1, 2. ა) მუ მოხვარნა პრობლემეფიშ გარზებას? გენწყით. ბ) მუს გუვარჩიენთ თე სტატიას?

„მუჟამსით ფიფქრენქ თი პრობლემეფშე, ნამუთ გინიბღჷ, ვორწყექ, ნამდა ჩქიმით დღას ვეშმალებედ თენა“. თქვა ხოლო გითქუალნანო თეცალ მუდგარენ? ბრელს ნობღვენა თეშნერ შემთხვევა. შილებე თენა თიმწკუმა თქვით, მუჟამსით ფიქრენდით, მუჭო შეგალებეს გინიღითკო სერიოზულ ლახალა ვარდა საჸოროფო პიროვნებაშ ღურა. თე პრობლემეფშე ფიქრიშ დროს გინაფლენთ, ნამდა თინეფიშ გარზებელო, იეჰოვაქ მუშ წმინდა შურიშ საშვალებათ მერჩეს „ძალა, ნამუთ ჩვეულებრივშე უმოს რე“ (2 კორ. 4:7—9).

² წმინდა შურ მოსაჭირნა, ნამდა თე უბადო ქიანაშ გლახა გავლენაქ ჩქინწკუმა ვემოქმედას (1 იოან. 5:19). თეს გეძინელ, მოსაჭირნა ძალა, მუშენდა ოკო იბრძოლათ „ზეციერ უბადო შურეფიშ წინააღმდეგ“ (ეფეს. 6:12). თე სტატიას გუვარჩიენთ ჟირ საშვალებას, ნამდგათ ღორონთიშ წმინდა შურ მოხვარნა თე სირთულეეფიშ გარზებას დო ქობძირუნთ, მუშ კეთება შემლებნა, ნამდა ღორონთიშ წმინდა შურქ სრულაშო მომღან სარგებელ.

3. მუ რე თი ართ-ართ საშვალება, მუდგათ იეჰოვა მოხვარნა, გავურზათ სირთულეეფს?

³ იეჰოვაშ წმინდა შურ მოხვარნა თით, ნამდა მარზენა ძალას, სირთულეეფიშ უმკუჯინუო შევასრულათ ჩქინ პასუხიშმგებლობეფ. მოციქულ პავლეს უჩქუდ, ნამდა სირთულეეფიშ უმკუჯინუო შეულებუდ გაგრძელკო იეჰოვაშ მსახურება, მუშენდა თინა მენდებულ რდუ „ქრისტეშ ძალაშა“ (2 კორ. 12:9). მაჟია მისიონერულ მოგზაურობაშ დროს, პავლე ქოთ მსახურენდჷ დო ქოთ მუშ დუდის ეიჯუმუანდჷ. თიქ კორინთის, აკვილა დო პრისკილაშ ჸუდეს ქუდოსქიდ. თინეფ კარვეფს ჭანდეს. პავლეს ხოლო უჩქუდ თე საქმე, ათეშენ მინშა თინეფწკუმა ართო მუშენდჷ (საქ. 18:1—4). პავლეს წმინდა შურქ მეჩჷ ძალა, ქოთ იმსახურკო დო ქოთ იმუშუკო.

4. მუჭოთ 2 კორინთელეფიშ 12:7ბ—9-ს ჭარჷ, მუ პრობლემა უღუდ პავლეს?

 ⁴ წეკითხით 2 კორინთელები 12:7ბ—9. მუჭოთ თაქ ჭარჷ, მუს გულისხმენდჷ პავლე, მუჟამსით თქუ, ნამდა „სხეულს ძიგირ“ უღუდ? სხეულს ძიგირ ქოიღუდანინ, მუშო ოკო რაგად, გაჭუდან იჸი. მუჭოთ იძირე, პავლეს თიშ რაგად ოკოდ, ნამდა მუდგარენ პირადულ პრობლემა უღუდ. თიქ მუშ პრობლემა მიშინუ, მუჭოთ „სატანაშ ანგელოზი“, ნამუთ „სახეს ხეს მიოგანდჷ“ თის. სატანა ვარდა თიშ ანგელოზეფ, შილებე პირდაპირ გაგებათ ვა რდეს პავლეშ პრობლემაშ მიზეზ, ნამუთ თიშო ძიგირცალ რდუ. მარა, მუჟამსით თე უბადო სულიერ ქმნილებეფქ ქოძირეს პავლეშ პრობლემა, შილებე ეცადეს, ნამდა გაუფრაშესკო თიშ მდგომარეობა. მუჭო მიქცუ პავლექ?

