1. მუშ უფლებას მარზენა იეჰოვა?

იეჰოვა მარზენა უფლებას, გეგშაბგორათ ჩქინ ცხოვრებაშ შარა. თინა მოგურუანა, მუჭო მიბღათ ჯგირ გადაწყვეტილებეფ დო მუჟამსით თიშ მოსაწონ გადაწყვეტილებეფს ბღებულენთ, მოხვარნა ბოლოშა შევასრულათ თინეფ (ფსალმ. 119:173). მუთ უმოს ხშირას გიმიბრინუანთ ღორონთიშ სიტყვაშე ნაგურეფ სიბრძნეს, თით უმოს უჯგუშ გადაწყვეტილებეფს მიბღენთ (ებრ. 5:14).

2. მუქ შილებე გამჭირდან გადაწყვეტილებაშ მეღებაშ უკულ?

² თიმწკუმა ხოლო, მუჟამსით ბრძნულ გადაწყვეტილებას ბღებულენთ, შილებე გამჭირდან დოჭყაფილ საქმეშ ბოლოშა მეჸუნაფაქ. გუვარჩუათ თეშ მუსხირენ მაგალით: ახალგაზრდა ჯიმაქ გინოჭყვიდ, წეკითხას მთელ ბიბლია. თინა მუსხირენ მარას ჯგირო მეჸუნს გეგმას, მარა უკულ მუდგარენ მიზეზით ჩენდუ. ართ დაქ გინოჭყვიდ, პიონერულ მსახურებაშ დოჭყაფა, მარა ირიათო გინმოდვანს თეშ კეთებას. უხუცესეფიშ საბჭოშ არძა წევრიქ ართათ გეგნოჭყვიდ, უმოს ყურადღება ქიმიაქცუან სამწყსო მონახულებეფიშ კეთებას, მარა მუსხირენ თუთაშ უკულ, საქმე დიო ხოლო ვა დუჭყაფნა. თე სიტუაციეფ გენესხვავებ ართიანშე, მარა მუდგარენ საერთო იშენით უღნა — დოჭყაფილ საქმე ბოლოშა ვა რე მეჸუნაფილ. თეცალ სირთულე უღდეს პირველ საუკუნეს, კორინთის მახორუ ქრისტიანეფს. ქობძირათ, მუშ გურაფა შემლებნა თინეფიშ მაგალითშე.

3. მუ გადაწყვეტილება მიღეს კორინთელეფქ, მარა მუქ მოხვად უკულ?

³ ახ. წ. სოდგარენ 55 წანას, კორინთელ ქრისტიანეფქ მნიშვნელოვან გადაწყვეტილება მიღეს. თინეფქ ქიგეგეს, ნამდა იერუსალიმს დო იუდეას მახორუ თანაქრისტიანეფ ღარიბულო ცხოვრენდეს დო მანგარო უჭირდეს. თეს გეძინელ, ქიგეგეს, ნამდა შხვა კრებეფ ფარას შაყარანდეს თინეფშო. კორინთელეფქ ხეგოფაჩილობა დო სიჯგირა გიმირჩქინეს დო პავლეს კითხეს, მუჭო შეულებდეს გაჭირებას რდესინ თი ჯიმალეფიშ ელარნა. თიქ კრებას  მითითებეფ ქიმეჩ დო ტიტეს ქუდავალ ფარაშ შაყარუა (1 კორ. 16:1; 2 კორ. 8:6). მუსხირენ თუთაშ უკულ პავლექ ქიგეგ, ნამდა კორინთელ ქრისტიანეფ ვემეჸუნდეს მეღებულ მითითებეფს. შედეგო, თინეფიშ შესაწირ, საეგებიოთ, დროულო ვეჸუაფუდ მზათ, ნამდა შხვა კრებეფშე მეღებულ ფარაწკუმა ართო იერუსალიმშა ქაჯღონესკო (2 კორ. 9:4, 5).

4. მუჭოთ 2 კორინთელეფიშ 8:7, 10 დო 11-ის ჭარჷ, მუშ კეთება ელუჩ პავლექ კორინთელ ქრისტიანეფს?

