1. მუ რჩევა მეჩჷ მოციქულ პეტრექ თანამორწმუნეეფს დო მუშენ შილებე თე რჩევა თეშ იძირედას, ნამდა თიშ მეჸუნა ძნელ რე?

 ზეცას ცხოვრებაშ იმენდ მიღნა დოვარ დედამიწას, ჯგირობუას მომღანა მოციქულ პეტრეშ რჩევაშე დაფიქრება, ნამუთ პირველ საუკუნეს ცხებულ ქრისტიანეფს მეჩჷ: «ირნერო წმინდეფ რდათ, თი წმინდაცალო, მიდგაქ დოიძახეს, მუშენდა ჭარილ რე: „რდათ წმინდეფ, მუშენდა წმინდა ვორექ მა“» (1 პეტ. 1:15, 16). თე სიტყვეფშე იძირე, ნამდა ჩქი შემლებნა მივაჸუნათ იეჰოვაშ მაგალითის, ნამუთ არძაშ უჯგუშო გიმირჩქინანს სიწმინდეს. სიწმინდეშ ირნერო გიმორჩქინა ჩქინ ვალდებულება რე. მინშა შილებე თეშ იძირედას, ნამდა არასრულყოფილ კოჩის თენა ვაკეთებე. პეტრე ხოლო ჩირთუდ, მარა თიშ მაგალით მოძირანა, ნამდა შემლებნა ვორდათ წმინდეფ.

2. მუ კითხვეფს გუვარჩიენთ თე სტატიას?

² თე სტატიას გუვარჩიენთ მუსხირენ კითხვას: მუ რე სიწმინდე? მუს მოგურუანა ბიბლია იეჰოვაშ სიწმინდეშ გურშენ? მუჭო შემლებნა ირნერო წმინდეფ ვორდათ? მუ კავშირ რე სიწმინდე დო იეჰოვაწკუმა ჩქინ ურთიერთობა შქას?

3. მუს ფიქრენს ნამთინე სიწმინდეშ გურშენ, მარა სოვრეშე შემლებნა გებგათ სიმართლე?

³ ბრელ ფიქრენს, ნამდა წმინდა ადამიანს მიკაქუნს რელიგიურ ბარგ, თინა ირო სერიოზულო იჯინე დო დღას ვეძიცანს. მარა თენა ვა რე სიმართლე. ბიბლიას წმინდა ღორონთიშ, იეჰოვაშ, გურშენ ჭარჷ, ნამდა თინა რე „ბედნერ ღორონთ“ (1 ტიმ. 1:11). თექ თიშ თაყვანიშმცემელეფ ხოლო ბედნერეფო რენა მოშინაფილ (ფსალმ. 144:15). იესოქ ვემიწონუ თი ადამიანეფ, მით განსხვავებულ ბარგის  მიკიქუნანდეს დო ჯგირ საქმეეფს ხვალე ხალხიშ ოძირაფალო ორთუდეს (მათ. 6:1; მარ. 12:38). მუჭოთ ქრისტიანეფ, ჩქინ დამოკიდებულებას სიწმინდეშ მიმართ გივორსხუანთ თიშა, მუთ ბიბლიაშე დიბგურეთ. დებრწმუნით, ნამდა ჩქინ წმინდა დო მოჸოროფე ღორონთ დღას ვამჩანდეს თიცალ მითითებას, ნამდგაშ მეჸუნა ვეშმალებედეს. თაშ ნამდა, მუჟამსით იეჰოვა მირაგადნა, „რდათ წმინდეფ“ ჩქი ბჯერა ნამდა, შემლებნა თეშ კეთება, მარა ირნერო წმინდეფ ქუვორდათინ, საჭირო რე, მარჩქილედან, მუ რე სიწმინდე.

4. მუს ნიშნენს სიტყვეფ წმინდა დო სიწმინდე?

⁴ მუ რე სიწმინდე? ბიბლიას სიტყვეფს წმინდა დო სიწმინდე უმენტაშო ზნეობრივ დო რელიგიურ სისუფთავე იგულისხმებ. თინა ღორონთიშ მსახურებაშო გიშართილს ხოლო ნიშნენს. შხვა სიტყვეფით ქოფთქუათინ, წმინდეფო იფთვალუთ თიმწკუმა, მუჟამსით ვორეთ ზნეობრივო სუფთეფ, ვომსახურუთ იეჰოვას მუს ოკონ თეშ დო მიღნა თიწკუმა ხოლოშიან პირად ურთიერთობა. მართალო გასაკვირ რე, ნამდა სრულყოფილო წმინდა ღორონთის, ჩქინწკუმა, არასრულყოფილ ადამიანეფწკუმა, ოკო ურთიერთობა.

