1. მუშენ უწუ პავლე მოციქულქ ქრისტიანეფს, ნამდა ართიანშა „ხოლო მეტო“ ელუკინდესკო გურშა?

მუშენ ოკო ვოცადუდათ და დო ჯიმალეფიშ გურშა ელაკინას ხოლო უმოსო? მოციქულ პავლე თეშ მიზეზის ეთმონწყუნს ებრაელეფშა მეჭარილ წერილს. თიქ ჭარ: „ყურადღება გეგმიფრჩქინათ, ნამდა ართიან მიჸორდან დო ჯგირ საქმეეფ ვაკეთათ. ვემვოტუათ ჩქინ შეხვალამეფ, მუჭოთ ნამთინეს წესო უღუ, გურშა ელუკინათ ართიანს დო ხოლო მეტო, მუთ უმოსო ვორწყეთ თი დღაშ მონჭაფას“ (ებრ. 10:24, 25). ჯიმალეფს შილებედ უკვენდესკო, მუშენ უწუ პავლექ თინეფს, ართიანშა ხოლო უმოსო ელუკინდესკო გურშა. სოდგარენ ხუთ წანაშ უკულ თეშ მიზეზიქ უმოს უჯგუშო გეგმორჩინდჷ, მუჟამსით თინეფქ ქოძირეს, ნამდა იერუსალიმიშ განადგურება მონჭაფილ რდუ. თი დროს მახორუ ქრისტიანეფქ ქიმეხვადეს, ნამდა ოკო დუჯერებდესკო იესოშ სიტყვეფშა დო უნტებდესკო ქალაქშე (საქ. 2:19, 20; ლუკ. 21:20—22). „იეჰოვაშ დიდ დო დიდებულ“ დღაქ ახ.წ. 70 წანას ქუდოდირთ, მუჟამსით რომაელეფქ იერუსალიმ განადგურეს.

2. მუშენ ოკო ვორდათ ამდღა ხოლო უმოსო დაინტერესებულ შხვეფიშ გურშა ელაკინათ?

² ამდღა ხოლო უმოსო ვორწყეთ, ნამდა „იეჰოვაშ დღა“ მონჭაფილ  რე (იოელ. 2:11). წინასწარმეტყველ სოფონიაქ თქუ: „ხოლოს რე იეჰოვაშ დიდ დღა, ხოლოს რე დო მანგარო ინჭუაფ“ (სოფ. 1:14). თე გაფრთხილება ჩქინ დროს ხოლო ოხუ, ათეშენ გეფთვალისწინათ ოკო პავლეშ სიტყვეფ: „ყურადღება გეგმიფრჩქინათ, ნამდა ართიან მიჸორდან დო ჯგირ საქმეეფ ვაკეთათ“ (ებრ. 10:24). თაშ ნამდა, ყურადღება ქიმვაქცუათ ჩქინ და დო ჯიმალეფს დო გურშა ელვუკინათ, მუჟამსით დესაჭირებნა.

3. მუ თქუ პავლე მოციქულქ გურიშ ელაკინაშ გურშენ? (ქოძირით სურათი 20 გვერდის).

³ იგავეფს ჭარ: „წუხება კოც გურს უმონკენს, გემუან სიტყვა გურს ხიოლით ეუფშანს“ (იგავ. 12:25). თეშ რაგად შილებე ჩქინ გურშენ ხოლო. კანკალეშა ჩქი ხოლო მოკონა გურიშ ელმაკინალ სიტყვეფიშ მორჩქილაფა. პავლექ თქუ, ნამდა თინეფს ხოლო ოსაჭირდეს გურიშ ექექაფა, მიდგას შხვეფიშ გურშა ელაკინაშ პასუხიშმგებლობა უღუდ. თიქ რომაელ ქრისტიანეფს მეჭარ: „მანგარო მოკო თქვან ძირაფა, მუშენდა გოირთათ სულიერ ძღვინი თქვან გამანგარებელო, უმოს სწორას ქოფთქუენ, თიშენ, ნამდა გურშა ელვუკინათ ართიანს ჩქინ-ჩქინ რწმენათ“ (რომ. 1:11, 12). მართალ რე, პავლე შხვეფს გურშა ელუკინანდჷ, მარა კანკალეშა მუს ხოლო ოსაჭირუდ გურიშ ექექაფა (წეკითხით რომაელები 15:30—32). *

4, 5. მის ოკო ელვუკინათ გურშა დო მუჭო?