5. მუჭო უპასუხ იეჰოვაქ პავლეშ ლოცვეფს?

⁵ დუდშე პავლეს ოკოდ, თე „ძიგირიშ“ ჩათხინაფა. თიქ ალალას თქუ: „სუმშა ვეხვეწ უფალს [იეჰოვას] თიშ ჩათხინაფა“. პავლეშ ლოცვეფიშ უმკუჯინუო, პრობლემაქ ვემიგვარ. ნიშნენსო თენა თის, ნამდა იეჰოვაქ ვა უპასუხ პავლეშ ლოცვეფს? მუშო ოკო რაგად, ვარ! ღორონთიქ უპასუხ თიშ ლოცვეფს. მართალ რე, იეჰოვაქ ვა ჩუთხინუ პრობლემა, მარა თიშ გარზებელო ძალა მეჩჷ. ღორონთიქ უპასუხ: „უჭყანობაშ დროს გინირთუ სრულყოფილო ჩქიმ ძალა“ (2 კორ. 12:8, 9). ღორონთიშ მოხვარათ, პავლეს ხიოლ დო შინაგან სიმშვიდე ვა უდინუაფ (ფილ. 4:4—7).

6. ა) მუჭო შილებე იეჰოვაქ უპასუხას ჩქინ ლოცვეფს? ბ) თე აბზაცის მოშინაფილ ნამ დუნაპირებუეფ გარზენა ძალეფს?

⁶ პავლეცალო, თქვა ხოლო ქოითხუნანო იეჰოვაშა, ჩაითხინუესკო პრობლემა? შილებე ბრელშა ილოცით, მარა პრობლემაქ ვემიგვარ დო უმოსო მიძინ. თე დროს ხომ ვაიფიქრებნა, ნამდა იეჰოვა უკმაყოფილო რდუ თქვანით? თაშ ქორდ-და, ირიათო რშუდან პავლეშ მაგალით. იეჰოვა თქვან ლოცვეფს ხოლო უპასუხენს თეშ, მუჭოთ პავლეშ ლოცვას უპასუხ. შილებე ღორონთიქ ვა ჩაითხინუან პრობლემა, მარა მუშ წმინდა შურიშ საშვალებათ ქიმერჩანა ძალას, გაურზათ თის (ფსალმ. 61:3, 4). შილებე პრობლემეფიშ გურშენ ძალა გაფდან გიშალიებურ, მარა იეჰოვა დღას ვემგოტენა (2 კორ. 4:8, 9; ფილ. 4:13).

7, 8. ა) მუ გაგებათ რე წმინდა შური ბორიაცალ? ბ) მუჭო ეჭარ პეტრექ წმინდა შურიშ მოქმედება?

⁷ ხოლო მუჭო მოხვარნა წმინდა შურ? შემლებნა თინა ბორიას შევადარათ. ბორია სწორ მიმართულებათ ქუმბარს-და, თინა მეხვარებ გემს ქიმიოჭირინუას დანიშნულებაშ ადგილს, თიმწკუმა ხოლო, მუჟამსით ზღვა აღელვებურ რე. თეშნერო, წმინდა შურ მოხვარნა პრობლემეფიშ უმკუჯინუო გუვაგრძელათ იეჰოვაშ მსახურება, სოიშახ ღორონთიშ დაპირებულ ახალ ქიანა იჸუაფ.

