1-2. (a) Seeni enniiriha olotta wiira voohixikha mixankiho ninviriha nhu, hiyo khanri meekhinhu? (b) Eseeni nin’ya nhu woona yoosoma ela?

 VAAVO ninviriha nhu nxankiho muulupale, pooti opacera wuupuwela wiira niri meekhinhu, okaphwana nkhama ninwenle mwaatiya nkhaani eriyari ya epahari, okathi enoopa awa ettheku yuulupale. Masi okathi owo, khaninkhala meekhinhu. Tiithi nhu a wiirimu onnoona mixankiho ninviriha nhu ni onnilaihera onikhalihera. Moopheta, Yehova onnaalaihera arumeyi-ye oororomeleya airaka: ‘Miyo kinawookhaliherani.’—Yes. 41:10.

² Yoosoma ela, nin’ya woona inamuna sese dhinoonihera moopora Yehova onnikhalihera iye (1) aneettihaka, (2) anivahaka itthu dhinnithowa, (3) anikhapelelaka, ni (4) anivahaka nimaaliho. Voohixikha mixankiho ninviriha nhu mweekumini mwihu, Yehova oolaihera wiira khankhala-khala aninyanyalaka. Tivo, hiyo khanri meekhinhu.

YEHOVA ONNINEETTIHA

3-4. Yehova onneettiha dhai? (Esalimo 48:14)

³ Nsome Esalimo 48:14. Yehova oodhuwela wiira khaninwerya wiidheettiha meekhinhu ni ninnitthuneya olakiwa. Ndho, Yehova onweettiha dhai arumeyi-ye oororomeleya olelo-va? Owo onnipaka elo anrumeelaka Biibiliya. (Esal. 119:105) Arumeelaka Nuulumo-ne, Yehova onninikhalihera opaka dhoothanla dhooreera, okhalana mikhalelo dhinnikhalihera okhalana ekumi yoohakalala nenna-va ni ophwanya ekumi yoohimala nhoolo. a Mwa ntakihero, owo onninikhalihera waalevelela atthu akina ni ohipweha mathowa aahiidho mayoko, okhala oororomeleya mwa  itthu dhootheene ni woonihera waapheta atthu akina ni nrima wootheene. (Esal. 37:8; aHeb. 13:18; 1 Ped. 1:22) Vaavo ninoonihera nhu mikhalelo idha dhooreera, ninnikhala anaan’yari ooloka, alopwana oothela, athiyana ootheliwa ni axirikha ooloka.

⁴ Ohiya-vo, Yehova ohiiriha waatikhiwa mbiibiliyani dhawiiraneya dheekhweeli dha atthu avirinhe mixankiho dhuulupale dhinlikana ni mixankiho dhihu. (1 aKor. 10:13; Yak. 5:17) Okathi ninsoma nhu dhawiirneya idho ni ovarihela nteko itthu nindhudha nhu, dhinnikhalihera mwa inamuna piili. Yoopacera, ninnoona wiira khanri meekhinhu ninviriha mixankiho dha mweekumini, atthu akina khalai dhaataka waaphwanya mixankiho imodharu, ndho ekhaliheriwaka ni Yehova aawerya ovilela. (1 Ped. 5:9) Yanaili, ninnihudha ovilela mixankiho nihihiyaka okhala oohakalala.—aRoma 15:4.

5. Taani Yehova onaarumeela iye wiira eneettihe?

⁵ Nitho Yehova onnaarumeela anna ni arokora wiira eneettihe. b Mwa ntakihero, asitokweene a esirkwiitu annisekurya miloko okathi wootheene wiira enilipihe. Awo annilotta miyaha dhinlipiha waamini wihu ni dhinnikhalihera ohihiya okhala awiiraana. (Mit. 15:40–16:5) Asitokweene mmulokoni anniilipihera onkhalihera khuta namalaleerya ohihiya okhala waataana woolipa ni Yehova. (1 Ped. 5:2, 3) Anaan’yari annaahudhiha ana ompheta Yehova, opaka dhoothanla dhooreera ni okhalana dhoolema dhooreera. (Mir. 22:6) Ohiya-vo, arokora oolipa mwa omunepani annaakhalihera arokora ari imwali, yaavahaka ntakihero nooreera, miruku dhoovareleya nteko ni waalipiha.—Tito 2:3-5.

