1. მუ შილებე იფიქრას მინშა ღორონთიშ ნამთინე მსახურქ?

 ᲛᲣ ᲡᲐᲡᲘᲐᲛᲝᲕᲜᲝ რე თიშ რჩქინა, ნამდა ვორეთ თი ხალხ შქას, ნამდგას იეჰოვა იწონუანს. ბიბლიას ჭარჷ: „იეჰოვა ხარენს მუშ ხალხით“ (ფსალმ. 149:4). მარა ნამთინეს მინშა თეშ უტირხუ გურ, ნამდა შილებე იფიქრას: პირადო მა ქომღუნო იეჰოვაშ მოწონა? ულირს ხოლო ღორონთიშ ბრელ ართგურ მსახურს უფიქრებ თენა (1 სამ. 1:​6—10; იობ. 29:​2, 4; ფსალმ. 51:11).

2. მის უღჷ იეჰოვაშ მოწონა?

² ბიბლიაშე არგამათ იძირე, ნამდა არასრულყოფილ ადამიანეფს შეულებუნა იეჰოვაშ მოწონაშ მეღება. მუ ოკო ვაკეთათ თეშო? ოკო გეგმიფრჩქინათ რწმენა იესოშ მიმართ დო დიმნათათ (იოან. 3:16). თეშნერო ირკოჩიშ წოხოლე ვაცხადენთ, ნამდა მნარღენთ ჩქინ ცოდეფს დო პირობას ბდვანთჷ, ნამდა შევასრულენთ ღორონთიშ ნებას (საქ. 2:38; 3:19). მუჟამსით თე ნაბიჯეფს გინობდგუნთ, ნამდა იეჰოვაშ მეგობრეფო გინიფრთათ, თის გურ ხიოლით აფჷ ეფშა. დოდვალირ აღთქმას ვეგნურთანთ-და, ირიათო მაღვენუნა იეჰოვაშ მოწონა დო თიშ ხოლოშიან მეგობრეფ იპჸუაფუთ (ფსალმ. 25:14).

3. მუ კითხვეფს გუარჩიენთ თე სტატიას?

³ თაშ ქორენ-და, მუშენ შილებე ღორონთიშ ნამთინე მსახურ ფიქრენდას, ნამდა ვა უღჷ თიშ მოწონა? მუჭო მოძირანა იეჰოვა, ნამდა ხარენს ჩქინით? მუ მეხვარებ ქრისტიანს, ჯერდას, ნამდა ღორონთიშ თოლს მოწონა უღჷ? მორთჷ ქუპასუხათ თე კითხვეფს.

 ᲛᲣᲨᲔᲜ ᲨᲘᲚᲔᲑᲔ ᲦᲝᲠᲝᲜᲗᲘᲨ ᲜᲐᲛᲗᲘᲜᲔ ᲛᲡᲐᲮᲣᲠ ᲤᲘᲥᲠᲔᲜᲓᲐᲡ, ᲜᲐᲛᲓᲐ ᲘᲔᲰᲝᲕᲐ ᲕᲔᲬᲝᲜᲣᲐᲜᲡ?

4, 5. მუშა შემლებუნა ვორდათ დარწმუნებულ, თიშ უმკუჯინუო, ნამდა მინშა შილებე უღირსობაშ გრძნობა მიღუდან?

⁴ ნამთინეს ბაღანობაშე მიღუნა დაბალ თვითშეფასება (ფსალმ. 88:15). ართ ჯიმა, ადრიან, იჩიებ: „ირო უღირსობაშ გრძნობა მიღუდ. ფშჷ, ბაღანობას ირიათო ბლოცულენდჷ თიშე, ნამდა ჩქიმ ოჯახიქ ახალ ქვეყნიერებას ქიცხოვრუკო, მარა ჩქიმ დუდის დღას ვემშუჸუნუანდჷ, მუშენდა ვა ფიფქრენდჷ, თექიან ცხოვრებაშ ღირს ქუორდინ“. ტონი, ნამუთ ჭეშმარიტებას ვა რე ნარდ, იჩიებ: „დღას ვა ფშჷ, მშობლეფს ჩქიმდა ქუცქვაფუდესკო დო უთქუალუდესკო, ნამდა უჸორდჷ. თიცალ გრძნობა მიღუდ, ითამ თინეფიშ მოსაწონ მუთუნ ვა მაკეთებედ“.

