1. მუშ სურვილ მიღნა დო მუ მიშურს თეშა?

მუჭო გინაფლენთ დუც, მუჟამსით პიროვნებას, მიდგას პატის ცენთ დო აფასენთინ, თქვან სახელ ოჭყორდუ ვარდა საერთოთ ვარჩინებულენა? თეცალ საქციელ გურს ქელგოჭუანდეს, მუშენდა არძას უღჷ თიშ სურვილ, შხვეფ იჩინენდან დო პატის ცენდან. მარა ჩქი მოკონა შხვეფ ხვალე მიჩინენდან ვარინ, უჩქუდან მუნერ პიროვნებეფ ვორეთ დო მუს მივოჭირნეთ ცხოვრებას (რიცხ. 11:16; იობ. 31:6).

2, 3. მუჭო შილებე ჩქინ ბუნებრივ სურვილქ, ნამდა შხვეფქ პატი ფცან, დაპრკოლებათ გინმართან? (ქოძირით სურათ თე გვერდის).

² მარა კურცხას ვა ვეპჸუაფუთ-და, არასრულყოფილებაშ გურშენ შილებე ჩქინ ბუნებრივ სურვილქ, შხვეფქ პატი ფცან, დაპრკოლებათ გინმართან. სატანაშ ქვეყნიერება ოცად, თიშ სურვილ გომრჩქინან, არძაშო ჩინებულ დო აღიარებულ ვორდათ. შედეგო, ვა მაღვენუნა თიშ სურვილ, ვემსახურათ ჩქინ ზეციერ მუმას, იეჰოვა ღორონც, ნამუთ დასურო იმსახურენს თეს (გამოცხ. 4:11).

³ იესოშ დროს რელიგიურ წინამძღოლეფს არასწორ შეხედულება უღდეს აღიარებაშ გურშენ. იესო მუშ მიმაჸუნალეფს  აფრთხილენდჷ: „დუდ ეუჩილითეთ მწიგნობარეფს, ნამდგას უჸორა გინძე მიკაქუნალეფით გილულა, მოედანეფს მოკითხირ, წოხოლენ ადგილ სინაგოგეფს დო პატი გედვალირ ადგილეფ სუფრას“. თეშ რაგადიშ უკულ იესოქ გეუძინ: „თინეფ უმოს მკაცრაშე დესაჯებნა“ (ლუკ. 20:46, 47). თინეფიშ გინაწონს, იესოქ ქაცქუ გაჭირებულ ქომონჯ ღურელ ოსურს, ნამუთიქ შესაწირს ჭიჭე რაოდენობაშ ფარა ინაჸათ, თიშ უმკუჯინუო, ნამდა შხვეფს საეგებიოთ ვა უძირნა თენა (ლუკ. 21:1—4). მუშო ოკო რაგად, იესო შხვანერო უჯინედ აღიარებას. თე სტატია მიმეხვარებნა აღიარებაშენ თიცალ შეხედულება მიღდან, მუნერით იეჰოვა ღორონთშო რე მოსაწონ.

4. მუ რე არძაშ უმოს დიდ აღიარება დო მუშენ?

⁴ მუ რე არძაშ უმოს დიდ აღიარება, ნამდგაშ მეღებას ოკო ვოცადუდათ? თეშა ვემშურს აღიარება, ნამუსით ხალხ გორუნს განათლებაშ მეღებათ, ბიზნესით ვარდა გართობაშ ინდუსტრიათ. ქიდეკვირით, მუჭო ეჭარ პავლექ ნამდვილ აღიარება: „მარა ასე, მუჟამსით ღორონთ გეჩინებაფეთ, უმოს ზუსტას ქოფთქუათინ, ღორონთიქ გაიჩინებაფეს, მუჭო ოკო დართათ სუსტ დო მუთუნიშ მოღე ვა რენ ფერ პრინციპეფს დო კინ თიშ მონათ გინირთათ?“ (გალ. 4:9). მუშ მადიდა პატი რე ღორონთიშ გაჩინებაფა, ნამუთ სამყაროშ უზენაეს გუმაჭყაფალ რე. თის ოკო, ნამდა ჩქინწკუმა ხოლოშიან ურთიერთობა უღდას. მუჟამსით იეჰოვა მუშ მეგობარო ფჩინებულენან, ჩქინ ცხოვრებას დასურო უღჷ აზრი (ეკლ. 12:13, 14).

5. მუ ოკო ვაკეთათ, ნამდა იეჰოვაქ გამჩინებაფუან?