5. მუს ბგურაფლენთ იეჰოვაშ გურშენ ართგურ ანგელოზეფშე?

⁵ იეჰოვა ირნერო სუფთა დო წმინდა რე. თეს ჩქი ვორწყეთ თევრეშე, მუჭო ეჭარეს თინა სერაფიმეფქ, ანგელოზეფქ, მით ღორონთიშ ტახტწკუმა მსახურენა. თინეფქ თქუეს: „წმინდა რე, წმინდა რე, წმინდა რე იეჰოვა ლაშქარეფიშ ღორონთ“ (ეს. 6:3). მუშო ოკო რაგად, ანგელოზეფს წმინდა ღორონთწკუმა ხოლოშიან ურთიერთობა თიშენ უღნა, ნამდა მუნეფ ხოლო წმინდეფ რენა. ათეშ გურშენ გინირთუდ დედამიწას წმინდათ თი ადგილ, სოდეთ ანგელოზეფ ღორონთიშ ცნობას გინოჩანდეს ადამიანეფს. თაშ მოხვად მოსეშ შემთხვევას, მუჟამსით თინა დაჩხირმონტებულ ბართვწკუმა გერდჷ (გამ. 3:2—5; იეს. 5:15).

6, 7. ა) მუჭოთ გამოსვლაშ 15:1 დო 11-ის ჭარჷ, მუ თქუ მოსექ ღორონთიშ სიწმინდეშ გურშენ? ბ) მუ გაშინანდჷ ისრაელეფს, ნამდა ღორონთ წმინდა რე? (ქოძირით სურათ გალენ გვერდის)

⁶ ჭითა ზღვაშ გინოკვათუაშ უკულ მოსექ ისრაელეფს გუცხად, ნამდა მუნეფიშ ღორონთ, იეჰოვა, წმინდა რე (წეკითხით გამოსვლაშ 15:1, 11). ეგვიპტელეფ, ნამუთ ტყურა ღორონთეფს ცენდეს თაყვანს, ხოლოს ხოლო ვა რდეს სიწმინდეწკუმა. თეშ რაგად შემლებნა ქანაანელეფშენ ხოლო. თინეფიშ ღორონთეფიშ თაყვანიშცემაშა მიშეშ ბაღანეფიშ შეწირუა დო სექსუალურ გარყვნილება (ლევ. 18:3, 4, 21—24; კან. 18:9, 10). მარა იეჰოვა ვა გუდჷ თე ტყურა ღორონთეფს. თინა დღას ვეთხინდჷ მუშ მსახურეფშე, გაკეთესკო თიცალ მუდგარენ, მუთ უწმინდურ რდჷ. იეჰოვა სრულყოფილო წმინდა რე. თენა ჯგირო იძირედ თი ნაჭარაშე, ნამუთ მღვდელმთავარიშ დუდიშ გიორთუმალარიშ ოქროშ ფირფიტას უღუდ. თექ მიკოჭარუდ: „წმინდა რე იეჰოვა“ (გამ. 28:36—38).

⁷ ფირფიტას გეჭარილ ნაჭარა არძას არწმუნენდჷ, ნამდა იეჰოვა ნამდვილო წმინდა ღორონთ რდჷ. მარა მუშ რაგად შილებე თი ისრაელეფშე, მიდგას ვეშიალებედეს თე ფირფიტაშ ძირაფა, მუშენდა მღვდელმთავარიშ ხოლოშა ვემიართედეს? ვეგეგენდესო თინეფ თე მნიშვნელოვან ინფორმაციას? მუშო ოკო რაგად, ქო. არძას შეულებუდ თე ცნობაშ მორჩქილაფა, მუჟამსით კანონ იკითხირუაფუდ მთელ ისრაელ ხალხიშ წოხოლე (კან. 31:9—12). თქვა ხოლო თექ  ქიგეჸოფედითკონ, თეცალ სიტყვეფს მირჩქილუანდით: „მა ვორექ თქვან ღორონთ . . . წმინდეფ რდათ, მუშენდა წმინდა ვორექ მა“. „წმინდეფ რდათ ჩქიმო, მუშენდა მა იეჰოვა წმინდა ვორექ“ (ლევ. 11:44, 45; 20:7, 26).