⁵ უღირსობაშ გრძნობა მინშა სი ხოლო ქოიღუნ-და, ქიგიშინ, ნამდა იეჰოვას იჩინენქინ თენა თეშ ვა მოხვალამე; მუქ მეიჸონ მუშ ხოლოშა (იოან. 6:44). თინა ორწყე ჩქინ ჯგირ თვისებეფს, თიცალეფს ხოლო, ნამდგას შილებე კინ ჩქი ვა ვორწყედათ, დო უჩქჷ, მუნერ გურიშ ვორეთ (1 სამ. 16:7; 2 მატ. 6:30). ათეშენ, მუჟამსით მირაგადუნა, ნამდა თიშო მანგარ ძვირფასეფ ვორეთ, შემლებუნა ბჯერდან, ნამდა თენა მართალო თაშ რე (1 იოან. 3:​19, 20).

6. მუს გინაფლენდჷ პავლე ულირს დაშებულიშ გურშენ?

⁶ ჭეშმარიტებაშ გაგებაშახ ნამთინეს შილებე თიცალ მუდგარენ მაფუდან ნაკეთებ, მუდგაშ გურშენ ამდღა ხოლო მაწუხენა სინდის (1 პეტ. 4:3). თინეფ ხოლო, მით მთელ ცხოვრება რე, იეჰოვას ართგურო ომსახურუნა, ობრძოლუნა მუდგარენ სისუსტეეფს. თქვან შემთხვევას ხოლო თაშ ქორე დო გურ ბრალს ქიგერდვანან-და, გურშა ელაიკინანა თიშ რჩქინა, ნამდა ღორონთიშ შხვა ართგურ მსახურეფს ხოლო უღუდეს თეცალ გრძნობეფ. მაგალთო, მუჟამსით პავლე მოციქულ მუშ არასრულყოფილებაშე ფიქრენდჷ, თქუ, ცოდა კოჩ ვორექია (რომ. 7:24). თის უკვე ნარღებულ აფუდ ღორონთიშ წოხოლე თი ირფელ, მუთ ულირს დაშუ დო ნათილ ხოლო რდჷ, მარა მუშ დუდშე იშენ თქუ, „მოციქულეფ შქას არძაშ უნაკლებაშ“ დო ცოდამეფშე „პირველ“ ვორექია (1 კორ. 15:9; 1 ტიმ. 1:15).

7. მუ ოკო ფშუდან ულირს დაშებულიშ გურშენ?

⁷ ჩქინ ზეციერ მუმა მოპირუნა, ნამდა, მუჟამსით მთელ გურით მნარღენთ დაშებულს, თინა მაპატიენა (ფსალმ. 86:5). ათეშენ ცოდეფს მთელ გურით ქომნარღენთ-და, შემლებუნა ბჯერდან, ნამდა იეჰოვა აუცილებერო შეასრულენს მუშ სიტყვას დო მაპატიენა (კოლ. 2:13).

8, 9. მუჭო შემლებუნა ჩეფთხინუათ თიცალ აზრ, ნამდა იეჰოვაშ მოწონაშ ღირსიქ ქიპჸუათინ თიზმა დღას ვა მაკეთებენა?

⁸ არძას მოკონა, მუთ შილებე ბრელ გუაკეთათ იეჰოვაშო. მარა შხვადოშხვა მიზეზიშ გურშენ ნამთინექ შილებე იფიფქრას, ნამდა იეჰოვაშ მოწონაშ ღირსიქ ქიჸუასინ თიზმა დღას ვაქიმინე. ართ და, ამანდა, იჩიებ: „მინშა თიცალ ფიქრეფ მუმალე, ნამდა იეჰოვაშო ნამ შეილებუნ თიშ კეთება ნიშნენს, ირიათო უმოს დო უმოს აკეთე. ათეშენ ხშირას ჩქიმ დუდის შემლებუნ თიშე უმოსის ფთხინქჷ. უკულ, მუჟამსით თენა ვექშმალე, ფიფქრენქ, ნამდა იეჰოვა ხოლო თიცალ უკმაყოფილო რე ჩქიმით, მუნერით მა ვორექ ჩქიმ დუდით“.