⁴ ცქვაფას იმსახურენა თი და დო ჯიმალეფ, მით ღორონც დუდ გინოდვალირო ომსახურნა, მაგალთო, ართგურ პიონერეფი. ბრელქ დიდ მსხვერპლშა იდუ თიშენ, ნამდა სრულ დროთ პიონერო უმსახურებდესკო. თეშ რაგად შილებე მისიონერეფ, ბეთელელეფ, რაიონულ ზედამხედველეფ, თინეფიშ ოსურეფ დო დაშორებულ მთარგმნელობით ოფისის მსახურენან თი და დო ჯიმალეფშე. თინეფქ ბრელ მუთუნ დათმეს, ნამდა უმოს მეტ დრო მეუძღვინესკო წმინდა მსახურებას. ათეშენ თე და დო ჯიმალეფს გურიშ ელაკინა ოსაჭირნა. რენა თიცალ მაუწყებელეფ ხოლო, ნამუსით შურ დო გურით ოკო, კინ გაგრძელას სრულ დროთ მსახურება, მარა ვეშულებნა თეშ კეთება. თინეფ მარდულეფ რენა მუჟამსით გურშა ელვუკინანთ.

⁵ გურშა ელაკინა ოსაჭირნა თი და დო ჯიმალეფს, მით ვექორწინებნა, მუშენდა ითვალისწინენა მითითებას, ნამდა დეოჯახან „ოღონც უფალს“ (1 კორ. 7:39). გურიშ ემაქექაფალ სიტყვეფიშ მორჩქილაფა ქომონჯეფშე თი ოსურეფს ხოლო ოსაჭირნა, მით ბრელს ხანდენს (იგავ. 31:28, 31). თი ქრისტიანეფს ხოლო ოსაჭირ გურშა ელაკინა, ნამუთ ართგურეფ სკიდუნა თხოზინიშ დო ლახალაშ უმკუჯინუო (2 თეს. 1:3—5). იეჰოვა დო იესო გურშა ეუქექუანა არძა ართგურ მსახურს (წეკითხით 2 თესალონიკელები 2:16, 17). *

6. მუს საქმეს ორთუნა უხუცესეფ, მუჭო ესაიაშ 32:1, 2-ს რე ეჭარილ?

⁶ წეკითხით ესაია 32:1, 2. * იესო ქრისტე ფხემძღვანელენა დო გურშა ელამკინანა, მუჟამსით თენა მოსაჭირნა. თეშ კეთებას იესოს მუშ ცხებულ ჯიმალეფ დო „მთავრეფი“ ოხვარ, ნამუთ შხვა შხურშე რენა. ზუსტას თაშ ოკო რდას, მუშენდა უხუცესეფ „ვაუნჩაშენა“ შხვეფიშ რწმენაშე, თეშ მანგიორო, თინეფ  ოხვარნა ჯიმალეფს, ვა უდინან ხიოლქ (2 კორ. 1:24).

7, 8. მუჭო შეულებნა უხუცესეფს გურიშ ელაკინა სიტყვეფით დო საქმეეფით?

⁷ მოციქულ პავლექ ჯგირ მაგალით დომტუეს. თიქ თესალონიკელ ქრისტიანეფს, ნამუთ თი დროს დევნეფს შითმოხვადუდეს, მეჭარ: „სათუთ გრძნობეფ მიღნა თქვანწკუმა დო ათეშენ სიამოვნებით გინორჩით ხვალე სახიოლო ამბე ვარინ, ჩქინ შურეფ ხოლო, მუშენდა ქიმეჸოროფით“ (1 თეს. 2:8).