6. Eseeni ninreerela nhu opaka wiira noonihere oxukhurela malakihero Yehova onnivaha iye?

⁶ Yehova oonivaha malakihero annikhalihera opaka dhoothanla dhooreera ni okhalana ekumi yoohakalala. Eseeni ninreerela nhu opaka wiira noonihere oxukhurela mwaha wa Yehova onivaha malakihero awo? Miruku 3:5, 6 onlotta wiira: ‘Munroromele Yehova ni nrima nnyu wootheene, nhiroromele odhuwela winyu.’ Akhala wiira ninoopaka elo, ‘owo onawookolela iphuro dhihu.’ Elo entaphulela wiira onoonikhalihera oxaka mixankiho dha mweekumini ni okhalana ekumi yoohakalala. Ndho ninninxukhurela vawaatta Yehova mwaha wonoonihera onipheta onivahaka miruku ninramela nhu!—Esal. 32:8.

YEHOVA ONNINIVAHA ITTHU DHINNITHOWA

7. Yehova onnivaha dhai itthu dhinnithowa? (aFilipi 4:19)

⁷ Munsome aFilipi 4:19. Ohiya pahi oneettiha nkhalelo wa omunepani, Yehova onnireeliha wiilipihera wihu wiira niphwanye eyooca, ikuwo dhoowara ni opuro wookhala. (Math. 6:33; 2 aTes. 3:12) Nnaamwi ohikhanle vootakhala oxanka mwaha wa itthu dha veerutthuni, masi Yehova onlotta wiira nihitepe oxanka mwaha wa itthu idho. (Math. 6:25) Mwaha wa seeni? Okhala wiira Tiithi nhu a wiirimu olaihera wiira khankhala-khala anyanyalaka arumeyi-ye oororomeleya okathi antthuna awa okhaliheriwa. (Math. 6:8; aHeb. 13:5) Ndho nikhupali ni nrima wootheene, vaavo onlotta iya wiira onoonivaha itthu dhinnithowa.

8. Yehova ankhapelenle dhai Davidi?

⁸ Vano, nirowe nithokorerya moopora Yehova ankhalihenre iye Davidi vaavo antthawa iye Sawuli. Okathi owo wooxankiha, Yehova aahinvaha Davidi vamodha ni atthu aariiyene itthu yaaramela awa wiira ekhale akumi. Uupuwelelaka moopora Yehova ankhalihenre iye okathi ole wooxankiha, Davidi aatikhe wiira: ‘Miyo kaari rapasi, ndho vano kihuuluvala, masi nkinamoone naxariya anyanyaliwe hata ane evekaka eyooca.’ (Esal. 37:25) Nkhama Davidi, woonawene mootaka woona moopora Yehova  ookhapelenleiyeni aahiidho aakhapelenle iye anna ni arokora okathi wooxankiha.

9. Yehova onaakhalihera dhai arumeyi-ye vaavo enaaphwanya awa ehasara yeephattu? (Moone-tho efootu.)

⁹ Nitho Yehova onnaakhalihera arumeyi-ye vaavo dhinkhumelela awa ihasara dheephattu. Mwa ntakihero, noomala eseekulu yoopacera okhumelela etala oYerusaleemu, Makiristau a ilapo dhoovirikana yaahinnyerera itthu wiira yaakhalihera anna waaphwannye nxankiho ole. (Mit. 11:27-30; aRoma 15:25, 26) Nitho olelo arumeyi a Muluku annipaka etthu emodharu ekhalaka atthu oovaha. Mwa ntakihero, vaavo enkhumelela awa ehasara yeephattu, Yehova onnaarumeela anna ni arokora wiira yaakhalihere anna yaaphwanye ehasara elo, yaavahaka itthu dhinaathowa nkhama eyooca, maadhi, ikuwo ni mirette. Anna anvara nteko wooteka annikocihera mampa a anna ni Mampa a Omwene ahononen’ye. Nitho mwawaakuveya arumeyi a Yehova anaakhalihera yaavahaka nikhalihero nkhalelo wa mmuupuweloni ni omunepani anna apwetheiwe mampa ni amudhi yaapheta awa. c

10-11. Eseeni munhudha nhu ni etthu enkhumelenle Borys?

