1. მუჭო ელუკინ გურშა იეჰოვაქ კაცობრიობას ედემიშ ბაღის მოხვალამირ ამბეშ უკულ?

იეჰოვა გურიშ ელმაკინალ ღორონთ რე. მუჟამსით კაცობრიობაქ ცოდაშ დო არასრულყოფილებაშ მონობას ქინოლუნ, თევრეშე მოჸუნაფილო იეჰოვა ირიათო გიმირჩქინანდჷ თე თვისებას. ედემიშ ბაღის მოხვალამირ ამბეშ უკულ თიქ ხეთეშე ქიმეჩ ადამიშ გამნარყის იმენდ, ნამუთ თინეფს გურს ეუქექუანდჷ. ადამიანეფშო დიო ხოლო ვა რდუ ირფელ დინაფილ. დაბადებაშ 3:15-ის მოჩამილ წინასწარმეტყველება კაცობრიობას იმენდის მეჩანდჷ, ნამდა საბოლათ სატანას, მუშ დემონეფს დო თიშ არძა უბადო საქმეს ბოლო მეღებუდ (გამოცხ. 12:9; 1 იოან. 3:8).

2. მუჭო ელუკინ გურშა ნოეს იეჰოვაქ?

² იეჰოვაშ მსახურ ნოე, უღორონთო ქიანას ცხოვრენდჷ, სოდეთ ხვალე თიშ ოჯახ ომსახურუდ ღორონც. ირდიხას  ძალადობა დო უზნეობა რდუ მოდვალირ დო ნოეს შილებე გურქ ხოლო გუტირხუკო (დაბ. 6:4, 5, 11; იუდ. 6). მარა ნოეს იეჰოვაქ თიცალ ინფორმაცია გინოჩ, ნამუთ გურშა ელუკინანდჷ დო ძალას მეჩანდჷ, გუგრძელებუდკო თიშ მსახურება (დაბ. 6:9). ღორონთიქ უწუ ნოეს, ნამდა უბადო ქიანაშ მოსპუალას აპირენდჷ. თეს გეძინელ, მითითებეფ ხოლო მეჩჷ მუ ოკო აკეთკო, მუშ დუდიშ დო ოჯახიშ გინასქილიდარო (დაბ. 6:13—18). იეჰოვა დასურო გურშა ელუკინანდჷ ნოეს.

3. მუჭო ელუკინ გურშა იეჰოვაქ იესო ნავეშ სქუას? (ქოძირით სურათ მა-15 გვერდის).

³ იესო ნავეშ სქუას სერიოზულ დავალება უღუდ, თიქ ღორონთიშ ხალხ ოკო დახორუკო დაპირებულ ქიანას. ათეშენ თის თი ერეფიშ ძალიერ ჯარწკუმა ოკო უჩხუპებუდკო, ნამუთ თი ტერიტორიას ოხორანდჷ. იესო ნავეშ სქუას დასურო უღუდ შიშიშ მიზეზ. იეჰოვას ჯგირო არჩქილედ თიშ მდგომარეობა დო მოსეს უწუ, გურშა ელუკინუდკო თიშა: „ქუდანიშნჷ იესო ნავეშ სქუა, გურშა ელუკინ დო გამანგარ, მუშენდა თინა აწაჸუნუ თე ხალხის დო თინა დამკვირდებაფუანს თი დიხას, ნამუსით ძირუნქ“ (კან. 3:28). სოიშახ იესო ნავეშ სქუა მოქმედებას დიჭყანდკონ, იეჰოვაქ თის უწუ: „ხომ ქოიზოჯი, გურ გემანგარ-მაქ! ვა დოიზარზალუას დო ვა გაშკურნას, მუშენდა სოდგა ვედენ, ირდიხას სქანწკუმა იჸუაფ იეჰოვა, სკან ღორონთი“ (იეს. 1:1, 9). თე სიტყვეფ თის დასურო იმენდის ქიმეჩანდჷ.

4, 5. ა) მუჭო ელუკინ გურშა იეჰოვაქ მუშ ხალხის ჯვეშო? ბ) მუჭო ელუკინ გურშა იეჰოვაქ მუშ სქუას?

