1. მუ ოდინეს ადამ დო ევაქ მუნეფიშ მოქმედებათ დო მუ შედეგიქ მაჸუნ თეს?

თქვან აზრით, მიქ ოკო დამდგინან ნორმეფ მუ რე ჯგირ დო ფურ? მუჟამსით ადამ დო ევაქ ჯგირ დო ფურიშ გიშაგორუაშ ჯაშე ნაყოფ ოჭკუმეს, თეთ ქაძირეს, ნამდა ვანდუდეს იეჰოვას დო თიშ მითითებეფს. თინეფქ გინოჭყვიდეს მუნეფიშით დადგინესკო, მუ რდუ ჯგირ დო ფურ (დაბ. 3:22). მარა თეცალ მოქმედებათ ბრელ მუდგარენ მიოდინეს, მაგალთო იეჰოვაწკუმა მეგობრულ ურთიერთობა. თეს გეძინელ, მიოდინეს მარადიულ სიცოცხლეშ შესაძლებლობა დო მუნეფიშ სქუალეფს ცოდა დო ღურა გეგნოჩეს (რომ. 5:12). ნამდვილო, ადამ დო ევაშ არჩევანს ბრელ უბედრობაქ მაჸუნ.

2, 3. ა) მუ აკეთ ეთიოპელ საჭურისიქ, მუჟამსით ფილიპექ უქადაგ? ბ) მუ კურთხევეფს მიბღენთ, მუჟამსით დიმნათუთ დო მუ კითხვეფს გუვარჩიენთ?

² ადამ დო ევაშ გინაწონს, შხვანერო მიქცუ ეთიოპელ საჭურისიქ, მუჟამსით ფილიპექ უქადაგ. თიქ ირფელ დაფას, მუთ იეჰოვა დო იესოს აფუდ თიშო კეთებულ დო ხეთეშე დინათ (საქ. 8:34—38). ღორონთშა დუდიშ მეძღვინუათ დო ნათუათ, მეპჸუნთ ეთიოპელ საჭურისიშ მაგალითის დო არგამათ ვოძირანთ, ნამდა ვაფასენთ თი ირფელს, მუთ იეჰოვა დო იესოქ ჩქინო აკეთეს. თეს გეძინელ, თეთ იეჰოვაშ ნდობას გიმიფრჩქინანთ დო ვაღიარენთ, ნამდა ხვალე თის შეულებ დამდგინან, მუ რე ჯგირ დო ფურ.

³ დეფიქრით თი კურთხევეფშე, ნამუთ იეჰოვაშ მსახურებაქ მომღეს. ჩქი მიღნა შესაძლებლობა, დიფრთინუათ თი  ირფელ, მუთ ადამ დო ევაქ ოდინეს, თინეფ შკას მარადიულ სიცოცხლე. იესო ქრისტეშ რწმენაშ საფუძველშა, იეჰოვა მაპატიენა შეცდომეფს დო მარზენა სუფთა სინდისის (მათ. 20:28; საქ. 10:43). თეს გეძინელ, ვორეთ იეჰოვაშ ოჯახიშ წევრეფ დო მელნა დიდებულ მომავალ (იოან. 10:14—16; რომ. 8:20, 21). თე კურთხევეფიშ უმკუჯინუო, ნამთინე, მიდგაქ გეჩინებაფუ იეჰოვა, ვა ჩქარენს მიაჸუნას ეთიოპელ საჭურისიშ მაგალითის. მუ შილებე ოცილდან თინეფს ნათუას დო მუჭო შეულებნა მერუან თე სირთულეეფს?

4, 5. მუ სირთულეეფ უღდეს ევერი დო ხანას?

⁴ მუნეფიშ დუდშა ვა რენა დარწმუნებულ. ევერიშ მშობლეფ იეჰოვაშ მოწმეეფ რენა. თიშ მუმა ოჯახშო ზრუნენს დო ჯგირ უხუცეს ხოლო რე. მარა ევერი აყოვნენდჷ ნათუას. თინა იჩიებ: „ფიფქრენდჷ, ნამდა ვეშმალებედ მუაჩქიმცალ სამაგალითო ვორდიკო“. თეს გეძინელ, ევერი ფიქრენდჷ, ნამდა ვეშიასრულებედ თი პასუხიშმგებლობეფ, ნამუსით ნათუაშ უკულ მიღენდჷ. თინა გეუძინანს: „ნათუაშ უკულ საჯაროთ მაჸიდ ლოცვა ორაგადე, მოხსენებეფ ოკეთებელ ვარდა ოხემძღვანებელებერ სამქადაგებლო ჯგუფშა. თე ირფელშა მოშკურუდ“.

