1, 2. ა) მუ მნიშვნელოვან საკითხიშ წოხოლე გერე კაცობრიობა? ბ) მუშენ რე მნიშვნელოვან თე საკითხი ჩქინო?

ბრელ კათაშო ამდღა ირფელშე უმოს მნიშვნელოვან ფარა რე. თინეფ ქონებაშ შაყარუას ვარდა მუთ უღუნან თიშ მიკოლუაფას მიკახარჯენა არძაშ უმოს დროს. შხვეფს მიორჩქუნა, ნამდა არძაშ უმოს მნიშვნელოვან რე ოჯახი, ჯამრთელობა ვარდა კარიერა.

² მარა სინამდვილეს, თე საკითხეფშე ბრელით უმოს მნიშვნელოვან რე, იეჰოვაშ უზენაესობაშ დამტკიცება, ნამუთ არძას მოხუნა. ათეშგურშენ, კურცხას ოკო ვორდათ, ნამდა თე სიცოცხლეშო მნიშვნელოვან საკითხიქ უყურადღებოთ ვადმოსკიდან. მუჭო შილებე მოხვადას თექ? ირდღაშიან ოზრუნებელქ შილებე თეშ ქიმშამტყურუან, ნამდა გუმოჭყოლიდუან მუზმათ მნიშვნელოვან რე იეჰოვაშ უზენაესობაშ დამტკიცება. ვარდა პირად პრობლემეფქ შილებე გეგნოწონას თე მნიშვნელოვან საკითხი. მარა მუთ უმოსო მარჩქილენა, მუზმათ მნიშვნელოვან რე იეჰოვაშ უზენაესობაშ დამტკიცებაშ საკითხინ, თით უმოსო იპჸით მზათ, ვებრძოლათ ირდღაშიან პრობლემეფს. თენა მიმეხვარებნა, უმოს ხოლოშიან ურთიერთობა მიღუდან იეჰოვაწკუმა.

3. მუს ამტკიცენდ სატანა ღორონთიშ ხემძღვანელობაშენ?

³ სატანაქ ეჭვიშ თუდო ქიგიორინუ იეჰოვაშ უზენაესობაშ უფლება. თინა ამტკიცენს, ნამდა იეჰოვა გლახა მართველ რე დო მუდგარენ ჯგირს უფულუნს მუშ ქმნილებეფს. ფაქტიურო სატანა იჩიებ,  ნამდა ღორონთიშ ხემძღვანელობაშ უმშო ხალხი უმოს ბედნერ იჸუაფ (დაბ. 3:1—5). სატანა თის ხოლო ამტკიცენს, ნამდა ღორონც მითინ ვამსახურ ართგურო დო სერიოზულ სირთულეეფიშ დროს ოჭიშის ქურთინუანს თის (იობ. 2:4, 5). სატანაშ თე ბრალდებეფს ქუპასუხას თიშენ, იეჰოვა კაცობრიობას არზენს დროს, გეგმიარგამას მუ მაჸუნუ თიშ სამართლიან ხემძღვანელობაშ უმშო ცხოვრებას.

4. მუშენ ოკო გინოჭყორდას უზენაესობაშ საკითხიქ?

⁴ მუშო ოკო რაგად, იეჰოვას უჩქ, ნამდა მუსით სატანა ამტკიცენსინ, ტყურა რე. მარა მუშენ გინოჭყვიდ ღორონთქ, დრო ქიმუჩამუდკო სატანაშა? თიშენ ნამდა, ონირზებელ საკითხი ოხუ არძას, მუჭოთ ანგელოზეფს თეშ, ხალხის ხოლო (წეკითხით ფსალმუნი 83:18). * პირველ წყვილქ ოჭიშ ქურთინუ ღორონთიშ მართველობას დო თიშ უკულ ბრელ თაშ იქციებ. ათეშგურშენ ნამთინექ შილებე იფიქრას, ნამდა მუდგას სატანა ამტკიცენდუნ, მართალ რე. სოიშა თე მნიშვნელოვან საკითხ ვეგნოჭყორდუნ, დღას ვაღვენუნა ნამდვილ მშვიდობა ერეფს, ტომეფს, შხვადოშხვა რჯულიშ კათას, ოჯახეფს დო ცალკე პიროვნებეფს. მარა მუჟამსით იეჰოვაშ უზენაესობა დემტკიცებუნ, არძა თიშ სამართლიან ხემძღვანელობას დემორჩილებუ დო მთელ სამყაროს მშვიდობა იჸი (ეფეს. 1:9, 10).