⁴ იეჰოვა არძა მუშ მსახურს ეუქექუანს გურშა. მაგალთო, თის უჩქუდ, ნამდა იუდეველეფს გურიშ ელაკინა ოსაჭირდეს, მუშენდა ბაბილონიშ ტყვეობას რდეს. ათეშენ თეცალ წინასწარმეტყველება თქუ: „ვა გაშქურნას, მუშენდა სქანწკუმა ვორექ. იშო-აშო ვეჯინა, მუშენდა სქან ღორონთი ვორექ. მა გუგამანგარენქ. მა მიგეხვარებუქ. ჩქიმ სიმართლეშ მარძგვან ხეს ქუმორთხუნქ“ (ეს. 41:10). ჯვეშ დროს მახორუ ქრისტიანეფცალო ღორონთ ამდღა ხოლო ელუკინანს გურშა მუშ ხალხის (წეკითხით 2 კორინთელები 1:3, 4). *

⁵ იეჰოვაქ იესოს ხოლო ელუკინ გურშა. ნათუაშ დროს თიქ ზეცაშე ხონარ მირჩქილუ: „თენა რე ჩქიმ საჸოროფო სქუა, ნამუთ მა მიპწონე“ (მათ. 3:17). თე სიტყვეფ დასურო ელუკინანდჷ იესოს გურშა დედამიწას მსახურებაშ დროს.

6. მუჭო ელუკინ გურშა იესოშ მოწაფეეფს ტალანტეფიშ გურშენ იგავქ?

⁶ იესო მუშ მუმაშ მაგალითის მეჸუნდჷ დო შხვეფს ელუჩანდჷ ართგურეფ ჸოფედესკო. ტალანტეფიშ გურშენ იგავს ბატონ მუშ ართგურ მონეფს ოცქვანს: „ყოჩაღ, ჯგირ დო ართგურ მონა რექ! ჭიჭე ჩუგაბარ დო ართგურობა ვაიდინუაფ, ათეშენ უმოს მეტის ჩუგაბარენქ. ქუმორთ დო გეხარ სქან ბატონწკუმა ართო“ (მათ. 25:21, 23). თე სიტყვეფ გურშა ელუკინანდჷ მოწაფეეფს დო ქიმეხვარებუდ, გაგრძელესკო იეჰოვაშ ართგურ მსახურება.

7. მუჭო ელუკინ გურშა იესოქ მუშ მოციქულეფს დო განსაკუთრებულო პეტრეს?

⁷ მოციქულეფ ხშირას ნირზენდეს, მი რდუ თინეფ შკას არძაშ უდიდაშ, მარა იესო მოთვინებას გიმირჩქინანდჷ დო ელუჩანდჷ, ჸოფედესკო თანდაბლეფ, უნჩაშალა ვა დუჭყაფდესკო დო შხვეფს მემსახურესკო (ლუკ. 22:24—26). პეტრე მოციქულქ ბრელშა დუშვჷ შეცდომა დო თეთ გურ გუტახ იესოს (მათ. 16:21—23;  26:31—35, 75). მარა იესოს ოჭიშ ვა ურთინუაფ პეტრეშა. პირიქით, გურშა ელუკინ დო დავალ, გუმანგარებუდკო მუშ ჯიმალეფ (იოან. 21:16).

8. მუჭო ელუკინ გურშა ხიზკიაქ ჯარიშ უნჩაშეფს დო იუდაშ ხალხის?

⁸ სოიშა იესო დედამიწაშა მიშკო დო გურიშ ელაკინაშ სრუყოფილ მაგალითის მუჩანდესკო, იეჰოვაშ ართგურ მსახურეფს ჯგირო არჩქილედეს, მუსხით მნიშვნელოვან რდუ შხვეფშა გურიშ ელაკინა. მუჟამსით იერუსალიმს ასურელეფიშ ჯარ გოურდუნ, ხიზკიაქ აკოშაყარუ ჯარიშ უნჩაშეფ დო იუდაშ ხალხი, ნამდა გურშა ელუკინკო თინეფს. ბიბლიას ჭარ: „იუდაშ მეფე ხიზკიაშ სიტყვეფქ გურშა ელუკინ ხალხის“ (წეკითხით 2 მატიანე 32:6—8). *

9. მუს მოგურუანა იობიშ წიგნი გურიშ ელაკინაშ გურშენ?