⁴ კორინთელეფქ ჯგირ გადაწყვეტილება მიღეს დო პავლექ ქაცქუ თინეფს გიმორჩქინელ რწმენაშ დო ხეგოფაჩილობაშ გურშენ. მარა თინა ხოლო ელუჩ, ნამდა დოჭყაფილ საქმე ბოლოშა ქიმიჸონესკო (წეკითხით 2 კორინთელები 8:7, 10, 11). კორინთელეფიშ მაგალითშე ბგურაფლენთ, ნამდა მინშა ართგურ ქრისტიანს ხოლო შილებე გუჭირდას მეღებულ გადაწყვეტილებაშ ბოლოშა მეჸუნაფაქ.

5. მუ კითხვეფს გუვარჩიენთ?

⁵ კორინთელეფცალო, ჩქი ხოლო შილებე გამჭირდან წუმოჭყაფილ საქმეშ ბოლოშა მეჸუნაფაქ. მუშენდა, არასრულყოფილებაშ გურშენ, შილებე უბრალოთ ვეფჩქარათ საქმეშ დოჭყაფა. ვარდა გაუთვალისწინებელ მუდგარენქ შილებე ქიმეცილან საქმეშ ბოლოშა მეჸუნაფას (ეკლ. 9:11; რომ. 7:18). მუჭო შემლებნა ჯგირ გადაწყვეტილებეფიშ მეღება დო საჭირო ქორენ-და, ულირს გინოჭყვიდილიშ თირუა? მუჭო შემლებნა დებრწმუნათ, ნამდა ბოლოშა ქიმიპჸუნანთ დოჭყაფილ საქმეს?

6. მუჟამ შილებე გადაწყვეტილებეფქ ოთირალქ მაჸუან?

⁶ ნამთინე მნიშვნელოვან გადაწყვეტილებას დღას ვა ფთირანთ. მაგალთო, მტკიცაშო მაფნა გინოჭყვიდილ ვემსახურათ იეჰოვას დო ჩქინ მეუღლეშ ართგურეფ ვორდათ (მათ. 16:24; 19:6). მარა მდგომარეობა ითირუნ თიშენ, შხვა გადაწყვეტილებეფქ შილებე ოთირალქ მაჸუან. მუ მიმეხვარებნა არძაშ უჯგუშ გადაწყვეტილებეფიშ მეღებას?

7. მუ ოკო ფთხუათ ლოცვას იეჰოვას დო მუშენ?

⁷ ლოცვას ქოთხით იეჰოვას სიბრძნე. ღორონთიშ შთაგონებათ იაკობიქ ჭარჷ: „თქვანდე მითინს სიბრძნე ქარკუნ-და, ირიათო თხუას ღორონთის, ნამუთ არძას ხვეიანო . . . არზენს“ (იაკ. 1:5). ნამთინე საკითხის არძას მორკუნა სიბრძნე. ათეშენ, იეჰოვას მოხვარა ოკო ქოფთხუათ, მუჟამსით გადაწყვეტილებას ბღებულენთ დო მუჟამსით მეღებულ გადაწყვეტილებაშ თირუა მოკონა. ღორონთ მიმეხვარებნა ბრძნულ გადაწყვეტილებაშ მეღებას.

8. მუ ოკო ვაკეთათ ონდო მუდგაინს გინობჭყვიდუნდათ?

⁸ ჯგირო გეგმირკვით. იხემძღვანელით ღორონთიშ სიტყვათ, წეკითხით იეჰოვაშ ორგანიზაციაშე მეღებულ პუბლიკაციეფ, ქუდურაგადეთ თინეფს, მიდგას ონდუთ დო შეულებნა ჯგირ რჩევა მერჩან (იგავ. 20:18). თეცალ გიმორკვიება მნიშვნელოვან რე, სოიშახ თიცალ გადაწყვეტილებას მიბღენთ, ნამუთ ოხუ სამუშაშ თირუას, ოცხოვრებშა შხვადო გინულას ვარდა თიშნერ განათლებაშ მეღებას, ნამუთ საშვალებას მერჩანა დუდ გეიჯუმათ დო გაგრძელათ მსახურება.

9. მუშენ რე მნიშვნელოვან გეგმიბრკუათ ჩქინ მოტივეფ, მუჟამსით გადაწყვეტილებეფს ბღებულენთ?