⁸ მოციქულ პეტრე მეჩხომე რდუ, ათეშენ თის ბრელ მუდგარენ უჩქუდ ნაოსნობაშ გურშენ. შილებე ზუსტას თეშ გურშენ გიმირინუ ნაოსნობაწკუმა დაკავშირებულ ფრაზეფ, მუჟამსით წმინდა შურიშ მოქმედებაშენ იჩიებუდ. თიქ ჭარჷ: „მუშენდა წინასწარმეტყველება დღას ვა ჸოფე ნარაგად კოჩიშ ნებათ; წმინდა შურით აღძრულ ადამიანეფს ღორონთ ორაგადაფუანდჷ“. ბერძნულ სიტყვა, ნამუთ თარგმნილ რე, მუჭოთ „აღძრულ“, სიტყვასიტყვათ ნიშნენს „გილაჸონაფას“ (2 პეტ. 1:21).

9. მუს გულისხმენდჷ პეტრე, მუჟამსით თქუ სიტყვა „გილაჸონაფა“?

⁹ მუს გულისხმენდჷ პეტრე, მუჟამსით თქუ სიტყვა „გილაჸონაფა“? ზუსტას თე ბერძნულ სიტყვა გიმირინუ მოციქულ ლუკაქ საქმეეფიშ წიგნის, მუჟამსით იჩიებუდ გემიშ გურშენ, ნამუთ ბორიას გილაჸუნდჷ (საქ. 27:15). მუჭოთ ბიბლიაშ ართ მარკვიებელ იჩიებ, მუჟამსით პეტრექ ბიბლიაშ მაჭარალეფშე თქუ, ნამდა „აღძრულ“ რდეს წმინდა შურით, თიცალ ფრაზა გიმირინუ, ნამუთ ხალხის ნაოსნობას გაშინანდჷ. პეტრე იჩიებუდ, ნამდა, მუჭოთ ბორია ოხვარ გემს ქიმერთას დანიშნულებაშ ადგილშა, თეშ წმინდა შურ ხემძღვანელენდჷ ბიბლიაშ მაჭარალეფს ბოლოშა ქიმიჸონესკო მუნეფიშ საქმე. ჟიშე მოშინაფილ ბიბლიაშ  მარკვიებელქ თქუ: „თაშ ქოფთქუათინ, წინასწარმეტყველეფქ მუნეფიშ აფრეფ გოფაჩეს“. იეჰოვაქ მუშ ოკეთებელ გაკეთ, თიქ ქიმეჩ თინეფს წმინდა შურ, შხვა სიტყვეფით ქოფთქუათინ — „ბორია“. ბიბლიაშ მაჭარალეფქ ხოლო მუნეფიშ ოკეთებელ გაკეთეს — თინეფქ მიაჸუნეს წმინდა შურიშ ხემძღვანელობას.

10, 11. მუ ჟირ ნაბიჯიშ გინოდგუმა მიმეხვარებნა დებრწმუნათ, ნამდა ღორონთიშ წმინდა შურქ სრულაშო მომღანა სარგებელს? ქიმიჸონით მაგალით.

¹⁰ მუშო ოკო რაგად, ამდღა იეჰოვა თიშო ვეგმირინუანს წმინდა შურს, ნამდა ხალხის ბიბლიაშ წიგნეფ დაჭარაფუას. მარა, იეჰოვა წმინდა შურიშ საშვალებათ ხემძღვანელენს მუშ მსახურეფს. ღორონთ იშენით ორთჷ მუშ ოკეთებელს. მუშ კეთება შემლებნა, ღორონთიშ წმინდა შურქ სარგებელ სრულაშო მომღანინ? ოკო დებრწმუნათ, ნამდა ჩქინ ოკეთებელს ვორთუთ. მუჭო შემლებნა თეშ კეთება?