⁹ გურიშ ელაკინაშ ჯგირ მაგალითის იობი მარზენა. იობიშ ითამ მეგობრეფ ოცადუდეს გურშა ელუკინესკო თის, მარა იობიქ უწუ, მუჭო მიქციებუდ თინეფიშ ადგილს ქოჸოფედკო. თინა იჩიებ: „ჩქიმ სიტყვა გუგამანგარენდეს დო გურშა ელაიკინანდეს“ (იობ. 16:1—5). საბოლათ, იობის გურშა ელუკინ ელიჰუშ დო იეჰოვაშ სიტყვეფქ (იობ. 33:24, 25; 36:1, 11; 42:7, 10).

10, 11. ა) მუშენ ოსაჭირუდ იფთახიშ ცირასქუას გურიშ ელაკინა? ბ) ამდღა მის ოსაჭირ გურიშ ელაკინა?

¹⁰ გურიშ ელაკინა იფთახიშ ოსურსქუას ხოლო ოსაჭირუდ. სოიშა ამონელეფწკუმა ოჩხუპეფშა იშუკო, იფთახიქ იეჰოვას პირობა მეჩჷ, ნამდა მაგებაფუანდ-და, ჸუდეს პირველ მიდგა ეწაზადუდუნ, იეჰოვაშ ტაძარს იმსახურენდჷ მთელ მუშ ცხოვრებას. ჩხუპიშ მოგებაშ უკულ იფთახის არძაშ უმოს პირველო მუშ ართკაკალ ძღაბიქ ქეწაზად დო ქიმიახვამ მოგება. იფთახის გურქ მანგარო ქელაჭვჷ. მარა თიქ შეასრულ მუშ პირობა დო მუშ სქუა შილოშა, იეჰოვაშ ტაძარშა მიდაშკვჷ, სოდეთ თინა სიცოცხლეშ ბოლოშა მსახურენდჷ (მსაჯ. 11:30—35).

¹¹ მუშო ოკო რაგად, თენა ეფჷ ვეჸიდ იფთახშო, მარა ხოლო უმოს ძნელ მუშ ძღაბშო იჸუაფუდ, ნამუთ მზათ რდუ შეასრულკო მუშ მუმაშ გადაწყვეტილება (მსაჯ. 11:36, 37). იფთახიშ ძღაბშო თენა თის ნიშნენდჷ, ნამდა დღას ვეგეთხუაფუდ დო ვაშიდ ბაღანეფ. თის გამნარყ ვაჸვენუდ დო ვართ მემკვირდეობა აშიდ. მუშო ოკო რაგად, თის გურიშ ექექაფა დესაჭირებუდ. ბიბლიას ჭარ: „ისრაელს წესო გინირთ: ირ წანას ისრაელ ცირასქუალეფ მიშეს გალაადელ იფთახიშ ცირასქუაშა დო ოცქვანდეს თის, წანმოწანაშე ოთხ დღას“ (მსაჯ. 11:39, 40). ამდღა ხოლო ცქვაფა დო გურიშ ელაკინა ოსაჭირნა თი დაუქორწინებელ და დო ჯიმალეფს, მიდგას მთელ ყურადღება ღორონთიშ მსახურებაშა აფნა გინოღალირ (1 კორ. 7:32—35).

12, 13. მუჭო გამანგარ პეტრექ მუშ ჯიმალეფ?

¹² ღურაშ წოხოლენ სერს იესოქ პეტრე მოციქულს უწუ: „სიმონ, სიმონ, სატანაქ მითხუ, თქვან ცირუა ქობალიშ კაკალცალო. მარა მა იბლოც სქანო, ნამდა რწმენაქ ვეშქელუას დო მუჟამსით მიკირთუქინ, გამანგარე სქან ჯიმალეფ“ (ლუკ. 22:31, 32).