⁹ გეგმირკვით თქვან მოტივეფ. იეჰოვა ირკვიენს ჩქინ გურს დო ათეშენ, თიშო მნიშვნელოვან რე ჩქინ მოტივეფ (1 სამ. 16:7). მუჟამსით ჩქინ დუდის გიმიბრკვიენთ, ვორწყეთ მუ მოტივეფ მიღნა. მარა გადაწყვეტილებეფიშ მეღებაშ დროს, მოკონა პატიოსნეფ ვორდათ ჩქინ დუდწკუმა დო შხვეფწკუმა ხოლო. თე დროს, სწორ მოტივეფ ვა მიღუნან-და, მუჟამსით პრობლემეფ წიმიჭკირუ, გამჭირდუნა თიშ კეთება, მუთ გინობჭყვიდით. მაგალთო, შილებე ახალგაზრდა ჯიმაქ გინოჭყვიდ პიონერულ მსახურებაშ დოჭყაფა. მარა ჭიჭე ხანიშ უკულ, თის გუჭირდჷ საათეფიშ საჭირო ნორმაშ ჩაბარებაქ, ათეშენ ნაკლებ ხიოლით მსახურენს. მუ რე თეშ მიზეზ? თინა შილებე ფიქრენდკო, ნამდა თეცალ მსახურებაშ დოჭყაფაშ მთავარ მოტივ იეჰოვაშ გურიშ გახარება რდუ. მარა შილებენო თიშ მთავარ  მოტივ თინა ჸოფედკო, ნამდა მშობლეფ ვარდა შხვეფ გახარუკო?

10. მუ რე საჭირო ცვლილებეფიშ ოკეთებელო?

¹⁰ წერმიდგინით თეცალ სიტუაცია, ბიბლიაშ მაგურაფალქ გეგნოჭყვიდ სიგარეტშა დუდიშ დანებება. პირველ ჟირ მარას, შილებე ჯგირო მეჸუნდას საქმეს თიშ უმკუჯინუო, ნამდა რთულ აფჷ თეშ კეთება, მარა უკულ კინ გეშვას. საბოლათ თიქ წარმატებას ქიმიოჭირინუ! იეჰოვაშ ჸოროფაქ დო თიშ დიდ სურვილქ, ნამდა ასიამოვნუკო ღორონთის, მეხვარ თის გიორჯგინკო თე გლახა ჩვევას (კოლ. 1:10; 3:23).

11. მუშენ ოკო მიღდან კონკრეტულ მიზნეფ?

¹¹ გიღდან კონკრეტულ მიზნეფ. მუთ უმოს კონკრეტულ მიზნეფ მაღვენუნა, თით უმოს ადვილ მაჸინა მიზანიშ მეჭირნაფა. მაგალთო, შილებე გეგნობჭყვიდათ, ირდღას წებკითხათ ბიბლია. მარა კონკრეტულ გეგმა ვა მიღნან-და, შილებე გამჭირდან თეშ კეთებაქ. * შილებე უხუცესეფქ გინოჭყვიდან უმოს ყურადღება ქიმიაქცუან სამწყსო მონახულებეფიშ კეთებას, მარა ჭიჭე ხანიშ უკულ, შილებე ვემიაჸუნან მეღებულ გადაწყვეტილებას. წარმატებას ქიმიოჭირინუანინ, თინეფს შეულებდეს თეცალ კითხვეფ დუსვესკო მუნეფიშ დუდის: „ხომ ვეჸუაფუდ მოხუჯურ, თი და დო ჯიმალეფიშ სია დობჭარითკო, მიდგას განსაკუთრებულო ოსაჭირ გურიშელაკინა? დუვადგინითო კონკრეტულ დრო, მუჟამ მივაკითხანდით თინეფს?“.

12. მუშ კეთებაქ შილებე იჸუას საჭიროქ დო მუშენ?

