1959 წანას, ბეთელს განცხადებაქ იჸუ კეთებულქ, ნამდა საჭირო რდჷ მოხალისეეფ, მით იმსახურენდეს სამხრეთ აფრიკაშ ფილიალს, სოდეთ ახალ როტაციულ ობეშტალ მანქანა აფდეს გენწყილ. დუდ მოხალისეთ ქენიბჭარ დო მანგარო მახიოლ, მუჟამსით მა გიშაბგორეს. ჩქიმწკუმა ართო ხოლო სუმ კანადელ ჯიმა რდჷ გიშაგორილ თე საქმეშო. თინეფ რდეს: დენის ლიჩი, ბილ მაკლელანი, კენ ნორდინი. ჩქი მიბრაგადეთ, ნამდა ართო მიდეფშით!

ჩქიმ დიდას დოურეკ დო ვუწი: „დედა, ახალ ამბე ოკო გიწუე. სამხრეთ აფრიკაშა მევურქ!“. თის ძალიერ რწმენა უღუდ დო სულიერო მოწიფულ რდჷ. დიაჩქიმ წყნარ ოსურ რდჷ დო ბრელ მუთუნ ვა უთქუალ ჩქიმდა, მარა მიჩქუდ, ნამდა ხუჯის მიკინენდჷ. მართალ რე, შორს იპიდინ თიშენ ჩქიმ მშობლეფს გურქ დოჭყორდეს, მარა ულაშ წინააღმდეგ ვა რდეს.

დიო ბრუკლინიშ ბეთელშა გომტეს, ნამდა ოთხხოლოს გემკომრთუმდესკო ახალ მეთოდით ბეშტუაშ კურსეფ. უკულ ეშებლით სატვირთო გემშა, ნამუთ კეიპტაუნშა, სამხრეთ აფრიკაშა, მიშჷ. თიმწკუმა 20 წანერ ვორდჷ. ონჯუა რდჷ, მუჟამსით კეიპტაუნშე იოჰანესბურგშა მიშუნ თი მატარებელშა მითიბლით. პირველო გუვაჩერდით ჭიჭე ქალაქ კარუს, სოდეთ გვერდო უდაბნო რე. თენა რე ტვერამ დო ჩხე ადგილ. ჩქი ოთხხოლო აკოშკაშე იბჯინედით დო მანგარო მიკვენდეს თეცალ ადგილიშ ძირაფა. თიშე ბწუხენდით, მუნერ იჸუაფუდ ჩქინ ახალ დანიშნულება. უმოს გვიანო, მუჟამსით კინ ქუმოფხვადით თე ქალაქის, ქიმეფხვადით, ნამდა ჭიჭე ქალაქეფ სასიამოვნო დო მშვიდ რე.

მუსხირენ წანას ჩქიმ დანიშნულება რდჷ, რთულ ლინოტიპიშ დანადგარწკუმა მუშობა, ნამდა ჟურნალეფ „გინაჯინალ კოშკი“ დო „გეგშაკურცხით!“ ობეშტალო მზათ ჸოფედკო. თე ფილიალს ჟურნალეფ ბრელ აფრიკულ ნინაშა იბეშტუდ, ნამუთ ხვალე სამხრეთ აფრიკაშო ვარინ, აფრიკაშ შხვა ქიანეფშო ხოლო რდჷ. თე ახალ როტაციულ ობეშტალ მანქანა, მუდგაშ გურშენ გვერდ მსოფლიო მიკოფრთით, ჯგირო ორთუდ მუშ საქმეს!

უმოს გვიანო, ვმსახურენდჷ თი განყოფილებას, ნამუთ ხემძღვანელენს ლიტერატურაშ თარგმნუას, ბეშტუას დო ჯღონუას. მანგარ გადატვირთულ  ცხოვრება მიღუდ, მარა თინა კმაყოფილებათ რდჷ ეფშა.