⁸ პავლექ ეფესოელ უხუცესეფს მეჭარ, ნამდა გურიშ ელაკინაშო ხვალე სიტყვეფ ვა რდუ დასაბაღი: «ოკო მეხვარათ ძალა გიშალიებურეფს დო რშუდან უფალ იესოშ სიტყვეფი: „შხვაშა ჯგირიშ კეთებას უმოს მეტ ბედნერობა მოუღჷ, ვინემ მეღებას“» (საქ. 20:35). პავლეს ჯიმალეფშა ხვალე გურიშ ელაკინა ვაკოდ, თინა მზათ რდუ ირფელ დუთმებუდკო დო თინეფიშ გურშენ დუდ გეგნუდვალუდკო (2 კორ. 12:15). თეგვარო, უხუცესეფქ ხვალე სიტყვეფით ოკო ველუკინან ქრისტიანეფს გურშა, თინეფქ პირად ინტერესიშ გიმორჩქინათ ოკო ოძირუან, ნამდა შხვეფიშ ჯგირობუაშო ზრუნენა (1 კორ. 14:3).

9. მუჭო შეულებნა უხუცესეფს გურიშ ელმაკინალ რჩევაშ მეჩამა?

⁹ ართიანიშ ჯგირობუაშო ზრუნვაშა მიშურს რჩევაშ მეჩამა. თე დროს უხუცესეფქ ოკო მიაჸუნან ბიბლიას მოჩამილ მაგალითის, სოვრეშეთ იძირე, მუჭო შილებე რჩევაშ მეჩამათ შხვეფშა გურიშ ელაკინა. თეშ ჯგირ მაგალით იესო ქრისტექ დომტუეს გათელებაშ უკულ. თის მცირე აზიაშ ნამთინე კრებაშა მკაცრი რჩევა აფუდ მიოჩამალ, მარა ქიდეკვირით მუჭო იჭყანს თინა ჩიებას. ეფესოშ, პერგამონიშ დო თიატირიშ კრებეფს თიქ დიო ქაცქუ დო უკულ რჩევა ქიმეჩ (გამოცხ. 2:1—5, 12, 13, 18, 19). იესოქ ლაოდიკეაშ კრებას უწუ: „მიჸორსინ თინეფს არძას რჩევას ვარზენქ დო აღმზრდელობით ზომეფს გიმიფრჩქინანქ თინეფწკუმა. ათეშენ მონდომა გეგმირჩქინ დო მინანი“ (გამოცხ. 3:19). უხუცესეფ ოცადნა მიაჸუნან იესოშ მაგალითის, მუჟამსით შხვეფშა რჩევა აფნა მიოჩამალი.

10. მუჭო შემლებნა არძას გურიშ ელაკინა ართიანშა?

¹⁰ გურიშ ელაკინა ხვალე უხუცესეფიშ პასუხიშმგებლობა  ვა რე. პავლექ ქრისტიანეფს რჩევა მეჩჷ, ნამუთ ჩიებას ოხუდ. თიქ თქუ: „თქვან პიჯშე . . . ხვალე ჯგირქ გიშართას, ნამუთ ხეს შეუნწყუნს ჯგირობუაშო ზრუნვას, მუჭოთ თეს საჭიროება მითხინს, მუშენდა თექ მარდიქ ქიჸუას მარჩქილეფშო“ (ეფეს. 4:29). არძაქ ოკო დეფიფქრათ მუჭო შემლებნა შხვეფიშ მოხვარა. პავლექ ებრაელ ქრისტიანეფს ელუჩ: „გოთინით გიმოკინელ ხელეფ დო დასუსტებულ ბირგულეფ დო გასწორით თქვან გილაულარ შარა თქვან კუჩხშო, მუშენდა ქულაქ კუჩხ ვეწყუნუას დო დოსკიდას“ (ებრ. 12:12, 13). არძას დო თეს გეძინელ, ახალგაზრდეფს ხოლო შეულებ შხვეფიშ ჯგირობუაშო ზრუნვა გურიშ ელმაკინალ სიტყვეფით.

11. მუქ მეხვარ მართას დეპრესიაშ დროს?