¹⁰ Nitho Yehova onnoonihera waareerela nrima atthu ale ahininrumeela avahaka itthu dhinaathowa. Nittharaka ntakihero na Yehova, hiyo ninnaadhya inamuna dhoovirikana wiira noonihere waareerela nrima ale ahininrumeela Yehova. (aGal. 6:10) Ndho vaavo nimpaka nhu elo, onnivaha onamoona wuulupale. Moone etthu enkhumelenle Borys, tereitoore a eskola emodha ya wUcrânia. Nnaamwi Borys ahaakhanle Namoona a Yehova, owo anaathokorerya anaskola yaari Anamoona Yehova mooreera  nrima ni aanittittimiha dhookhupali-dha. Okathi wa ekhotto, Borys aahikhuma opuro aakhala iye athamela opuro nkina. Noomala owo ophiya, anna yaakhala opuro ole yaahinkhalihera. Noovira okathi, owo aahirowela nthukumano wa Wuupuwelela okhwa wa Yeesu. Uupuwelelaka moopora anna yaankhalihera awa, Borys onlotta wiira: “Anamoona a Yehova yaahoonihera okireerela nrima vawaatta ni okikhalihera. Tivondho, kinnaaxukhurela vawaatta.”

¹¹ Ootheene nhu ninoowerya otakiha omoriwa ikharari wa Tiithi nhu a wiirimu naaphetaka atthu ootheene, waahela mpuwa ale ahininrumeela Yehova. (Luka 6:31, 36) Ninlipelela wiira opheta ninwoonihera nhu, owiirihe otthuna ohudhera voohima dha Yehova ni opacera onrumeela. (1 Ped. 2:12) Ndho voohixikha akhala wiira elo enawiiraneya, hiyo ninoophwaya ohakalala onkhumelela mwaha wookhala atthu oovaha.—Mit. 20:35.

YEHOVA ONNINIKHAPELELA

12. Yehova onlaihera dhai waakhapelela atthu-ye nkhama ekhurupu? (Esalimo 91:1, 2, 14)

¹² Nsome Esalimo 91:1, 2, 14. Olelo-va, Yehova onnilaihera onikhapelela nkhalelo wa omunepani anaakiheraka itthu dhootheene dhaaya ohonona waataana wihu nuuwo. Owo khankhala-khala anhiyaka Satana ahononaka okokhorela weekhweeli. (Yohani 17:15) Noomala opacera ‘maxakha muulupale,’ nikhupali ni nrima wootheene wiira Yehova onawaakhapelela arumeyi-ye nkhalelo wa omunepani ni veerutthuni.—Wiis. 7:9, 14.

13. Yehova oninkhapelela dhai khuta mmodha a hiyo?

¹³ Yehova oninkhapelela dhai khuta mmodha a hiyo? Anrumeelaka Biibiliya, Yehova onninikhalihera odhuwela etthu yooreera ni yoonanara. (aHeb. 5:14) Vaavo nintthara nhu malakihero a mbiibiliyani, ninniikhapelela nkhalelo wa omunepani ni veeruthuni. (Esal. 91:4) Ohiya-vo, Yehova onninikhapelela arumeelaka muloko. (Yes. 32:1, 2) Mwaha wa okhala vamodha ni anna ni arokora animpheta Yehova ni aneettela malakihero-ye, awo anninilipiha ni onikhalihera wiira nixake opaka itthu dhootakhala.—Mir. 13:20.