⁹ მუჭო შემლებუნა ჩეფთხინუათ თიცალ აზრ, ნამდა იეჰოვაშ მოწონაშ ღირსიქ ქიპჸუათინ თიზმა დღას ვა მაკეთებენა? ართ წუთის დეფიქრით: იეჰოვა თიცალ ღორონთ რენო, ნამდა ვა გამგან დო შემლებუნან თიშე უმოს მოფთხუან? რჯერდან, იეჰოვა მანგარო აფასენს, მუჟამსით ნამ შემლებუნან თის ვორთუთ თიშო. თეწკუმა ართო, დეფიქრით თი ბიბლიურ პერსონაჟეფშე ხოლო, მით შურ დო გურით ომსახურუდეს იეჰოვას, მაგალთო, მუნერით რე პავლე მოციქულ. წანეფიშ დინახალე თინა დუდგინოდვალირო ხანდენდჷ, მიკიშ ანთასობით კილომეტრის დო კრებეფიშ ჩამოყალიბებას დუდენდჷ. მარა უკულ სიტუაციაქ დათირ დო თისხი ვაკეთებედ ქადაგებაშ საქმეს. ოდინუო პავლექ იეჰოვაშ მოწონა თეშ გურშენ? ვარ, თინა აგრძელენდჷ თიშ კეთებას, მუთ შეულებუდ დო იეჰოვაქ ხოლო აკურთხჷ (საქ. 28:​30, 31). თეშნერო, სიტუაცია ჩქი ხოლო მათირუნა დო ირო ართზმა ვა მაკეთებენა იეჰოვაშო. მარა თიშო  არძაშ უმოს მნიშვნელოვან მუსხის ვორთუთინ თინა ვარინ, თინა რე, მუნერ გურით ვორთუთ. მორთჷ ასე ქიფჩუათ თი მუსხირენ მხარეშე, სოვრეშეთ იეჰოვა მოძირანა, ნამდა ხარენს ჩქინით.

ᲛᲣᲭᲝ ᲛᲝᲫᲘᲠᲐᲜᲐ ᲘᲔᲰᲝᲕᲐ, ᲜᲐᲛᲓᲐ ᲛᲘᲬᲝᲜᲣᲐᲜᲐ?

10. მუჭო შემლებუნა მიფრჩქილუათ იეჰოვაშე, ნამდა თინა მიწონუანა? (იოან. 16:27).

¹⁰ მუშ სიტყვათ. იეჰოვას უჸორს გრძნობეფიშ გიმოხანტუა დო ოგინაფუანს მუშ ხალხის, ნამდა გურს უხარენა თის. ბიბლიას ჟირ შემთხვევა რე მოჩამილ, სოდეთ იეჰოვა იესოს ურაგად, ნამდა თინა რე მუშ საჸოროფო სქუა, ნამუთ მიწონუ (მათ. 3:17; 17:5). თქვა ხოლო გოკონანო, პირადო იეჰოვაშე „ქიმირჩქილუათ“, ნამდა გიწონუანა? მართალ რე, იეჰოვა ზეცაშე ვეგთქგოძახანა, მარა თიშ ხონარიშ გაგება ბიბლიაშე შეილებუნა. მაგალთო, თეშ საშვალება მიღუნა, მუჟამსით სახარებეფს ენოჭარილ იესოშ სიტყვეფს ბკითხულენთ (წეკითხით იოანეშ 16:27). თინა სრულყოფილო გიმირჩქინანდჷ მუამუშიშ თვისებეფს. ათეშენ, მუჟამსით ბკითხულენთ, მუჭო იწონუანდჷ იესო მუშ ართგურ მიმაჸუნალეფს, მით არასრულყოფილეფ რდესჷ, შემლებუნა წერმიბდგინათ, ნამდა იეჰოვა თე სიტყვეფს ჩქი მირაგადუნა (იოან. 15:​9, 15).

11. მუშენ ვა ნიშნენს სირთულეეფ იეჰოვაშ მოწონაშ დინაფას? (იაკ. 1:12).

¹¹ საქმეეფით. იეჰოვა დღას ვა მარკენა აუცილებერს, მაგალთო, თინა ირიათო ზრუნენს ჩქინ ფიზიკურ საჭიროებეფშე. მართალ რე, იეჰოვა მინშა უშვენს, სირთულეეფ მიღუდან, მუჭოთ თექ იობიშ შემთხვევას მოხვად, მარა თენა ვა ნიშნენს, ნამდა მივოდინეთ ღორონთიშ მოწონა (იობ. 1:​8—11). სინამდვილეს, სირთულეეფიშ დროს საშვალება მერზიებუნა, ქუვოძირუათ იეჰოვას, მუჭო მიჸორა დო ვონდუთ (წეკითხით იაკობიშ 1:12). რთულ სიტუაციეფ თიშ საშვალებას ხოლო მარზენა, ნამდა ჩქინ დუდშა გეგმოფცადათ იეჰოვაშ ძალიერ ჸოროფა დო მოხვარა.