¹¹ დეფიქრით თე მაგალითშე. ბორიაქ სარგებელ ქუმუღასინ, მეზღვაურქ ჟირ მუდგარენ ოკო გეთვალისწინას. პირველ, თიქ მუშ ნავი ბორიაშ მიმართულებათ ოკო ქიგიორინუას. მუშო ოკო რაგად, ნავი წოხოლე ვა ურს, მუჟამსით თინა ნავსადგურს გედგჷ, სოდეთ ბორია ვემიაგამუ. მაჟია, მეზღვაურქ მუთ შილებენ ბოლოშა ოკო გოფაჩას აფრეფ. შილებე ბორია უმბარდას, მარა აფრეფ გოფაჩილ ვარენ-და, ნავს წოხოლე იშენით ვალნე. თეშნერო, იეჰოვაშ მსახურებაშ გაგრძელება ხვალე წმინდა შურიშ მოხვარათ შემალებენა. წმინდა შურქ სარგებელ ქუმომღანინ, ჟირ მუდგარენ ოკო გუვაკეთათ. პირველ, თი საქმეეფ ოკო ვაკეთათ, ნამდგათ წმინდა შურს ჩქინწკუმა მოქმედებაშ საშვალებას მეფჩანთ. მაჟია, მუთ შილებენ ბოლოშა ოკო „გოფაფჩათ აფრეფ“, შხვა სიტყვეფით ქოფთქუათინ, მუთ შემლებნან ირფელ ოკო ვაკეთათ, ნამდა სრულაშე მიბღათ მონაწილება თე საქმეეფს (ფსალმ. 119:2). თე ნაბიჯეფს გეგნობდგუნთ-და, წმინდა შურ მიმეხვარებნა, წინააღმდეგობეფიშ დო პრობლემეფიშ უმკუჯინუო, წიმი იბდათ დო ქომჩანა ძალას, ართგურო გუვაგრძელათ იეჰოვაშ მსახურება, სოიშახ ღორონთიშ დუნაპირებ ახალ ქვეყნიერება იჸუაფ.

12. მუს გუვარჩიენთ?

 ¹² ჩქი უკვე გუვარჩით ჟირ საშვალება, ნამდგათ წმინდა შურ მოხვარნა. თინა მარზენა ძალას დო მოხვარნა, ქუდოფსქიდათ ართგურეფ პრობლემეფიშ დროს. თეს გეძინელ, წმინდა შურ ფხემძღვანელენა დო მოხვარნა თი საქმეეფიშ კეთებას, ნამუთ იეჰოვას ოკო ჩქი ვაკეთათ დო ნამდგაშ კეთებას ჩქინო მარადიულ სიცოცხლე მოუღ. გუვარჩუათ ოთხ მუდგარენ, ნამუთ ოკო ვაკეთათ, ნამდა ღორონთიშ წმინდა შურქ სრულაშო მომღან სარგებელ.

13. მუჭოთ 2 ტიმოთეშ 3:16 დო 17-ის ჭარჷ, მუჭო შილებე ბიბლიაქ იმოქმედას ჩქინწკუმა დო ჩქი მუ ოკო ვაკეთათ?

¹³ პირველ, ქიდიბგურუათ ღორონთიშ სიტყვა (წეკითხით 2 ტიმოთე 3:16, 17). ბერძნულ სიტყვა, ნამუთ თარგმნილ რე მუჭოთ „ღორონთშე რე შთაგონებულ“ სიტყვასიტყვათ ნიშნენს „ღორონთშე შთაბერილი“. ღორონთიქ მუშ წმინდა შურიშ საშვალებათ, თაშ ქოფთქუათინ, გონებაშა მუშ აზრეფ ქინუდვჷ ბიბლიაშ მაჭარალეფს. მუჟამსით ბიბლიას ბკითხულენთ დო ფიფქრენთ ნაკითხერშე, ღორონთიშ მითითებეფ ჩქინ გურ დო გონებას ოხუ. ღორონთიშ თე „შთაგონებულ“ აზრეფ მოხვარნა, თიშ მოსაწონო დოფთირუათ ჩქინ ცხოვრება (ებრ. 4:12). მარა ღორონთიშ წმინდა შურქ სარგებელ სრულაშო ქუმომღანინ, დრო ოკო გეგმურთათ ბიბლიაშ რეგულარულ გურაფას დო ნაკითხერშე ფიქრის. თეშ უკულ ღორონთიშ სიტყვა იმოქმედენს ჩქინ რაგად დო საქმეეფწკუმა.

