YOOSOMA YA MWAHA 23
NCIPO 2 Ndhina Ninyu ti Yehova
Eseeni Nintaphulela awa Ndhina na Yehova wa Hiyo?
“‘Anamon’aka ti nyuwo,’ anihimya t’Apwiya [Yehova].”—YES. 43:10.
ETTHU NIN’YA NHU OHUDHA
Nin’ya woona etthu ninreerela nhu opaka wiira nitteelihe ni waakihera ndhina na Yehova.
1-2. Eseeni enoonihera wiira Yeesu onnivaha efaita yuulupale ndhina na Yehova?
NDHINA na Yehova nookhalana efaita yuulupale wa Yeesu. Yeesu ntthu muulupale ompaka itthu dhootheene onwerya iye wiira aakihere ndhina na Yehova. Nkhama noonne nhu yoosoma evinre, Yeesu aahaakhulela okhwa wiira oonihere wiira Yehova tawaarya ni itthu dhootheene Tiithi-ye ompaka iye ti dhaxariya. (Mar. 14:36; aHeb. 10:7-9) Okhala wiira Yeesu ontthuna wiira Yehova aakhele ovuwa wootheene, wookhidherani wa olamulelo wa Eyaakha Ekonto Emodha, owo onoontthikihera Omwene Tiithi-ye. (1 aKor. 15:26-28) Ndho moopora Yeesu onthokorerya iye ni onvaha iye efaita ndhina na Yehova onnoonihera opheta wuulupale oriiyena ni Tiithi-ye.
2 Yeesu aahuura valaponi wiira alotte mwa ndhina na Tiithi-ye. (Yohani 5:43; 12:13) Owo aahaadhuweliha atthareli-ye ndhina na Tiithi-ye. (Yohani 17:6, 26) Nitho owo aahipaka miiriirya ni aahaahudhiha atthu mwa ndhina na Tiithi-ye. (Yohani 10:25) Aahimaka ahudheri-ye, Yeesu aahinvekela Yehova airaka: ‘Tiithi . . . mwaakhapelele mwaha wa ndhina ninyu.’ (Yohani 17:11) Moolumo ala annoonihera wiira Yeesu aanivaha efaita yuulupale ndhina na Yehova oxira itthu dhootheene. Wiira muupuwele: Onweryaneya dhai ntthu olotta wiira ntthareli a Yeesu ahidhuwelaka ni ahirumeelaka ndhina na Yehova?
3. Eseeni nin’ya nhu woona yoosoma ela?
3 Nkhama makiristau eekhweeli, hiyo ninnintakiha Yeesu nooniheraka opheta ni ottittimiha ndhina na Yehova. (1 Ped. 2:21) Yoosoma ela, nin’ya woona moopora ale anlaleya ‘ihapari dhooreera dha Omwene’ andhuweliwa awa ni ndhina na Yehova. (Math. 24:14) Nitho ninawoona moopora nikhanle nhu woonihera wiira ninnivaha efaita yuulupale ndhina na Yehova mweekumini mwihu.
‘ATTHU AN’YA WIITTHANELIWA NDHINA-NE’
4. (a) Eseeni Yeesu aaleenle iye ahudheri-ye ohalaka okathi vakhaani wiira atthikele wiirimu? (b) Nikoho seeni nin’ya othokorerya?
4 Ohalaka okathi vakhaani wiira atthikele wiirimu, Yeesu aahaaleela ahudheri-ye airaka: ‘Nyuwo munoophwanya ikuru okathi mun’ya nnyu waakhela munepa wawaarya. Ndho mun’ya okhala anamoona aka oYerusaleemu, oYudeya ni oSamariya wootheene, ni elapo yootheene ya vathi.’ (Mit. 1:8) Elo entaphulela wiira ahudheri yanlaleya ihapari dhooreera elapo yootheene, ohiya pahi wiisarayeeli. Nuuvira okathi, atthu a maloko ootheene yankhalana eparakha ya okhala ahudheri a Yeesu. (Math. 28:19, 20) Yeesu aalontte wiira: ‘Nnookhala anamoona aka.’ Niire ahudheri ale apheya yaaya okhala anamoona a Yeesu pahi aahiidho yaanitthuneya odhuwela ndhina na Yehova? Dhawiiraneya dhiri Miteko ekapiitulu 15 inoonikhalihera ophwanya waakhuliwa wa nikoho nna.