¹¹ ართ და სახელო მართა, * ნამუსით დეპრესია უღუდუნ ჭარუნს: „ართ დღას, მუჟამისით გურიშ ელაკინა მოსაჭირუდ დო თეშ გურშენ ბლოცულენდინ, ქეშეფხვად ჩქიმდე უნჩაშ დას, ნამუთიქ ჩქიმწკუმა სიტიბა დო თანაგრძნობა გიმირჩქინ, მუდგა თიწკუმა მანგარო მოსაჭირუდ. თიქ მეჩუ, ნამდა მუს ხოლო ზუსტას თიცალ პრობლემა უღუდ, მუნერით თი დროს მა მაწუხენდჷ, თეშ უკულ დუდ ჭიჭეთ უჯგუშო ქიბგინ“. შილებე, თე დას შუროთ ვაგუჩამ გურ, მუშმაჯგირათ იმოქმედ თიშ სიტყვეფქ მართაწკუმა.

12, 13. მუჭო შემლებნა ფილიპელეფიშ 2:1—4-ის მოჩამილ რჩევაშ გიმორნაფა?

¹² პავლექ ფილიპეშ კრებაშ არძა წევრის თეცალ მუდგარენ ელუჩ: „ქეშეილებნა გურშა ელუკინათ ართიანს ქრისტეწკუმა, ჸოროფათ ეუქექუათ დო თინეფიშ მდგომარეობაშა მიშელათ-და, გეიოფშით ჩქიმ ხიოლ; ართ აზრი გიღდან, გიჸორდან ართიან, რდათ ართ შურიშ დო ართ აზრიშ. მუთუნ ვაკეთათ ართიანიშ ჯინით დო ეგოისტობათ, რდათ თანდაბლეფ დო შხვეფ თქვან დუდშე უმოსო მირჩქინით; ხვალე თქვან ჯგირობუაშე ვარინ, შხვეფიშ ჯგირობუაშე ხოლო იხანდით“ (ფილ. 2:1—4).

¹³ დასურო, არძაქ ოკო მინდომას, ნამდა შხვეფიშ ინტერსეფ პირველ ადგილს ქიგიორინუას. თეს გეძინელ, შეილებნა „ჸოროფათ ეუქუქუათ“ დო „თინეფიშ მდგომარეობაშა მიშელათ“, თეგვარო გურშა ეუქექუანთ და დო ჯიმალეფს.

14. მუქ შილებე ბრელშო გურიშ ემაკინალქ იჸუას?

¹⁴ ჩქინდა ხიოლ მოუღჷ თიშ რჩქინას, ნამდა ართგურო აგრძელენა მსახურებას თინეფ, მიდგას ადრე მივეხვარით. მოციქულ იოანექ ჭარ: „მარდულობაშ დიდ მიზეზ მიღჷ თიშენ, ნამდა ჩქიმ სქუალეფ ჭეშმარიტებას გილულა“ (3 იოან. 4). ბრელ პიონერს გურშა ელუკინანს თიშ რჩქინა, ნამდა თინეფ, მიდგას დიდ ხანიშ წოხოლე ჭეშმარიტებაშ გაგებას მეხვარესინ, ამდღა ართგურო ომსახურნა იეჰოვას, ნამთინე შილებე პიონერო ხოლო მსახურენდას. მუჟამსით პიონერეფს გურ გოტახილ აფნან, შემლებნა ქუგვოშინათ თი ჯგირ საქმეეფ, ნამუთ ადრე უკეთებნა შხვეფს ქიმეხვარესკონ თიშენ.

15. მუჭო შემლებნა გურშა ელუკინათ თინეფს, მით ართგურო მსახურენა?

¹⁵ ბრელ რაიონულ ზედამხედველ დო თინეფიშ ოსურეფქ თქვის, ნამდა მანგარო ელუკინეს გურშა კრებეფიშ მონახულებაშ უკულ ჭიჭე წერილიშ მეღებაქ, სოდეთ და დო ჯიმალეფ მარდულობას გიმოხანტუნდეს. მადლობაშ რაგადით, შემლებნა გურშა ელუკინათ უხუცესეფს, მისიონერეფს, პიონერეფს დო ბეთელიშ ოჯახის წევრეფს ხოლო.

16. მუჭო შემლებნა უბრალო საქციელით შხვეფიშ გურშა ელაკინა?

