რომაელეფშა მეჭარილ წერილ 1:1-32
1 რჭარუნთ პავლე — იესო ქრისტეშ მონა, მოციქულო გიშაგორილ დო სახიოლო ამბეშ გუმაცხადებელო გერნაფილ.
2 ღორონთიქ თე სახიოლო ამბე წმინდა წერილეფს ბრელ ხანიშ წოხოლე გაცხად მუშ წინასწარმეტყველეფიშ საშვალებათ.
3 თე სახიოლო ამბე ამოწმენს თიშ სქუაშ გურშენ, ნამდგაქ დედამიწას დავითიშ გამნარყშე დებად.
4 ღორონთიქ თინა მუშ წმინდა შურიშ* ძალათ გათელ დო თეშნერო ქიძირ, ნამდა თინა ღორონთიშ სქუა რდჷ, ნამუთ ჩქინ უფალ, იესო ქრისტე რე.
5 ღორონთიქ თიშ საშვალებათ მიჭყოლოფუეს. იესოქ მოციქულო გიშაბგორ, ნამდა მივეხვარე არძა რჯულიშ ხალხის, გეგმირჩქინან რწმენა, რდანჷ მორჩილეფ დო განადიდან თიშ სახელ.
6 თინეფ შქას თქვა ხოლო რეთჷ გიშაგორილ, ნამდა იესო ქრისტეს ოკუთვნუდათ.
7 რჭარუნთ არძას, მით რომს რეთჷ, ღორონთშო საჸოროფოეფს დო წმინდეფო* გიშაგორილეფს:
ჭყოლოფა დო მშვიდობა ვა მორრკებუდან ღორონთშე, ჩქინ მუმაშე, დო უფალ იესო ქრისტეშე!
8 პირველ რიგის, მადლობას ურაგადუქ ჩქიმ ღორონთის იესო ქრისტეშ საშვალებათ თქვანიშ გურშენ, მუშენდა თქვან რწმენაშენ ირდიხას იჩიებუნა.
9 ღორონთის მთელ შურ დო გურით ვომსახურუქ დო ვაცხადენქ სახიოლო ამბეს თიშ სქუაშ გურშენ. ღორონთ რე მოწმე, ნამდა ირიათო გიშინუანთ ჩქიმ ლოცვეფს.
10 ღორონთის ვოხვეწუქ, შეიოლებერ ქორენ-და, თიშ ნებათ, ასე ვარა ქეშმალებუას თქვანდა მეულაქ,
11 მუშენდა შურ მოლჷ თქვან ძირაფაშა, ნამდა გოირთათ სულიერ ძღვინ თქვან გამანგარებელო,
12 შხვანერო ქოფთქუენ, გურშა ელუკინათ ართიანს ჩქინ-ჩქინ რწმენათ.
13 ჯიმალეფ, მოკო, გიჩქუდან, ნამდა ბრელშა მიმნდომ თქვანდა მეულა, მარა ვეგშართჷ. მოკოდ, ქობძირიკო, მუ ჯგირ შედეგეფ მაჸუნუდ თექ ჩქინ ქადაგებას, მუჭოთ შხვა ხალხწკუმა ქადაგებას მაჸუნ.
14 არძაშ მოვალე ვორექ — ბერძენეფიშ დო ბარბაროსეფიშ*, ბრძენეფიშ დო უჭკუეეფიშ.
15 მთელ გურით მოკო, სახიოლო ამბე გეგნორჩათ თქვა ხოლო, მით რომს რეთჷ.
16 ონჯღორე ვა მიჩქჷ სახიოლო ამბეშ გურშენ, მუშენდა თინა რე ძალიერ საშვალება ღორონთიშ ხეს არძა მორწმუნეშ ორსხებელო, დიო იუდეველიშ დო უკულ ბერძენიშ.
17 ღორონთ სახიოლო ამბეშ საშვალებათ უცხადენს მუშ სიმართლეს მორწმუნეეფს დო თეშნერო ხოლო უმოსო ემანგარებუნა რწმენა, მუჭოთ ჭარილ რე: „მართალ რწმენათ იცოცხლენს“.
18 ღორონთ მუშ რისხუას ზეცაშე გიოტახანს* თინეფს, მით მუნეფიშ უღორონთე დო უბადო საქმეეფით შხვეფს სიმართლეშ გაგებაშ საშვალებას ვარზენა;
19 თინეფშო ფულირ ვა რე მუთუნ, მუთ ღორონთიშ გურშენ შილებე უჩქუდან, მუშენდა თიქ ირფელ არგამათ გაუცხად.
