დანიელა ირიათო კურცხაშე რდუ დო ხეთეშე ქიმეხვად, მუშა რდუ საქმე. თიქ ჸუჯის ქალმოფუცქინ: „ვარეკა, თინეფ თაქ რენა უკვე“. სასტუმროშ წოხოლე თინეფიშ მანქანაქ ქუმადირთჷ. მუსხირენ წუთშა ჯარიშკოჩეფქ ოპჭოფეს. მარა დანიელაშ ჭყოლოფუათ, ქუვოჭიშე მნიშვნელოვან საბუთეფ ართ ჯიმას გეგნოფჩიკო.

მუჟამსით პოლიციაშ განყოფილებაშა მეპჸუნდით, ფიფქრენდჷ მუჭო გამიმართლჷ, ნამდა გაბედულ დო სულიერო მოაზროვნე მეუღლე პჸუნდჷ. თეცალ ბრელ შემთხვევა მიღდეს, მუჟამსით მა დო დანიელა მუჭოთ ართ გუნდინ თეშ ვორდით. ასე ქიგეჩიებუთ, მუშენ გილეფშით თი ქიანეფშა, სოდეთ ჩქინ საქმიანობა აკრძალულ რე.

მა 1930 წანას ჩრდილოეთ საფრანგეთიშ ჭიჭე ქალაქ კრუას ართ კათოლიკურ ოჯახის დებაბდჷ. ჩქი ირ მარას ვოსწრუდით მესას; მუაჩქიმ აქტიურო რდუ ჩართულ ეკლესიაშ საქმეეფს. მარა სოდგარენ 14 წანერ ვორდინ თეშ ართ მოვლენაქ თოლეფ გომინჯჷ დო ქუმოძირუ ეკლესიაშ თვალთმაქცობა.

მაჟია მსოფლიო ჩხუპიშ დროს, საფრანგეთი გერმანიას აფუდ ოკუპირებულ. ჩქინ მღვდელ ქადაგებაშ დროს ირიათო მომწოდენდეს ხუჯ ქუდუკინითკო ქალაქ ვიშიშ პრო-ნაცისტურ მთავრობას. თიშ ნარაგადიქ გლახათ ქუმოხვად ჩქინ გურს. შხვეფცალო, ჩქი ხოლო ტყობაშე ვურჩქილედით ბი-ბი-სიშ რადიოს, ნამუთ მოკავშირე ძალეფიშ გურშენ ახალ ამბეფს გინმოჩანდჷ. ჭიჭე ხანშა ქიგებგით, ნამდა მღვდელს დუთირუ მუშ პოზიცია დო გინულებ მოკავშირე ძალეფიშ მხარეშა. თიქ ეკლესიას წირვა აღავლინ მოკავშირე ძალეფიშ წარმატებაშ აღნიშნებელო, ნამდგას 1944 წანაშ სექტემბერს მიოჭირნეს. თე ირფელქ სამღვდელოებაშ ნდობა მემდინუ.

ჩხუპიშ თებაშე ჭიჭე ხანშა მუმაქ დომღურ. უნჩაშ და გათხილ რდუ დო ბელგიას ცხოვრენდჷ. ათეშენ დიაჩქიმშა მაფუდ მიკაჯინალ. ჯგირ სამუშა დობგორ. ჩქიმ უნჩაშ დო თიშ ჟირ სქუა დუდგინოდვალირ კათოლიკეეფ რდეს. მართალ რე, თინეფწკუმა დაწინაურება მელუდ, მარა მალას დიდ გამოცდაშ წოხლე მაჸიდ გიორნალ.

1953 წანას ჩქიმ და სემონქ, ნამუთ უკვე იეჰოვაშ მოწმე რდუ, ჩქინ ოძირაფშა ქუმორთჷ. თიქ ბიბლიაშე ქუმოძირუ, ნამდა კათოლიკურ ეკლესიაშ გურაფეფ,  მუნერით რე: ჯოჯოხეთ, სამება დო უღურალ შურ, ტყურა რდუ. დუდშე ქივენირზი, მუშენდა კათოლიკურ ბიბლიას ვეგმირინუანდჷ, მარა მალას ქიმეფხვად, ნამდა ჭეშმარიტებას მირაგადუდ. უმოს გვიანო თიქ „გინაჯინალ კოშკიშ“ ჯვეშ გიშაშკუმალეფ ქუმომიღ, ნამუთ არძა თიმ სერს წეპკითხჷ. ხეთეშე ქიმეფხვად, ნამდა თენა ჭეშმარიტება რდუ, მარა მოშკურუდ, იეჰოვაშ მხარეს ქიდებკინენდ-და, სამუშას მივოდინუანდჷ.