1968 წანას დებქორწინ ართ პიონერ დაშა, ლაურა ბოუენშა. თინა ბეთელწკუმა ხოლოს ცხოვრენდჷ დო მთარგმნელობით განყოფილებას მსახურენდჷ, სოდეთ ბეშტანდჷ. თი პერიოდის ახალ დაქორწინებულეფს ფილიალ დანიშნულებას უთირანდჷ დო ათეშენ სპეციალურ პიონერეფო დაბნიშნეს. ჭიჭეს ქობწუხენდჷ, მუშენდა ვით წანაშ დინახალე, ბეთელს ვართ ოჭკუმალშე დო ვართ ოცხოვრებელშე ოფიქრებელ ვა მაფუდ. მარა ასე მუჭო ოკო იბაბღინეთკო თი ჭიჭე ფარა, ნამდგას სპეციალურ პიონერეფს არზენდეს? ჩქი ირთუთას გარკვეულ რაოდენობაშ საათ ოკო გეგმვურთითკო მსახურებას, გუვაკეთითკო კინ მეკითხირეფ დო გუვავრცელითკო ლიტერატურა. თე შემთხვევას ფილიალ ირთუთას 25 რანდით (თიმ დროშ 35 აშშ დოლარ) ქიმმეხვარებდეს. თე ფარა ჩქი ოკო დებაბღინეთკო ბინაშ ქირაშო, ოჭკუმალშო, მგზავრობაშო, ჯამრთელობაშო დო შხვა პირად საჭიროებეფშო.

ჩქი დაბნიშნეს ჭიჭე ჯგუფის ქალაქ დურბანიშ გოხოლუას, ნამუთ ინდოეთიშ ოკეანეწკუმა რე. თექ ინდოელეფიშ დიდ დასახლება რდჷ. 1800-იან წანეფს თინეფიშ ჯვეშეფქ თე ტერიტორიაშა თიშენ გინორთეს, ნამდა შანქარიშ საწარმოეფს ქიმუშესკო. მუჟამსით ჩქი თე ტერიტორიაშა გენოფრთით, თინეფ უკვე შხვა საქმეთ რდეს დაკავებულ, მარა ვა უდინუაფნა მუნეფიშ კულტურა დო ტრადიციულ კერძეფ, მუნერით რე კარი. თინეფ ინგლისურო იჩიებდეს დო ათეშენ ჩქინო ადვილ რდჷ თექ ქადაგება.

სპეციალურ პიონერეფქ ირთუთას 150 საათ ოკო იქადაგესკო, ათეშენ მა დო ლაურაქ პირველ დღას დაბგეგმით, ამშვ საათ ქიბქადაგითკო. თექ მანგარ სინჩხე დო სირისტ რდჷ. ჩქი კინ მეკითხირ დო ბიბლიაშ გურაფეფ ვამღუდეს, ათეშენ ამშვ საათის კარდოკარ მაფდეს ოქადაგებელ. მსახურებაშ დოჭყაფაშე ჭიჭე ხანიშ უკულ საათის ქიგვოჯინ დო ხვალე 40 წუთ რდჷ მიკულირ! ფიფქრენდჷ, მუჭო შემალებედეს სპეციალურ პიონერო მსახურება.

ჭიჭე ხანშა ქიგიმწყით. მსახურებაშა ირდღას სენდვიჩეფ დო თერმოსით კოფე ვარდა სუპ მემღუდეს. ქუმმაშქირნედესინ, ჩქინ ჭიჭე მანქანას ჯაშ თუდო, ოროს, გუვაჩერენდით დო ბჭკუმუნდით. მინშა ინდოელეფიშ ბაღანეფ ქუგომდირთუდეს დო მოკვირდეს. მუსხირენ დღაშა ჩქი ქიმეფხვადით, ნამდა მსახურებაშ დოჭყაფაშე ჟირ-სუმ საათიშ უკულ დღა უმოს მალას ითებუდ.

დიდ ხიოლ მოუღუდ ბიბლიურ ჭეშმარიტებაშ გინოჩამას თე ტერიტორიას მახორუ სტუმარიშ მოჸოროფე ხალხშა! ჩქი ქობძირით, ნამდა თინეფ გიმირჩქინანდეს შხვეფიშ პატიცემას, რდეს ჯგირ გურიშ დო უღდეს ღორონთიშ შიშ. ბრელ ინდუს ღებულენდჷ თი ცნობას, ნამდგას ჩქი გინოფჩანდით. თინეფს მოწონდეს იეჰოვაშ, იესოშ, ბიბლიაშ, მომავალ მშვიდობიან ახალ ქვეყნიერებაშ დო ღურელეფიშ გათელებაშ გურშენ რჩქინაშ მეღება. ართ წანაშ უკულ უკვე 20 ბიბლიაშ გურაფა მიღდეს. ირდღას ნამდგაინ ბიბლიაშ მაგურაფალწკუმა ბჭკუმუნდით ოჭკუმალს. ჩქი მანგარ ბედნერეფ ვორდით.

