დებაბდ 1926 წანას საბერძნეთიშ ჭიჭე სოფელ კარიცას, მოხანდე ოჯახის. მა ბრუო და დო ჯიმაშე მაშკვითა ვორდი.

ჩქიმ დაბადებაშახ ართ წანათ ადრე, მშობლებქ ქეშეხვადეს იოანის პოპარიზოსის, ნამუთ ჩიებაშ მოჸოროფე დო ბიბლიაშ გურგედვალირ მარკვიებელ (უმოს გვიანო იეჰოვაშ მოწმეეფი) რდუ. იოანისიშ გონივრულ მსჯელობაშ ჭყოლოფუათ თინეფქ ბიბლიაშ მარკვიებელეფიშ შეხვალამეფშა დასწრება ქიდიჭყეს, ნამუთ ჩქინ სოფელს იტარებუდ. დიაჩქიმს იეჰოვა ღორონთიშ მანგარ რწმენა უღუდ დო თიშ უმკუჯინუო, ნამდა ჭარუა დო კითხირ ვა უჩქუდუნ, ირნერო ოცადუდ შხვეფს ქეჩუკო მუშ რწმენაშ გურშენ. სანარღოთ, მუაჩქიმ არასრულყოფილ კოჩიშ კილს აქცენდ ყურადღებას დო დრო ხანიშ უკულ მიოტუ კრებაშ შეხვალამეფშა გილულა.

მა დო ჩქიმ და დო ჯიმალეფ ვაფასენდით ბიბლიას, მარა მუჟამსით ჭიჭე გენწიბრდითინ, ჩქინ ყურადღებაქ ახალგაზრდულ კორნებეფშა გეგნორთ. მუჟამსით 1939 წანას მაჟია მსოფლიო ჩხუპიქ ქიდიჭყუნ, ჩქინ სოფელს თიცალ მუდგარენქ ქუმოხვად, ნამუქით არძა შიშის ქენმოჸოთეს. ჩქინ ნათესე ნიკოლას პსარასი, ნამუთ სამეზობლოს ცხოვრენდუნ, ახალ ნანათა რდუ, მუჟამსით საბერძნეთიშ ჯარშა გეგმიძახეს. 20 წანერ ნიკოლასიქ სამხედროეფს უშკურანჯუო უწუ: „მა ვამაჩხუპებე, მუშენდა ქრისტეშ ჯარიშკოჩ ვორექ“. თის სამხედრო სასამართლოქ ვით წანა ქიმეჩუ. თექ მანგარო ქიგმანთხეს გურს!

საბედნეროთ, 1941 წანაშ დაჭყაფუს საბერძნეთშა მოკავშირეეფიშ ჯარქ გემშართ დო ნიკოლას ციხეშე გუტეს. თიქ კარიცაშა დირთ, სოდეთ ჩქიმ უნჩაშ ჯიმა ილიასიქ ბიბლიაშ გურშენ ბრელ კითხვეფ დუსვუ. მა  დიდ ინტერესით ურჩქილედ. ჭიჭე ხანშა, მა, ილიასიქ დო ჩქიმ უკლაშ და ეფმორფიაქ ბიბლიაშ გურაფა ქიდიპჭყით დო მოწმეფიშ კრებაშ შეხვალამეფს ვა ვოჩილითუანდით. უკულიან წანას სუმხოლოქ დუდ მევუძღვინით იეჰოვას დო დიმნათით. უმოს გვიანო ჩქიმ ოთხ და დო ჯიმაქ ხოლო იეჰოვაშ მოწმეთ გინირთ.

1942 წანას კარიცაშ კრებაშ წევრეფ შქას ჩხორო და დო ჯიმა ვორდით, ნამუშ ასაკი 15-შე 25 წანაშახ რდუ. არძას მიჩქდეს, ნამდა წოხოლე დიდ განსაცდელეფ მელდეს. თაშ ნამდა, ართიან გუვამაგნარითკონ თიშ გურშენ, მუჭო შემალებედესინ თეშ ართო ბგურაფლენდით ბიბლიას, იბიბრდით ღორონთიშ ოდიდებელ ობირეშეფს დო ბლოცულენდით. თეშ ჭყოლოფუათ რწმენაქ გემემანგარეს.