20 ღორონთიშ ვეძირენ ფერ თვისებეფს არგამათ ვორწყეთ, მუჟამსით იბრკვიენთ, მუჭო რე ქიანა გოჭყაფილ; თიშ ნახელუანშე იძირე, ნამდა თინა ღორონთ რე დო ულიებ ძალა უღჷ. ათეშენ, მით თე ფაქტეფშე თოლს წკურუნს, გამართლება ვა უღჷ.
21 მართალ რე, თინეფ იჩინენდეს ღორონთის, მარა თიშ განდიდებაშე ვარიას იჩიებუდეს დო ვართ მარდულეფ რდესჷ; მუთუნიშ მოღე ვა რე თინეფიშ აზროვნება დო მუთუნს ვენანჭუ თინეფიშ ქუაცალ გურ.
22 ბრძენეფო მოუღუნა დუდ, მარა სინამდვილეს უჭკუეეფ რენა.
23 თიშ მანგიორო, ნამდა დიდება უძღვინან ღორონთის, ნამუთ დღას ვა ღურუ, კერპეფს უძღვინენა დიდებას. ნამთინე კერპის ადამიანიშ ფორმა უღჷ, მიდგაშ ბოლო ღურა რე, ნამთინეს — ფრინველიშ, ოთხკუჩხამიშ ვარდა ქვეწარმავალიშ.
24 ათეშენ ღორონთიქ მიაშქვჷ თინეფ, ნამდა გაკეთან თი უწმინდურ საქმეეფ, მუთ მუნეფიშ გურს ოკო, მუდგათ პატის ეუჸოთანა მუნეფიშ სხეულს.
25 თინეფქ ღორონთიშ სიმართლე ტყურაშა გოთირუეს. გუმაჭყაფალიშ მანგიორო გუნაჭყეფუს ცენა თაყვანს დო თის ომსახურუნა, ვარინ გუმაჭყაფალ ოკო რდასჷ ირიათო განდიდებულ. ამინ!
26 ზუსტას ათეშენ ღორონთიქ თინეფ მუნეფიშ საონჯღორო სექსუალურ სურვილეფს ქატუ. შედეგო, ოსურკათაქ ქომოლკათაწკუმა სქესობრივ ურთიერთობა, მუთ ბუნებრივ რე, დოთირუეს თით, მუთ ბუნებრივ ვა რე — კინ ართიანწკუმა სქესობრივ ურთიერთობათ.
27 ქომოლკათაქ ხოლო მიოტუეს ბუნებრივ სქესობრივ ცხოვრება ოსურკათაწკუმა დო ართიანშა მინჭუაფუნა ძალიერ სექსუალურ სურვილეფით, ქომოლკოჩ — ქომოლკოჩშა. თინეფ სრულას მიღენა სასჯელს მუნეფიშ დაშებულიშ გურშენ.
28 თინეფს საჭიროთ ვემიორჩქუდეს ღორონთიშ გაჩინებაფა*, ათეშენ ღორონთიქ მიაშქვჷ თინეფ მუნეფიშ ნებაშა, ნამდა მუნეფიშ კვარჩხულ აზროვნებას გეიაჸუნესკო დო თიცალ საქმეეფ გაკეთესკო, ნამუთ ოკეთებელ ვა აფუდეს.
29 თინეფ ეფშა რენა ირნერ კვარჩხობათ, უღორონთობათ, ჰარამობათ, უბადობათ დო მენჯარიშობათ; თეწკუმა ართო, კოჩის ჸვილუნა, ნირზენა, ტყურას იჩიებუნა, გურშა ჟღამ ელუძუნა, შხვაშ ამბეს გილეჩიებუნა,
30 შხვეფს ეკარაგადანა, ღორონთ ჯოგუნა; რენა დუდარდებულეფ, დუდძირგალეფ, დუდიშ მაცქვაფალეფ, გლახაშ დუმარსხუალეფ, მშობლეფიშ უდუჯერებელეფ,
31 მუთუნ ვაგგაგებაფენ ფერეფ, სიტყვაშ გუმატახალეფ, გურგოჸინილეფ დო უდუნდებელეფ.
32 თინეფს გვალო ჯგირო უჩქუნა, ნამდა ღორონთიშ სამართალით თეცალ ხალხის ღურა ხვადჷ, მარა, თეშ უმკუჯინუო, თეს ხვალე მუნეფ ვართუნან, შხვეფს ხოლო ელუჩანა თეშ კეთებას.
სქოლიოეფ
^ ქოძირით „ბიბლიურ სიტყვეფიშ ენწყუმა“.
^ ქოძირით „ბიბლიურ სიტყვეფიშ ენწყუმა“.
^ შხვანერო — „მით ვა რენა ბერძენეფ“.
^ შხვანერო — „უცხადენს“.
^ შხვანერო — „ღორონთიშ გურშენ ზუსტ რჩქინაშ მეღება“.