⁵ ჩქი მიჩქნა, ნამდა მოსე იეჰოვაშ მეგობარ რდუ. მუჟამსით მოსექ იეჰოვას თხუ, თიშ შარეფიშ გაგებაშ ნება ქიმუჩამუდკონ, იეჰოვაქ უპასუხ: „მუთ მიწინ თის ხოლო გუვაკეთენქ, მუშენდა ჭყოლოფა ქოძირ ჩქიმ თოლს დო სახელით გიჩინენქ“ (გამ. 33:12—17). ჩქი ხოლო ბრელ კურთხევეფს მიბღენთ, მუჟამსით იეჰოვა პირადო გამჩინებაფუანა. მარა მუ ოკო ვაკეთათ, ნამდა ღორონთქ გამჩინებაფუან? იეჰოვა მიჩინენდან იჸი, მუჟამსით ქიპჸოროფუანთ დო დუც მეუძღვინენთ თის (წეკითხით 1 კორინთელები 8:3). *

6, 7. მუქ შილებე გილამლუან იეჰოვაწკუმა ურთიერთობა?

⁶ ირნერო ოკო ვეცადათ, ნამდა ვა ვოდინუათ ზეციერ მუმაწკუმა ძვირფას ურთიერთობა. გალატელ ქრისტიანეფცალო, მიდგას პავლექ მეჭარუნ, ჩქი ხოლო ოკო ვეცადათ, ვეგნიფრთათ „სუსტ დო მუთუნშა ვაღირუნ ფერ პრინციპეფიშ მონათ“ დო თეწკუმა ართო, ვაბგორათ თე ქვეყნიერებაშე აღიარება (გალ. 4:9). გალატელ ჯიმალეფ იჩინენდეს ღორონც დო ღორონთ ხოლო იჩინენდ თინეფს. მარა პავლექ თე ჯიმალეფშე თქუ, ნამდა დართეს მუთუნშა ვაღირუნ ფერ საქმეეფს. შხვა სიტყვეფით ქოფთქუათინ, პავლექ თინეფს უწუ: „ღორონთიშ გაჩინებაფაშ უკულ, მუშენ დართით უაზრო საქმეეფს, ნამუთ მეტებულ გაფდეს?“.

⁷ შილებენო ჩქი ხოლო ქიპჸუათ თეცალ სიტუაციას? მუშო ოკო რაგად, ქო. დუდშე, მუჟამსით იეჰოვა გეფჩინებაფეთინ, პავლეცალო, ჩქი ხოლო დუდ დუვანებით ირფელს, მუთ სატანაშ ქვეყნიერებას სახელს მომღანდეს (წეკითხით ფილიპელები 3:7, 8). * მაგალთო, შილებე ვარია ფთქვითკო უმაღლეს განათლებაშე, ჯგირ სამუშაშე ვარდა ბიზნესშე. შილებე მუსიკალურ ნიჭი ვარდა სპორტულ კარიერაშე ფთქვითკო ვარია, მუთ სახელს დო დიდებას მომღანდეს (ებრ. 11:24—27). გონივრულ ვეჸუაფ, იმნარღათ თიმ დროს მეღებულ გადაწყვეტილება დო იფიფქრათ, ჯგირ შანსი გუტეთ ხეშე. თეცალ აზროვნებაქ შილებე კინ თიშ გორუა ქუდმოჭყაფუან, მუთ ართ დროს მუთუნო ვემმორჩქუდეს. *

8. მუ მიმეხვარებნა, მტკიცას მაფდან გინოჭყვიდილ, იეჰოვაშე მიბღათ აღიარება?

⁸ მუჭო შემლებნა მტკიცას მაფდან გინოჭყვიდილ, ნამდა იეჰოვაშე მიბღათ აღიარება დო ვართ ხოლო თე ქვეყნიერებაშე? თეშო საჭირო რე, ირიათო ფშუდან ჟირ მნიშვნელოვან ფაქტი. პირველ, იეჰოვა ირიათო თინეფს აღიარენს, მით ართგურო ომსახურ (წეკითხით ებრაელები 6:10; * 11:6). თინა მანგარო აფასენს თითოულ მუშ მსახურს; თაშ ნამდა, უსამართლობათ მიორჩქჷ მუშ ართგურ მსახურეფიშ უყურადღებოთ დოტება. იეჰოვა ირიათო „იჩინენს მუშიანს“ (2 ტიმ. 2:19). თინა ორწყე „მართალიშ შარას“დო უჩქჷ, მუჭო გინასკილიდუას თინა (ფსალმ. 1:6; 2 პეტ. 2:9).