8. მუშენ ოკო მივაქცუათ ყურადღება ლევიანეფიშ 19:2-ს დო 1 პეტრეშ 1:14—16-ის?

⁸ მორთ ყურადღება ქიმვაქცუათ, მუ ინოჭარ ლევიანეფიშ 19:2-ს, ნამუთ მთელ ისრაელიშ წოხოლე იჸუაფუდ კითხირებულ. იეჰოვაქ მოსეს უწუ, «გეგნოჩ ისრაელეფს: „რდათ წმინდეფ, მუშენდა წმინდა ვორექ მა, იეჰოვა, თქვან ღორონთ“». შილებე პეტრეს ხოლო თავრეშე მოჸუნდკო ციტატა, მუჟამსით თანაქრისტიანეფს ელუჩანდჷ, ჸოფედესკო წმინდეფ (წეკითხით 1 პეტრეშ 1:14—16). მუშო ოკო რაგად, ჩქი მოსეშ კანონიშ მორჩილება ვემმეთხიებნა, მარა პეტრეშ სიტყვეფშე იძირე, მუს ბგურაფლენთ ლევიანეფიშ 19:2-შე: მიდგას ღორონთ უჸორს, ოკო ოცადდას, რდას წმინდა, მუშენდა იეჰოვა წმინდა რე. თენა არძას მოხუნა, ვა უღჷ მნიშვნელობა ზეცას ცხოვრებაშ იმენდ მიღნა დოვარ დედამიწას (1 პეტ. 1:4; 1 პეტ. 3:13).

9. მუ ჯგირობუას მომღანა ლევიანეფიშ მა-19 დუდიშ გარჩიება?

⁹ ჩქი მოკონა, გურ გუხარათ ჩქინ წმინდა ღორონთის დო ათეშენ ირნერო ვოცადუთ, ქიდიბგურუათ, მუჭო გინიფრთათ წმინდეფო. ლევიანეფიშ მა-19 დუდის მოჩამილ რჩევეფშე იძირე, ნამდა იეჰოვა ხოლო მოხვარნა თეშ კეთებას. ებრაელ მეცნიერ მარკუს კალიჩ იჩიებ: „თე დუდშა არძა საჭირო ინფორმაცია მიშურს, ბრელნერ საკითხის ოხუ დო შილებე არძაშ უმოს მნიშვნელოვან ნაწილ რდას ლევიანეფიშ წიგნის დო ხვალე თე წიგნის ვარინ, მოსეშ ხუთწიგნეულს ხოლო“. მორთ ასე მუსხირენ მუხლ გუვარჩუათ ლევიანეფიშ მა-19 დუდშე დო ქობძირათ, მუს ბგურაფლენთ თევრეშე ჩქინ ირდღაშიან ცხოვრებაშ გურშენ. თე გარჩიებაშ დროს ვაგგოჭყორდან, ნამდა თე მუხლეფ ეკოჸუნს ფრაზას „რდათ წმინდეფ“.

10, 11. წმინდა საქციელწკუმა დაკავშირებულ ნამ მხარე იძირე ლევიანეფიშ მა-19 დუდიშ დაჭყაფ სიტყვეფშე დო მუშენ რე თენა მნიშვნელოვან?

¹⁰ თიშ უკულ მუთ ისრაელეფს მეჩჷ მითითება, ნამდა წმინდეფ ჸოფედესკო, იეჰოვაქ  გეუძინ: „პატი ცით დიდას დო მუმას . . . მა ვორექ იეჰოვა“ (ლევ. 19:2, 3).