 ¹³ პეტრე ართ-ართ რდუ, მით ქრისტიანულ კრებას ხემძღვანელენდჷ (გალ. 2:9). თიქ მუშ გაბედულ მოქმედებათ გურშა ელუკინ ჯიმალეფს ჟარნეჩდომავითა დღაშ დღახუს დო თიშ უკულ ხოლო. ბრელ წანას მსახურებაშ უკულ თიქ ჯიმალეფს მეჭარ: „ჟირ სიტყვა მორჭარით გურიშ ელაკინალო დო ღორონთიშ ჭეშმარიტ ჭყოლოფუაშ გურშენ შურდოგურით დასამოწმებელო. მანგარო რდათ“ (1 პეტ. 5:12). ღორონთიშ შთაგონებათ ჭარილ პეტრეშ წერილ ამდღა ხოლო გურშა ელუკინანს ქრისტიანეფს. ჩქი დასურო მოსაჭირნა გურიშ ექექაფა ველუთ იეჰოვაშ დაპირებეფიშ შესრულებას (2 პეტ. 3:13).

14, 15. მუჭო ელუკინანს გურშა იოანე მოციქულიშ წერილეფ ქრისტიანეფს?

¹⁴ იოანე მოციქულ ხოლო რდუ თინეფ შკას, მით ქრისტიანულ კრებას ხემძღვანელენდჷ. თიქ იესოშ მსახურება ეჭარ ართ-ართ სახარებას. ბიბლიაშ თე წიგნი, საუკუნეეფიშ დინახალე დო ასე ხოლო გურშა ელუკინანს ქრისტიანეფს. ხვალე თიშ სახარებას პკითხულენთ, ნამდა ნამდვილ ქრისტიანეფ ართიანიშ ჸოროფათ გიშეჩინებენა (წეკითხით იოანე 13:34, 35). *

¹⁵ თიშ ნაჭარა სუმ წერილშე ხოლო, მნიშვნელოვან ინფორმაციას ბგებულენთ. მუჟამსით შეცდომეფიშ გურშენ გურ გოტახილ მაფნა, გურშა ელამკინანა თიშ გაგება, ნამდა „იესოშ ზისხერ პწიმინდანა ირნერ ცოდაშე“ (1 იოან. 1:7). მუჟამსით ჩქინ გურ ბრალს გებვდანან, ემქექუანა იოანეშ სიტყვეფ: „ღორონთ ჩქინ გურეფშე უმოს რე“ (1 იოან. 3:20). ხვალე იოანექ ჭარ, ნამდა „ღორონთი ჸოროფა რე“ (1 იოან. 4:8, 16). თიშ მაჟია დო მასმა წერილ ოცქვანს თი ქრისტიანეფს, მით „ჭეშმარიტებას გილულა“ (2 იოან. 4; 3 იოან. 3, 4).

16, 17. მუჭო ელუკინ გურშა მოციქულ პავლექ ქრისტიანეფს?

 ¹⁶ პირველ საუკუნეს მოციქულ პავლექ ქრისტიანეფიშ გურშა ელაკინაშ ჯგირ მაგალით დომტეს. მუჭოთ იძირენ, თი დროს ქრისტიანეფიშ უმენტაშ იერუსალიმს ცხოვრენდჷ, სოდეთ ხემძღვანელ საბჭო რდუ (საქ. 8:14; 15:2). თე ქრისტიანეფ უქადაქენდეს ხალხის, ნამუთ იუდაიზმიშ გავლენაშ თუდო რდეს დო ათეშენ წანდეს ართ ღორონთიშ არსებობაშ. მარა, მოციქულ პავლე წმინდა შურქ ბერძნეფწკუმა, რომაელეფწკუმა დო შხვა ეროვნებაშ ხალხწკუმა ოქადაქებშა მიდაშკვჷ, ნამუთ ბრელ ღორონც ომსახურდეს (გალ. 2:7—9; 1 ტიმ. 2:7).