მუსხირენ თუთაშა ჩქიმით ბგურაფლენდჷ ბიბლიას დო პკითხულენდჷ „გინაჯინალ კოშკიშ“ სტატიეფს. ბოლოს გეგნოპჭყვიდ მიდამრთუმუდკო სამეფო დარბაზშა. თექ მანგარ ჸოროფა იბგინ, ნამუქით მანგარო შეხუ ჩქიმ გურს. ართ გამოცდილ ჯიმა ამშვ თუთას მოგურუანდჷ ბიბლიას, ნამუშ უკულ 1954 წანაშ სექტემბერს დიმნათ. ჭიჭე ხანშა დიაჩქიმ დო უკლაშ დაქ ხოლო გინირთეს იეჰოვაშ მოწმეეფო.

1958 წანას მიღუდ პატი, ნიუ-იორკის საერთაშორისო კონგრესის დევესწრიკო. სანარღოთ კონგრესშახ მუსხირენ მარათ ადრე დიაჩქიმქ დოღურ. ასე უკვე ოჯახის მითინშა ვა მაფუდ მიკაჯინალ, ათეშენ მივოტე სამუშა დო პიონერო ქიდიპჭყჷ მსახურება. თე დროს გეფჩინებაფე ართ ენთუზიაზმით ეფშა პიონერ და, დანიელა დელიე. ჩქი 1959 წანაშ მესიშ თუთას დეფქორწინით.

დანიელა სრულ დროთ პიონერო მსახურენდჷ ართ-ართ დაშორებულ რეგიონს, ბრეტანის, ნამუთ მუშ ჸუდეშე შორს რდუ. თის გაბედულება ოსაჭირუდ, ნამდა ველისპეტით გილართკო სოფელეფშა დო იქადაგკო თექ, სოდეთ კათოლიკეეფ ცხოვრენდეს. ჩქიმცალო დანიელა ხოლო უგნუდვალუო ქადაგენდჷ, მუშენდა მიჩქუდეს, ნამდა ბოლო დროს ფცხოვრენდით (მათ. 25:13). თიშ თეცალ განწყობაქ მიმეხვარეს გამგრძელებდესკო სრულ დროთ მსახურება.

დაქორწინებაშე მუსხირენ დღაშა გილმალ ზედამხედველო დუმანიშნეს. ჩქი ქიმვარჩქვანით უბრალო ცხოვრებას. პირველ კრებას, სოდეთ მეფრთით, 14 მაქადაგებელ რდუ დო თექიან ჯიმალეფს ვა უღდეს პირობეფ, სერით თინეფწკუმა ქუდოფსკიდითკო. ათეშენ სამეფო დარბაზის მატრასეფს გივოჯანუდით. თენა გვალო მოხუჯურ დო გემუან ვა მაფდეს, მარა მანგიორ ხერხემალშო რდუ ჯგირ!

გადატვირთულ გრაფიკიშ უმკუჯინუო, დანიელაქ ხეთეშე ქიმიარჩქვან გილმალ მსახურებას. თის ხშირას უხვადუდ ქომჯინკო ჩქინ ჭიჭე მანქანას უხუცესეფიშ შეხვალამეფიშ გურშენ, ნამუთ დაგეგმილ ვარდჷ, მარა თეშენ დღას ვეჭირებუდ. ჩქი ჟირ წანას ვორდით გილმალ მსახურებას დო თე დროშ დინახალე ქიდიბგურეთ მუსხით მნიშვნელოვან რე წყვილშო გურ გეგნუფაჩან ართიანს დო ართ გუნდცალო რდან (ეკლ. 4:9).