9. ქიმიჸონით მაგალითეფ, მუჭო იწონუანს იეჰოვა მუშ ხალხის.

⁹ ჯვეშო იეჰოვაქ განსაკუთრებულო ოძირ, ნამდა იწონუანდჷ მუშ ხალხის (2 მატ. 20:20, 29). მაგალთო, ქიგიფშინათ, მუჭო გინასკილიდუ იეჰოვაქ მუშ ხალხ ჭითა ზღვას, მუჟამსით თინეფს ფარაონიშ ჯარ მოთხოზუდ (გამ. 14:21—30; ფსალმ. 106:9—11). თე შემთხვევაშ გურშენ ხალხ 40 წანაშ მიკულაშ უკულ ხოლო რაგადანდჷ (იეს. 2:9—11). ჩქი დასურო გურშა ელამკინანა თეცალ შემთხვევეფიშ გოშინა, მუშენდა მალას გოგი მაგოგი დუც ქიგიანთხუ ღორონთიშ ხალხის (ეზეკ. 38:8—12). თი დროს, ჩქი მარდულეფ იპჸით, ნამდა ვოცადუდით ღორონთშე მიბღითკო აღიარება დო ვართ ხოლო თე ქვეყნიერებაშე.

10. მუ მნიშვნელოვან ფაქტი ოკო ფშუდან?

¹⁰ ჩქი მაჟია მნიშვნელოვან ფაქტი ხოლო ოკო ფშუდან: შილებე იეჰოვაქ შურო ვეველუთუნ თეშ მაკურთხან. იეჰოვა ვაკურთხენს თინეფს, მით ჯგირ საქმეეფს შხვეფქ ქაცქუანინ თიშენ ორთ, მუშენდა მუჭოთ იესოქ თქუნ, თინეფქ უკვე სრულაშე მიღეს, მუთ ოკუთნუდესინ (წეკითხით მათე 6:1—5). * მარა იესოქ თქუ, ნამდა ზეციერ მუმა ორწყე თინეფს, მით ჯგირ საქმეეფს ორთ შხვეფშო, მარა შხვეფიშ თოლს თენა ვა რჩქუ. იეჰოვაშ თოლს ფულირ ვა რე თინეფიშ ჯგირ საქმეეფ დო თითოულს აკურთხენს. მინშა იეჰოვა განსაკუთრებულ შარათ მაკურთხენა. მორთ, ქობძირათ მუსხირენ მაგალით.

11. მუჭო აკურთხჷ იეჰოვაქ ახალგაზრდა მარიამს ველუდუნ თეშ?

¹¹ ქუმორთჷ თიშ დროქ, ნამდა იესო ადამიანო ქუდაბადებედკო. იეჰოვაქ თეშო თანდაბალ ახალგაზრდა ძღაბ, მარიამი გიშაგორ, ნამუთ თე განსაკუთრებულ ბაღანაშ დიდა იჸუაფუდ. მარიამი ქალაქ ნაზარეთის ცხოვრენდჷ, ნამუთ იერუსალიმშე დო დიდებულ ტაძარშე შორს რდუ (წეკითხით ლუკა 1:26—33). * მუშენ  აშუ მარიამს თეცალ პატიქ? ანგელოზიქ თე პიროვნებას უწუ, ნამდა ღორონთ თის იწონუანდჷ. მარიამიშ სულიერობაქ გეგმორჩქინდჷ მუშ ნათესე ელისაბედწკუმა ჩიებაშ დროს (ლუკ. 1:46—55). იეჰოვა ოკვირუდ მარიამს დო ქოძირ, ნამდა თინა ღორონთიშ ართგურ რდუ. ათეშენ ველუდუნ ფერ კურთხევა მეჩჷ თის.

12, 13. მუჭო გიმირჩქინეს იესოშ პატიცემა თიშ დაბადებაშ დროს დო თიმწკუმა, მუჟამსით 40 დღაშ უკულ ტაძარშა იჸონეს?