5. მუჭო შემლებნა იეჰოვაშ მხარე დებკინათ უზენაესობაშ საკითხის?

⁵ იეჰოვაშ უზენაესობაშ უფლება დემტკიცებუნ, არგამა იჸი, ნამდა სატანაშ დო კოჩიშ მართველობაქ ვა გამართლუ დო ართ დო სამუდამოთ გენადგურებუ. ღორონთიშ მართველობა თიშ მესიანურ სამეფოშ ჭყოლოფუათ წარმატებულ იჸუაფ დო ხალხი მუნეფიშ ართგურობათ დამტკიცენს, ნამდა შეულებნა ღორონთიშ მართველობაშ მხარე დეკინან (ეს. 45:23, 24). მუშო ოკო რაგად, ალბათ გოკონა რდათ თი ართგურ ხალხ შქას, მით იეჰოვაშ უზენაესობას უკინენს ხუჯის. ართგურ დო მორჩილეფ ვორდათინ თიშო, საჭირო რე ირო ფშუდან უზენაესობაშ საკითხ დო მარჩქილედან მუსხით მნიშვნელოვან რე თინა.

6. მუსხით მნიშვნელოვან რე იეჰოვაშ უზენაესობაშ დამტკიცება?

⁶ მუჭოთ თე სტატიას მოშინაფილ რდუნ, იეჰოვაშ უზენაესობაშ დამტკიცება, არძაშ უმოს მნიშვნელოვან საკითხ რე სამყაროს, ვინემ მითინიშ პირად ბედნერობა. ხომ ვა უბრალოენს თე ფაქტი ჩქინ გინოსკილადას ვარდა თის ხომ ვა ნიშნენს, ნამდა იეჰოვას ვა ვოინტერესუთ? შუროთ ხოლო ვარ. მუშენ შემლებუნა თეშ თქუალა?

7, 8. მუშენ მიშურს იეჰოვაშ უზენაესობაშ საკითხშა მუშ დაპირებეფიშ შესრულება?

⁷ იეჰოვას მანგარო უჸორს დო აფასენს ხალხის. მარადიულ ცხოვრებაშ საშვალება ქომღუდესკონ თიშგურშენ, თიქ მუშ სქუაშ სიცოცხლე შეწირ (იოან. 3:16; 1 იოან. 4:9). იეჰოვა მუშ დაპირებეფს ვეშიასრულენს-და, სატანას აღვენუ თიშ მიზეზ, ღორონც მეტყურე დუძახას დო თქუას, ნამდა თინა მუდგარენ ჯგირს უფულუნს ხალხის დო თეგვარო უსამართლოთ მართველენს. თეშ გარდა მოწინააღმდეგეეფს ხოლო აღვენუნა თიშ მიზეზ გეძიცებულო თქუან: „სო რე თი დუნაპირებ დრო, მუჟამსით თინა მოულირ ოკო ჸოფედკო? თევრეშე მოჸუნაფილ, მუთ ჩქინ ჯვეშეფქ დოღურესინ, ირფელ თეშ სქიდუ, მუჭოთ გუნაჭყეფუშ დაჭყაფშე რდუ“ (2 პეტ. 3:3, 4). იეჰოვა შეასრულენს მუშ დუნაპირებუს დო ქაძირანს, ნამდა ართგურეფიშ გინოსკილადა მუშ უზენაესობაშ დამტკიცებაშ საკითხშა მიშურს (წეკითხით ესაია 55:10, 11). * თეშ გარდა, იეჰოვაშ უზენაესობა ჸოროფაშა რე გერსხილ. ათეშენ შემლებუნა დარწმუნებულ ვორდათ, ნამდა იეჰოვას ირიათო უჸორდას იჸი დო აფასენდას იჸი მუშ ართგურ მსახურეფს (გამ. 34:6).

 ⁸ მართალ რე, იეჰოვაშ უზენაესობაშ საკითხ მნიშვნელოვან რე, მარა თენა თის ვა ნიშნენს, ნამდა ჩქი ვარდა ჩქინ გინოსქილადა ღორონც ვაინტერეს. ჩქი სწორ თოლწონუა ოკო მიღდან იეჰოვაშ უზენაესობაშ დო გინოსქილადაშ გურშენ. თენა მოხვარნა, ირიათო ფშუდან, მუ რე უმოს მნიშვნელოვან დო ართგურო დუკინათ ხუჯი იეჰოვაშ ხემძღვანელობას.

9. მუს ამტკიცენდ სატანა იობიშ გურშენ? (ქოძირით სურათ 22-ა გვერდის).