¹⁶ სწორ ვეჸუაფ იფიფქრათ, ნამდა მორდებუან ვორეთინ თიშენ, ვეშმალებენა შხვეფშა გურიშ ელაკინა. შხვეფიშ გურშა ექექაფას ბრელ მუთუნ ვაკო. მაგალთო, შეილებნა უბრალოთ გუძიცუათ შხვეფს, მარა აშო ვაგოიძიცუეს-და, თენა შილებე ნიშნენდას, ნამდა პრობლემა უღნა დო  მიდგაინწკუმა დორაგად ოსაჭირნა. თეცალ დროს შემლებნა ქუმურჩქილუათ დო თეგვარო გურშა ელუკინათ თინეფს (იაკ. 1:19).

17. მუქ ელუკინ გურშა ართ ახალგაზრდა ჯიმას?

¹⁷ ართ ახალგაზრდა ჯიმა ჰენრი, მანგარ გურგოტახილ რდუ, მუშენდა თიშ ხოლოშიან ნათესეფქ დო თეს გეძინელ, მუმაქ ხოლო, ნამუთ უხუცესო მსახურენდუნ, ორგანიზაცია ქიდიტეს. ჰენრის მანგარო ელუკინ გურშა რაიონულ ზედამხედველიშ ყურადღებაქ. თიქ ჰენრი ყავაშა ქუდაპეჯ დო თექ საშვალება ქიმეჩ, ქუჩიებინუდკო მუშ პრობლემაშ გურშენ. ჰენრიქ ქიმეხვად, ნამდა ართგურო მსახურება ოკო გაგრძელკო, მუთ მეხვარებუდ მუშ ოჯახის დართესკო იეჰოვას. თის გურშა ელუკინ თიცალ ბიბლიურ მონაკვეთეფიშ კითხირქ, მუნერით რე ფსალმუნიშ 46 დუდი, სოფონიაშ 3:17 დო მარკოზიშ 10:29, 30.

18. ა) მუ თქუ მეფე სოლომონქ გურიშ ელაკინაშ გურშენ? ბ) მუს ელამჩანა პავლე მოციქულ?

¹⁸ მართა დო ჰენრიშ მაგალითეფ ოძირანს, ნამდა არძას შეულებ გურშა ელუკინას თი და დო ჯიმალეფს, მიდგას თენა ოსაჭირ. მეფე სოლომონქ თქუ: „მუ ჯგირ რე მუშ დროს ნათქუელ სიტყვა! ხიოლით ეფშა თოლეფ გურს ახარენს; ჯგირ ამბე ძვალეფს ამანგარენს“ (იგავ. 15:23, 30). შემლებნა „გინაჯინალ კოშკშე“ ვარდა ჩქინ ვებ-გვერდშე გეგშუკითხათ მუდგაინ გურიშ ემაკინალ თინეფს, მიდგას გურ აფჷ გოტახილ. პავლე მოციქულ იჩიებ, ნამდა სამეფოშ ობირეშეფიშ ართო ბირას ხოლო შეულებ გურიშ ალაკინა. თიქ ჭარ: „ქუდაგურეთ დო ქიგიოწურეთ ართიან ფსალმუნეფით, ღორონთიშ ოდიდებელეფით, ჰამო სულიერ ობირეშეფით დო თით, ნამდა მთელ გურით უბირთ იეჰოვას“ (კოლ. 3:16; საქ. 16:25).

19. მუშენ იჸი ართიანიშ გურშა ელაკინა მნიშვენლოვან დო მუ ოკო ვაკეთათ?

¹⁹ იეჰოვაშ დღას მუთ უმოსო მივანჭუაფუთინ, თით უმოს მნიშვნელოვან იჸი ართიანიშ გურიშ ელაკინა (ებრ. 10:25). ათეშენ მორთ, ქიმვაჸუნათ პავლეშ რჩევას, ნამუთ პირველ საუკუნეშ ქრისტიანეფს მეჩ: „ათეშენ გურშა ეუქექეთ დო გამანგარით ართიან, მუდგასით ქოთ ორთუთ“ (1 თეს. 5:11).