო ჯიმალეფს ელუჩანს, დეფიქრან, მუჭო დეახლოვ თინეფ იეჰოვაქ დო მუჭო გაგებაფუ ჭეშმარიტება. თეშ უკულ, არწმუნენს, ნამდა იეჰოვას მანგარო უჸორს თინეფ დო დღას ვა თქუანს ვარიას  თინეფშე. პოლ თეცალ სიტყვეფს იჩიებ: „ბრელშა მიძირ, მუჭო გიორჯგინეს გურგოტახუას იეჰოვაშ მოხვარათ და დო ჯიმალეფქ დო მუჭო გაგრძელეს თიშ ართგურო მსახურება“.

15. მუჭო მარწმუნენა მოციქულ პეტრეშ დო ჯიმა ჰორსტიშ მაგალითეფ მათეშ 6:33-ს ინოჭარილ სიტყვეფიშ ჭეშმარიტებაშა?

¹⁵ დარწმუნებულ ვორეთ, იეჰოვაშ მსახურებას პირველ ადგილს ქიგვორინუანთ-და, თინა ქიზრუნენს ჩქინ აუცილებერ საჭიროებეფშო, მუჭოთ თენა პეტრე დო შხვა მოციქულეფიშ შემთხვევას აკეთ (მათ. 6:33). ჰორსტის, ნამუთ ჟიშე მიფშინეთ, მაჟია მსოფლიო ომიშ უკულ პიონერო მსახურებაშ დოჭყაფა ოკოდ. თის მატერიალურო მანგარო უჭირდჷ დო საშვალება ვა უღუდ, ათეშენ აფიქრუაფუდ, შეიალებედ დო ვარ სრულ დროთ პიონერო მსახურება დო დუდიშ ეჯუმალა. თიქ გინოჭყვიდ, რაიონულ ზედამხედველიშ მონახულებაშ მარას სრულას მიღკო მონაწილება მსახურებას დო თეშნერო, თაშ ქოფთქუათინ, გეგმოცადკო იეჰოვა. მარაშ ბოლოს ჰორსტიქ გაკვირებულქ ქუდოსქიდ, მუჟამსით თიშა რაიონულ ზედამხედველქ ქიმერთჷ დო ანონიმურ კონვერტ გეგნოჩ, სოდეთ მუსხირენ თუთაშ დასაბაღ ფარა ინოძუდ. თენა თის საშვალებას ქიმეჩანდჷ, იმსახურკო პიონერო. ჰორსტიქ დერწმუნ, ნამდა იეჰოვა ირიათო ელუდირთუდ თის დო ვემიარკენდჷ აუცილებერს. ათეშენ, მთელ ცხოვრება იეჰოვაშ მსახურებას მეუძღვინ დო თინა გეურდჷ პირველ ადგილშა (მალ. 3:10).

16. მუ ჯგირობუას მომღანა პეტრეშ ცხოვრებაშე დო თიშ წერილეფშე დაფიქრება?

¹⁶ ალბათ, პეტრე მანგარ ბედნერ იჸუაფუდ, ნამდა იესოქ ვემიოტუ თინა, მუჟამსით უწუ: „ვენკმანჭა, უფალ“. იესო ირიათო ელურდჷ პეტრეს დო ბრელ მუდგარენს ოგურუანდჷ, მუდგაშ ჭყოლოფათ თის ამდღა ართგურ მოციქულო იფჩინენთ დო ჩქინო სამაგალითო რე. ჩქი ხოლო შემლებნა ჯგირობუა მიბღათ თიშე, მუთ პეტრექ იესოშე დიგურუ. თე ირფელ პეტრეს მუშ დუდშო ვა უჩუალ დო შხვეფს ხოლო გეგნოჩ. ბრელ მუდგარენ, მუთ ქრისტეშე დიგურუ, მიშინუ პირველ საუკუნეშ კრებეფშა მეჭარილ ჟირ წერილს, ნამუთ ბიბლიაშ ნაწილ რე. უკულიან სტატიას გუვარჩიენთ მუსხირენ რჩევას თე წერილეფშე დო ქობძირუნთ, ჩქი მუჭო შემლებნა თინეფიშ გიმორნაფა ამდღა.