14. (a) Seeni ivaara dhikina Yehova onaahiya iye arumeyi-ye ehaawaka? (b) Yoolaihera seeni yoolipiha eri Esalimo 9:10? (Moone-tho enoota.)

¹⁴ Khalai Yehova aahaakhapelela arumeyi-ye nkhalelo wa veerutthuni. Masi owo khaapanke elo ivaara dhootheene. Nitho olelo pooti oniphwanya mixankiho okhala wiira ‘oreeriwa ni otakhaliwa khoninthanla ntthu.’ (Mus. 9:11) Ohiya-vo, khalai Yehova aahaahiye arumeyi-ye ettharatthariwaka mpakha okhwa wiira oonihere wiira Satana nawoothe. (Yobi 2:4-6; Math. 23:34) Woonawene etthu yaakhulenle arumeyi a Yehova a khalai, pooti onikhumelela. Masi nikhupali wiira owo khankhala-khala anyanyalaka arumeyi-ye oororomeleya. d—Esal. 9:10.

YEHOVA ONNINIVAHA NIMAALIHO

15. Yehova onrumeela dhai nivekelo, Nuulumo-ne ni anna ni arokora wiira animaalihe? (2 aKorinto 1:3, 4)

¹⁵ Munsome 2 aKorinto 1:3, 4. Ivaara dhikina, hiyo pooti oriipiwa nrima, oxanka aahiidho okhulumuwa. Woonawene nyuwo munniviriha nxankiho onwiirihani woona wiira nri meekhinnyu. Ndho, niire ookhala ntthu ondhuwela saana nxankiho nnyu? Aayo, Yehova onnidhuwela saana. Ohiya pahi woona owereya wihu, owo ‘onninimaaliha khuta nxankiho onniphwanya.’ Mooporani? Okathi nininvekela nhu Yehova, owo onninivaha ‘nrettele wa Muluku, yoowo onxira odhuwela wootheene wa apinaatamu.’ (aFil. 4:6, 7) Nitho ninniphwanya nimaaliho vaavo nininsoma nhu Biibiliya. Anrumeelaka Biibiliya, Yehova onnoonihera wiira onninipheta, onninihudhiha okhala atthu aakhili ni onninivaha nlipelelo.  Vaavo ninrowela nhu mithukumano, ninnihudha itthu dhoolipiha dha mbiibiliyani ni ninnikhala vamodha ni anna ni arokora annipheta vawaatta.

16. Eseeni munhudha nnyu ni etthu enkhumelenle Nathan ni Priscila?

¹⁶ Hiyo ninoowerya woona moopora Yehova onnivaha iye nimaaliho ni onnilipiha, ninrumeelaka Biibiliya. Vano, nirowe nithokorerya etthu enkhumelenle Nathan ni Priscila, yaawo ankhala wEstados Unidos. Iyaakha vakhaani dhivinre, awo yaahithaamela opuro woothowa anamalaleerya. Nathan onlotta wiira: “Hiyo naalipelela wiira Yehova anreeliha wiilipihera wihu.” Masi noomala awo ophiya opuro owo, waaphwanya nxankiho wa ekumi yahaalipelela awa ni yaanixankha moopora woophwanya itthu dhaathowa dha veerutthuni. Noovira okathi, awo yaahitthikela owaani. Masi hata eri dhiidho, nxankiho wa othoiwa nsurukhu khiwaamalenle. Uupuwelelaka etthu yairanen’ye, Nathan onlotta wiira: “Miyo kaanikoha nthowa naamwiirinhe Yehova ohinireeliha nkhama nuupuwela nhu. Ndho elo yaahikiiriha opacera wuupuwelela wiira yookhala etthu yootakhala nipanke nhu.” Masi noovira okathi vakhaani, Nathan ni Priscila yaahoona wiira Muluku khaanyanyanle okathi ole wooxankiha. Nathan onlotta wiira: “Okathi ole wooxankiha, Biibiliya ari nkhama nxirikha nhu, owo aaninivaha miruku dhoovareleya nteko ni onilipiha. Ohiya wuupuwelela mixankiho dhihu, hiyo nuupuwela moopora Yehova aanikhalihera iye ovilela mixankiho idhe dhootheene. Ndho elo yoonikhalihera okhalana waamini woolipa wiira niwerye ovilela mixankiho dha nhoolo.”

