1. მუს ადარენს დავით იეჰოვას ფსალმუნიშ 18:46-ის?

 ᲐᲛᲓᲦᲐᲠ ქვეყნიერებას თიცალ პრობლემეფს შეფხვადუთ, ნამდგაქ შილებე ჩქინ ცხოვრება წუთიშმამალას დუდგიმე გემნართინუას. მარა, მუჭოთ ულირ სტატიაქ გუმოშინეს, იეჰოვა ცოცხალ ღორონთ რე დო ირო მზათ რე, ქელამდირთან. მთელ გურით უმარდუთ თეშო ჩქინ ღორონთის! მუჟამსით ჩქინ ცხოვრებას თიშ ხეს ვორწყეთ, თენა ხოლო უმოსო მარწმუნენა, ნამდა „ცოცხალ ღორონთ რე იეჰოვა!“ (წეკითხით ფსალმუნიშ 18:46). საინტერესო რე, ნამდა კინ თე მუხლის დავით იეჰოვაშენ თის ხოლო იჩიებ, „ჩქიმ კირდე“ რენია. მუშენ უდარენს თინა ცოცხალ ღორონთ იეჰოვას უსულო საგანს, კირდეს?

2. მუს გუვარჩიენთ თე სტატიას?

² თე სტატიას გუვარჩიენთ, მუშენ რე იეჰოვა შედარებულ კირდეშა დო მუს მოგურუანა თე შედარება თიშ გურშენ. თიშე ხოლო მაღვენუნა ჩიება, მუ მიმეხვარებუნა, იეჰოვას თეშ ვონდუდათ, ნამდა ჩქი ხოლო მარაგადედან ჩქიმ კირდე რენია. ბოლოს თიშე ხოლო ქობრაგადანთ, მუჭო შემლებუნა ჩქი ხოლო გეგმიფრჩქინათ იეჰოვაშ თი თვისებეფ, ნამდგაშ გურშენ თინა კირდეშა რე შედარებულ.

ᲛᲣᲨᲔᲜ ᲠᲔ ᲘᲔᲰᲝᲕᲐ ᲨᲔᲓᲐᲠᲔᲑᲣᲚ ᲙᲘᲠᲓᲔᲨᲐ?

3. ხშირას მუ აზრით რე ბიბლიას გიმორნაფილ სიტყვა „კირდე“? (ქოძირით სურათ).

³ ბიბლიას იეჰოვა კირდეშა რე შედარებულ, მუთ მოხვარუნა, უჯგუშო ქენვანჭათ, მუნერ ღორონთ რე თინა. ხშირას თე სიტყვა თიცალ მონაკვეთეფს რე გიმორნაფილ, სოდეთ იეჰოვას მუშ ართგურ მსახურეფ განადიდენა დიდებულ თვისებეფიშ გურშენ. ბიბლიას იეჰოვა კირდეშა პირველო კანონიშ 32:4-ის რე შედარებულ. ართშა ლოცვაშ დროს ხანაქ ხოლო უწუ იეჰოვას: „ხვალე სი რექჷ კირდეშმამანგარა“ (1 სამ. 2:2). აბაკუმქ ხოლო იეჰოვას „კირდე“ დოუძახ (აბაკ. 1:12). ხვალე თიშ მსახურეფქ ვარინ, იეჰოვაქ ხოლო  შეუდარ მუშ დუდ კირდეს (ეს. 44:8). მორთ გუვარჩუათ სუმ მუდგარენ, მუდგათ იეჰოვა კირდეს მოგენს, დო ქიგებგათ, მუ ოკო ვაკეთათ, ნამდა თინა ჩქინო ხოლო „კირდე“ რდასჷ (კან. 32:31).

4. მუ გაგებათ რე იეჰოვა დუდიშგითაფორაფალ? (ფსალმ. 94:22).