⁹ იობიშ წიგნიშე, ნამუთ ბიბლიაშ ართ-ართ პირველ წიგნი რე, იძირე, მუსხით მნიშვნელოვან რე, სწორ თოლწონუა მიღუდან იეჰოვაშ უზენაესობაშ გურშენ. თე წიგნიშე იძირე, ნამდა სატანაშ მტკიცებათ იობი რთულ განსაცდელეფიშ დროს ოჭიშის ქურთინუანდ ღორონც. სატანაქ ღორონც უწუ, ნამდა პირადო დუტანჯებუდკო იობი. იეჰოვაქ ვარია თქუ თეშე, მარა თიქ ქიმეჩ სატანას უფლება, გეგმუცადებუდკო იობი დო უწუ: „აჸ, სქან ხეს რე ირფელ, მუთ უღ“ (წეკითხით იობი 1:7—12). * ჭიჭე ხანშა, იობის გუჭყორდ მსახურეფქ დო მეუდინ ირფელქ, მუთ ქუღუდ; ბოლოს ვითხოლო სქუაქ დუღურ. სატანაქ თეშ მანწყუ ირფელ, ითამ ღორონთი რდუკო იობიშ პრობლემეფიშ მიზეზი (იობ. 1:13—19). თეშ უკულ სატანაქ იობი არძაშ უფრაშ ლახალათ დალახუ (იობ. 2:7). იობიშ გაჭირებას მუშ ოსურიშ დო სუმ ითამ მეგობარიშ გურიშ გუმატახალ სიტყვეფქ ხოლო ქიგიაძინ (იობ. 2:9; 3:11; 16:2).

10. ა) მუჭო ოძირუ იობიქ, ნამდა ღორონთიშ ართგურ რდუ? ბ) მუშენ ოსაჭირუდ იობის აზროვნებაშ თირუა?

¹⁰ მუდგას სატანა ამტკიცენდუნ, ირფელქ ტყურაქ იჸუ. იობიქ ღორონთიშ ართგურქ ქუდოსკიდ (იობ. 27:5). მარა მუსხირენ ხანიშ დინახალე იობის მეუდინ სწორ თოლწონუაქ. თინა ოცადუდ მუშ სიმართლე დამტკიცკო დო ქიგეგკო, მუშენ იტანჯებუდთეშმანწარათ (იობ. 7:20; 13:24). ჩქი შილებე მიშებლათ იობიშ მდგომარეობაშა დო ქუგუგათ თის, მარა იეჰოვა ორწყედ, ნამდა თის ოსაჭირუდ აზროვნებაშ თირუა. მუ უწუ იეჰოვაქ თის?

11, 12. მუშ გაგებას მეხვარ იეჰოვაქ იობის დო მუჭო მიქცუ თიქ?

¹¹ იობიშ წიგნის— 38—41 დუდეფს მოჩამილ რე იობშა ნათქუელ ღორონთიშ სიტყვეფი, მარა თექ სოთინ ვა რე მოშინაფილ, ღორონთიქ იობის უწუკო, მუ რდუ თიშ ტანჯებაშ მიზეზი. იეჰოვაშ მთავარ მიზანი ვარდ, გეუნწყუკო იობის, მუშენ ინატჯებუდუნ დო თეთ დუდ უმართლებუდკო. იეჰოვას ოკოდ ქიმეხვარკო იობის თიშ გაგებას, ნამდა მუშ დიდებაწკუმა გინაწონს მუშმაჭიჭა რდუ იობი. ღორონთიქ ქაძირუ იობის, ნამდა არსებენდ  მუშ პრობლემეფშე უმოს მნიშვნელოვან საკითხეფი (წეკითხით იობი 38:18—21). * თექ მეხვარ იობის, გეგმასწორკო მუშ თოლწონუა.

¹² თიშ უკულ მუთ იობიქ გინიღუნ, იეჰოვაშ თეცალ პირდაპირ რჩევა ზედმეტ ხომ ვეჸიდ თიშო? მუშო ოკო რაგად ვარ, დო ვართ იობი ფიქრენდ თაშ. ძნელ გინაღალარ განსაცდელეფიშ უმკუჯინუო, იობიქ ბოლოს სწორას ქიდიჭყ ფიქრი დო რაგად. თიქ თქუ: „უკახალე მემიღ ჩქიმ სიტყვეფი დო ტვერს დო ტუტას იმნანიენქ“. თეცალ შედეგიქ მაჸუნ იეჰოვაშ პირდაპირ, მარა გიშმაკურცხინაფალ რჩევას (იობ. 42:1—6). თეიშა იობიქ ახალგაზრდა ელიჰუშე ხოლო მიღუ სწორ რჩევა (იობ. 32:5—10). მუჟამსით იობიქ მიღუ იეჰოვაშ რჩევა დო თოლწონუა გეგმასწორუნ, იეჰოვაქ შხვეფს ქუგაგებაფუ, ნამდა აფასენდ იობიშ ართგურობას, ნამუთ პრობლემეფიშ დროს ხოლო გიმირჩქინ (იობ. 42:7, 8).