მაჟია მსოფლიო ჩხუპ ითებუდ, მუჟამსით ბერძენ კომუნისტეფქ საბერძნეთიშ მთავრობაშ წინააღმდეგ მიდართეს დო თეს უდუნდებელ სამოქალაქო ჩხუპიქ ქუმაჸუნ. კომუნისტ პარტიზანეფ სოფელეფშა გილეშეს დო თექიან მახორუეფს ანძალენდეს მუნეფწკუმა ართო ჩხუპის. მუჟამსით ჩქინ სოფელშა ქუმორთესინ, სუმ ახალგაზრდა იეჰოვაშ მოწმე მიხირეს: ანტონიო სუკარისი, ილიას დო მა. ჩქი ურაგადუდით, ნამდა ქრისტიანეფ ვორდით დო ჩხუპშა ვემიფშით. მარა თინეფქ დუმანძალეს ოლიმპოშ გვალაშა ულა, სოიშახ 12 საათიშ ოულარ შარა რდუ.

თეშ უკულ ხეთეშე კომუნისტ ოფიცერქ მიზოჯეს, ნამდა პარტიზანულ მოძრაობაშა გენშამრთუმდესკო. მუჟამსით ჩქი გეუნწყით, ნამდა ჭეშმარიტ ქრისტიანეფ მოყვასიშ წინააღმდეგ იარაღის ვეჭოფუნდესინ, გურმულირ ოფიცერქ გენერალშა მიდაბჯიკეს. მუჟამსით იგივე გუმეორითინ, გენერალქ ზოჯუ: „თინწკუმა ჯორს ქიმერჩანთ დო ჭკირილეფ ჩხუპშე საავადმყოფოშა გილეჸუნით“.

ჩქი უპასუხით: „მარა მთავრობაშ ჯარქ ოპჭოფეს-და ჩქი ხოლო ჯარიშკოჩეფო ხომ ქიმემრჩქინანა?“. თეშ პასუხო თიქ მიწუეს: „თინწკუმა ქობალ გილეღით ფრონტიშ ხაზის“. ჩქი უწით: „მარა ოფიცერქ ჯორწკუმა ართო ქობძირეს დო იარაღიშ ღალა ქუდმავალეს-და?“. გენერალქ ჭიჭე ხანით ჩეფიქრ დო ბოლოს წიმიძახ: „შხურიშ მიკოჯინა შეილებნა! გვალას გაჩენდით დო შხურეფს ყურადღება ქიმიაქცით“.

თაშ ნამდა, მუჟამსით სამოქალაქო ჩხუპ მიშუნ სუმხოლოს სინდის მარზენდეს თიშ უფლებას, შხურეფ დომჭყიშუდესკო. ართ წანაშ უკულ, ჩქიმ უნჩაშ ჯიმა ილიას ჸუჩა გუტეს, ქომონჯღურელ დიდაშ მიკაჯინუშა. ანტონიოს ჯამრთელობაშ პრობლემეფქ აშუ დო თინა ხოლო განთავისუფლეს, მარა მა კინ ტყვეობას ქუდოფსკიდი.

თე დროს, საბერძნეთიშ ჯარ ჭიე-ჭიეთ კომუნისტეფიშ ხოლოშა მიშუ. თინეფს, მიდგას ჭოფილ ვაფუდინ, გვალეფით მეზობელ ალბანეთშა ოკოდეს გინულა. საზღვარიშ ხოლოშა მივანჭითინ, ჩქი ბერძენ ჯარიშკოჩეფქ ირდიხაშე ქუგომდირთეს. პარტიზანეფქ შიშის ქენოლეს დო ინტეს. მა ეკორთელ ჯას ქიმკვატყობ დო ათე დროს ბძირეს თი ჯარიშკოჩეფქ, მით ადრე მიფშინე.

მუჟამსით ბერძენ ჯარიშკოჩეფს უწი, ნამდა კომუნისტეფს ჭოფილ ვაფუდინ, თინეფქ  გეგნამოწმესკონ თიშ გურშენ მიდამჸუნეს სამხედრო ბანაკშა ვერიაშ ხოლოს, უჯვეშაშ ბიბლიურ ქალაქ ბერეას. მა დუმავალეს თხორილეფ გამკეთებუდკონ, ნამდა ჯარიშკოჩეფს თევრეშე უჩხუპებდესკონ. მუჟამსით მა ვარია ქოფთქვინ, ხემძღვანელ ოფიცერქ გეგნოჭყვიდ ჩქიმ გინოხორაფა მაკრონისოშ კუნძულშა, სოდეთ საცოდება ციხე რდუ.