⁴ იეჰოვა დუდიშგითაფორაფალ რე. მუჭოთ მანგარ ჭვემა დო ბორიაშ დროს ადამიანს შეულებ დუდ კირდეს გითუფორუას, თეშნერო, იეჰოვაწკუმა ხოლო თხილერ ვორეთ, მუჟამსით ცხოვრებას რთულ პერიოდ მიღუნა (წეკითხით ფსალმუნიშ 94:22). თინა ფთხილანა დო მარწმუნენა, ნამდა თი ირფელ, მუთ ამდღა მიჭირა, მარადიულო ვეგეგრძელებ; იეჰოვა სადღამუშოთ მოსპუნს ჩქინ არძა ოწუხებელს, მუთ სვანჯის მიდინუანა (ეზეკ. 34:25, 26).

5. მუ ოკო ვაკეთათ, ნამდა იეჰოვაქ ჩქინო კირდეცალ დუდიშგითაფორაფალქ ქიჸუას?

⁵ ართ-ართ საშვალება, მუდგათ შემლებუნა იეჰოვას დუდ ქექთუფორუათ, რე ლოცვა. მუჟამსით ბლოცულენთ, ბღებულენთ „ღორონთიშ მშვიდობას“, ნამუთ თხილანს ჩქინ გურ დო გონებას (ფილ. 4:6, 7). ზუსტას თაშ მოხვად ართ ჯიმაშ, არტიომიშ შემთხვევას, ნამუთ რწმენაშ გურშენ ჭოფეს. ციხეს გამომძიებელს თინა ხშირას გიმოჸუნდჷ დაკითხვაშა, მუდროსით ამცირენდჷ დო მანგარ გლახათ ოქცუდ. არტიომ იჩიებ: „გამომძიებელ გაგმომძახუდუნ, გომზარზალუანდჷ. . . ირიათო ბლოცულენდჷ დო იეჰოვას სიმშვიდეს დო სიბრძნეს ფთხინდჷ. . . გამომძიებელს მუშ მეთოდეფით ვემიაჭირინუ მიზანშა. . . ვორწყედ, მუჭო მოხვარუდ იეჰოვა. თინა ჩქიმო კირდეცალო რდჷ, ნამდგას დუდის გითუფორუანდჷ“.

6. მუშენ შემლებუნა ირო მიღუდან იეჰოვაშ იმენდ? (ეს. 26:3, 4).

⁶ იეჰოვა საიმენდო რე. მუჭოთ კირდე ვარდა გვალა ირიათო ართ ადგილს რე დო სოთინ ვედიქანცუანს, თეშნერო, იეჰოვა ხოლო დღას ვამტენა დო ირიათო მზათ რე ჩქინ მახვარებელო. შემლებუნა ირო მიღუდან თიშ იმენდ, მუშენდა იეჰოვა „კირდე რე მარადიულო“ (წეკითხით ესაიაშ 26:3, 4). თინა ირო შეასრულენს მუშ სიტყვას, ქიმირჩქილუანს ჩქინ ლოცვეფს დო ქიმმეხვარებუნა. იეჰოვა თიშ გურშენ ხოლო რე საიმენდო, ნამდა თინა მუშ მსახურეფიშ ართგურ რე (2 სამ. 22:26). ღორონთ დღას ვეგიჭყოლიდუანს ჩქინ ჯგირ საქმეეფს დო აუცილებერო მაკურთხენა (ებრ. 6:10; 11:6).

7. მუჭო მიმეხვარებუნა იეჰოვაშა მენდება? (ქოძირით სურათ).

⁷ იეჰოვაქ ჩქინო კირდეცალო ქიჸუასინ, ბოლოშა ოკო ვონდუდათ თის. ოკო ბჯერდან, ნამდა, მუდგა რთულ სიტუაციას ვა ვორდათინ, იეჰოვაშ მორჩილება ირო ჯგირ შედეგის მომღანა (ეს. 48:17, 18). ირო, მუჟამსით იეჰოვაშ ხეს ვორწყეთ ჩქინ ცხოვრებას, თიშ მიმართ ნდობა უმოსო მემანგარებუნა. თენა მიმეხვარებუნა, მომავალს ხოლო, მუდგა სირთულეს ვეშეფხვადათინ, ხვალე თიშ იმენდ მიღუდან. მუჟამსით თიცალ რთულ სიტუაციაშე გიშურთ, ნამუთ იეჰოვაშ მეტ მითინს ვეგშანწყუედ, ჩქინ თოლო ვორწყეთ, მუნერ საიმენდო რე თინა. ართ ჯიმა, ვლადიმერ მირაგადუნა, მუჭო მეხვარ თის რთულ სიტუაციაქ იეჰოვაწკუმა უმოსო დაახლოებას. თინა იჩიებ: „ჭოფილ ვორდინ თიმ პერიოდის უმოსო დევეახლოვ იეჰოვას. თეცალ ხოლოს დღას ვა პჸოფექ თიწკუმა. იეჰოვაშ მეტ მითინს ვა მახვარებედ ჩქიმდა, მუდგაქ ქუდმოგურუ, ხოლო უმოსო მივენდიკო თის“.