მალას ახალ დანიშნულება მიბღით. თენა რდჷ რაიონულ მსახურება თი სქვამ ტერიტორიას, ნამუთ ინდოეთიშ ოკეანეშ წყარპიჯის რდჷ. ირმარას შხვადოშხვა ოჯახიშ სტუმარეფ ვორდით, მუჟამსით კრებას იბძირუანდით დო მსახურენდით თექიან მაუწყებელეფწკუმა ართო, ნამდა გურშა ელვუკინითკო თინეფს. ჩქი თინეფიშ ოჯახიშ წევრო გინიფრთით დო ბლაჸაფენდით თინეფიშ ბაღანეფ დო ცხოველეფწკუმა ართო. ჟირ წანაშ უკულ ვეველუდითინ თეშ, ფილიალშე დომრეკეს დო მიწუეს: „მოკონა, ნამდა ბეთელშა დირთათ“. მა ვუწი: „ჩქი თაქ მანგარ ბედნერ ვორეთ“. მარა მუშო ოკო რაგად, ჩქი მზათ ვორდით იბდითკო თექ, სოდეთ დაბნიშნენდეს.

ბეთელს სამსახურებრივ განყოფილებას დაბნიშნეს, სოდეთ მიღუდ პატი, ვიმსახურკო სულიერო მოწიფულ დო გამოცდილ ჯიმალეფწკუმა. თი პერიოდის თითოულ კრება რაიონულ მონახულებაშ უკულ ზედამხედველიშ ანგარიშიშ საფუძველშა ფილიალშე ღებულენდჷ წერილს. თე წერილიშ მიზან რდჷ, გურშა ელუკინკო დო მუსხირენ საჭირო მითითება ხოლო ქიმეჩკო კრებას. თე საქმე ჩქინ მდივანეფშე ბრელ ხანდას ითხინდჷ, მუშენდა თინეფქ რაიონულ ზედამხედველეფიშ  ანგარიშეფ ხოსა, ზულუ დო შხვა ნინეფშე ინგლისურშა ოკო გეგნოთარგმნესკო დო ფილიალიშ წერილეფ ინგლისურშე აფრიკულ ნინეფშა. მანგარო ვაფასენდჷ თე მოხანდე მთარგმნელეფს. თინეფქ თის ხოლო მიმეხვარეს, ნამდა ქიგებგიკო, მუ პრობლემეფ უღდეს თექიან და დო ჯიმალეფს.

თი დროს სამხრეთ აფრიკა რასობრივო გორთილ რდჷ. თითოულ რასა ცალ-ცალკე ჯგუფო ცხოვრენდჷ დო ართიანწკუმა ნაკლებ ურთიერთობა უღდეს. ჩქინ აფრიკელ უჩაკანამ და დო ჯიმალეფ მუნეფიშ ნინაშა იჩიებდეს, ქადაგენდეს დო ატარენდეს შეხვალამეფს.

ჩქიმ კრებაშ ტერიტორიას ხვალე ინგლისურო მორაგადე ხალხ ცხოვრენდჷ, ათეშენ ვეფჩინენდჷ ბრელ უჩაკანამ აფრიკელ ჯიმას. მარა ასე მიღუდ საშვალება, ქიგებგიკო თე და დო ჯიმალეფიშ, თინეფიშ კულტურაშ დო ტრადიციეფიშ გურშენ. თეს გეძინელ, ქიგებგჷ, მუ სირთულეეფ უღდეს თექიან ტრადიციეფიშ დო რწმენაშ გურშენ. თიშ უმკუჯინუო, ნამდა ოჯახშე დო სოფელშე მანგარ წინააღმდეგობას ხვადუდეს, თე და დო ჯიმალეფ დიდ გაბედულებას გიმირჩქინანდეს დო ვარიას იჩიებდეს არაბიბლიურ ტრადიციეფ დო სპირიტიზმის მონაწილებაშე! თექიან სოფელეფს გაჭირებულ ხალხ ცხოვრენდჷ. ბრელს საშვალო განათლება ხოლო ვა უღუდ, მარა თინეფ აფასენდეს ბიბლიას.