¹² მუჟამსით მარიამს იესოქ ქეშეძინუნ, იეჰოვაქ იერუსალიმს დო ბეთლემს რდესინ თი ჩინებულ ხალხის დო მართველეფს ვემეჩ თიშ პატი, ნამდა თე მნიშვნელოვან მოვლენაშ გურშენ ქიგეგესკო. თეშ მანგიორო, თიქ ანგელოზ მიდაშქვჷ თანდაბალ ჭყიშეფშა, ნამუთ ბეთლემიშ გალე შხურს ჭყიშანდეს დო ქუგაგებაფუ თე მოვლენაშ გურშენ (ლუკ. 2:8—14). თეშ უკულ თინეფქ იესოშ ოძირაფშა მიდართეს (ლუკ. 2:15—17). მუჭო გუკვირდუდეს მარიამს დო იოსების თიშ ძირაფა, ნამდა იეჰოვაქ ჭყიშეფიშ საშვალებათ განადიდ მუშ სქუა. ქიდეკვირით, მუშმადიდა განსხვავება რე იეჰოვაშ დო ეშმაკიშ საქმეეფ შკას. მუჟამსით სატანაქ ასტროლოგეფ მიდაშკვჷ იესოშ დო თიშ მშობლეფიშ ოძირაფშან, მთელ იერუსალიმქ ქიგეგ იესოშ დაბადებაშ გურშენ (მათ. 2:3). თე ამბეშ გაგებას ბრელ უდანაშაულო ბაღანაშ ღურაქ მაჸუნ (მათ. 2:16).

¹³ იესოშ დაბადებაშე ჟარნეჩ დღაშ უკულ მარიამქ ბეთლემშე 9 კილომეტრიშ მაშორას, იერუსალიმიშ ტაძარს მსხვერპლ ოკო შეწირკო იეჰოვას (ლუკ. 2:22—24). მუჟამსით მუშ ქომონჯ დო იესოწკუმა ართო შარას მიშუნ, შილებე ფიქრენდკო, ნამდა მღვდელ მუთუნ განსაკუთრებულს ქოთქუანდჷ იესოშ მომავალ დავალებაშ გურშენ. მუშო ოკო რაგად, იესოშ პატიცემა გეგმირჩქინეს, მარა თეშ ვარ, მუჭოთ მარიამ ელუდ. იეჰოვაქ „მართალ დო ღორონთიშ მოშიშ“ კოჩიშ, სიმონიშ დო 84 წანერ ქომონჯ ღურელ წინასწარმეტყველ ანაშ პიჯით თქუ, ნამდა თე ბაღანა დაპირებულ მესია, ქრისტე იჸუაფუდ (ლუკ. 2:25—38).

14. მუჭო აკურთხჷ იეჰოვაქ მარიამ?

¹⁴ მუშ რაგად შემლებნა მარიამიშ გურშენ? გეგმირჩქინუო იეჰოვაქ მარიამიშ პატიცემა თიშ გურშენ, ნამდა ართგურო ზრუნენდჷ დო რდუნდ მუშ სქუას? მუშო ოკო რაგად, ქო! ღორონთიქ თიშ საქმეეფ დო სიტყვეფ ბიბლიას მიშინუ. მუჭოთ იძირენ, მარიამს ვეშულებუდ იესოწკუმა ართო სუმ წანა დო გვერდის გილართუკო მსახურებაშა. შილებე თე დროს თის ქომონჯ ღურელ აფუდ დო ნაზარეთის რდუკონ. იესოწკუმა ართო მსახურება ვეშულებუდუნ თიშენ, მარიამქ ბრელ უპირატესობა გოუტუ ხეშე, მარა იესოშ ღურაშ დროს თინა მუშ სქუაწკუმა რდუ (იოან. 19:26). ჟარნეჩდომავითა დღაშ დღახუშ წოხოლენ დღალეფს მარიამი იერუსალიმს მოწაფეეფწკუმა ართო რდუ, მუჟამსით მოწაფეეფშა წმინდა შურქ გინორთჷ (საქ. 1:13, 14). მუჭოთ იძირენ, შხვა მოწაფეეფწკუმა ართო მარიამშა ხოლო გინორთჷ წმინდა შურქ. დასურო თაშ ქორდუ-და, თის ქაშუ თიშ პატიქ, იესოწკუმა ართო მარადიულო იმეფას ზეცას. მუშო ოკო რაგად, იეჰოვაქ მანგარო დაფას თიშ ართგურ მსახურება.

15. მუჭო ოძირ იეჰოვაქ, ნამდა იწონუანდჷ მუშ სქუას?