8. ა) მუშენ შემლებუნა ფთქუათ, ნამდა იეჰოვა ვეთირუ? ბ) მუშენ იჸუაფ ჩქინო ჯგირ, იეჰოვა ჩქინ კირდე ქიჸუაფუნ-და? (ფსალმ. 62:6, 7).

 ⁸ იეჰოვა ვეთირუ. მანგარ კირდეცალო იეჰოვა ხოლო მტკიცე რე დო მუნერით ირო რდუნჷ, თიცალ სქიდუ. თიშ პიროვნება დო განზრახვეფ დღას ვეთირუ (მალ. 3:6). თექ ჯგირო ქიძირ, მუჟამსით ადამ დო ევაქ იეჰოვაშ წინააღმდეგ მიდართეს. თის თეშ გურშენ მუშ განზრახვაშე ვარია ვა უთქუალ. მუჭოთ მოციქულ პავლექ თქუ, იეჰოვა „მუშ დუდის ვეგნულუანს“ (2 ტიმ. 2:13). თენა ნიშნენს, ნამდა მუდგაქ ვა მოხვადას დო შხვეფქ მუდგა ვა ქიმინანინ, იეჰოვაშ თვისებეფ, განზრახვეფ დო ნორმეფ დღას ვეთირუ. თეცალ ღორონთიშ მენდულეფ დარწმუნებულეფ ვორეთ, ნამდა თინა ირო ქიმმეხვარებუნა სირთულეეფიშ დროს დო არძა დუნაპირებუს შემსრულენა (წეკითხით ფსალმუნიშ 62:6, 7).

9. მუს ბგურაფლენთ ტატიანაშ შემთხვევაშე?

⁹ იეჰოვაშ თვისებეფშე დო თიშ განზრახვეფშე ფიქრ მიმეხვარებუნა, ბოლოშა ვონდუდათ თის დო ჩქინ კირდე რდასჷ. თენა მიმეხვარებუნა, სირთულეეფიშ დროს ვა ვოდინუათ სიმშვიდე დო იეჰოვაშ ართგურქ ქუდოფსქიდათ (ფსალმ. 16:8). თაშ იჸუ ართ ჩქინ დაშ, ტატიანაშ შემთხვევას ხოლო, ნამდგას რწმენაშ გურშენ შინაპატიმრობა მეუსაჯეს. დეკვირით, მუს იჩიებ თინა: „გვალო ხვალე ქუდოფსქიდ. დუდშე მანგარო გამჭირდჷ, ხშირას გურშეჭირებულ ვორდჷ“. მუქ მეხვარ ტატიანას, გაურზუკო თე სირთულეს დო დირთინუკო სიმშვიდე? თიქ მთელ ყურადღება თიშა გეგნიღ, მუჭო რდჷ თიშ მდგომარეობა დაკავშირებულ იეჰოვაშ განზრახვაწკუმა. ტატიანა აგრძელენს: „ყურადღება თიშა გეგნიბღჷ, ნამდა თე მდგომარეობას იეჰოვაშ ჸოროფაშ დო თიშ ართგურობაშ გურშენ ვორდჷ. თეშ ინონჭაფაქ მიმეხვარ, ჩქიმ დუდშე ისხით ვეფიფქრიკო“.

10. მუ მიმეხვარებუნა, იეჰოვა ჩქინო ხოლო კირდე რდასჷ?