რგილ, უწყარე, ჩხანაშ ჭვილ გვალამ კუნძულ მაკრონისო რე ატიკაშ ზღვაპიჯწკუმა, ათენშე სოდგარენ 50 კილომეტრიშ მაშორას. თინა სიგინძათ 13 კილომეტრი რე, დო სიგანეთ 500 მეტრა რე. 1947 წანაშე მოჸუნაფილ 1958 წანაშა, თექ 100 000-შე უმოს პატიმარ დახუნეს,თინეფშე ნამთინე აქტიურ კომუნისტ ვარდა კომუნისტობაშე ეჭმიტანილ რდუ, ნამთინე ხოლო ჯვეშ მაჩხუპერეფ, მით მთავრობაშ წინააღმდეგ მიშეს დო სოდგარენ ეჩშახ იეჰოვაშ ართგურ მოწმე.

1949 წანას, მუჟამსით თექ ქიმემჸონესინ, პატიმარეფ მუსხირენ ბანაკო რდეს გორთილ. მა ნაკლებო თხილერ ბანაკშა გომტეს, სოდეთ ოშობით კოჩ ხედუ. სოდგარენ 40 კოჩშახ 10 კოჩიან ბრიზენტიშ კარავს ვორდით დო დიხას გივოჯანუდით. ჩქი გაფუჭებულ წყარს ფშუნდით დო ოსპის დო ბადრიჯანს პჭკუმუნდით. მტვერ დო ბორიაშ გურშენ თექ ცხოვრება ჭირდ. საბოლათ უკვე ვეგლამზინდუდეს ქუალეფ იშო-აშო დო თენა მანგარ შვება რდუ, მუშენდა თეცალ მუშობაქ ბრელ პატიმარიშ ჯამრთელობას დო გონებას გლახათ იმოქმედ.

ართ დღას ზვაპიჯს გილეფშინ თიმწკუმა, მუსხირენ იეჰოვაშ მოწმეს შეფხვად, ნამუთ შხვა ბანაკშე რდეს. ჩქი მანგარო მახიოლეს ართიანიშ ძირაფაქ! ვა მოკოდეს მითინქ მეხვადკო მი ვორდითინ დო ათეშენ, სოდეთ შემალებედესინ თექ შეფხვადუდით ართიანს. თეს გეძინელ, შხვა პატიმარეფს ხოლო ტყობაშე უქადაქუდით დო ნამთინექ უკულ იეჰოვაშ მოწმეთ გინირთუ. თეცალ საქმეეფიშ ქიმინუაშ დო ლოცვაშ ჭყოლოფუათ სულიერო მანგარო ვორდით.

ვით თუთიან „რეაბილიტაციაშ“ უკულ ჩქიმ მაჭოფალეფქ გინოჭყვიდეს, ნამდა უკვე დრო რდუ სამხედრო ფორმა ქინკომქუნუდკო. მუჟამსით ვარია ქოფთქვინ, თინეფქ ბანაკიშ ზედამხედველშა მიდაბჯიკეს. თი კოჩის ხეს ქუდვოკინე ნაჭარა: „მა მოკო ხვალე ქრისტეშ ჯარიშკოჩ ვორდე“. ზედამხედველქ დუმორცქინ დო თეშ უკულ ჩქიმ დუდ, ბერძენ მართლმადიდებელ ეპისკოპოსის გეგნოჩუ, ნამუთ თიშ მოადგილე რდუ. მუჟამსით თამამას ქუპასუხ თიშ კითხვეფს ბიბლაშე, თიქ გურმულირო ქიმიოღვარუ: „მიდეჸონით თავრეშე. თენა ფანატიკოს რე!“

მაჟია ოჭმარეს ჯარიშკოჩეფქ კინ მოფთხის სამხედრო ფორმაშ მიკოქუნა. მუჟამსით ვარია ქოფთქვინ, თინეფქ ლიკვეფით დო ჯაშ კეტით გობლახეს. თეშ უკულ ბანაკიშ საავადმყოფოშა მიდამჸუნეს, ნამდა დერწმუნესკო მუჭო ძვალ ვა მაფუდ ტახილ დო კინ ჩქიმ კარავშა მიდაბჯიკეს. თაშ იგრძელებუდ ჟირ თუთას.

ჩქიმ რწმენა ვადაფთმინ თიშ გურშენ ჯარიშკოჩეფქ ახალ მეთოდ ქოცადეს. ხელეფ ოჭიშიშ უკახლე დომკირეს დო მუთ შეულებდესინ თოკის მუმოგანდეს კუჩხიშ გურეფს. საშინელ ჭუას ბგინაფლენდ, მარა იესოშ სიტყვეფქ ქუგმაშინ: „ბედნერეფ რეთ მუჟამსით რლანძღუნა, რთხოზუნა . . . გოხიოლდან, მუშენდა დიდ რე თქვან საზღაურ ზეცას; თქვანშახ ცხოვრენდესინ თი წინასწარმეტყველეფს ხოლო თაშ თხოზუდეს“ (მათ. 5:11, 12). საბოლათ, უგუთებ წვალებაშ უკულ მა გურქ მიდამირთ.

