ტიტე 2:1-15
2 მარა სი ირიათო თინა ოგურე, მუთ სწორ გურაფას მეურე.
2 უნჩაშ ქომოლკათას ირფელს ზომა-წონა ოკო უჩქუდან, რდანჷ სერიოზულეფ, უღუდან სწორ აზროვნება, ძალიერ რწმენა, ჸოროფა დო მოთვინება.
3 უნჩაშ ოსურკათა ხოლო ოკო რდანჷ ღირსუანეფ, ვა რდანჷ ტყურაშ ეკმაწამებელეფ, ვა უჸორდან ზედმეტ შუმა დო ჯგირს ოგურუანდან,
4 მუშენდა ახალგაზრდა ოსურკათაშა ელაჩინედან, ნამდა უჸორდან ქომონჯეფ დო სქუალეფ,
5 უღუდან სწორ აზროვნება, რდანჷ ზნეობრივო წმინდეფ, მეოჯახეეფ, ჯგირ უკეთან შხვეფს დო დემორჩილან ქომონჯეფს, ნამდა ღორონთიშ სიტყვაქ ვეგილანძღას.
6 ახალგაზრდა ქომოლკათას ხოლო ქელუჩ, სწორას იაზროვნან.
7 მაგალით რდა ირ ჯგირ საქმეს, ოგურე სიმართლე დო სერიოზულო ქიმუდირთ თეს.
8 ირო ჯგირ იჩი, ნამდა სქან ნარაგადშა მითინს კილქ ვაგორას, თეშნერო მოწინააღმდეგეეფს ჩქინიშ გურშენ გლახაშ რაგადიშ სამანჯელ ვაღვენუნან, ონჯღორეს ქოძირუნა.
9 მონეფქ ირფელს დემორჩილან მუნეფიშ ბატონეფს, ეცადან, გურს მუჰამუან, სიტყვა ვეკნურთინუან
10 დო მუთუნ ვეთახირან, თეშ გინაწონს, თოლწკურილო ოკო ინდებედას თინეფშა, ნამდა ასქვამენდან თი გურაფას, ნამუთ ჩქინ მარსხებელ ღორონთშე მოურს.
11 გეგმიარგამ ღორონთიშ ჭყოლოფაქ, ნამდგას რსხება მოუღ არძანერ კოჩშა
12 დო ნამუთ მოგურუანა, ჩეფთხინუათ უღორონთობა დო თი სურვილეფ, ნამუთ თე უბადო ქიანაშე მოურს, დო ასეიან დროს* მახორუ ხალხ შქას მიღუდან სწორ აზროვნება, ვორდათ მართალეფ დო ღორონთიშ ართგურეფ,
13 ონდო ველუთ სარკო იმენდიშ შესრულებას დო ჩქინ ძალიერ ღორონთიშ დო ქრისტე იესოშ, ჩქინ მარსხებელიშ, დიდებულ გიმოცხადებას.
14 თიქ სიცოცხლე დათმჷ ჩქინო, ნამდა გუმათავისფალესკო ირნერ უკანონობაშე დო გუმასუფთუეს, ნამდა პჸოფედითკო მუშ ხალხ, ჯგირ საქმეშ ოკეთებელო მონდომებულ.
15 ირიათო ოგურე შხვეფს თე ირფელ, გაუდღან დო ქაძირე, სო რე ჩილათირ, მუშენდა მეღებულ გაფჷ თეშ უფლება; მითინქ ვა დოიჭყას არდებულო ჯინა.
სქოლიოეფ
^ ბერძნ. „ეონ“. ქოძირით „ქიანა“ („ბიბლიურ სიტყვეფიშ ენწყუმა“).