17. Yehova onvanhe dhai nimaaliho nrokora Helga? (Moone-tho efootu.)

¹⁷ Nitho Yehova onninimaaliha arumeelaka anna ni arokora. Mooporani? Nirowe noone moopora ompaka iye elo, nithokoreraka yawiiraneya ya Helga onkhala oHungria. Mwa iyaakha dhawaatta, owo ooviriha mixankiho dhoovirikana dheidho dhaamwiiriha okhala ookhulumuwa ni wiidhoona ohikhalana efaita. Masi vaavo onuupuwela iye itthu dhinkhumelenle  ottuli, onniwerya woona moopora Yehova aarumeela iye anna ni arokora mmulokoni wiira enlipihe. Tivondho owo olontte wiira: “Yehova aanikikhalihera vaavo oonne iye wiira ikuru dhaka dhoovukuwa mwaha woovara nteko, onkhapelela mwanaka awereiwa ni mixankiho dhikina. Mwa iyaakha 30 dhivinre, owo aanikimaaliha khuta nihiku nkhama oolaihenre iye. Ivaara dhawaatta Yehova onnikimaaliha arumeelaka moolumo oolipiha a anna ni arokora. Okathi kaatthunaka okhaliheriwa, anna ni arokora yaanikinviyarela mensaaxe, okaatikhela iwarakha aahiidho okittottopela.”

18. Nin’ya owerya dhai waamaaliha atthu akina?

¹⁸ Nintakihaka Muluku nhu opheta Yehova, ninnoona okhala eparakha waamaaliha atthu akina. Nin’ya owerya dhai opaka elo? Hiyo ninoowerya opaka elo, naawiriyanaka ni ephoole, nilottaka naawo mwa enamuna yoolipiha ni naavahaka nikhalihero anramela awa. (Mir. 3:27) Hiyo ninnipaka itthu dhootheene ninwerya nhu wiira naavahe nimaaliho atthu dhinaaphwanya mixankiho, waahela mpuwa ale ahininrumeela Yehova. Mwa ntakihero, vaavo visinyu nhu onkhweliwa iye ntthu aapheta iye, owereiwa aahiidho onxanka iye mwaha wa mixankiho dhikina, hiyo ninnisekurya, onwiriyana ni ephoole vaavo olotta iye ni ninnimaaliha ninrumeelaka Biibiliya. Vaavo ninintakiha nhu Yehova, ‘Muluku onnimaaliha mwa makhalelo ootheene,’ ninniwerya waakhalihera anna ni arokora ovilela mixankiho ni owiiriha atthu ahininrumeela Yehova, otthuna ondhuwela.—Math. 5:16.

OKATHI WOOTHEENE YEHOVA ORI HIYO

19. Itthu seeni Yehova onnipakela iye, ni nin’ya owerya dhai ontakiha?

¹⁹ Yehova onnaathokorerya ootheene ale animpheta. Okathi dhinniphwanya awa mixankiho, owo khannihiya meekhinhu. Nkhama dhiidhaale paapa aahiidho maama oninkhapelela iye mwane moopheta, Yehova onnaakhapelela arumeyi-ye oororomeleya. Mwa ntakihero, owo onnineettiha, onninivaha itthu dhinnithowa, onninikhapelela ni onninivaha nimaaliho. Ninoowerya ontakiha Tiithi nhu oopheta a wiirimu, naakhaliheraka ni waalipiha atthu dhinaaphwanya mixankiho. Ndho voohixikha mixankiho dhinniphwanya, nikhupali wiira Yehova ori ni hiyo. Owo oolaihera wiira: ‘Nhoove, miyo kiri ni nyuwo.’ (Yes. 41:10) Tthiri moolumo ala annilipiha nroromelo nihu! Voohaakhanyera hiyo khanri meekhinhu.