1, 2. მუ მიშურს „ჯგირ საქმეშა“, მუდგას უხუცესეფ ორთუნა?

 ᲛᲝᲛᲡᲐᲮᲣᲠᲔ ქორექ-და, ალბათ უკვე გავითარებულ გაჸი ბრელ თიცალ თვისება, მუთ უხუცესო მსახურებაშო რე საჭირო. ქინჭუაფუქო თე „ჯგირ საქმეშა“? (1 ტიმ. 3:1).

² მუ საქმეეფს ორთუნა უხუცესეფ? თე ჯიმალეფ ხელმძღვანელენა ქადაგებაშ საქმეს, რენა ჭყიშეფ დო მასწავლებერეფ დო ამანგარენა კრებას სიტყვათ დო საქმეთ. ბიბლია მართალო ჯგირო ეჭარუნს თე ჯიმალეფს, მუჟამსით თინეფიშ გურშენ იჩიებ, ნამდა „ადამიანეფ [რენა] ძღვინო“ (ეფეს. 4:8).

3. მუ ოკო აკეთას ჯიმაქ, უხუცესიქ ქიჸუასინ? (1 ტიმ. 3:1–7; ტიტ. 1:5–9).

³ მუ ოკო აკეთე, უხუცესიქ ქიჸუენ? თენა ვა მოგენს სამუშაშ შიბას. ხშირას დამსაქმებელს ხვალე თინა ოინტერეს, მთავარ უნარეფ ქოიღუდას, მუთ მუშ საქმეშ კეთებას მიგეხვარებ. მარა უხუცესიქ ქიჸუენ, ხვალე თინა ვა რე დასაბაღ, უნარიან რდე დო ჯგირო გიშგალედას ქადაგება დო გურაფა. თეწკუმა ართო, საჭირო რე, თიცალ ადამიან რდე, მუნერით 1 ტიმოთეშ 3:1-7 დო ტიტეშ 1:5-9-ს რე ეჭარილ (წეკითხით). თე მუხლეფს მოჩამილ მოთხოვნეფს სუმ კუნთხუთ გუვარჩიენთ: 1) უხუცესის ჯგირ სახელ ოკო უღუდას მუჭოთ კრებაშ დინახალე, თეშ კრებაშ გალე, 2) ოკო რდასჷ სამაგალითო ოჯახიშ დუდ დო 3) მზათ ოკო რდასჷ, მემსახურას კრებას.

ᲒᲘᲦᲣᲓᲐᲡ ᲯᲒᲘᲠ ᲡᲐᲮᲔᲚ

4. მუს ნიშნენს მოთხოვნა „ბრალიშ გედვალაშ სამანჯელ მითინს ოკო ვა უღუდას“?

⁴ უხუცესო დენიშნენ, სქანდა „ბრალიშ გედვალაშ სამანჯელ მითინს ოკო ვა უღუდას“. თენა ნიშნენს, კრებას ჯგირ კოჩიშ სახელ გერძუდას დო მითინს ვეგიადვინედას სქანდა ხე გლახაშ  კეთებას. თეწკუმა ართო, კრებაშ გალე ხოლო ჯგირ სახელ ოკო გიღუდას. შილებე იეჰოვაშ მოწმეეფ ვა რენან თინეფქ სქან რწმენაშენ გლახათ იჩუან, მარა სი ოკო ვემეჩე დღას თიშ რაგადიშ სამანჯელ, წესიერ დო პატიოსან კოჩ ვა რენია (დან. 6:4, 5). ქოკითხ სქან დუდის: ქომღუნო ჯგირ სახელ ქოთ კრებას დო ქოთ კრებაშ გალე?

5. მუჭო შეილებ ოძირუე, ნამდა ჯგირიშ მოჸოროფე რექჷ?