¹⁰ წიმი მანგარ რთულ პერიოდ მელუნა, მუდროსით იეჰოვაშა მენდება აიშახ დღას ვეგეფხვილუთინ თეშ დემესაჭირებუნა. ათეშენ, ამდღარშე ოკო ქიდიბგურუათ თიშა მენდება დო ბჯერდან, მუდგა სირთულეს ვეშეფხვადათინ, თინა ქიმმეხვარებუნა, ირფელს ქუგურზათ. მუ გაიმანგარენა იეჰოვაშ ნდობას? წეკითხით ბიბლიურ დო ამდღარ დროს მახორუ ღორონთიშ ართგურ მსახურეფიშ შემთხვევეფ. ჯგირო დეფიქრით თე შემთხვევეფშე დო ქიდეკვირით, მუჭო ალუდირთჷ იეჰოვაქ მუშ მსახურეფს. თენა ქიმგეხვარებუნა, იეჰოვა თქვანო ხოლო კირდე რდასჷ.

ᲛᲘᲐᲸᲣᲜᲘᲗ ᲘᲔᲰᲝᲕᲐᲨ ᲛᲐᲒᲐᲚᲘᲗᲘᲡ

11. მუ იჸუაფ შედეგ, იეჰოვაშ მაგალითის ქიმვაჸუნუთ-და? (ქოძირით ჩარჩო „ ახალგაზრდა ჯიმალეფ, მუ მიზან შეილებუნა გიღუდან?“).

¹¹ ჩქი გუვარჩით, მუჭო მოგენს იეჰოვა კირდეს. ასე თიშე ქიფჩუათ, მუჭო მივაჸუნათ თიშ მაგალითის ჟიშე გარჩიებულ მხარეეფს. თეშ კეთება მნიშვნელოვან რე, ნამდა უმოსო გეგმვოდირთათ კრებას დო გუვამანგარათ და დო ჯიმალეფ. თექ ჯგირო გემკორჩქინდჷ თევრეშე, ნამდა იესოქ სიმონს კეფა გიოდვჷ (ითარგმნუ, მუჭოთ „პეტრე“), მუთ ნიშნენს „კირდეშ ნოტეხის“ (იოან. 1:42). მუშენ გიოდვჷ იესოქ მოციქულს თე სახელ? მუშენდა პეტრე რწმენას გაუმანგარენდ დო გურშა გეუქექუანდ და დო ჯიმალეფს. კრებაშ უხუცესეფ ხოლო „დიდ კირდეშ ოროშა“ რენა შედარებულ, მუთ ნიშნენს, ნამდა თინეფ  ხოლო თხილანა კრებას (ეს. 32:2). მარა ხვალე უხუცესეფქ ვარინ, არძაქ ოკო მივაჸუნათ იეჰოვაშ მაგალითის დო კირდეცალ ვორდათ და დო ჯიმალეფშო (ეფეს. 5:1).

12. მუ დო მუნერო შემლებუნა დუდიშგითაფორაფალ ვორდათ და დო ჯიმალეფშო?

¹² რდათჷ დუდიშგითაფორაფალ. მინშა შილებე საჭიროქ იჸუას, პირდაპირ გაგებათ დუდიშგითაფორაფალ ქიმეფჩათ თანაქრისტიანეფს სტიქიურ უბედრობაშ, არეულობაშ ვარდა ომიშ დროს. მუთ უმოსო იუფრაშებ მდგომარეობა თე „ბოლო დღალეფს“, უმოსო მუმაჩამუნა საშვალება, ქალუდირთათ ართმაჟიას (2 ტიმ. 3:1). შემლებუნა და დო ჯიმალეფშო თი გაგებათ ხოლო ქიპჸუათ დუდიშგითაფორაფალქ, ნამდა ემოციურო ქალუდირთათ დო ჸოროფა ქუვოგინაფუათ. თეშ ართ-ართ საშვალება რე, შეხვალამეფშა მეურთინ თიმწკუმა თანაქრისტიანეფწკუმა დორაგადაფა დო თინეფშა გურიშელაკინა. ამდღა ქვეყნიერებას ადამიანეფს ჸოროფა აფუნა დინაფილ დო გურ აფუნა გორგილაფირ, მუთ ჩქინ ემოციეფშა ხოლო მოქმედენს. ათეშენ მოკონა, კრებაშა ქუმულან, და დო ჯიმალეფქ ჸოროფა ქიგინან, გემოშა რდანჷ დო ჭიჭე შურ მიდგან.