¹⁵ იესოს ვა უღუდ თიშ სურვილ, რელიგიურ დო პოლიტიკურ ლიდერეფშე მეუღებუდკო აღიარება. მარა, მუჭო ახიოლედ იესოს თიშ მორქჩილაფა, ნამდა იეჰოვა იწონუანდჷ თის, მუჟამსით ღორონთიქ სუმშა ზეცაშე დურაგადუ. იორდანეშ მალწყარს იესოშ ნათუაშ დროს, იეჰოვაქ თქუ: „თენა რე ჩქიმ საჸოროფო სქუა, ნამუთ მა მიპწონე“ (მათ. 3:17). მუჭოთ იძირენ, თე სიტყვეფ ხვალე იოანექ მირჩქილუ. თეშ უკულ, იესოშ ღურაშე ართ წანათ ადრე, სუმ მოწაფექ გეგონ, მუ თქუ იეჰოვაქ იესოშ გურშენ: „თენა რე ჩქიმ საჸოროფო სქუა, ნამუთ მა მიპწონე. თის  ურჩქილით“ (მათ. 17:5). ბოლოს, იესოშ ღურაშა მუსხირენ დღათ ადრე იეჰოვაქ კინ დურაგადუ მუშ სქუას (იოან. 12:28).

16, 17. მუჭო აკურთხ იეჰოვაქ მუშ სქუა?

¹⁶ იესოს უჩქუდ, ნამდა თის ღორონთიშ ლანძღუას ქეკაბრალენდეს დო საონჯღორო ღურათ დოღურუდ. მარა თეშ უმკუჯინუო, იშენით ლოცულენდჷ, იეჰოვაშ ნება შესრულებედკო (მათ. 26:39, 42). იესო აღიარებას ქვეყნიერებაშე ვარინ, მუშ მუმაშე გორუნდჷ დო ათეშენ „ონჯღორე მუთუნო ვემირჩქინ დო ძელს წამებას გაურზჷ“ (ებრ. 12:2). მუჭო ოძირუ იეჰოვაქ, ნამდა იწონუანდჷ იესოს?

¹⁷ დედამიწას ცხოვრებაშ დროს იესოქ სურვილ გიმოხანტჷ, ნამდა ოკოდ ზეცას თი დიდებაშ მეღება, ნამუთ ართ დროს უღუდ მუშ ზეციერ მუმაწკუმა (იოან. 17:5). ბიბლიაშე სოთინ ვარჩქჷ, ნამდა იესოს თეშ გარდა ხოლო შხვა მუდგარენ ოკოდ. თინა ველუდ, ნამდა დედამიწას იეჰოვაშ ნებაშ შესრულებაშენ განსაკუთრებულ ჯილდოს მიღენდჷ. მარა მუ აკეთ იეჰოვაქ? ღორონთიქ იესო თიცალ კურთხევეფით ეიოფშჷ, ნამუსით თინა შურო ველუდ. იეჰოვაქ მუშ სქუა განადიდ თით, ნამდა გათელ დო „უმოს მაღალ მდგომარეობა“ ქიმეჩ. თეს გეძინელ, ღორონთიქ უკვდავებათ დაჯილდოვ — ძღვინით, ნამუთ იესოშახ მითინს ვემუღებ! * (ფილ. 2:9; 1 ტიმ. 6:16). იეჰოვაქ დაფას მუშ სქუაშ ართგურობა!

18. მუ მიმეხვარებნა ვა ბგორათ აღიარება თე ქვეყნიერებას?

¹⁸ მუ მიმეხვარებნა თე ქვეყნიერებაშ მოწონება ვა ბგორათ? დღას ვაგმოჭყორდან, ნამდა იეჰოვა ირიათო აღიარენს დო აჯილდოვენს მუშ ართგურ მსახურეფს დო ხშირას ღორონთ შურო ვეველუთინ თეშ ორთჷ თეს. მის უჩქჷ, ხოლო მუჭო მაკურთხენა თინა მომავალს? მარა ასე, მუჟამსით თე ქვეყნიერებას სირთულეეფს ვობრძოლუთინ, მორთ, ირიათო ქოფშუდან, ნამდა თე ქვეყნიერება მალას მისპუ. ათეშენ, მუდგანერ დიდებას ვა ფთავაზენდანინ, ირფელ თიწკუმა ართო გენადგურებ (ფილ. 2:9; 1 ტიმ. 6:16). ჩქინ ზეციერ მუმა იეჰოვა „უსამართლო ვა რე, ვეგიჭყოლიდუანს თქვან ხანდას დო ჸოროფას, ნამუთ თიშ სახელიშ გურშენ გიმირჩქინით“ (ებრ. 6:10). დასურო, ღორონთშე საჭირო აღიარებას მიბღენთ დო შილებე შურო ვეველუთინ თეშ ხოლო მაკურთხან.