¹² რეალურო შეაფასით სიტუაცია. მითინს ვამღუნა თისხი დრო, რესურსეფ ვარდა ენერგია, ნამდა გუვაკეთათ ირფელ, მუთ მოკონა. ათეშენ, რეალურო შეაფასით სიტუაცია დო გეგმირჩქინით გონივრულობა. აუცილებერ ქორენ-და, შეილებნა დოთირუათ გადაწყვეტილება, ნამუთ ბოლოშა ვემგაჸუნენა (ეკლ. 3:6). მარა შილებე გეგნაჯინით თქვან გადაწყვეტილებას, საჭირო ცვლილებეფ გემშეღით დო ქიმეხვადით, ნამდა შეილებნა თიშ ბოლოშა მეჸუნაფა. მორთ გუვარჩუათ ხუთ ნაბიჯ, მუთ მიგეხვარებნა ბოლოშა ქიმიჸუნათ წუმოჭყაფილ საქმე.

13. მუჭო შეილებნა მიღათ ძალა, ნამუთ მიგეხვარებნა ბოლოშა ქიმიჸუნათ თქვან გადაწყვეტილება?

¹³ ლოცვას ქოთხით ღორონთის ქიმერჩან ძალა. ღორონთის შეულებ მერჩან „მოქმედებაშ ძალა“ დო მიგეხვარან ბოლოშა ქიმიჸუნათ თქვან გადაწყვეტილება (ფილ. 2:13). ათეშენ, ქოთხით იეჰოვას წმინდა შურ, ნამდა მოქმედებაშ ძალა ქიმერჩან. გაგრძელით ლოცვა თიმწკუმა ხოლო, მუჟამსით თეშ იძირე, ითამ ლოცვაშ პასუხ იგვიანუანს. იესოქ ელამჩეს: „ითხით დო ქუმგაჩამნა [წმინდა შური]“ (ლუკ. 11:9, 13).

14. მუჭო შეულებ ლუკაშ 14:28-ს მოჩამილ პრინციპის მიგეხვარან ბოლოშა ქიმიჸუნათ წუმოჭყაფილ საქმე?

¹⁴ წინასწარ დაგეგმით (წეკითხით ლუკა 14:28). არძანერ წუმოჭყაფილ საქმე ბოლოშა ქიმიჸონათინ, წინასწარ დაგეგმება რე საჭირო. თეშ უკულ, ოკო მიაჸუნათ თქვან გეგმას. თეშნერო, მუჟამსით გადაწყვეტილება მეღებულ გაფნა, გეგმაჭარით კონკრეტულ ნაბიჯეფ, ნამუთ მიგეხვარებნა ბოლოშა ქიმიჸუნათ წუმოჭყაფილ საქმე. დიდ საქმე ქუგაფნა ოკეთებელ-და, გორთით თინა ჭიჭე საქმეეფო. მუჟამსით თე ჭიჭე საქმეეფს შეასრულენთ, ქოძირუნთ მუსხით ქორეთ წიმი ულირ. პავლექ ელუჩ კორინთელ ქრისტიანეფს, ნამდა „ირ მარაშ პირველ დღას“ გეგნუდვალდესკო მუსხირენ რაოდენობაშ თანხა დო ვართ ხოლო თიშ მოულაშ დროს დუჭყაფდესკო შაყარუა (1 კორ. 16:2). დიდ საქმეეფიშ ჭიჭე საქმეეფო გორთუალა მიგეხვარებნა დუდ თეშ ვეგინათ, ითამ ვეშეილებნა თიშ შესრულება.

15. მუშ კეთება რე საჭირო გეგმაშ გიმაჭარუაშ უკულ?

¹⁵ მუჟამსით გეგმაჭარუნთ თქვან გეგმას, უმოს ადვილ გაჸინა მეღებულ გადაწყვეტილებაშ ბოლოშა შესრულება (1 კორ. 14:40).  მაგალთო, უხუცესეფს უღნა მითითება, დანიშნან ართ-ართ უხუცეს, ნამუთ უხუცესეფიშ საბჭოშ მეღებულ გადაწყვეტილებეფს ქინიჭარანს. თიქ ოკო დოჭარას მი შეასრულენს თე გეგმას დო მუჟამ. მუჟამსით უხუცესეფ გიმაჭარნა თეცალ სიას, თინეფშო უმოს ადვილ რე წუმოჭყაფილ საქმეშ ბოლოშა მეჸუნაფა (1 კორ. 9:26). პირადო თქვა ხოლო შეილებნა გაკეთათ თეცალ მუდგარენ თქვან ირდღაშიან ცხოვრებას. მაგალთო, შეილებდეს ირდღას გეგმაჭარითკო მუშ კეთება გოკონა დო სიაშ დუდის თიცალ საკითხეფ ქიმიშინუათ, ნამდგას პირველო აკეთენდით. თენა ხვალე საქმეშ ბოლოშა მეჸუნაფას ვარინ, თის ხოლო მიგეხვარებნა, ნამდა ჭიჭე დროშა ბრელ საქმეშ კეთება ქაჭიშუათ.

