Niire ivaara dhikina onnooliperyani ophwanya yawaatikhiwa ya mbiibiliyani ehinreela woodhivelani aahiidho wuupuwelela moolumo ari yawaatikhiwa elo? Woonawene elo yawaatikhiwa nnoona nnyu okhala yoomaaliha, enookhaliherani oxaka miyuupuwelo dhoohiloka aahiidho yawaatikhiwa mwaatthuna omooniha ntthu nkina. (Esal. 119:11, 111) Moone malakihero vakhaani an’ya wookhaliherani wuupuwelela dhawaatikhiwa dha mbiibiliyani.

• Nrumeele etikeeta eri va aplikatiivu JW Library^®. Mpake etikeeta eniitthaniwa: ‘Dhawaattikhiwa Dhoodhivela,’ ni mpwehe opuro owo dhawaatikhiwa dhootheene muntthuna nnyu wuupuwelela.

• Mpwehe dhawaatikhiwa opuro munwerya nnyu woona. Mwaatikhe vawarakhani eveersu muntthuna nnyu ohiliyala ni mpwehe opuro mun’ya nnyu nkawerya woona ivaara dhawaatta. Atthu akina annoona okhala vooreerela opweha vaspeelyuni aahiidho akina vankhora. Nitho akina annitirari efootu yawaatikhiwa mmodha ya mbiibiliya enaadhivela wiira epweha vayekarani ya telefooni aahiidho komputatoore.

• Nrumeele iwarakha ikhaani wiira dhookhalihereni wuupuwelela. Mwaatikhe ohoolo wa ewarakha yawaatikhiwa muntthuna nnyu wuupuwelela, ekapiitulu ni eveersu. Nuumala ottuli wa ewarakha elo mwaatikhe moolumo ari yawaatikhiwa elo. Moottharelana, moone mphantta mmodha wa ewarakha ni mweehererye olotta ele emphwanyaneya mphantta nkina.