1962 წანას ქიმემწვიეს გალაადიშ 37-ა კლასიშ ვით თუთიან კურსშა, ნამუთ ბრუკლინს (ნიუ-იორკი) იტარებუდ. 100 სტუდენტშე 13 წყვილ რდუ, თაშ ნამდა ჩქინო დიდ პატი რდუ ართო მიკიბლითკო თე სკოლა. ასე ხოლო ჯგირო გუმაშინე თიცალ ჯიმალეფწკუმა ურთიერთობა, მუნერით რდეს ფრედერიკ ფრენცი, იულისიზ გლასი დო ალექსანდრე მაკმილანი. თინეფ რწმენაშ დიდ მაგალითის ირზენდეს.

გურაფაშ დროს მომწოდენდეს გუვავითარითკო დაკვირვებაშ უნარ. ნამთინე საბატონ ონჯუას ქალაქ  ნიუ-იორკიშ ღირშესანიშნაობეფს ვათვლიერენდით, მუთ გურაფაშ ნაწილ რდუ. თუთაშხას მოკლეთ მაფდეს ეიოჭარალ თი ირფელ, მუთ დუვათვალიერით ქალაქის. ხშირას გათებულ შულადირ იფრთუდით საბატონ ონჯუას, მარა ჩქინ ბეთელელ გიდი გამეორებელ კითხვეფს მისვენდეს, ნამდა ვაგმოჭყორდესკო მთავარ აზრეფქ, ნამუთ ჭარუაშ დროს გიმმოდირთუდეს. ართ ონჯუას მთელ ქალაქ მიბლით. ობსერვატორიას ქიგებგით, მუ განსხვავება რდუ მეტეორეფ დო მეტეორიტეფ შკას. ამერიკაშ საბუნებისმეტყველო ისტორიულ მუზეუმს ქიგებგით, მუთ გენესხვავებდეს ართიანშე ნიანგი დო ალიგატორი. ბეთელშა დიბრთითინ, ჩქინ გიდიქ პკითხეს: „მუ განსხვავება რე მეტეორეფ დო მეტეორიტეფ შკას?“. დანიელა მანგარ შულადირ რდუ დო გურუგუჩამუო ქუპასუხ: „მეტეორიტეფს უმოს დიდი კიბირეფ უღნა“.

ჩქინდე გასაკვირო საფრანგეთიშ ფილიალს დუმანიშნეს, სოდეთ 53 წანაშე მეტ ხანს ვმსახურენდით. 1976 წანას ფილიალიშ კომიტეტიშ კოორდინატორო დუმანიშნეს; თეს გეძინელ აფრიკაშ დო შკა აღმოსავლეთიშ ქიანეფშა ხოლო მაფუდ გილაულარ, სოდეთ ჩქინ საქმიანობა აკრძალულ ვარდა შეზღუდულ რდუ. ჟიშე მოშინაფილ შემთხვევაქ ზუსტას თიმწკუმა მოხვად, მუჟამსით ართ-ართ თეცალ ქიანაშა, გაბონშა იბდით. სიმართლე ქოიწუათინ, ირიათო ვა ვორდჷ მზათ თეცალ მოულოდნელ შემთხვევეფშო. მარა დანიელა მანგარო მოხვარუდ ირნერ დავალებაშ შესრულებას.

ბეთელს მსახურებაქ ხეთეშე ქიმეჸოროფეს. დანიელა ჩქინ პუბლიკაციეფს თარგმნუნდჷ; თიქ ინგლისურ ხუთ თუთაშა გალაადიშ ულაშახ დიგურუ. ბეთელიშ საქმეს ჩქინდა დიდ კმოყოფილება მოუღუდ, მარა კრებაშ საქმეეფს — მაჟია თისხი ხიოლ. ჯგირო ფშუ თი დრო, მუჟამსით მა დო დანიელა შულადირეფ პარიზიშ მეტროთ, სერით გვიანო ბიბლიაშ გურაფეფიშ ოტარეფშა მიფშით. მარა ბედნერეფ ვორდით, მუშენდა ბიბლიაშ მაგურაფალეფ სულიერო წოხოლე მიშეს. სანარღოთ, დანიელაშ ჯამრთელობაშ მდგომარეობაქ უცფას დითირ დო თის უკვე ვეშულებუდ მსახურებას აქტიურო მონაწილება.