14. ა) მუშენ შემლებნა თიშ რაგად, ნამდა ჩქინ ქრისტიანულ შეხვალამეფს იეჰოვაშ წმინდა შურ რე? ბ) მუჭო შემლებნა ქრისტიანულ შეხვალამეფშა დასწრებათ სრულ სარგებელ მიბღათ ღორონთიშ წმინდა შურშე?

¹⁴ მაჟია, ართო ვემსახურათ ღორონთის (ფსალმ. 22:22). ჩქინ ქრისტიანულ შეხვალამეფს იეჰოვაშ წმინდა შურ რე (გამოცხ. 2:29). მუშენ შემლებნა თეშ რაგად? მუშენდა, მუჟამსით თაყვანიშცემაშო თანაქრისტიანეფწკუმა ართო იფშაყარუთ, ლოცვას წმინდა შურს ფთხინთ ღორონთის, იბიბრთ ობირეშეფს, ნამუთ ღორონთიშ სიტყვაშა რე გერსხილ დო იფრჩქილუაფუთ ბიბლიაშა გერსხილ მითითებეფს, ნამდგას ღორონთიშ წმინდა შურით დანიშნულ ჯიმალეფ მარზენა. თეს გეძინელ, ღორონთიშ წმინდა შურ ოხვარ დალეფს, მამზადან დო გაკეთან მუნეფიშ დავალებეფ. წმინდა შურქ მუთ შილებე მეტ ჯგირობუა მომღანინ, კრებაშ შეხვალამეფშა მომზადებულეფქ ოკო მოფრთათ დო მიბღათ მონაწილება. თაშ ნამდა, მუჟამსით თე შეხვალამეფს ვოსწრუთ, მზათ ვორეთ სრულაშო იფსარგებლათ ღორონთიშ წმინდა შურშე. ზუსტას თეშ, მუჭოთ ნავი, ნამდგას აფრეფ გოფაჩილ აფჷ.

15. მუჭო მოხვარნა ღორონთიშ წმინდა შურ ქადაგებაშ დროს?

¹⁵ მასმა, მონაწილება მიღით ქადაგებაშ საქმეს. მუჟამსით მსახურებას ვარდა შხვეფიშ გურაფაშ დროს, ბიბლიას გიმიბრინუანთ, თეშნერო ღორონთიშ წმინდა შურს ვარზენთ საშვალებას, მიმეხვარან (რომ. 15:18, 19). ქუგოკონა ღორონთიშ წმინდა შურქ სრულ სარგებელ ქუმოიღან-და, რეგულარულო ოკო მიღათ მონაწილება ქადაგებაშ საქმეს დო სიტუაცია საშვალებას ქუგარზენან-და, გეგმირინუათ ბიბლია. ხალხწკუმა ქადაგებაშ დროს „ჩქინ ქრისტიანულ ცხოვრება დო მსახურებას“ მოჩამილ რაგადიშ დოჭყაფაშ ნიმუშეფს გეგმირინუანთ-და, შილებე უმოს უჯგუშ ჩიებაქ იჸუას თქვან დო მობინადრეშ შქას.

16. მუ რე წმინდა შურიშ მეღებაშ არძაშ უჯგუშ საშვალება?

¹⁶ მანთხა, ილოცით (მათ. 7:7—11; ლუკ. 11:13). წმინდა შურიშ მეღებაშ არძაშ უჯგუშ საშვალება რე, ლოცვას ქოფთხუათ იეჰოვას. მუთუნს ვაცილებე თიშა, ნამდა ჩქინ ლოცვეფქ იეჰოვას ქიმიოჭირინუას დო ვართ თიშა, ნამდა მიბღათ ღორონთიშ წმინდა შური; თეშა ვართ სატანას ეწარნე დო ვართ ციხეშ კიდალეფს (იაკ. 1:17). მუჭო ოკო იბლოცათ, ნამდა ღორონთიშ წმინდა შურქ სრულ სარგებელ მომღან? თე კითხვას ქუპასუხათინ, მორთ,  დეტალურო გუვარჩუათ ლოცვაშ გურშენ მოჸუნაფილ მაგალით, ნამუთ მოშინაფილ რე ხვალე ლუკაშ სახარებას. *

17. მუს ბგურაფლენთ ლოცვაშ გურშენ მოჸუნაფილ იესოშ მაგალითშე, ნამუთ ლუკაშ 11:5—9-ს დო 13-ს ჭარჷ?