¹⁷ პავლე ქადაქენდჷ თი მხარეეფს, ნამუთ ასე თურქეთიშ, საბერძნეთიშ დო იტალიაშ ტერიტორიეფშა მიშურს. თექ თინა ახალ კრებეფს გითმონწყუნდჷ, სოდეთ თეფერ ხალხ გილეშ, ნამუთ ვა რდეს ებრაელეფ. თე ახალ ქრისტიანეფს გურშა ელაკინა ოსაჭირდეს, მუშენდა თინეფს მუნეფიშ თანამემამულეეფ თხოზდეს (1 თეს. 2:14). სოდგარენ ახ.წ. 50 წანას პავლე მოციქულ თესალონიკეშ კრებას ჭარუნდ: „ღორონც ირიათო მადლობას ვურაგადუქ, მუჟამსით ღოცვაშ დროს არძას მოიშინუანთ, მუშენდა ირიათო ფშუ თქვან რწმენაშ საქმეეფი, ჸოროფათ შრომა დო მოთვინება“ (1 თეს. 1:2, 3). თეს გეძინელ, პავლექ თინეფს ელუჩ, ნამდა გუმანგარებდესკო ართიან: „ათეშენ გურშა ეუქექეთ დო გამანგარით ართიან“ (1 თეს. 5:11).

18. მუჭო ელუკინ გურშა პირველ საუკუნეს ხემძღვანელ საბჭოქ ფილიპეს?

¹⁸ პირველ საუკუნეს ხემძღვანელ საბჭო გურშა ელუკინანდჷ მუჭოთ ხემძღვანელ ჯიმალეფსინ თეშ შხვა ქრისტიანეფს ხოლო. მუჟამსით მოციქულ ფილიპე სამარიელეფს უქადაქუდუნ, თის ხემძღვანელ საბჭო ხუც უკინენდჷ. თინეფქ მუნეფიშ წარმომადგენელეფ, პავლე დო იოანე მიდაშქვეს, მუშენდა ახალ მოწაფეეფიშ გურშენ ქულოცებდესკო, ნამდა თინეფს წმინდა შურ მეუღებდესკო (საქ. 8:5, 14—17). მუჭო ელუკინანდჷ გურშა ფილიპეს დო ახალ ქრისტიანეფს თიშ ძირაფა, ნამდა ხემძღვანელ საბჭო ელურდ თინეფს.

19. მუჭო ელუკინ გურშა ხემძღვანელ საბჭოშ წერილქ პირველ საუკუნეშ ქრისტიანეფს?

¹⁹ უმოს გვიანო, ხემძღვანელ საბჭოქ გინოჭყვიდ, ნამდა ებრაელეფ ვა რდესინ თი ქრისტიანეფს ვავალდეს წინადაცვეთა, ნამუსით მოსეშ კანონ ითხინდჷ (საქ. 15:1, 2). წმინდა წერილეფიშ გარჩიებაშ დო წმინდა შურიშ ხემძღვანელობაშ უკულ პასუხიშმგებელ ჯიმალეფქ გინოჭყვიდეს, ნამდა თეშ კეთება ვა რდუ საჭირო დო თე გადაწყვეტილებაშ გურშენ კრებეფს ქიმეჭარეს. ხემძღვანელ საბჭოქ მუშ წარმომადგენელეფ მიდაშქვჷ, ნამდა თე წერილ კრებეფშა ქიმუღალდესკო. მუ რდუ თეშ შედეგი? ბიბლიას ჭარ: „თინეფქ წეკითხეს, თექ გურშა ელუკინ თინეფს დო მანგარო გეხარეს“ (საქ. 15:27—32).

20. ა) მუჭო ელუკინანს გურშა ხემძღვანელ საბჭო მთელ საჯიმალოს? ბ) მუ კითხვას მეფჩანთ პასუხის უკულიან სტატიას?

²⁰ ხემძღვანელ საბჭო ამდღა ხოლო გურშა ელუკინანს ბეთელიშ ოჯახიშ წევრეფს, სრულ დროთ მსახურეფს დო მთელ საჯიმალოს. თეს ზუსტას თიცალ შედეგ მოჸუნს, მუნერით პირველ საუკუნეს უღუდ, მუჟამსით ქრიტიანეფქ მანგარო გეხარეს. თეს გეძინელ, 2015 წანას ხემძღვანელ საბჭოქ გიშაშქვჷ ბროშურა „დართით იეჰოვას“, ნამუთიქ გურშა ელუკინ თინეფს, მიდგას ჭეშმარიტება აფუდ მეტებულ. მარა, ხვალე პასუხიშმგებლობეფ უღნან თი ჯიმალეფიშ საქმე რენო შხვეფიშ გურშა ელაკინა? თე კითხვას უკულიან სტატიას ქიმეფჩანთ პასუხის.