1993 წანას თის კიბოშ დიაგნოზ ქიგუშკვეს. მანგარ რთულ მკურნალობაქ დესაჭირ, მუჭოთ ოპერაციაქ თეშ ქიმიოთერაპიაქ ხოლო. 15 წანაშ უკულ კიბოქ ხოლო უმოს რთულ ფორმათ კინ ქირჩქინ დუდ. დანიელას მანგარო უჸორდჷ მუშ სამუშა, ათეშენ მუჟამსით თიშ ჯანმრთელობაქ გეუჯგუშუნ, კინ გაგრძელ თარგმნუა.

გლახა ჯამრთელობაშ უმკუჯინუო, დღას ვამფიქრებნა ბეთელს მსახურებაშ მეტება. მარა მუშო ოკო რაგად, ლეხ რექინ თეშ ბეთელს მსახურებას მუშ სირთულეეფ მოჸუნს, განსაკუთრებულო, მუჟამსით შხვეფს ვესმებ, მუსხით რთულ რე მდგომარეობა (იგავ. 14:13). 70 წანას გინოჩილათირ დანიელას თბილ სახე დო ბუნებრივ სისქვამე იშენით უღუდ, ათეშენ ფიზიკურ მდგომარეობა იზმათ ვეგიოხედ. თინა დუც ვა უცოდილუანდჷ მითინს. პირიქით, ოცადუდ ირიათო შხვეფს ქიმეხვარკო. თის უჩქუდ, ნამდა მარჩქილე უჯის შეულებუდ მეხვარკო თინეფს, მით იტანჯებუდ (იგავ. 17:17). თინა მუშ გამოცდილებათ ბრელ დას ოხვარუდ, გიორჯგინესკო კიბოშ შიშის.

ჩქი ახალ სირთულექ ხოლო ქიგმაძინეს. დანიელას ვეშულებუდ ქიმსახურკო სრულ დროთ. მარა თინა ოცადუდ შხვადოშხვა საშვალებეფით ქიმმეხვარკო. დანიელაქ ბრელ მუთუნ აკეთ, ნამდა უმოსო გამმარტივკო ცხოვრება, მუდგაქ საშვალება მუჩჷ 37 წანაშე  მეტ ხანს ვიმსახურკო ფილიალიშ კომიტეტიშ კოორდინატორო. მაგალთო, თინა ჩქინო ოჭკუმალს ამზადენდჷ, ნამდა ოთახის ომჭკუმდესკო დო თეგვარო, ირ დღას ჭიჭე ხანით ართო მომსვანჯებდესკო (იგავ. 18:22).

დანიელა ირიათო ოპტიმისტურ განწყობათ გიშეგორუდ; თინა სიცოცხლეთ ეფშა რდუ. თის მასმაშა ქიგუშკვეს კიბოშ დიაგნოზი. ჩქი მანგარ უსუსურო იბგინით დუდ. ქიმიოთერაპია დო რადიოთერაპიაშ მკურნალობა დანიელას თეშ მიდუღანდჷ ძალეფს, ნამდა მინშა ონდეთ გილეშ. გურს მიჭუნდჷ თიშ ძირაფა, ნამდა ჩქიმ ძვირფას მეუღლე, ნამუთ გამოცდილ მთარგმნელ რდუ, ასე ონდეთ აკოშაყარანდჷ ორაგადე სიტყვეფს.

თეცალ მდგომარეობაშ უმკუჯინუო, ლოცვა ვემემტებნა, მუშენდა დარწმუნებულ ვორდით, იეჰოვა დღას ვა დუშვენდჷ თიშე უმოსის, ვინემ შემალებედეს (1 კორ. 10:13). ვოცადუდით იეჰოვაშ მარდულეფ ვორდითკო თი მოხვარაშენ, ნამდგას მუშ სიტყვა ბიბლიაშ, ბეთელიშ სამედიცინო განყოფილებაშ დო სულიერ ოჯახიშ საშვალებათ მარზენდეს.