5. Arummwa vamodha ni asitokweene a oYerusaleemu yoonihenre dhai wiira tiwootthuneya atthu ootheene odhuwela ndhina na Yehova? (Moone-tho efootu.)
5 Mwaakha wa 49 Nuumala Kiriistu Ora, arummwa vamodha ni asitokweene yaahithukumana wiira yoone etthu yaareerela awa opaka ale yahaakhanle ayuuda ni yahaawunle wiira ewerya okhala makiristau. Wookhidherani wa nthukumano ole, Yakobu nhimaye Yeesu, aalontte wiira: ‘[Pheeduru] oonileela wiira vano Muluku onniwaakhela atthu ahikhanle ayuuda, wiira aathanle eriyari yaale ahikhanle ayuuda, atthu an’ya wiitthaneliwa ndhina-ne.’ Masi Yakobu aahima ndhina nawani? Alottaka moolumo a profeeta Amooxi, Yakobu onnitthikela olotta airaka: ‘Wiira ale an’ya ohala enrumeele Yehova vamodha ni atthu a maloko ootheene, yaawo an’ya wiitthaneliwa ndhina naka. Ti miyo Yehova kinhima.’ (Mit. 15:14-18) Ahudheri awo apheya khiyaarowa ohudha pahi voohima dha Yehova, masi-tho ‘yaamwiitthaneliwa ndhina-ne.’ Elo entaphulela wiira awo yaamwaadhuweliha atthu akina ndhina na Yehova nitho yaandhuweliwa ni ndhina nno.
Vaavo anna a nikhuru noolamulela a eseekulu yoopacera yaathukumanna awa, yaahiiwasasa wiira makiristau yaanitthuneya okhala atthu yaaya wiitthaneliwa ni ndhina na Yehova (Moone ettima 5)
6-7. (a) Eseeni yaamwiirinhe Yeesu ora valaponi? (b) Etthu seeni ekina yootepa otthuneya yaahela mpuwa?
6 Ndhina na Yeesu nintaphulela wiira “Yehova Moopoli.” Ndho elo ti yookhalela okhala wiira Yehova onrumeela Yeesu wiira awoopole ale anoonihera waamini. Yeesu aahuura valaponi wiira avahe ekumi-ye wiira awoopole apinaatamu. (Math. 20:28) Mwaha wa Yeesu oliva yawoopola, ohiiriha oweryaneya apinaatamu okhalana eparakha ya ophwanya ekumi yoohimala.—Yohani 3:16.
7 Masi seeni apinaatamu yaatthuneya awa woopoliwa? Mwaha wa ele ekhumelenle Oxardim wa Weedeni. Nkhama noonne nhu yoosoma evinre, anamathelana oopacera Adamu ni Eeva yaahinrukunuwela Yehova. Ndho mwaha wa opaka elo, awo aayeleela eparakha ya okhala mahiku ootheene. (Maph. 3:6, 24) Ohiya pahi oreela owoopola apinaatamu, Yeesu aahuura valaponi wiira apake etthu ekina yootepa otthuneya. Satana oomoothera Yehova alottaka itthu dhawootha voohima dha owo. (Maph. 3:4, 5) Ndho, woopoliwa wa apinaatamu onnivarihana ni etthu yootepa otthuneya ori: Otteelihiwa ndhina na Yehova. Ndho Yeesu aari ntthu oophwanelela opaka elo, okhala wiira aninthoonyera Yehova ni aanipaka moomalela yootthuna ya Tiithi-ye.
Onweryaneya dhai ntthu olotta wiira ntthareli a Yeesu ahidhuwelaka ni ahirumeelaka ndhina na Yehova?