⁵ ხანა, ნამუთ 18 წანერ რე, ართ დროს ვარდჷ დუდშა დარწმუნებულ. თიშ მშობლეფ იეჰოვაშ მოწმეეფ რდეს. მარა იშენით ოეჭვუდ, ქეშეიალებედ დო ვარ იეჰოვაშ ნორმეფით ცხოვრება. ხანას უღირსობაშ გრძნობა უღუდ, ათეშენ მინშა თიცალ გლახათ რდუ, მუშ დუც ზიანს მიორინუანდჷ. მარა თეთ ხოლო უმოსო ირთულენდჷ მდგომარეობას. ხანა იჩიებ: „თენა დღას მითინშა ვამთქუალ, ვართ მშობლეფშა. მიმორჩქუდ, ნამდა თე ირფელიშ გურშენ იეჰოვა დღას ვამჩანდ თიშ საშვალებას, გინიფრთიკო თიშ მსახურ“.

6. მუ ოცილუდ ვანესას ნათუას?

⁶ მეგობრეფიშ გავლენა. 22 წანერ ვანესა იჩიებ: „მა დასურო ჯგირ მეგობარ პჸუნდჷ, ნამდგას ბრელ ხან რდუ, მუთ იფჩინენდჷ“. მუჟამსით ვანესაქ ნათუა გინოჭყვიდ, თიქ ხუჯ ვა დუკინ თე გადაწყვეტილებას. ათეშენ ვანესას მანგარო ქალაჭვჷ გურქ. თინა იჩიებ: „შხვეფწკუმა დამეგობრება მიჭირს, ათეშენ ფიფქრენდჷ, თიწკუმა ურთიერთობას მივოტენდ-და, დღას ვამაშიდ ხოლოშიან მეგობარ“.

7. მუშა ოშკურუდ მაკეილას დო მუშენ?

⁷ შიშ, ნამდა შილებე ქუდაშუე. მაკეილა 5 წანერ რდუ, მუჟამსით თიშ ჯიმაქ გერიცხჷ. თინა ორწყედ, მუჭო ელაჭვედეს გურ მშობლეფს მუშ ჯიმაშ მოქმედებეფშე. მაკეილა იჩიებ: „ნათუა ვა მოკოდ, მუშენდა  მოშკურუდ, ნამდა მა ხოლო დუვაშენდჷ, კრებაშე გებრიცხებუდ დო ხოლო უმოს გურჭუას მივორინუანდჷ მშობლეფს“.

8. მუშა ოშკურუდ მაილზის?

⁸ წინააღმდეგობეფიშ შიშ. მაილზიშ მუმა დო დიდაჸონერ იეჰოვაშ მოწმეეფ რენა. მარა თიშ დიდა ვა რე იეჰოვაშ მოწმე. მაილზი იჩიებ: „18 წანას ფცხოვრენდჷ დიაჩქიმწკუმა დო მოშკურუდ თიშ რაგადშა, ნამდა ნათუა მოკოდ. ვორწყედ მუნერ რეაქცია უღუდ, მუჟამსით მუაჩქიმქ იეჰოვაშ მოწმეთ გინირთჷ. მოშკურუდ მუთუნ პრობლემა ვაგომრჩქინკო“.

9. მუ შედეგ მაჸუნუ, მუჟამსით ქიგეგენთ, მუნერ მოჸოროფე დო მომთმენ რე იეჰოვა?