⁵ ხოლო ართ მოთხოვნა რე, რდე ჯგირიშ მოჸოროფე. თეცალ კოჩ ორწყე შხვეფიშ ჯგირ თვისებეფს დო ოცქვანს თინეფს თეშ გურშენ. თეს გეძინელ, ოხიოლ შხვეფშა ჯგირიშ კეთება დო მზათ რე, მეთხიებუნ თიშე უმოს გაკეთას თინეფშო (1 თეს. 2:8). მუშენ რე მნიშვნელოვან, უხუცეს ჯგირიშ მოჸოროფე რდასჷ? მუშენდა თე ჯიმალეფ ქიანაშ დროს გიმურთუნა კრებაშ ჭყიშუას დო მუნეფიშ პასუხიშმგებლობეფიშ შესრულებას, ათეშენ თე თვისება მნიშვნელოვან რე, ნამდა თექ ხიოლით გაკეთებუან (1 პეტ. 5:1–3). მართალ რე, თინეფს ბრელ საქმე უღუნა, მარა თი ხიოლ, ნამუთ შხვეფშა მოხვარას მოუღ, ირნერ მსხვერპლის გინოფორუნს (საქ. 20:35).

6. მუს ნიშნენს, რდე სტუმარიშ მოჸოროფე? (ებრ. 13:2, 16; ქოძირით სურათ).

⁶ მუჭო შეილებ ოძირუე, ნამდა სტუმარიშ მოჸოროფე რექჷ? თეცალ ადამიან ხვალე მუშ ხოლოშიან მეგობრეფს ვარინ, არძას ურთჷ ჯგირს (1 პეტ. 4:9). ართ-ართ წყაროს სტუმარიშ მოჸოროფე კოჩ თეშნერო რე ეჭარილ: „თიშ გურიშ დო ჸუდეშ კარ ირო გონჯამილ რე უჩინებ ხალხშო“. ქოკითხ სქან დუდის: ქომღუნო თიცალ კოჩიშ სახელ, მით ირო მზათ რე სტუმარეფიშ მიოღებელო? (წეკითხით ებრაელეფიშ 13:2, 16). სტუმარიშ მოჸოროფე კოჩ ნამ უღუნ თის, შურ დო გურით ურთუნს მუშ სტუმარეფს, მაგალთო, საშვალება ვა უღუნ ფერ და დო ჯიმალეფს, კრებაშა მოხსენებათ მოულირ ჯიმალეფს დო თინეფს, მით განსაკუთრებულო ბრელს ხანდენა თანაქრისტიანეფშო, მაგალთო, რაიონულ ზედამხედველეფს (დაბ. 18:2–8; იგავ. 3:27; ლუკ. 14:13, 14; საქ. 16:15; რომ. 12:13).

7. მუჭო შეილებ ოძირუე, ნამდა ვა რექჷ ფარაშ მოჸოროფე?

⁷ „ფარა ვა უჸორდას“. თენა ნიშნენს, ნამდა ფარა დო მატერიალურ ნივთეფ ოკო ვა რდასჷ სქანო ირფელშე უმოს მნიშვნელოვან. ვა უღჷ მნიშვნელობა ქონებიერ რექჷ დოვარ ბრელიშ საშვალება ვაიღ, ცხოვრებას  პირველ ადგილშა ღორონთიშ სამეფო ოკო გეირდას (მათ. 6:33). სქან დრო, ენერგია დო ირფელ იეჰოვაშ თაყვანიშცემაშო, ოჯახშა მიკაჯინალო დო კრებაშ მამსახურებელო გეგმირინე (მათ. 6:24; 1 იოან. 2:15–17). ქოკითხ სქან დუდის: მუნერ დამოკიდებულება მიღჷ ფარაშენ? ქიგებჯერდუქო აუცილებერს დოვარ ირო უმოსიშ შიბას ფიფქრენქ? (1 ტიმ. 6:6, 17–19).

8. მუჭო შეილებ ოძირუე, ნამდა ირფელს ზომა-წონა გიჩქჷ დო დუდშეკებულ რექჷ?