8. Eseeni atthareli ootheene oororomeleya a Yeesu yaareerela awa odhuwela?
8 Atthu ootheene yaatthuna okhala atthareli a Yeesu waahela mpuwa ayuuda ni ale yahaari ayuuda, yaanireerela odhuwela wiira woopoliwa-wa waalipa ni Yehova, Atiithi-ye Yeesu. (Yohani 17:3) Ohiya-vo, nkhama Yeesu, awo yaandhuweliwa ni ndhina na Yehova. Nitho awo yaanireerela odhuwela wiira tivootthuneya otteeliha ndhina nno, okhala wiira woopoliwa-wa waalipa ni elo. (Mit. 2:21, 22) Ndho, atthareli ootheene oororomeleya a Yeesu yaanitthuneya ohudha voohima dha Yehova ni Yeesu. Voohaakanyera ti yeelo yaamwiirinhe Yeesu omaliha nivekelo-ne niri Yoohaani ekapiitulu 17, airaka: ‘Miyo kihaadhuweliha ndhina ninyu, nitho kinootepa waadhuweliha, wiira opheta weiwo mukiphetale nnyu okhale ni yaawo, nitho miyo kikhale awiiraana naawo.’—Yohani 17:26.
‘NYUWO MWA ANAMOONA AKA’
9. Nin’ya woonihera dhai wiira ndhina na Yehova ti nootepa otthuneya wa hiyo?
9 Nkhama noonne nhu, ennoononeya wiira atthareli ootheene a Yeesu ahaana okhalihera otteeliha ndhina na Yehova. (Math. 6:9, 10) Ndhina na Yehova nihaana okhala nootepa otthuneya wa hiyo. Ninoowerya woonihera elo nipakaka etthu mweekumini mwihu. Ndho, eseeni ninreerela nhu opaka wiira nitteelihe ndhina na Yehova ni woonihera wiira Satana nawoothe?
10. Ophukela seeni wa nthoonyero onlottiwa Yesaaya ekapiitulu 42 mpakha 44? (Yesaya 43:9; 44:7-9) (Moone-tho efootu.)
10 Yesaaya ekapiitulu 42-44, onnittittimihera moopora niniirela nhu ephantta otteelihiwa ndhina na Yehova. Ikapiitulu idha, Yehova onnaalaleya atthu ootheene wiira ethukumane, nkhama eniireya awa waaya aka ophukiwa mwaha otribunaale. Owo onnaarukunuwela ale aniihima okhala amuluku wiira yoonihere akhala wiira amuluku eekhweeli. Nitho Yehova onnaavekela anamoona wiira yoonihera mathowa anwiiriha okhupali wiira amuluku-ya aakhala. Masi mooriipiha nrima, khaavo onwerya opaka elo!—Munsome Yesaya 43:9; 44:7-9.
Mwa inamuna dhoovirikana, ninkhala nkhama niri otribunaale ya nthoonyero wiira nivahe onamoona voohima dha Yehova (Moone ettima 10-11)
11. Eseeni Yehova onaaleela iye arumeyi-ye, Yesaya 43:10-12?
11 Munsome Yesaya 43:10-12. Aahimaka arumeyi-ye, Yehova onlotta wiira: ‘Nyuwo mwa anamoona aka, . . . ni miyo ka Muluku nnyu.’ Moottharelana owo onnavekela wiira awo yaakhule nikoho nna: ‘Niire okhala Muluku nkina okihiya miyo?’ (Yes. 44:8) Ndho, eparakha yuulupale hiyo waakhula nikoho nna. Oreela wa moolumo nhu ni miteko, hiyo ninnivaha onamoona wiira Yehova pahi tori Muluku eekhweeli. Ndhina-ne ti nuulupale oxira madhina ootheene. Itthu nimpaka nhu mweekumini mwihu dhinnoonihera akhala wiira ninnimpheta Yehova ni akhala wiira na atthu oororomeleya ohoolo-we, hata Satana anikhumiheraka mixankiho. Ndho napaka elo, ninookhalana eparakha ya okhalihera otteelihiwa ndhina na Yehova.