⁹ ადამ დო ევაქ ისხუნეს, ვემსახურესკო იეჰოვას, მუშენდა ვა უჸორდეს თინა. მარა იეჰოვაქ იშენით ქიმეჩ თინეფს საშვალება იცხოვრესკო ბრელ ხანს, ქაშუესკო სქუალეფქ დო მუნეფიშით გინოჭყვიდესკო, მუჭო რდუნდეს თინეფს. თი შედეგეფშე, ნამუთ ადამ დო ევაშ გადაწყვეტილებას მაჸუნ, იცხოვრესკო იეჰოვაშე დამოუკიდებელო, ქიძირ, მუ უგუნურო მიქცუეს თინეფქ. უნჩაშ სქუაქ ბრალ ვა უღუდუნ ფერ ჯიმა დოჸვილ დო თევრეშე მოჸუნაფილ ძალადობა დო მენჯარიშობაქ გევრცელ მთელ კაცობრიობწკუმა (დაბ. 4:8; 6:11—13). მარა იეჰოვაქ ადამ დო ევაშ შთამომავლეფს, მით თის ემსახურებუდ, საშვალება ქიმეჩ, გინასკიდესკო (იოან. 6:38—40, 57, 58). მუთ უმოსის გეგენთ, მუნერ მომთმენ დო მოჸოროფე რე იეჰოვა, თით უმოსო გეჸოროფებნა თინა. თეს გეძინელ, გაღვენუნა სურვილ, ვემიაჸუნათ ადამ დო ევაშ მაგალითის დო აღძრულ იჸუაფუთ დუდ მეუძღვინათ ღორონც.

10. მუჭო მიგეხვარებ ფსალმუნიშ 19:7, ემსახურე იეჰოვას?

¹⁰ გაგრძელით იეჰოვაშ უჯგუშო გაჩინებაფა. ღორონთიშ უჯგუშო გაჩინებაფა, დუგარწმუნენა, ნამდა შეიოლებერ რე, წარმატებულო ემსახურათ თის. ევერი, ნამუთ ჟიშე მიფშინეთ, იჩიებ: „ჩქიმ დუდშა უმოსო დუმარწმუნ თი დუნაპირებშე დაფიქრებაქ, ნამუთ მოჩამილ რე ფსალმუნიშ  19:7-ის“ (წეკითხით). ევერს უმოსო ქეჸოროფ იეჰოვაქ, მუჟამსით ქოძირ, მუჭო შეასრულ იეჰოვაქ მუშ დუნაპირებ. ჸოროფა ხვალე ჩქინ დუდშა დარწმუნებას ვარინ, თის ხოლო მოხვარნა, ნამდა მთელ ყურადღება იეჰოვაშა დო თიშ ნებაშ შესრულებაშა გეგნიბღათ. ჟიშე მოშინაფილ ხანა იჩიებ: „ბიბლიაშ კითხირ დო გურაფაქ ქუმოძირუ, ნამდა ჩქიმ დუდშა ზიანიშ მერინაფათ, იეჰოვას ელვოჭუანქ გურს“ (1 პეტრე 5:7). ხანაქ ღორონთიშ სიტყვაშ შემსრულებერო გინირთჷ (იაკობი 1:22). მუქ მაჸუნ თეს შედეგო? თინა იჩიებ: „იეჰოვაქ უმოსო ქიმეჸოროფ, მუჟამსით ქობძირ, მუ ჯგირობუა მოუღ თიშ მორჩილებას. ასე დარწმუნებულ ვორექ, ღორონთ ირიათო ჩქიმ გვერდით იჸუაფ, მუჟამსით თიშ მოხვარა დემესაჭირებ“. ხანაქ მიოტუ თიშ კეთება, მუდგას ადრე ორთუდ, დუდ მეუძღვინ იეჰოვას დო დინათ.

11. მუქ მეხვარ ვანესას, დოგორკო ჯგირ მეგობრეფ დო მუშ გურაფა შემლებნა თავრეშე?

¹¹ გონივრულო გიშეგორით მეგობრეფ. ჟიშე მოშინაფილ ვანესაქ, საბოლათ ქიმეხვად, ნამდა მეგობარ ოცილუდ, ემსახურკო იეჰოვას, ათეშენ მიოტუ თიწკუმა მეგობრობა. თიქ ირნერო ქეცად ახალ მეგობრეფ შეძინკო კრებას. ვანესაქ თქუ, ნამდა ნოეშ დო თიშ ოჯახიშ მაგალითიქ მეხვარ. თინა იჩიებ: „თინეფს თიცალ ხალხწკუმა უხვადუდეს ცხოვრება, მით ვამსახურუდ იეჰოვას, მარა ართიანწკუმა ჯგირ ურთიერთობა უღდეს“. ნათუაშ უკულ ვანესაქ პიონერო ქიდიჭყჷ მსახურება. თინა იჩიებ: „თექ მიმეხვარ ჯგირ მეგობრეფ ხვალე ჩქიმ კრებას ვარინ, შხვა კრებეფს ხოლო დობგორკო“. თქვა ხოლო შეილებნა დოგორათ ჯგირ მეგობრეფ, მუჟამსით შეასრულენთ იეჰოვაშ დავალებურ საქმეს (მათ. 24:14).