⁸ ირფელს ზომა-წონა ქოიჩქ დო დუდშეკებულ ქორექ-და, გონიერებას გიმირჩქინანდენ იჸი არძა საკითხის. თეშა მიშურს, უნორმეთ ვა ჭკუმე, ვა შვე დო ჭკვერულ გადაწყვეტილებეფ მიღე მიკაქუნალიშ, თუმაშ სტილიშ ვარდა გართობაშ გიშაგორუაშ დროს. ვეიაჸუნა ქვეყნიურ ხალხიშ გლახა ცხოვრებაშ წესის (ლუკ. 21:34; იაკ. 4:4). დუდშეკება თის ხოლო ნიშნენს, ნამდა ვეგშართე მდგომარეობაშე, მუჟამსით სქან ეჸოთამას ოცადუნა. თეწკუმა ართო, უხუცეს „ოკო ვა რდასჷ შუმილია“ დო ვართ მანგარ მაშუმალიშ სახელ გეძუდას. ქოკითხ სქან დუდის: ქირაგადენო ჩქიმდე, ნამდა ირფელს ზომა-წონა მიჩქჷ დო დუდშეკებულ ვორექ?

9. მუს ნიშნენს, მოთხოვნეფ გურგოჩამილ დო ირნერო წკანტილ რდასჷ?

⁹ გურგოჩამილ რდენ თენა ნიშნენს, შხვადოშხვა სიტუაციას ბიბლიურ პრინციპეფით მეუდირთე. ჯგირო ოკო გარჩქილედას ბიბლიურ პრინციპეფ, მუთ მიგეხვარებ, ქინანჭე საკითხეფს დო მიღე ჭკვერულ გადაწყვეტილებეფ. თეწკუმა ართო, გურგოჩამილ კოჩ, ონდო არძა საჭირო ინფორმაცია ვაღვენუნ თეიშახ, ვა ჩქარენს დასკვნეფიშ გიშაღალას (იგავ. 18:13). შედეგო, შეულებ მიღას ჭკვერულ გადაწყვეტილებეფ, ნამუთ იეჰოვაშ აზროვნებას მეურე. ირნერო წკანტილ რდენ თენა ნიშნენს, რდე ორგანიზებულ დო პუნქტუალურ. თეცალ კოჩის იჩინენა, მუჭოთ საიმენდოს დო ხელმძღვანელობას მეჸუნსინ ფერს. თე თვისებეფიშ ჭყოლოფათ ჯგირ რეპუტაცია გაღვენუ. ასე მორთ ქიფჩუათ თიშე, მუჭო ოკო დაკმაყოფილას ჯიმაქ ბიბლიურ მოთხოვნეფ, ნამდა სამაგალითო ოჯახიშ დუდ რდასჷ.

ᲠᲓᲐ ᲡᲐᲛᲐᲒᲐᲚᲘᲗᲝ ᲝᲯᲐᲮᲘᲨᲓᲣᲓ

10. მუს ნიშნენს, ჯგირო მერჸუნდას ოჯახ?

¹⁰ დაოჯახებულ ქორექ დო უხუცესო მსახურება ქუგოკონ-და, სქან ოჯახის მუნერ სახელ გეძუნ თეს დიდ მნიშვნელობა აღვენუ სქან დანიშნებაშო. ათეშენ, ოჯახ ჯგირო ოკო მერჸუნდას. საჭირო რე, ჸოროფათ ზრუნენდე სქან ოჯახშე დო სერიოზულო მეურდე ოჯახიშ დუდიშ პასუხიშმგებლობას. თეშა თინა ხოლო მიშურს, ნამდა ირიათო ჩატარე ოჯახურ თაყვანიშმცემლობა, ქიმეხვარე ოჯახის, ირიათო ქიდესწრან კრებაშ შეხვალამეფს, დო, ნამ შეულებუნან, ირფელ გაკეთან მსახურებას. მუშენ რე თე ირფელ თეცალ მნიშვნელოვან? დეკვირით, მუს იჩიებ პავლე: „კოჩის ოჯახ მუჭო იჸუნასინ თინა ვა უჩქუნ-და, ღორონთიშ კრებას მუჭო მიკაჯინე?!“ (1 ტიმ. 3:5).