გოპკურცხინ, გოჸინილ საკანს ვორდი, ქობალიშ, წყარიშ დო ნორჩალიშ უმშო. მარა იშენით მშვიდაშე ბგინაფლენდ დუც. მუჭო ბიბლია იჩიებუნ, ჩქიმ გურს დო გონებას „ღორონთიშ მშვიდობა“ თხილანდ (ფილ. 4:7). მაჟია დღას ართ ჯგირ გურიშ ჯარიშკოჩიქ ქობალ, წყარ დო გინაქუნალ ქომუჩუ. შხვა კარიშკოჩიქ მუშ ოჭკომალ დამითმუ. თაშ ნამდა, თეცალო დო შხვანერო ხოლო იეჰოვა ზრუნენდ ჩქიმო.

ხელისუფლებას ვეგმისწორებენ ფერ მეამბოხეთ მივორჩქუდ დო ათეშგურშენ ათენშა, სამხედრო სასამართლოშა მიდამჸუნეს. თექ სუმ წანა ქომჩეს იაროსიშ კუნძულიშ ციხეს, ნამუთ მაკრონისოშ აღმოსავლეთით 50 კილომეტრიშ მაშორას რდუ.

იაროსიშ ციხე ჭითა ანგურათ შენებულ ციხესიმაგრე რდუ, სოდეთ 5 000-შე უმოს პოლიტიკურ პატიმარ ხედუ. თინეფ შქას შკვით იეჰოვაშ მოწმე  რდუ, ნამუთ ნეიტრალიტეტიშ გურშენ ხედეს. სასტიკო ვარიებულ რდუნ თიშ უმკუჯინუო, ჩქი მითინს ვა უჩქუდუნ თეშ იშენით ბგურაფლენდით ბიბლიას. თეს გეძინელ ტყობაშე ირიათო ბღებულენდით „გინაჯინალ კოშკის“, ნამუსით ხეთ გინმოპჭარუნდით დო ოგურაფალო გიმიბრინუანდით.

ართ დღას ტყობაშე ბგურაფლენდითინ თეშ, ციხეშ დაცვაქ ქობძირეს დო ლიტერატურა მიდამღეს. ჩქი ციხეშ უნჩაშიშ მოადგილეშა გემნომჸონეს დო ფიფქრენდით, ნამდა წანას ხოლო ქიგემძინანდეს. მარა მოადგილექ მიწის: „ჩქი მიჩქნა თქვა მი რეთინ დო პატის ფცენთ თქვან რწმენას. ჩქი შემლებნა თქვა გენდათ. დართით თქვან სამუშას“. თეს გეძინელ თიქ ნამთინეს უმოს ეფ სამუშა ქომჩეს. მარდულობაშ მეტ მუ მარაგადედეს. ციხეს ვოხედით, მარა ჩქინ ართგურობას იშენით მოუღუდ იეჰოვაშა დიდება.

ჩქინ სიმტკიცეს შხვა ჯგირ შედეგეფქ ხოლო ქუმაჸუნ. ართ მათემატიკოს პატიმარ, ნამუთ ციხეს ხედუნ, ჩქინ საქციელს ოკვირუდ დო უკულ რწმენაშ გურშენ კითხვეფს მისვენდეს. იეჰოვაშ მოწმეფწკუმა ართო 1951 წანას თინა ხოლო გუტეს. უმოს გვიანო თიქ დინათ დო სრულ დროთ მსახურენდ.

განთავისუფლებაშ უკულ მა კარიცაშა, ჩქიმ ჸუდეშა დიფრთი. უმოს გვიანო, ჩქიმ სოფელს ცხოვრენდესინ ფერ კათაწკუმა ართო მელბურნშა, ავსტრალიაშა გინიბლით. თექ მა ოსურო ქიმიპჸონ ართ ქრისტიან და, ჟანეტი. ჩქი ქრისტიანულო მობრდით ართ ბოშ დო სუმ ძღაბი.

ამდღა 90 წანას გინოჩილათირ ვორექ დო უხუცესო ვმსახურენქ. თი გაჭირებაშ გურშენ მუთ გინიბღინ, კანკალეშა კუჩხეფს დო შხვა ადგილეფს ხოლო მაჭუ, განსაკუთრებულო თი დროს მუჟამსით ოქადაქებუს ვორექ. მარა თეშ უმკუჯინუო, მა იშენით გინოჭყვიდილ მაფ ვორდე ქრისტეშ ჯარიშკოჩი (2 ტიმ. 2:3).