¹¹ მუშო ოკო რაგად, მნიშვნელოვან რე მივაჸუნათ ღორონთიშ მითითებას დო პატი ფცათ მშობლეფს. ქიგიშინით შემთხვევა, მუჟამსით ართ კოჩიქ იესოს კითხჷ: „ნამ ჯგირ საქმეეფ ოკო ვაკეთე მარადიულ სიცოცხლეშ მიოღებელო?“. ართ-ართ მუთ იესოქ პასუხო უწუ, რდჷ, ნამდა პატი უცემუდკო მუმაშა დო დიდაშა (მათ. 19:16—19). იესოქ ფარისეველეფს დო მწიგნობარეფს განჭყორ, მუშენდა თინეფ ირფელს ორთუდეს, ნამდა დუდ ეუჩილითესკო მშობლეფიშ პატიცემას. თეშნერო თინეფქ პატი გეუჸოთეს ღორონთიშ სიტყვეფს (მათ. 15:3—6). ღორონთიშ სიტყვაშა მიშეშ ვით მცნებაშე მასმა, ნამდგას ლევიანეფიშ 19:3-ს ბკითხულენთ (ლევ. 19:3; გამ. 20:12). ხოლო ართშა ყურადღება ქიმვაქცუათ, ნამდა ლევიანეფიშ 19:3-ს მოჩამილ მითითება მშობლეფიშ პატიცემაშ გურშენ ეკოჸუნს ფრაზას „რდათ წმინდეფ, მუშენდა წმინდა ვორექ მა, იეჰოვა, თქვან ღორონთ“.

12. მუჭო შეილებნა მიაჸუნათ ლევიანეფიშ 19:3-ს მოჩამილ მითითებას?

¹² მუჟამსით იეჰოვაშ თე მითითებაშე ფიფქრენთ, შემლებნა ჩქინ დუდის ბკითხათ: „მა ქოფცენქო მშობლეფს პატის?“. ქოფიქრენთ, ნამდა ულირს თეს მუჭოთ საჭირო რდუნ თეშ ვართუდით-და, შეილებნა ასე გეუჯგუშათ თე საკითხის. ულირ ვა გათირენა, მარა ანწ შეილებნა უმოს აკეთათ თქვან მშობლეფშო. მაგალთო, მეტ დრო დუთმით თინეფს ვარდა ქიმეხვარით მატერიალურო, სულიერო დო ემოციურო. თეშნერო მიაჸუნუთ ლევიანეფიშ 19:3-ს მოჩამილ მითითებას.

13. ა) ხოლო მუ რჩევა რდჷ მოჩამილ ლევიანეფიშ 19:3-ს? ბ) მუჭო შემლებნა, მივაჸუნათ იესოშ მაგალითის, ნამუთ ლუკაშ 4:16—18-ს რე მოჩამილ?

¹³ ლევიანეფიშ 19:3-შე ხოლო შხვა მხარე იძირე, ნამდგათ შემლებნა გინიფრთათ წმინდეფო. თინა საბატონიშ დაცვებაშ გურშენ რაგადანს. ქრისტიანეფს ვემეთხიებნა საბატონიშ დაცვება, მარა მუშ გურაფა შემლებნა თევრეშე, მუჭო იცვენდეს ისრაელეფ საბატონს დო მუ ჯგირობუას ღებულენდეს შედეგო? საბატონ რდჷ ირდღაშიან საქმეეფშე მოსვანჯაშ დო სულიერ საკითხეფშე ფიქრიშ დრო. * ათეშენ იესო საბატონს გილეშ სინაგოგაშა დო კითხულენდჷ ღორონთიშ სიტყვას (გამ. 31:12—15; წეკითხით ლუკაშ 4:16—18). ლევიანეფიშ 19:3-ს მოჩამილ ღორონთიშ მითითებაქ, „ქიდეცვით ჩქიმ საბატონეფ“, ოკო გინმოჭყვიდირაფუან, ჩქინ ირდღაშიან საქმეეფშე დრო გეგშურთათ სულიერ საკითხეფს. ხომ ვა ფიქრენთ, ნამდა მუდგარენ გაფნა თე საკითხის ოთირალ? სულიერ საკითხეფს დროს ირიათო გეგშურთუნთ-და, გავითარენთ იეჰოვაწკუმა პირად ხოლოშიან ურთიერთობას დო თენა მიგეხვარებნა, რდათ წმინდეფ.

14. მუ ძირითად ჭეშმარიტებას იმეორენს ლევიანეფიშ მა-19 დუდ?