11, 12. მუჭო მოქმედენს მუმაშ პასუხიშმგებლობეფშა, მუნერეფ რენა თიშ სქუალეფ? (ქოძირით სურათ).

¹¹ ბაღანეფ ქორჸუნს-და, თინეფ შეგნებულო ოკო გომორჩილუდან. მუშო ოკო რაგად, მუჭოთ არძა ბაღანასინ თეშ, სქანეფს ხოლო უჸორდან იჸი ძიცა-ლაჸაფ, მარა თინა ხოლო ოკო ქუდაგურუე, ნამდა რდანჷ მორჩილეფ, პატიცემათ მექცუან შხვეფს დო ჯგირო მიქცუან. თეწკუმა ართო, მუთ შილებენ ირფელ გაკეთ, ნამდა ქიმეხვარე სქუალეფს, იეჰოვაწკუმა ხოლოშიან ურთიერთობა გევითარან, ბიბლიურ პრინციპეფით იცხოვრან დო ირიათო წიმი იდან, ნამდა დინათან.

¹² „ჸუნდას . . . მორწმუნე სქუალეფ, მიდგას ბრალ ვეგეძუნა დუდეშქუმალირობას ვარდა უდუჯერებუობას“. მუჭო იმოქმედენს მუმაშ პასუხიშმგებლობეფშა, მუწკუმა ცხოვრენსინ ფერ მორწმუნე სქუა სერიოზულო შეცოდენს-და? მუმა, ნამუთ მუშ ადგილს ვეგერდჷ – მეშქუმალირ აფუდ სქუა დო ვაგურუანდჷ თის –  ალბათ, ვეჸუაფ შესაფერის უხუცესო მსახურებაშო (ქოძირით 1996 წანაშ 1 ნოემბერიშ „გინაჯინალ კოშკი“, გვ. 17, აბზ. 6, 7).

ᲛᲔᲛᲡᲐᲮᲣᲠ ᲙᲠᲔᲑᲐᲡ

13. მუჭო შეილებ ოძირუე, ნამდა დოჸუნა ვაიჭირს დო ვა რექჷ აჩემებულ?

¹³ ჯიმალეფ, მიდგას ქრისტიანულ თვისებეფ უღუნა, მანგარო ოხვარუნა კრებას. მაგალთო, დოჸუნა ვა უჭირსინ ფერ კოჩ მშვიდობას უნწყუნს ხეს. თეცალ ჯიმაშ სახელ გიღუდასინ ქუგოკონ-და, ოკო შეილებუდას შხვეფიშ მორჩქილაფა დო მზათ რდე შხვანერ აზრიშ მიოღებელო. წერმიდგინ, ნამდა უხუცესო დენიშნჷ დო უხუცესეფიშ საბჭოშ შეხვალამას ოსწრუქ. ჯიმალეფიშ უმენტაშ ართ აზრის გერე, ნამუთ სი იშენდოიშენ ვა მორწონს. ქიჸიქო მზათ, ქუდაჸუნე თინეფს, მუჟამსით, მუდგას იჩიებუნან თინა, ვაწინააღმდეგ ბიბლიურ პრინციპეფს? აჩემებულ ვა რდენ თენა ნიშნენს, ვაცადუდე, ირფელქ სი გოკონ თეშ გეკეთინას. ოკო გარჩქილედას, მუსხით მნიშვნელოვან რე შხვეფიშ რჩევაშ მორჩქილაფა (დაბ. 13:8, 9; იგავ. 15:22). თეწკუმა ართო, ოკო ვაიჩქუდას ნირზ დო ვა რდე გურფიცხე. ვეჩუა ჸინჩას დო გურმულირო. ქეცად, გემუანო დო ტაქტიანო რაგადუე. რდა მშვიდობიან კოჩ, მუთ ნიშნენს, შხვეფწკუმა ურთიერთობაშ დროს, მანგარ დაძაბულ სიტუაციეფს ხოლო, მშვიდობას შეუნწყუე ხე (იაკ. 3:17, 18). სქან გემუან სიტყვეფს შეულებ გურმულირ ადამიან ხოლო დამშვიდას, თინეფ ხოლო, მით ოწინააღმდეგუნა ჩქინ რწმენას (მსაჯ. 8:1–3; იგავ. 20:3; 25:15; მათ. 5:23, 24).