13. მუ დო მუნერო შეულებუნა უხუცესეფს დუდიშგითაფორაფალ რდანჷ თანაქრისტიანეფშო? (ქოძირით სურათ).

¹³ უხუცესეფ დუდიშგითაფორაფალ რენა თანაქრისტიანეფშო, მუჟამსით თინეფ შხვადოშხვანერ განსაცდელს შეხვადუნა. მუჟამსით სტიქიურ უბედრობა ხვადუ ვარდა ნამდგაინ თანაქრისტიანს სასწრაფოთ ოსაჭირ სამედიცინო მოხვარა, უხუცესეფ ხეთეშე ეიაჸუნუნა საქმეს, ნამდა პრაქტიკულო ქიმეხვარან თინეფს. თე ჯიმალეფ სულიერო ხოლო ოხვარუნა თანაქრისტიანეფს. მუჟამსით უხუცეს გემუანო ეჩიებ და დო ჯიმალეფს, შურ დო გურით მორჩქილაფა უჩქჷ დო ოცად, გემშართას თინეფიშ მდგომარეობაშა, თინეფს უმოს ადვილ აფუნა თიშა მოხვარაშ თხუალა. თეცალ თვისებეფ უღუნ ფერ უხუცესშე და დო ჯიმალეფ ჸოროფას გინაფლენა დო საჭირო ქიჸინ, ვართ რჩევაშ მეღება გაუჭირდუნა (1 თეს. 2:7, 8, 11).

14. მუ მიმეხვარებუნა, საიმენდო ადამიანიშ სახელ გებძუდან?

 ¹⁴ რდათჷ საიმენდო. მოკონა, შხვეფს ირო უღუდან ჩქინ იმენდ, განსაკუთრებულო თიმწკუმა, მუჟამსით უჭირა (იგავ. 17:17). მუ ოკო ვაკეთათ, ნამდა თეცალ საიმენდო ადამიანიშ რეპუტაცია მიღუდან? ოკო ვეცადათ, თე საკითხის იეჰოვაშ მაგალითის ქიმვაჸუნათ, მაგალთო, შევასრულათ დოდვალირ სიტყვა დო ვორდათ პუნქტუალურეფ (მათ. 5:37). თეწკუმა ართო, მუჟამსით ბგებულენთ, ნამდა მიდგაინს მოხვარა ოსაჭირ, ჯგირ იჸუაფ, ქელუდირთათ. ხოლო ართ, მუთ მიმეხვარებუნა, საიმენდო ადამიანიშ სახელ გებძუდან, თინა რე, ნამდა კრებას მეღებულ დავალებეფ ირო მითითებეფიშ მიხედვით შევასრულათ.

15. მუ ჯგირობუა მოუღ კრებაშა თის, ნამდა უხუცესეფ საიმენდოეფ რენა?

¹⁵ მუ ჯგირობუა მოუღ კრებაშა თის, ნამდა უხუცესეფ საიმენდოეფ რენა? და დო ჯიმალეფ უმოს მშვიდას რენა, მუჟამსით უჩქუნა, ნამდა მოხვარაქ ქიდესაჭირეს-და, ნებისმიერ დროს შეულებუნა დეკავშირან უხუცესეფს, მაგალთო, მუნეფიშ სამქადაგებლო ჯგუფიშ ზედამხედველს. თინეფს ჸოროფას ოგინაფუანს თიშ რჩქინა ხოლო, ნამდა მუდგაქ ვა მოხვადასინ,  უხუცესეფ ირწუთის მზათ რენა თანაქრისტიანეფიშ მახვარებელო. და დო ჯიმალეფს უხუცესეფიშ მიმართ უმოს ნდობა ურჩქინდუნა, მუჟამსით თინეფ რჩევაშ მეჩამაშ დროს ბიბლიას დო პუბლიკაციეფს მუთ ჭარუნ თის ურაგადუნა დო ვართ ხოლო მუნეფიშ პირად აზრის. თინეფს უხუცესეფიშ ნდობა თიმწკუმა ხოლო ემანგარებუნა, მუჟამსით თე ჯიმალეფ შხვეფწკუმა ვა რაგადანა თანაქრისტიანეფიშ პირად საკითხეფშენ დო ირიათო ასრულენა დოდვალირ სიტყვას.