¹⁴ ლევიანეფიშ მა-19 დუდ ბრელშა იმეორენს ძირითად ჭეშმარიტებას, ნამუთ მოხვარნა, ქუდოფსქიდათ წმინდეფო. მანთხა მუხლ ითებუ თეშნერ სიტყვეფით: „მა ვორექ იეჰოვა, სქან ღორონთ“. თეცალ ფრაზას 16-შა შეფხვადუთ თე დუდის. თენა პირველ მცნებას გუმოშინანა: „მა ვორექ სქან ღორონთ . . . ჩქიმ მეტ შხვა ღორონთეფს ვაცა თაყვან“ (გამ. 20:2, 3). არძა ქრისტიანქ, მიდგას ოკო, წმინდა რდას, საჭირო რე, დერწმუნას, ნამდა მუთუნ დო მითინ ვაცილ ღორონთწკუმა ურთიერთობას. ჩქი იეჰოვაშ  მოწმეეფ ბჯოხონა, ათეშენ გინოჭყვიდილ ოკო მაფდან, დუდ ეუჩილითუათ ნებისმიერ საქმეს, მუთ თიშ წმინდა სახელს შეურაცხყოფას მიორინუანს (ლევ. 19:12; ეს. 57:15).

15. მუშ კეთებას გინმოჭყვიდრაფუანა ლევიანეფიშ მა-19 დუდის მოჩამილ მუხლეფ, ნამუთ მსხვერპლიშ შეწირუას ოხუ?

¹⁵ ისრაელეფ მუნეფიშ ღორონთო იეჰოვას მირჩქინანდეს, მუდგათ ოძირანდეს, ნამდა ომორჩილდეს თიშ კანონეფს. ლევიანეფიშ 18:4-ის ჭარჷ: „შეასრულით ჩქიმ სამართალ დო დეცვით ჩქიმ წესეფ, მა ვორექ იეჰოვა, თქვან ღორონთ“. თე კანონეფშე ნამთინე მა-19 დუდის რე მოჩამილ, მაგალთო, მა-5, მა-8, 21-ა დო 22-ა მუხლეფს. მარა თენა თეშ ოკო გაკეთესკო, ნამდა შეურაცხყოფა ვემიორნუესკო თის, მუთ წმინდა რდჷ იეჰოვაშ თოლს. თე მუხლეფიშ კითხირქ ოკო გინმოჭყვიდირაფუან, განვადიდათ იეჰოვა მუშო მოსაწონ ფორმათ, მუჭოთ თეს ებრაელეფიშ 13:15 ელამჩანა.

16. ლევიანეფიშ მა-19 დუდის მოჩამილ ნამ პრინციპ გუმოშინანა, ნამდა გიშართილეფ ვორდათ თინეფშე, მით ვამსახურნა იეჰოვას?

¹⁶ წმინდეფ ქუვორდათინ, თინეფშე განსხვავებულეფ ოკო ვორდათ, მით ვამსახურნა ღორონთის. თენა შილებე რთულ რდას. მინშა სკოლაშ ამხანაგეფ, თანამშრომელეფ, ნათესეეფ დო შხვეფ შილებე ოცადდან, თიცალ საქმეეფს მიმოღებაფუან მონაწილება, ნამუთ მეცილებნა იეჰოვაშ მსახურებას. თეცალ დროს მნიშვნელოვან გადაწყვეტილება მაფნა მიოღებელ. მუ მიმეხვარებნა სწორას მოქციებას? გუვარჩუათ ლევიანეფიშ 19:19-ს მოჩამილ პრინციპ: „ვამკიქუნათ ჟირ შხვადოშხვა ძაფით ნაშუა ბარგ“. თე კანონ ისრაელეფს გიშართუნდჷ შხვა ხალხშე. ჩქი, მუშო ოკო რაგად, ვა მოვალნა თე კანონიშ დაცვება, მარა განსხვავებულეფ ოკო ვორდათ თი ხალხშე, მიდგაშ რწმენა დო საქმეეფ ოწინააღმდეგ ბიბლიურ გურაფეფს. მუშო ოკო რაგად, მიჸორა ჩქინ ნათესეეფ დო შხვეფ, მარა გადაწყვეტილებეფიშ მიღებაშ დროს ვოძირანთ, ნამდა გიშართილ ვორეთ, მუჭოთ იეჰოვაშ ხალხ. თენა მნიშვნელოვან რე, მუშენდა წმინდეფ ქუვორდათინ, საჭირო რე, გიშართილ ვორდათ ღორონთშო (2 კორ. 6:14—16; 1 პეტ. 4:3, 4).