14. მუს ნიშნენს მოთხოვნეფ, „ოკო ვა რდასჷ რწმენას ახალ“ დო „რდასჷ ართგურ“?

¹⁴ ჯიმაქ უხუცესიქ ქიჸუასინ, „ოკო ვა რდასჷ რწმენას ახალ“. მართალ რე, უხუცესო დენიშნენ, აუცილებერ ვა რე, ბრელ წანაშ ნანათა რდე, მარა საჭირო რე, სულიერო მოწიფულ ქრისტიან რდე, მუდგაშ მენჭირნაფას დრო ოსაჭირ. სქან საქმეეფით ქაძირე, ნამდა იესოცალო თანდაბლურო ასრულენქ ირნერ დავალებას დო მოთვინებათ უჯინექ იეჰოვას, მუჟამ მერჩანს უმოს პასუხიშმგებლობეფს კრებას (მათ. 20:23; ფილ. 2:5–8). უხუცესიშ ხოლო ართ მოთხოვნა რე, „რდასჷ ართგურ“. თე  მოთხოვნას აკმაყოფილენქინ თეს თით ქაძირანქ, ნამდა მიაჸუნუქ იეჰოვაშ სამართლიან ნორმეფს დო ორგანიზაციაშე მეღებულ ხელმძღვანელობას (1 ტიმ. 4:15).

15. აუცილებერ რენო, უხუცეს მანგარ ორატორ რდასჷ? გენწყით.

¹⁵ წმინდა წერილეფ პირდაპირ იჩიებ, ნამდა ზედამხედველს „ოკო შეულებუდას შხვაშა გურაფა“. ნიშნენსო თენა, ნამდა აუცილებერო ორატორ ოკო რდე დო სასწაულ მოხსენებეფით გიშეშე? ვარ. ბრელ უხუცეს იშენდოიშენ ჯგირ მომხსენებელ ვა რე, მარა თინეფს ჯგირო შეულებუნა ოგურუან შხვეფს მსახურებაშ დროს დო სამწყემსო მონახულებეფს (ქეშუდარით 1 კორინთელეფიშ 12:28, 29 დო ეფესოელეფიშ 4:11). მართალ რე, მუჭოთ ფთქვით, უხუცესობაშო აუცილებერ ვა რე, განსაკუთრებულ მომხსენებელ რდე, მარა ენა ის ვა ნიშნენს, შურო ვეცადე თე უნარიშ გაუჯგუშებას. მუ მიგეხვარებ თეშ კეთებას?

16. მუჭო შეილებ გაუჯგუშე გურაფაშ უნარ? (ქოძირით სურათ).