12. მუშ გურაფა შემლებუნა დიმიტრიშ მაგალითშე?

¹² გუარჩუათ აზიას მახორუ ართ ჯიმაშ, დიმიტრიშ, შემთხვევა. თიქ სამუშა მიოდინუ დო მუსხირენ თუთას მუთუნქ ვაგორ. ათეშენ იეჰოვას მიანდჷ თე ამბე დო გეგნოჭყვიდ დრო მსახურებაშო გეგმირინუკო. თუთეფ მიშჷ, მარა სამუშაქ ვემკორჩქინდჷ. თეს თიქ ხოლო ქიგიაძინ, ნამდა დიმიტრის ჯამრთელობაშ პრობლემეფქ ქაშუ დო გვალო დონჯირელო რდჷ. თე ირფელიშ შედეგო თინა ფიქრენდჷ, ნამდა, მუჭოთ ქომონჯ დო მუმა, მუთუნიშ მოღე ვა რდჷ დო იეჰოვაშ მოწონა ხოლო დინაფილ აფუდ. ართ ონჯუას დიმიტრის  მუშ ძღაბიქ ქარღადშა ქიგუჭარ ესაიაშ 30:15-ის ინოჭარილ სიტყვეფ: „სქან ძალა მშვიდას რინას დო მენდებას იჸუაფ“. თე ქარღად ნორჩალშა ქიმუღ დო უწუ: „მამიკო, მუჟამსით მოწყინაფილ იჸუაფუქ, თე მუხლ ქიგიშინ“. დიმიტრიქ ქიმეხვად, ნამდა, მართალ რე, მუს მუთუნ ვაკეთებედ, მარა მუშ ოჯახის აუცილებერ მუთუნ ვარკუდ. თინა იჩიებ: „მა ხვალე მშვიდას ოკო ვორდიკო დო მივენდიკო ღორონთის“. თეცალ სირთულე თქვა ხოლო ქოიღუნან-და, რჯერდან, იეჰოვაშო არძაართ ვა რეთჷ დო მიგეხვარებუნა გარზებას.

13. მიშ საშვალებათ შილებე მოძირუან იეჰოვაქ მუშ მოწონა დო მუჭო ორთჷ თეს?

¹³ თანაქრისტიანეფიშ საშვალებათ. იეჰოვა და დო ჯიმალეფიშ საშვალებათ ხოლო მოგინაფუანა, ნამდა თიშ მოწონა მიღუნა. მაგალთო, შილებე შხვეფ გეგმირინუას ჩქინდა გურიშემაკინალ სიტყვეფიშ ორაგადეთ, მუჟამსით თენა მანგარო მოსაჭირუნა. აზიას მახორუ ართ დაქ თენა მუშ დუდშა გეგმოცად, მუჟამსით რთულ მდგომარეობას რდჷ. თიქ სამუშა მიოდინუ დო ჯამრთელობაშ სერიოზულ პრობლემაქ ხოლო ქაშუ. თეს თიქ ხოლო გიაძინ, ნამდა მუშ ქომონჯიქ შეცოდ დო უხუცესობაქ მანწყჷ. თე და იჩიებ: „მუთუნით ვემანწყინედ, მუშენ მაღოლ თე ირფელქ. ფიფქრენდჷ, ალბათ მუდგარენს მეფჩირთჷ დო იეჰოვაშ მოწონა მივოდინე-მაქ“. თე და იეჰოვას ოხვეწუდ, ქაძირუკო, ნამდა ვა აფუდ დინაფილ თიშ მოწონა. საინტერესო რე, მუჭო უპასუხ იეჰოვაქ. თე და გეუძინანს: „უხუცესეფქ დომრაგადუეს დო დუმარწმუნეს, ნამდა იეჰოვას უჸორდჷ“. მარა ჭიჭე ხანშა თე დაქ კინ ქოთხუ იეჰოვას დარწმუნუკო, ნამდა იწონუანდჷ. თინა იჩიებ: „ზუსტას თიმ დღას და დო ჯიმალეფშე წერილ მიბღჷ. თინეფიშ გურიშ ემაკინალ სიტყვეფიშ კითხირიშ უკულ ქიბგინ, ნამდა იეჰოვაქ მირჩქილუ ჩქიმ ლოცვა“. თაშ რე, ხშირას იეჰოვა მუშ მოწონას შხვეფიშ რაგადებულ გემუან სიტყვეფით მოძირანა (ფსალმ. 10:17).