მიღუდ პატი, მონაწილება მიბღიკო თაყვანიშცემაშ თავისუფლება დო ნეიტრალიტეტწკუმა დაკავშირებულ მუსხირენ სასამართლო საქმეს. რწმენაშ გუმამანგარებელ რდჷ თი ართგურ დო გაბედულ ბაღანეფიშ ძირაფა, მით სკოლაშე თიშ გურშენ გარიცხეს, ნამდა საერთო ლოცვა დო რელიგიურ ობირეშის მონაწილებაშე ვარია თქუეს.

აფრიკაშ ჭიჭე ქიანას, ნამდგას თი დროს სვაზილენდ ჯოხოდ, ჯიმალეფქ შხვა სირთულეს ხოლო შეხვადეს. მუჟამსით მეფე სოფჰუზა მაჟიაქ დოღურ, არძა თექიან მახორუშე მითხის, ნამდა მონაწილება მიღესკო ტრადიციულ რიტუალს. ქომოლკათაქ დუდ ოკო გეგნიხოკკო დო ოსურკათაქ თუმა დაბალას ოკო გიჭკირკო. ბრელ და დო ჯიმას თხოზუდეს, მუშენდა მონაწილება ვემიღეს ჯვეშეფიშ თაყვანიშცემაწკუმა დაკავშირებულ რიტუალს. თინეფიშ ართგურობა მანგარო გუხარენდჷ გურს იეჰოვას! ჩქი აფრიკელ ჯიმალეფშე ბრელ მუდგარენ დიბგურეთ ართგურობა დო მოთვინებაშ გურშენ, მუდგაქ ჩქინ რწმენა გამანგარ.

1981 წანას კინ დუვართჷ ბეშტუაშ საქმეს. თი დროშო უკვე კომპიუტერ ოკო გეგმომრინუაფდესკო ობეშტალო. თენა ჯგირ დრო რდჷ! ბეშტუაშ მეთოდეფ მანგარო რდჷ თირელ. ადგილობრივ კომპანიაშ წარმომადგენელქ ფილიალს უფასოთ ქიმეჩ ახალ დანადგარ, ნამდა გეგმოცადკო, მუჭო იმუშენდჷ თინა. შედეგო, ჯვეშ ჩხორო ლინოტიპიშ დანადგარ, ხუთ ახალ დანადგარქ დოთირუ. თეს გეძინელ, ქიგვონწყით ახალ ობეშტალ დაზგა დო საქმექ უმოს ჩქარას მიდართჷ!

ბეშტუაშ საქმეშა კომპიუტერიშ მიშაღალაქ ქიმმეხვარეს, ქიმვოგორეთკო ტექსტიშ პუბლიკაციაშ გვერდეფშა განაწილებაშ ახალ მეთოდეფს MEPS-იშ გიმორნაფათ (ფოტოენწყუალაშ ელექტრონულ სისტემა ბრელ ნინაშა). თიშ უკულ, მუთ ოთხ კანადელ ბეთელელს სამხრეთ აფრიკაშა მაჸუეს ოულარქ, ტექნიკაქ მანგარო გევითარ დო ჯვეშ, ჩქარას ვამუშებედუნ ფერ ლინოტიპიშ მანგიორო ახალ დანადგარით მუშობა ქიდიბჭყით (ეს. 60:17). ჩქი ოთხხოლოს პჸუნდეს სულიერო მოწიფულ მეუღლეეფ, მიდგას მანგარო უჸორდეს იეჰოვა. მა დო ბილი კინ ბეთელს ვმსახურენდით. კენი დო დენისის სქუალეფ ჸუნდეს დო ოჯახიშ საქმეეფშა აფდეს მეტ ყურადღება მიოქციებელ.

ფილიალს საქმე უმოსო იძინანდჷ. ბიბლიურ პუბლიკაციეფ ითარგმნუდ დო იბეშტუდ უმოს მეტ ნინაშა დო გემით შხვა ფილიალეფშა იჯღონუდ. შედეგო, ბეთელიშ ახალ კომპლექსიშ შენებაქ იჸუ საჭიროქ. ათეშენ ჯიმალეფქ იოჰანესბურგიშ დასავლეთ ნაწილს, სქვამ ადგილს აშენეს ბეთელ, ნამდგაშ მეძღვინუაქ 1987 წანას მოხვად. ჩქიმო დიდ პატი რდჷ თე საქმეს მონაწილება დო სამხრეთ აფრიკაშ ფილიალიშ კომიტეტის წანეფიშ დინახალე მსახურება.