¹⁶ „სიმართლეშ სიტყვას ზუსტას ოკო გეჸუნდას“. ჯგირ მასწავლებერ რდენ თეშო საჭირო რე, სქან ჩიება ბიბლიაშა რდასჷ გერსხილ, იჸუაფუნო თენა საჯაროთ გურაფაშ დროს დოვარ თიმწკუმა, მუჟამსით მიდგაინშა რჩევა გაფჷ მიოჩამალ. თეშო საჭირო რე, ჯგირო ირკვიენდე ბიბლიას დო ჩქინ პუბლიკაციეფს (იგავ. 15:28; 16:23). გიმორკვიებაშ დროს ჯგირო ქიდეკვირ, მუჭო ენწყუნს ბიბლიურ მუხლეფს ჩქინ პუბლიკაციეფ, ნამდა სწორას შეგალებუას თე მუხლეფიშ გიმორნაფაქ. შხვეფშა გურაფაშ დროს ქიმეხვარ მარჩქილეეფს, უმოსო ქიჸოროფუან იეჰოვა დო გინოჭყვიდან, გეგმირინუან ნაგურეფ. გამოცდილ უხუცესეფშა რჩევაშ ელაკითხირ დო თინეფიშ ნარაგადიშ გიმორნაფა ხოლო მიგეხვარებ, გეუჯგუშე გურაფაშ უნარ (1 ტიმ. 5:17). უხუცესის ოკო შეულებუდას გურშა ელუკინას და დო ჯიმალეფს. მარა, თეწკუმა ართო, მინშა საჭირო იჸი, შხვეფს რჩევა ქიმეჩე ვარდა ქაძირუე, სო რენა ჩილათირ. თეცალ შემთხვევეფს ირნერო ოკო ეცადე, გემუანო გაკეთე თენა. ჸოროფათ დო გემუანო ქიჩიებუქ დო სქან გურაფას ღორონთიშ სიტყვაშა ქიგიორსხუანქ-და, ჯგირ მასწავლებერ იჸუაფუქ, მუშენდა თეშნერო  დიდებულ მასწავლებერიშ, იესოშ, მაგალითის ქიმიაჸუნუქ (მათ. 11:28–30; 2 ტიმ. 2:24).

ᲛᲘᲖᲐᲜᲝ ᲒᲘᲦᲣᲓᲐᲜ, ᲣᲛᲝᲡ ᲒᲐᲙᲔᲗᲐᲗ

17. ა) მუ მეხვარებ მომსახურეს, გურქ ვეუოლას დო ინჭუას უხუცესობაშა? ბ) მუ ოკო შუდან უხუცესეფს, მუჟამსით ნამდგაინ ჯიმაშ რეკომენდაციაშ საკითხის გინოჭყვიდუნა? (ქოძირით ჩარჩო  „რდათჷ მოკრძალებურ, მუჟამსით ჯიმალეფს აფასენთ“).

¹⁷ უხუცესიშ მოთხოვნეფიშ გინოჯინაშ უკულ ნამთინე მომსახურექ შილებე იფიქრას, ნამდა უხუცესობა დღას ვეშიალებე. მარა ვაგგოჭყორდან, ვართ იეჰოვა დო ვართ თიშ ორგანიზაცია ველჷ თქვანდე, ნამდა სრულყოფილო გეგმირჩქინანთ თე თვისებეფს (1 პეტ. 2:21). იეჰოვა მუშ წმინდა შურით ქიმგეხვარებუნა, დაკმაყოფილათ თე მოთხოვნეფ (ფილ. 2:13). ნამდგაინ კონკრეტულ თვისებაშ გაუჯგუშება ქუგოკონან-და, ქოთხით იეჰოვას, ქიმგეხვარან. უმოს გეგმირკვით თე თვისებაშ გურშენ დო ნამდგაინ უხუცესის ხოლო ქელაკითხეთ რჩევა.

18. მუ ოკო აკეთან მომსახურეეფქ?

¹⁸ ჯიმალეფ, მორთით არძაქ, უხუცესო უკვე მსახურენთინ თინეფქ ხოლო, გუვაგრძელათ თე სტატიას გარჩიებულ თვისებეფიშ გაუჯგუშება (ფილ. 3:16). მომსახურე ქორექ-და, მიზანო გიღუდას, უმოს გაკეთე თანაქრისტიანეფიშ მახვარებელო. ქოთხი იეჰოვას, მუგამზადას, ნამდა თის დო კრებას უმოსო გეგმადირთე (ეს. 64:8). იეჰოვას დუხვამუდას სქან მონდომა.