ხშირას ფთუხლენდით იეჰოვას ხემძღვანელობას მკურნალობაწკუმა დაკავშირებით. ართშა ირნერ მკურნალობაშ უმშო ქიდოპსკიდით. ირ ქიმიოთერაპიაშ კურსიშ უკულ დანიელას გონება უდინუდ; ექიმს, ნამუთ თის 23 წანას მკურნალენდჷ, ვეიანწყინ მუ რდუ თეშ მიზეზ. თის მუთუნნერ ალტერნატიულ მკურნალობაშ დანიშნებაქ ვეშიალებუ. თაშ ნამდა, მკურნალობაშ მუთუნნერ იმენდის ვა მარზენდეს დო მოინტერესდეს მუჭო იჸუაფუდ საქმე. ჭიჭე ხანშა შხვა ონკოლოგიქ დეთანხმჷ დანიელაშ მკურნალობას. იეჰოვაშ ხე ქიბგინით, ნამუთ მოხვარდეს, გავურზითკო ჩქინ ოწუხებელს.

ქიდიბგურეთ ბრელ ვეპწუხითკონ, თეშ გავურზითკო ჩქინ პრობლემას. მუჭოთ იესოქ თქუ: „არძა დღას დასაბაღო უღჷ მუშ გაჭირება“ (მათ. 6:34). თე ირფელიშ გინოღალას დადებით განწყობა დო იუმორიშ გრძნობა ხოლო მოხვარდეს. მაგალთო, ართშა მუჟამსით დანიელა ჟირ თუთას ქიმიოთერაპიაშ უმშო რდუნ, თიქ გოძიცებულო მიწუ: „თეცალ ჯგირო დღას ვამგინაფ დუდ“ (იგავ. 17:22). მართალ რე, მანგარო წვალენდჷ, მარა იშენით ოსიამვონუდ ხონარმაღალო დო დაჯერებულო სამეფო ობირეშეფიშ ბირა.

თიშ დადებით განწყობა მა ხოლო მოხვარუდ, მივერიკო ჩქიმ პრობლემეფს, ნამუთ ასაკის მოჸუნს. სიმართლე ქოიწუათინ, მთელ 57 წანას დანიელა ზრუნენდჷ ჩქიმ ირნერ საჭიროებეფშე. მაგალთო, თის დღას ვა უძირაფ ჩქიმდა, მუჭო ჭუნდჷ კვერცხის. თაშ ნამდა, მუჟამსით თიქ სერიოზულო დელახ, დაგურაფალქ მაჸუ რჩხუალაქ, ნახუაქ დო უბრალო ოჭკუმალიშ კეთებაქ. მუსხირენშა ჭირქეფქ გომტირხ, მარა იშენით ხიოლით ვორთუდ ირნერ საქმეს, ნამდა დანიელა ქუვასიამოვნიკო. *

მუჟამსით ულირს იფშინანქ, შემლებ ფთქუე, ნამდა თი პრობლემეფ დო შეზღუდვეფშე, ნამუთ გლახა ჯამრთელობას დო ასაკის მოჸუნს, ბრელ მუთუნ დიბგურე. პირველ, დღას ოკო გეგნვაჸუნათ საქმეეფს თეშ, ნამდა დროქ ვა მაშუან ჩქინ საჸოროფო მეუღლეშო. ჯგირო გეგმიბრინუათ ოკო თი წანეფ, მუჟამსით ძალეფით ვორეთ ეფშა, ნამდა ყურადღება ვემვარკათ ჩქინ საჸოროფო კათას (ეკლ. 9:9). მაჟია, ზედმეტო ვებწუხათ ოკო ჭიჭე მუდგარენეფშე, ვარა შილებე გენკმოსკიდან ბრელ კურთხევაქ, ნამუთ ირ დღას მიღნა (იგავ. 15:15).

მუჟამსით იფშინანქ ჩქინ ცხოვრებას, ნამუთ სრულ დროთ მსახურებას გუვატარით, დარწმუნებულ ვორექ, ნამდა იეჰოვაქ ველუდით თიშე უმოსო მაკურთხეს. მა ხოლო ფსალმუნმაბირეცალო ბგინაფლენქ დუც, ნამუთიქ თქუ: „იეჰოვაქ ჯგირო მიმექცუ“ (ფსალმ. 116:7).