14. ხოლო მუჭო მოძირანა იეჰოვა, ნამდა მიღუნა თიშ მოწონა?

 ¹⁴ თანაქრისტიანეფიშ საშვალებათ იეჰოვა საჭირო დროს რჩევეფს ხოლო მარზენა დო თეშნერო ხოლო მოძირანა, ნამდა თიშე მოწონა მიღუნა. მაგალთო, პირველ საუკუნეს იეჰოვაქ პავლე მოციქულს 14 წერილ მიოჭარაფუ თანაქრისტიანეფშა. თე წერილეფს პავლე და დო ჯიმალეფს პირდაპირ, მარა ჸოროფათ არზენს რჩევეფს. მუშენ მიოჩამაფუ იეჰოვაქ პავლეს თეცალ რჩევეფ? მუშენდა, მუჭოთ ჯგირ მუმა, იეჰოვა შეგონებას არზენს მუშ საჸოროფო სქუალეფს (იგავ. 3:​11, 12). თაშ ნამდა, მიდგაინქ ბიბლიაშა გერსხილ რჩევა ქომუჩეს-და, თენა ვა ნიშნენს, ნამდა იეჰოვა უკმაყოფილო რე ჩქინით. თეშ გინაწონს, თენა ამტკიცენს, ნამდა იეჰოვას კინ უჸორთ დო მიღუნა თიშ მოწონა (ებრ. 12:6). ხოლო მუჭო მოძირანა იეჰოვა, ნამდა მიწონუანა?

ᲮᲝᲚᲝ ᲛᲣᲭᲝ ᲛᲝᲫᲘᲠᲐᲜᲐ ᲘᲔᲰᲝᲕᲐ, ᲜᲐᲛᲓᲐ ᲛᲘᲦᲣᲜᲐ ᲗᲘᲨ ᲛᲝᲬᲝᲜᲐ?

15. მის არზენს იეჰოვა წმინდა შურს დო მუშა მარწმუნენა თენა?

¹⁵ იეჰოვა წმინდა შურს არზენს თინეფს, მიდგას იწონუანს (მათ. 12:18). დეფიქრით თეცალ კითხვეფშე: ქიგმიფრჩქინანქო წმინდა შურიშ ნაყოფიშ თვისებეფს? ქიდიბგურეო მოთვინება დოვარ კინ თიცალ ვორექ, მუნერით იეჰოვაშ გაჩინებაფაშახ ვორდჷ? მუთ უმოსო გეგმირჩქინანთ წმინდა შურიშ თვისებეფს, თით უმოსო ქოძირუნთ, ნამდა გიღუნა იეჰოვაშ მოწონა (ქოძირით ჩარჩო  „წმინდა შურიშ ნაყოფ რე . . . “).

16. მის ონდჷ იეჰოვა ქადაგებაშ საქმეს დო მუშა მარწმუნენა თენა? (1 თეს. 2:4).