13. მუჭო მეხვარებუდ იობის იეჰოვაშ რჩევა განსაცდელეფიშ უკულ ხოლო?

¹³ იეჰოვაშ რჩევა იობის განსაცდელეფიშ უკულ ხოლო გიმადირთუდ. მუშენ? ბიბლიას ჭარ: „იეჰოვაქ იობიშ ბოლო წანეფ პირველშე უმოსო აკურთხუ“. თე ირფელშო დრო იჸუაფუდ საჭირო, მუშენდა თის „ქეშეძინ შკვით ქომოლსქუაქ დო სუმ ოსურსქუაქ“ (იობ. 42:12—14). მუშო ოკო რაგად, იობის ონატრუდკონ იჸიდ მუშ სქუალეფ, მიდგაქ სატანაშ ხეშე ღურეს. მინშა გაშინედკონ იჸიდ თი დრო, მუჟამსით განსაცდელეფიშ გურშენ იტანჯებუდ. თიმ დროს ხოლო იობის ბოლოშა ქუგუგებუდკო, მუშ გურშენ იტანჯებუდუნ, შილებედ იშენით უფიქრებუდკონ, მუშენ რდუ აუცილებერ თეშმანწარათ დეტანჯუკო. მუჭოდგა ვა ჸოფედკო, თის შეულებუდ იფიქრუკო ღორონთიშ რჩევაშენ. თენა გურშა ეუქექუანდ დო მეხვარებუდ, უღუდკო სწორ თოლწონუა (ფსალმ. 94:19).

14. მუს ბგურაფლენთ იობიშ მაგალითშე?

¹⁴ იობიშ მაგალითშე დაფიქრება გურშა ემქექუანა დო მოხვარნა, მიღუდან სწორ თოლწონუა. იეჰოვაქ იობიშ ისტორია ბიბლიას ინაჭარაფუ „ჩქინ ოგურაფალო, მუშენდა მოთმინებათ დო წმინდა წერილეფშე მეღებულ გურიშ ექექაფათ მიღუდან იმენდი“ (რომ. 15:4). მუს ბგურაფლენთ თავრეშე? პირველი: ჩქინ პრობლემეფს თეშ ოკო ვეგნვაჸუნათ, ნამდა გუმოჭყორდან არძაშ უმოს მნიშვნელოვანქ — იეჰოვაშ უზენაესობაშ დამტკიცებაქ. მაჟია: საჭირო რე ირიათო ფშუდან ჩქინ როლი თე მნიშვნელოვან საკითხის, ნამდა განსაცდელეფიშ დროს ხოლო იობცალო ართგურეფქ ქიდოფსკიდათ.

15. მუ შედეგ მოუღ ართგურობას განსაცდელეფიშ დროს?

¹⁵ მუშენ რე გურიშემაქექაფალ თიშე ფიქრი, მუ მნიშვნელობა უღუ ჩქინ ართგურობას?  თიშენ ნამდა, თინა მუდგარენ მიზანს ომსახურ. განსაცდელეფ თის ვა ნიშნენს, იეჰოვა უკმაყოფილო რე ჩქინით. თენა მარზენა თიშ საშვალებას ვოძირათ, ნამდა იეჰოვაშ უზენაესობას უკინენთ ხუჯის (იგავ. 27:11). მუჟამსით მოთმინებას გიმიფრჩქინანთინ, თეს ღორონთიშ მოწონა მაჸუნუ დო ჩქინ იმენდი იმანგარებ (წეკითხით რომაელები 5:3—5). * იობიშ მაგალითშე იძირე, ნამდა „სათუთ გრძნობეფი უღუ იეჰოვას დო მუ შემაცოდილაფარ რე“ (იაკ. 5:11). შემლებნა დარწმუნებულ ვორდათ, ნამდა ღორონთი ირფელ ჯგირით გინუგანს არძას, მით ხუჯის უკინენს თიშ უზენაესობას. თეშ რჩქინა მოხვარნა, ირფელ მიფთვინათ დო მიღუდან ხიოლი (კოლ. 1:11).

