ᲛᲣᲡᲘᲙᲐ ჯვეშ ისრაელიშ კულტურაშ მნიშვნელოვან ნაწილ რდჷ. ბიბლიას ბრელ სიტუაცია რე ეჭარილ, სოდეთ ნამდგაინ საკრავს მიოგანა ვარდა იბირა. ბიბლიაშ მუსხირენ წიგნ დუდშე ბოლოშა ობირეშეფშე შითმოდირთუ. მაგალთო, მუნერეფით რე „ფსალმუნეფ“, „ქებათა ქება“ დო „გოდება“. ართ-ართ წიგნის, ნამუთ ეჭარუნს, მუნერ რდჷ ცხოვრება ბიბლიურ დროს, პკითხულენთ, ნამდა ისრაელეფ ბრელ შხვადოშხვა სიტუაციას ირინუანდეს მუსიკას.

ირდღაშიან ცხოვრებას. ისრაელეფ მუნეფიშ ემოციეფს მუსიკათ გიმოხანტუნდეს (ეს. 30:29). მაგალთო, მიდგაინიშ გამეფებაშ, დღახუეფიშ დო ჩხუპიშ მოგებაშ დროს ოსურკათა დაირეფს მიოგანდჷ, სხაპუნდეს დო იბირდეს (მსაჯ. 11:34; 1 სამ. 18:6, 7; 1 მეფ. 1:39, 40). მიდგაინ დოუღურუდესინ თიმწკუმა ხოლო, ისრაელეფ მუნეფიშ გურჭუას ობირეშით გიმოხანტუნდეს (2 მატ. 35:25). „მაკ-კლინტოკიშ დო სტრონგიშ ენციკლოპედიას“ ჭარჷ, ნამდა ისრაელეფს მართალო მანგარო უჸორდეს მუსიკა.

სამეფო კარს. ისრაელიშ მეფეეფს მანგარო უჸორდეს მუსიკაშ მორჩქილაფა. მაგალთო, მეფე საულქ დავით გიორინუ სამეფო კარიშ მუსიკოსო (1 სამ. 16:18, 23). უკულ, მუჟამსით დავითიქ გინირთჷ მეფეთ, მუშ ხეთ ორთუდ მუსიკალურ საკრავეფს, ჭარუნდჷ ობირეშეფს დო, თეწკუმა ართო, იეჰოვაშ ტაძარს ორკესტრ ქიგიორინუ, ნამდა მუსიკალურ საკრავეფს ქიმიოგესკო (2 მატ. 7:6; ამოს. 6:5). მეფე სოლომონს ხოლო მუშ სასახლეს ჸუნდჷ მაბირე ოსურკათა დო ქომოლკათა (ეკლ. 2:8).

თაყვანიშცემაშ დროს. ისრაელეფშო მუსიკას მნიშვნელოვან ადგილ უკინებუდ იეჰოვაშ თაყვანიშცემას. იერუსალიმიშ ტაძარს 4 000 მუსიკოს მიოგანდჷ მუსიკალურ საკრავეფს (1 მატ. 23:5). თინეფ მიოგანდეს წინწილეფს, ქნარეფს დო სიმეფ უღუნ ფერ შხვა საკრავეფს (2 მატ. 5:12). მარა იეჰოვაშ თაყვანიშცემაშ დროს, მუსიკას ხვალე პროფესიონალ მუსიკოსეფ ვერინუანდეს. მაგალთო, მუჟამსით ისრაელეფ ირწანიან დღახუშ აღნიშნებელო იერუსალიმშა მიშეს, თინეფშე ბრელ შარას იბირდჷ (ფსალმ. 120—134). მუჭოთ იუდაურ ნაჭარეფშე იძირე, ისრაელეფ პასექიშ დღახუშ აღნიშნებაშ დროს „ჰალელეფს“ a იბირდეს.

მუსიკა ამდღა ხოლო მანგარ მნიშვნელოვან რე ღორონთიშ მსახურეფშო (იაკ. 5:13). ჩქი იეჰოვაშ ოდიდებელო იბიბრთ (ეფეს. 5:19). თანაქრისტიანეფწკუმა ბირაშ დროს უმოსო ბგინაფლენთ თი ართობას, ნამუთ ჩქინ შქას რე (კოლ. 3:16). იეჰოვაშ ოდიდებელ ობირეშეფიშ ბირა, მეგამა დო მორჩქილაფა მოხვარუნა სირთულეეფიშ გარზებას (საქ. 16:25). თაშ ნამდა, მუსიკა ჯგირ საშვალება რე, გეგმოფხანტათ იეჰოვაშ მიმართ რწმენა დო ჸოროფა.