12. მუშ შიშ ვა უღდეს ადამ დო ევას დო მუქ მაჸუნ თეს?

¹² გაწონასწორებულ დამოკიდებულება გიღდან შიშშე. მინშა შიშ ჯგირ რე. მაგალთო, საჭირო რე მიღდან ჯანსაღ შიშ, ნამდა გურ ველვოჭუათ იეჰოვას (ფსალმ. 111:10). ადამ დო ევას თეცალ შიშ ქოუღდესკონ, ვეშეს იეჰოვაშ წინააღმდეგ. მარა  თინეფქ თაშ ვემიქცუეს. თეშ უკულ ქიმეხვადეს, ნამდა ცოდა ჩედინეს. ადამ დო ევაქ მუნეფიშ სქუალეფს ცოდა დო ღურა გეგნოჩეს. მუჟამსით ქიმეხვადეს, მუ მდგომარეობას რდეს, ონჯღორექ დაგურეს დო დიფორეს მუნეფიშ ტან (დაბ. 3:7, 21).

13, 14. ა) მუჭოთ 1 პეტრეშ 3:21-ის რე მოჩამილ, მუშენ ოკო ვამღუდან ღურაშ პანიკურ შიშ? ბ) მუ მიზეზეფ მიღნა, ნამდა მიჸორდან იეჰოვა?

¹³ აუცილებერ რე, მიღდან იეჰოვაშ ჯანსაღ შიშ დო ვართ ხოლო ღურაშ პანიკურ შიშ. იეჰოვაქ მუჩეს საშვალება, იფცხოვრათ მარადიულო. ცოდა ქუმაფნა ჩადენილ, მარა შურ დო გურით ქობნარღენთ-და, იეჰოვა მაპატიენა გიშაჸიდირალიშ რწმენაშ საფუძველშა. რწმენაშ გიმორჩქინაშ არძაშ უჯგუშ საშვალება ღორონთშა დუდიშ მეძღვინუა დო ნათუა რე (წეკითხით 1 პეტრე 3:21).

¹⁴ ჩქი ბრელ მიზეზ მიღნა, მიჸორდან ღორონთ. თინა ხვალე თიცალ მუდგარენეფს ვა მარზენა, მუთ სასიამოვნოს გინაშკვანს ჩქინ ირდღაშიან ცხოვრებას. ღორონთ მოჩინებაფუანა მუშ დუც დო მირაგადნა მუ განზრახვეფ უღჷ (იოან. 8:31, 32). თეს გეძინელ, ფხემძღვანელენა დო ელამრენა ქრისტიანულ კრებაშ საშვალებათ. თინა მოხვარნა მივერუათ პრობლემეფს დო მარზენა მარადიულ ცხოვრებაშ იმენდის (ფსალმ. 68:19; გამოცხ. 21:3, 4). მუჟამსით დეფიფქრებუთ, მუჭო გიმირჩქინ იეჰოვაქ ჩქინ ჸოროფა, თინა უმოსო მეჸოროფებნა. შედეგო გუვავითარენთ ჯანსაღ შიშის დო ირნერო ვეცადებუთ, გურ ველვოჭუათ ღორონც, ნამუსით მანგარო ვუჸორთ.

15. მუჭო გიორჯგინ მაკეილაქ თიშ შიშის, ნამდა შილებე ქუდაშუკო?

¹⁵ ჟიშე მოშინაფილ მაკეილაქ გიორჯგინ შიშის, მუჟამსით ქიგეგ, ნამდა ღორონთ მპატიებელ რე. თინა იჩიებ: „ქიმეფხვად, ნამდა არძა არასრულყოფილეფ ვორეთ დო ვუშვენთ შეცდომეფს. თინა ხოლო ქიგებგჷ, ნამდა იეჰოვას ვუჸორთ დო გიშაჸიდირალიშ საფუძველშა მაპატიენა ცოდეფს“. იეჰოვაშ ჸოროფაქ მეხვარ მაკეილას, დუდ მეუძღვინკო თის დო დინათკო.