16. მუ ჯგირობუა მოუღ ქოთ ჩქინდა დო ქოთ შხვეფშა, მუჟამსით რწმენას მანგარო გივორეთ?

¹⁶ მტკიცას გერდათ. შხვეფშო ჯგირ მაგალით იპჸუაფუთ, მუჟამსით ირო თის გუვაკეთენთ, მუთ იეჰოვაშ თოლს სწორ რე დო გადაწყვეტილებეფიშ მეღებაშ დროს ბიბლიურ პრინციპეფს გეგმიბრინუანთ. ღორონთიშ სიტყვას ტომბას ქიბრკვიენთ დო რწმენაშ გამანგარებელო ირფელს ქუვორთუთ-და, მანგარო გივორდათ იჸი ჭეშმარიტებას. შედეგო, ბოლოშა იეჰოვაშ ართგურეფ იპჸით დო ტყურა გურაფეფს დო ქვეყნიერებაშ აზროვნებას ვეშიალებე მიმოჩილითუან (ეფეს. 4:14; იაკ. 1:6—8). თეს გეძინელ, იეჰოვაშ დო თიშ დუნაპირებუეფიშ რწმენა მიმეხვარებუნა, ვა ვოდინუათ სიმშვიდე, მუჟამსით გლახა ამბეეფს ქიმიფრჩქილუანთ (ფსალმ. 112:7, 8). ხვალე თენა ვარინ, რწმენას მტკიცას ქიგვორეთ-და, უჯგუშო შემალებენა ქელუდირთათ თი და დო ჯიმალეფს, მით სირთულეეფს ხვადუნა (1 თეს. 3:2, 3).

17. მუს ირინუანა უხუცესეფ, ნამდა კრებას მშვიდობას შეუნწყუან ხე დო და დო ჯიმალეფს რწმენა გაუმანგარან?

¹⁷ უხუცესეფს საღ აზროვნება უღუნა, ზომიერეფ, წესრიგიანეფ დო კეთილგონიერეფ რენა. თე ჯიმალეფ გურაფაშ დროს „სარწმუნო სიტყვას“ ირინუანა, მუდგათ და დო ჯიმალეფს რწმენას უმანგარენა დო ოხვარუნა, სიმშვიდე ვადინუან (ტიტ. 1:9; 1 ტიმ. 3:1—3). თინეფ ქოთ სიტყვათ დო ქოთ მუნეფიშ მაგალითით ოგურუანა თანაქრისტიანეფს, დესწრან შეხვალამეფს, იქადაგან დო უღუდან პირად გურაფა. მუჟამსით და დო ჯიმალეფს პრობლემეფ უღუნა დო წუხენა, უხუცესეფ გურშა ელუკინანა თინეფს დო ოხვარუნა, მთელ ყურადღება იეჰოვაშ დუნაპირებუეფშა გეგნიღან.

18. მუშენ მოკონა, განვადიდათ იეჰოვა დო ხოლო უმოსო დევეახლოვათ თის? (ქოძირით ჩარჩო „ მუ მიგეხვარებუნა, უმოსო დეახლოვათ იეჰოვას?“).

¹⁸ იეჰოვაშ გურშენ თე ირფელიშ გარჩიებაშ უკულ, დავითცალო ჩქი ხოლო შემლებუნა ფთქუათ: „დიდება იეჰოვას, ჩქიმ კირდეს“ (ფსალმ. 144:1). მთელ ცხოვრებას ირო შემლებუნა მიღუდან თიშ იმენდ. თიშ მოხვარათ, ორჩინელობას ხოლო სულიერო გოფალირ იპჸუაფუთ. თაშ ნამდა, თამამას შემლებუნა ფთქუათ: „თინა რე ჩქიმ კირდე“ (ფსალმ. 92:14, 15).