¹⁶ იეჰოვა სახიოლო ამბეშ ქადაგებას თინეფს ონდჷ, მიდგას იწონუანს (წეკითხით 1 თესალონიკელეფიშ 2:4). ართ დაშ, ჯოსელინიშ, მაგალითშე ქობძირათ, მუ ჯგირობუა მუღჷ თის შხვეფშა სახიოლო ამბეშ გაცხადებაქ. ართ დღას ჯოსელინქ მანგარ გლახა განწყობათ გოკურცხჷ. თინა იშინანს: „მუთუნიშ დუდ ვა მიღუდ, მარა პიონერ ვორდჷ დო თიმ დღას მსახურება მაფუდ დაგეგმილ. ათეშენ ქიბლოც დო მიდაფრთჷ ოქადაგებშა“. თიმ ოჭმარეს ჯოსელინქ შეხვად ართ ოსურკოჩის, მერის, მიდგაწკუმა ბიბლიაშ გურაფა ქიდიჭყჷ. მუსხირენ თუთაშ უკულ ჩიებას მაჸუნესინ, მერიქ ჯოსელინს უწუ, ნამდა სი კარშა მიკომხაკენ თიმ ოჭმარეს, ბლოცულენდჷ დო ღორონთის მოხვარას ვოხვეწუდია. მუ დაგურუ თე შემთხვევაქ ჯოსელინს? თინა იჩიებ: «თენა თიცალ რდჷ ითამ იეჰოვაქ მიწუკო: „მა გიწონუანქ“». მუშო ოკო რაგად, ვეველუთ, ნამდა მსახურებას არძა ქუმომრჩქილუანა, მარა შემლებუნა ბჯერდან, იეჰოვას მანგარო ოხიოლ,  მუჟამსით ნამ შემლებუნან ირფელს ვორთუთ შხვეფშა სახიოლო ამბეშ გაცხადებელო.

17. მუს ბგურაფლენთ ვიკიშ შემთხვევაშე გიშაჸიდირალიშ გურშენ? (ფსალმ. 5:12).

¹⁷ გიშაჸიდირალიშ საშვალებათ იეჰოვა ცოდეფს თინეფს პატიენს, მიდგას იწონუანს (1 ტიმ. 2:​5, 6). მარა, თიშ უმკუჯინუო, ნამდა მიღუნა გიშაჸიდირალიშ რწმენა დო ნათილ ხოლო ვორეთ, შილებე ვა ბჯერდან, ნამდა მიღუნა იეჰოვაშ მოწონა. მუ ვაკეთათ თეცალ დროს? ვაგგოჭყორდან, ჩქინ გრძნობეფშა ირო ვენდებე; მინშა შილებე თინეფქ დუმაღორან. მარა იეჰოვაშ ნდობა შემლებუნა ირიათო მიღუდან. თინეფ, მიდგას გიშაჸიდირალიშ რწმენა უღუნა, იეჰოვაშ თოლს მართალეფო რენა მერჩქინელ დო თიშე კურთხევეფ ვემიოკორდუნა (წეკითხით ფსალმუნიშ 5:12; რომ. 3:26). გუარჩუათ, მუჭო მეხვარ ჩქინ ართ დას, ვიკის, გიშაჸიდირალშე ფიქრიქ. ართ დღას, მუჟამსით გიშაჸიდირალშე ბრელ ხანს ფიქრენდჷ, თიქ თეცალ მუდგარენს ქიმეხვად: «მუსხი ხანს ნობთვინებუე იეჰოვა . . . ვარინ მა ფაქტიურო თეცალ სიტყვეფს ურაგადუდ: „სი ვეშეილებ თიშმადიდა ჸოროფაშ გიმორჩქინა, ნამდა მა ქომიჸოროფუე. სქან სქუაშ გიშაჸიდირალ ხოლო ვაბაღ ჩქიმ ცოდეფს“». გიშაჸიდირალშე ფიქრიშ ჭყოლოფათ, ვიკიქ ქიგინ, მუჭო უჸორდჷ იეჰოვას თინა. თეშ კეთება ჩქი ხოლო მიმეხვარებუნა, ქიბგინათ იეჰოვაშ ჸოროფა დო თიშ მოწონა.

18. მუშა შეულებუნა რდანჷ დარწმუნებულ თინეფ, მიდგას იეჰოვა უჸორა?

¹⁸ მართალ რე, შილებე ირნერო ვოცადუდათ თე სტატიას გარჩიებულ რჩევეფიშ გიმორნაფას, მარა მინშა შილებე იშენით მიტირხუდან გურ დო ფიფქრენდათ, ნამდა ვა მიღუნა იეჰოვაშ მოწონა. თაშ ქუმოხვად-და, ქიგიშინით, ნამდა იეჰოვა იწონუანს თინეფს, მიდგას თიშ ჸოროფა უღუნა (იაკ. 1:12). თაშ ნამდა, გაგრძელით თიწკუმა დაახლოება დო ქიდეკვირით თი არძა მხარეს, სოვრეშეთ იეჰოვა გოძირანა, ნამდა გიწონუანა. ვაგგოჭყორდან, იეჰოვა „შორს ვა რე ჩქინდე“ (საქ. 17:27).