¹⁷ წეკითხით ლუკა 11:5—9, 13. იესოშ მოჸუნაფილ მაგალითშე ვორწყეთ, მუჭო ოკო იფხთუათ ლოცვას წმინდა შური. თე მაგალითის მოშინაფილ კოჩიქ ქიმიოჭირინუ თის, მუთ ოკოდ, მუშენდა დაჩემებულო ითხინდჷ. თის ვამუმორდებუაფ მუშ მეგობარშა ქუთხუდკო მოხვარა, თიშ უმკუჯინუო, ნამდა შქა სერ რდუ (ლუკ. 11:8). * მუჭო დუკავშირ იესოქ თე მაგალით ლოცვას? თიქ თქუ: „ითხით დო ქუმგაჩამნა, გორით დო ქოძირუნთ, უხაკეთ დო გუგანჯამუნა“. მუს ბგურაფლენთ თე სიტყვეფშე? წმინდა შურქ ქიმგეხვარანინ, ირიათო ქოთხით ღორონთის თინა ლოცვას.

18. მუჭოთ იესოშ მოჸუნაფილ მაგალითშე იძირე, მუშენ შემლებნა ბჯერდან, ნამდა იეჰოვა ქომჩანა წმინდა შურს?

¹⁸ იესოშ მოჸუნაფილ მაგალით მოხვარნა ქობძირათ, მუშენ მუჩანა იეჰოვა წმინდა შურს. თე მაგალითის მოშინაფილ კოჩის ოკოდ, ჯგირ მენძელ ჸოფედკო. თინა დუდის ვალდებულო გინაფლენდჷ, ოჭკუმალ ქოჩკო გვიანო მოულირ სტუმარს. მარა ქოძირ, ნამდა მუთუნ ვა უღუდ. მუჭოთ იესოქ თქუ, მეზობელქ თიშენ მეხვარ თე კოჩის, ნამდა თინა დაჩემებულო თხინდჷ ქობალს. მუშ ძირაფა ოკოდ იესოს? არასრულყოფილ კოჩ მზათ ქორე, ნამდა ქიმეხვარას მუშ მეზობელს, ნამუთ დაჩემებულო თხინს-და, მუსხით უმოს ჯგირობუას გიმირჩქინანს ჩქინ ზეციერ მუმა თინეფწკუმა, მით ირიათო თხინს წმინდა შურს! ათეშენ, შემლებნა დარწმუნებულ ვორდათ, იეჰოვა ქუპასუხენს ჩქინ ლოცვას, მუჟამსით წმინდა შურს ფთხინთ (ფსალმ. 10:17; 66:19).

19. მუშენ შემლებნა დარწმუნებულ ვორდათ, ნამდა გივორჯგინანთ სირთულეეფს?

¹⁹ სატანა ირიათო მოწინააღმდეგნა, მარა შემლებნა დარწმუნებულ ვორდათ, ნამდა გივორჯგინანთ თის. მუშენ შემლებნა თეშ რაგად? მუშენდა წმინდა შურ ჟირ საშვალებათ მოხვარნა. პირველ, მარზენა ძალას, სირთულეეფ გეგნიბღათ. მაჟია, მოხვარნა გუვაგრძელათ იეჰოვაშ მსახურება, სოიშახ ღორონთიშ დუნაპირებ ახალ ქვეყნიერება იჸუაფ. მორთ, გინოჭყვიდილ მაფდან სრულ სარგებელ მიბღათ ღორონთიშ წმინდა შურშე!