17, 18. მუს ბგურაფლენთ ლევიანეფიშ 19:23—25-ის მოჩამილ კანონშე?

¹⁷ ფრაზაქ „მა ვორექ იეჰოვა თქვან ღორონთ“ ოკო მეხვარკო ისრაელეფს, ნამდა იეჰოვაწკუმა ურთიერთობა პირველ ადგილს ქიგიორინესკო. ლევიანეფიშ 19:23—25 ოძირანს ართ-ართ მხარეს, მუჭო შეულებდეს თეშ კეთება (წეკითხით).  მუს ნიშნენდჷ თე სიტყვეფ ისრაელეფშო დუნაპირებ ქიანაშ მინულაშ უკულ? მითინ ხილს დორგუნდ-და, სუმ წანას ოკო ვა ჭკუმკო თიშ მიკნაღელ. მანთხა წანას ღორონთიშ ტაძარშა ოკო ქიმიღკო შესაწირო დო ხვალე მახუთა წანას შეულებუდ თიშ მიკნაღელიშ ჭკუმუა. თე კანონს ოკო ქუმუხვარებუდკო ისრაელეფშა თიშ გაგებას, ნამდა მუნეფიშ საჭიროებეფ პირველ ადგილს ვეგიორინუესკო. თინეფქ ოკო მიენდესკო იეჰოვაშ მზრუნველობას დო თიშ თაყვანიშცემა პირველ ადგილს ქიგიორინესკო. ღორონთ ქიზრუნენდჷ, ნამდა თინეფს უღდესკო დასაბაღ ოჭკუმალ. ათეშენ ელუჩანდჷ, გურხვე შესაწირავეფ ქუმუღალდესკო.

¹⁸ კანონ, ნამუთ ლევიანეფიშ 19:23—25-ის რე ენოჭარილ, გუმოშინანა გვალას ქადაგებაშ დროს რაგადებულ იესოშ სიტყვეფს: „მეტო ვეწუხათ, მუ ჭკუმათ ვარდა მუ შვათ . . . თქვან ზეციერ მუმას უჩქ, ნამდა გოსაჭირნა თე ირფელ“. ღორონთ ფრინველეფშე ქოზრუნენს-და, ჩქინდე ხოლო იზრუნენს (მათ. 6:25, 26, 32). ჩქი ვონდუთ იეჰოვაშ მზრუნველობას დო ვოხვარუთ გაჭირებულეფს. თეს გეძინელ, ხიოლით ვაკეთენთ შესაწირავეფს კრებაშ საჭიროებეფშო. იეჰოვა ორწყე თეცალ ხეგოფაჩილობას დო მაკურთხენა (მათ. 6:2—4). ხეგოფაჩილობაშ გიმორჩქინათ ვოძირანთ, ნამდა მარჩქილენა, მუ პრინციპ ინოძ ლევიანეფიშ 19:23—25-ის მოჩამილ კანონს.

19. მუშენ იჸუ თქვანო ჯგირქ ლევიანეფიშ წიგნშე თე მონაკვეთეფიშ გარჩიებაქ?

¹⁹ ჩქი ხვალე მუსხირენ მხარე გუვარჩით ლევიანეფიშ მა-19 დუდშე, მუთ მოძირანა, მუჭო შემლებნა, მივაჸუნათ ჩქინ წმინდა ღორონთიშ მაგალითის. თიშ მაგალითიშ მეჸუნათ ვოცადუთ, ნამდა ირნერ საქციელს წმინდეფ ვორდათ (1 პეტ. 1:15). ბრელ, მით ვამსახურ იეჰოვას, მუშ თოლით ორწყე თე ჯგირ საქმეეფს დო თექ ნამთინეს გინაჭყვიდირაფუ, განადიდკო ჩქინ ღორონთ (1 პეტ. 2:12). ლევიანეფიშ მა-19 დუდშე ხოლო ბრელ მუდგარენიშ გურაფა შემლებნა. ანწიან სტატიას თე დუდიშ შხვა მუხლეფს გუვარჩიენთ დო ქობძირუნთ, ხოლო მუჭო შემლებნა ვორდათ წმინდეფ, მუჭოთ თენა პეტრექ ელამჩეს.