16. მუქ მეხვარ მაილზის გიორჯგინკო წინააღმდეგობაშ შიშის?

¹⁶ მაილზის, ნამუსით მუშ დიდაშ რეაქციაშა ოშკურუდ, რაიონულ ზედამხედველიშ რჩევაქ მეხვარ. მაილზ იჩიებ: „თიქ ხოლო რელიგიურო გორთილ ოჯახის ირდჷ, ათეშენ ელამიჩ, მუჭო ევუნწყიკო ჩქიმ დიდას, ნამდა ნათუა ჩქიმ გადაწყვეტილება რდუ დო მუაჩქიმს ვა დუნძალებ“. საბოლათ მაილზის ჸუდეშე აჸუ ოულარქ, მუშენდა დიამუშის ვემეწონ თიშ გადაწყვეტილებაქ. მარა თის ვა უთირუ მუშ გადაწყვეტილება დო დინათ. მაილზ იჩიებ: „ჩქიმ გურს მანგარო შეხუ თიშ გაგებაქ, მუთ იეჰოვაქ აკეთ ჩქიმო. იესოშ გიშაჸიდირალშენ დაფიქრება მარწმუნენს, ნამდა თის მანგარო ვუჸორქ. თექ მიმეხვარ დუდ მევუძღვინკო იეჰოვას დო დიმნათიკო“.

17. მუშ შესაძლებლობა მიღნა თითოულს?

¹⁷ ედემიშ ბაღის ხილიშ ჭკუმუათ, ევაქ ღორონთიშ წინააღმდეგ მიდართ. თის ადამქ ხოლო ქუდუკინ ხუჯ დო ჟირხოლოქ დიდ უმადურობა გიმირჩქინ თი ირფელშე, მუთ იეჰოვაქ თინეფს უკეთ. თითოულს შესაძლებლობა მიღნა ქუვოძირათ, ნამდა ვა ვოთანხმუთ თინეფიშ გადაწყვეტილებას. ნათუათ იეჰოვას ვუმტკიცენთ, ნამდა ბჯერა, ხვალე თის უღჷ უფლება დამდგინან, მუ რე ჯგირ დო ფურ. თეს გეძინელ, ვოძირანთ, ნამდა მიჸორა დო ვონდუთ ჩქინ ზეციერ მუმას.

18. მუ მიგეხვარებნა წარმატებულო ემსახურათ იეჰოვას?

¹⁸ ნათუაშ უკულ ცხოვრება იეჰოვაშ ნორმეფით ოკო გუვაგრძელათ დო ვართ ხოლო ჩქინ წესეფით. თაშ იქციებ ღორონთიშ მილიონობით მსახურ. თეშ კეთება თქვა ხოლო შეგალებენა, მუჟამსით გაგრძელენთ ბიბლიაშ გურაფას, გაღვენუნა ურთიერთობა და დო ჯიმალეფწკუმა დო ჩქინ მოჸოროფე მუმაშენ შხვეფს ხოლო ქეჩიებუთ (ებრ. 10:24, 25). გადაწყვეტილებეფიშ მეღებაშ დროს, მიაჸუნით თი რჩევეფს, ნამუსით იეჰოვა მუშ სიტყვაშ დო ორგანიზაციაშ საშვალებათ გარზენა (ეს. 30:21). თე ირფელიშ გათვალისწინება მიგეხვარებნა, რდათ წარმატებულ (იგავ. 16:3, 20).

19. მუ ოკო რშუდან ირიათო დო მუშენ?

¹⁹ იეჰოვა დო თიშ ნორმეფ უმოსო გეჸოროფებნა, მუჟამსით ქინანჭუთ მუზმა ჯგირობუა მოჸუნს თიშ ხემძღვანელობაშ მეჸუნას. თეშ უკულ მუთუნს, მუდგას სატანა შემობთავაზენა, ვეშიალებე მიმოტებაფუან იეჰოვაშ მსახურება. წერმიდგინით თქვან დუდ ანთას წანაშ უკულ. მუჟამსით ულირს ქიგიშინანთ, ნათუას თქვან ცხოვრებას არძაშ უჯგუშ გადაწყვეტილებათ მირჩქინანთ.