16. მუშენ ოკო, გუვოშინათ ჩქინ დუც მუსხით მნიშვნელოვან რე იეჰოვაშ უზენაესობაშ მხარე ქიდებკინათ?

¹⁶ განსაცდელეფიშ დროს შილებე რთულქ იჸუას იეჰოვაშ უზენაესობაშენ ფიქრიქ, მუშენდა პრობლემეფ მინშა ირფელს მოჭყოლიდუანა. თეცალ დროს ჭიჭე პრობლემეფ ხოლო შილებე დიდო მიფრჩქინათ, მუჟამსით ბრელს ფიფქრენთ თინეფშე. ათეშგურშენ, პრობლემეფიშ დროს ჯგირ იჸუაფ ირიათო ქუგვოშინათ ჩქინ დუც, მუსხით მნიშვნელოვან რე იეჰოვაშ უზენაესობაშ მხარე ქიდებკინათ.

17. მუჭო მიმეხვარებნა რეგულარულო ქადაქი, ვაგმოჭყორდან მნიშვნელოვან საკითხიქ?

¹⁷ რეგულარულო ქადაქი მიმეხვარებნა, ვაგმოჭყორდან მნიშვნელოვან საკითხიქ. მაგალთო ართ დას რენეს ინსულტი, ქრონიკულ ჭუა დო კიბო უღუდ. შხვადოშხვა საავადმყოფოეფს მკურნალობაშ დროს თინა უქადაქუდ მედპერსონალს, პაციენტეფს დო მაძირაფუეფს. ართ საავადმყოფოს თიქ 80 საათი იმსახურ ჟირ მარა დო გვერდიშ დინახალე. მაღურუ რდუნ თეშ ხოლო რენეს დღას ვაგოჭყოლად იეჰოვაშ უზენაესობაშ საკითხი. თენა ოხვარუდ დეპრესიას ვენოლკო.

18. მუჭო იძირე ართ დაშ მაგალითშე, ნამდა იეჰოვაშ მხარეს გერინას ჯგირ შედეგ მოუღ?

¹⁸ მუშო ოკო რაგად, ჩქი მოკონა ირდღაშიან პრობლემეფიშ დროს ხოლო ფშუდან იეჰოვაშ უზენაესობაშ საკითხი. მაგალთო, ართ იეჰოვაშ მოწმე ჯენიფერს სუმ დღას აეროპორტის აჸუ გაჩერებელქ, მუშენდა თვითმფრინავიშ რეისეფქ გეგნიდუ. თინა შულადირ რდუ დო ხასლას მითინ ვა ჸუნდ, ათეშგურშენ შილებე მუშ დუდ შიცოდილკო. მარა ღორონც თხინდ, ქაძირუკო, მუჭო შეულებუდ სულიერო მეხვარკო თინეფს, მით მუჯგურა სიტუაციას რდეს. მუ რდუ თეშ შედეგ? თიქ ბრელს უქადაქუ დო ქიანაშ ლიტერატურა გავრცელ. ჯენიფერ იჩიებ: „ბგინაფლენდ, ნამდა იეჰოვა ჩქიმ გვერდით რდუ დო ქომუჩ ძალა განვადიდკო თიშ სახელ“. თის ვა გოჭყოლად არძაშ უმოს მთავარ, იეჰოვაშ ნებაშ შესრულება.

19. მუჭო ოძირანს იეჰოვაშ ხალხი, ნამდა თიშ უზენაესობაშ მხარეს გერე?

¹⁹ ხვალე იეჰოვაშ ხალხის არჩქილე თიშ უზენაესობაშ მნიშვნელობა დო თეთ გენსხვავებნა თინეფ ცრუ თაყვანიშმცემელეფშე. ჩქი, მუჭოთ ჭეშმარიტ თაყვანიშმცემლეფქ, ირიათო ოკო გებდირთათ იეჰოვაშ უზენაესობაშ მხარეს.

20. მუჭო უჯინე იეჰოვა თქვან მონდომას, ქიდეკინათ თიშ უზენაესობაშ მხარე?

²⁰ რჯერდან, იეჰოვა აფასენს თქვან მონდომას, მუშენდა თიშ უზენაესობაშ მხარე გიკინებნა თით, ნამდა ართგურო მსახურენთ დო ურზუთ განსაცდელეფს (ფსალმ. 18:25). ანწიან სტატიას გენიფხილენთ, მუშენ იმსახურენს იეჰოვა თის, ნამდა მთელ გურით ქუდუკინათ ხუჯი თიშ უზენაესობას დო მუჭო შემლებნა თეშ კეთება.