მანგარო გამკვირდეს დო მახიოლეს, მუჟამსით 2001 წანას ამერიკაშ შეერთებულ შტატეფიშ ფილიალიშ კომიტეტიშ წევრო დაბნიშნეს. მართალ რე, გურ ბჭყორდუდეს, მუშენდა სამხრეთ აფრიკას ჩქინ საქმე დო მეგობრეფ დატებელ მაჸიდეს; მარა მოხიოლდეს, ნამდა იბჭყანდით ახალ ცხოვრებას, მუჭოთ შეერთებულ შტატეფიშ ბეთელიშ ოჯახიშ წევრეფ.

ჩქი ბწუხენდით, მუშენდა შორს იპიდით ლაურაშ დიდაშე, ნამუთ ქვრივ რდჷ. ნიუ-იორკშე ბრელ მუთუნ ვამმახვარებედეს თიშა, მარა ლაურაშ სუმხოლო დაქ მუნეფიშ დუდშა გეჭოფეს თიშ მიკოლუაფა დო ფიზიკურო, ემოციურო დო ფინანსურო ოხვარდეს დიდას. თინეფქ მიწის: „ჩქი ვა მამსახურებენა სრულ დროთ, მარა ჩქინ დიდაშ მიკოლუაფათ თქვა შეინწყუნთ ხეს, გაგრძელათ მსახურება“. თინეფიშ მანგარ მარდულეფ ვორეთ.

ლაურაშ დალეფცალო, ჩქიმ ჯიმა დო ნოსაქ ხოლო, მით ტორონტოს, კანადას, ცხოვრენა, მუნეფიშ დუდშა გეჭოფეს ჩქიმ ქვრივ დიდაშ მიკოჯინა. ჩქიმ დიდა 20 წანაშე უმოს ხანს ცხოვრენდჷ თინეფწკუმა. მანგარო ვაფასენთ თი ჸოროფა დო ხანდას, ნამუთ ჩქიმ ჯიმა დო ნოსაქ დიდაშ მიმართ გიმირჩქინეს. თინეფ ღურაშახ ულუანდეს თის; სანარღოთ, დიაჩქიმქ ნიუ-იორკშა ჩქინ ულაშ უკულ ხეთეშე დოღურ. მუშმადიდა კურთხევა რე, რჸუნდას ოჯახ, ნამუთ ელაირე დო მზათ რე, მუშ ცხოვრება თეშ დოთირუას, ნამდა ქიმკაჯინას ხანშამიშულირ მშობლეფს, მუთ მინშა მანგარ რთულ რე!

შეერთებულ შტატეფიშ ბეთელს პირველ მუსხირენ წანას ჩქიმ საქმე პუბლიკაციეფიშ ბეშტუა რდჷ, ნამდგაქ დითირ დო უმოსო გემარტივ. ჭიჭე ხანიშ წოხოლე შესყიდვეფიშ განყოფილებაშა გეგნომიჸონეს. მანგარო ვაფასენქ, ნამდა ბოლო 20 წანა რე, ბეთელიშ დიდ ოჯახიშ წევრ ვორექ, სოდეთ სოდგარენ 5 000 ბეთელელ დო 2 000 შტატგარეშე რე!

სუმენეჩ წანაშ წოხოლე მუთუნით ვეფიფქრენდჷ, ნამდა თაქ იპჸუაფუდ. თე წანეფიშ დინახალე ლაურა მთელ გურით ალამირდჷ დო შემლებ ფთქუე, ნამდა კმაყოფილებათ ეფშა ცხოვრება მიღუდ! ჩქი ვაფასენთ შხვადოშხვა პასუხიშმგებლობას, ნამუთ მიღდეს დო თი ძვირფას ხალხის, მიდგაწკუმა ართო ვმსახურენდით, მუჟამსით მსოფლიოშ შხვადოშხვა კუნთხუს ბეთელეფს ფილიალიშ დავალებათ იბძირუანდით. ასე 80 წანას გინოჩილათირ ვორექ დო იზმა ვა მაფჷ ომუშებელ, მუშენდა ახალგაზრდა, უნარიან ჯიმალეფ ორთნა საქმეს.

ფსალმუნმაბირექ ჭარჷ: „ბედნერ რე ერ, ნამდგაშ ღორონთ იეჰოვა რე“ (ფსალმ. 33:12). თენა მართალო თაშ რე! მანგარ მარდულ ვორექ, მუშენდა მუმაჩ საშვალებაქ, იეჰოვაშ ბედნერ ხალხწკუმა ართო გეფხარე.