16. მუშ კეთება რე საჭირო, ნამდა ბოლოშა ქიმიჸუნათ საქმე დო მუჭო უკინენს თეს ხუჯის რომაელეფიშ 12:11?

¹⁶ დუდ ვა დაზოგათ. გეგმაშ მეჸუნა დო თიშ ბოლოშა შესრულება დიდ მონდომას ითხინს (წეკითხით რომაელები 12:11). მოციქულ პავლექ ტიმოთეს ელუჩ საქმეს გურგედვალირო მიაჸუნკო დო ირიათო თაშ მიქცუკო, ნამდა ჯგირო ქაგურუკო ღორონთიშ სიტყვა. თე რჩევა შხვა სულიერ მიზნეფიშ მეჭირნაფას ხოლო ოხუ (1 ტიმ. 4:13, 16).

17. მუჭო მიმეხვარებნა ეფესოელეფიშ 5:15 დო 16-იშ გიმორნაფა, ბოლოშა ქიმიპჸონათ დოჭყაფილ საქმე?

¹⁷ გონივრულო დაგეგმით დრო (წეკითხით ეფესოელები 5:15, 16). დანიშნით დრო, მუჟამშო შეასრულენთ დაგეგმილ საქმეს დო ვა თირუათ თინა. ვა უჯინათ იდეალურ დროს, მუჟამსით შეგალებენა თეშ კეთება. თეცალ დროქ შილებე დღას ვა გაშუან (ეკლ. 11:4). კურცხას რდათ, ნამდა ნაკლებო მნიშვნელოვან საქმეეფქ ვემდაიღან დრო დო ენერგია, ნამუთ უმოს მნიშვნელოვან საქმეშო რე საჭირო (ფილ. 1:10). შეიოლებერ ქორენ-და, გეგშაგორით თიცალ დრო, მუჟამსით ნაკლებო გამაჩირთუთ საქმეს. ქუწით შხვეფს, ნამდა თეშ ოკეთებელო საქმეშა კონცენტრირება გოსაჭირნა. შეილებნა გოთიშათ ტელეფონ დო უმოს გვიანო შეამოწმათ იმეილს ვარდა სოციალურ ქსელს მეღებულ ინფორმაცია. *

18, 19. მუ მიგეხვარებნა სირთულეეფიშ უმკუჯინუო, წუმოჭყაფილ საქმე ბოლოშა ქიმიჸუნათ?

¹⁸ ქიფიქრით თი დადებით შედეგეფშე, ნამუთ თქვან გადაწყვეტილებას მაჸუნუ. თქვან გადაწყვეტილებაშ შედეგეფ მოგენს მოგზაურობაშ საბოლოო დანიშნულებაშ ადგილს. თიშ მეჭირნაფა მართალო ქუგოკონან-და, გაგრძელენთ ულას, თიშ უმკუჯინუო, ნამდა შილებე შარა კილერ რდას დო მიმართულებაქ გაჸუან ოთირალქ. თეშნერო, მუჟამსით ჩქინ გადაწყვეტილებაშ დადებით შედეგეფშე ფიფქრენთ, სირთულეეფიშ უმკუჯინუო, ადვილო ვა დუვანებენთ დუდის (გალ. 6:9).

¹⁹ ჯგირ გადაწყვეტილებეფიშ მეღება რთულ რე დო თიშ ბოლოშა მეჸუნაფა ხოლო სირთულეეფწკუმა რე დაკავშირებულ. მარა იეჰოვაშ მოხვარათ, თქვა შეილებნა მიღათ საჭირო სიბრძნე დო ძალა, ნამუთ მიგეხვარებნა წუმოჭყაფილ საქმეშ ბოლოშა მეჸუნაფას.