12. Eprofesiiya eri Yesaya 40:3, 5 yaakhwanenle dhai?
12 Vaavo nintteeliha nhu ndhina na Yehova, ninnoonihera wiira ninnitthara ntakihero na Yeesu Kiriistu. Profeeta Yesaaya aahilaihera wiira ntthu mmodha ‘anlokihera [aahiidho okocihera] ephuro ya Yehova.’ (Yes. 40:3) Ndho eprofesiiya ela yaakhwanenle dhai? Yoohaani Mpatisa aahilokihera ephuro ya Yeesu, yoowo aaruule ni aalontta mwa ndhina na Yehova. (Math. 3:3; Mar. 1:2-4; Luka 3:3-6) Nitho Yesaaya aahilotta eprofesiiya ekina airaka: ‘Vano atthu ootheene anrowa odhuwela ovuwa wa Apwiya [Yehova].’ (Yes. 40:5) Elo yiiranen’ye dhai? Okathi Yeesu aariiye valaponi aahinthoonyera Yehova moomalela, ndho vaakhala nkhama Yehova mwaneene taaruule valaponi.—Yohani 12:45.
13. Nin’ya owerya dhai otthara ntakihero na Yeesu?
13 Nkhama Yeesu, hiyo na anamoona a Yehova. Tivondho hiyo ninnikusa ndhina nno ni ninnaaleela atthu akina itthu dhootheene dhootepa oreera Yehova ompaka iye. Masi wiira nikhale anamoona a Yehova ooloka, nihaana waadhuweliha atthu itthu dhootheene Yeesu opanke iye wiira atteelihe ndhina na Yehova. (Mit. 1:8) Yeesu Namoona a Yehova muulupale aakhalenle nthiti waakhihera ndhina na Yehova, ndho hiyo nintthara ntakihero-ne. (Wiis. 1:5) Masi eseeni nintaphulela awa ndhina na Yehova wa khuta mmodha a hiyo?
ESEENI NINTAPHULELA AWA NDHINA NA YEHOVA?
14. Nkhama enlotta awa Esalimo 105:3, hiyo noonela dhai ndhina na Yehova?
14 Hiyo ninniittottopa mwaha wa ndhina na Yehova. (Nsome Esalimo 105:3.) Yehova onnihakalala vaavo niniittottopa nhu mwaha wa ndhina-ne. (Yer. 9:23, 24; 1 aKor. 1:31; 2 aKor. 10:17) Hiyo ninnoona okhala eparakha yuulupale ovuwiha ndhina na Yehova ni waakihera ontthu-ye. Tivondho nihikhala-khale nuuleliwaka muru waaleela makoleeka nhu a ontekoni, a oskola, mavisiinyu ni atthu akina wiira na Anamoona a Yehova! Satana ontthuna wiira nihiye waaleela atthu akina voohima dha ndhina na Yehova. (Yer. 11:21; Wiis. 12:17) Veekhweeli, Satana vamodha ni ale onaarumeela iye wiira elaleye itthu dhawoothiwa antthuna wiira atthu eliyale ndhina na Yehova. (Yer. 23:26, 27) Masi mwaha wa opheta ndhina na Yehova, hiyo khaninhiya onvuwiha “nihiku nootheene.”—Esal. 5:11; 89:16.
15. Ontaphulelani oromola ndhina na Yehova?
15 Hiyo khaninhiya oromola ndhina na Yehova. (Yow. 2:32; aRoma 10:13, 14) Oromola ndhina na Yehova onhela mpuwa itthu dhawaatta ohiya pahi odhuwela ni orumeela ndhina na Muluku. Masi ontaphulela odhuwela ontthu wa Muluku, onroromela ni onvekela nikhalihero ni malakihero. (Esal. 20:7; 99:6; 116:4; 145:18) Nitho ninnaaleela atthu akina ndhina-ne ni mikhalelo-dhe, naakhaliheraka opaka marukunuso mweekumini-mwa wiira enhakalalihe Muluku ni ephwanye woopowa.—Yes. 12:4; Mit. 2:21, 38.
16. Nin’ya owerya dhai woonihera wiira Satana nawoothe?
16 Hiyo ninnaakhulela ohaawa mwaha wa ndhina na Yehova. (Yak. 5:10, 11) Vaavo nihinhiya nhu okhala ororomeleya wa Yehova okathi wa mixankiho, ninnoonihera wiira Satana nawoothe. Mahiku a Yoobi, Satana aahiwoothera arumeyi a Yehova airaka: ‘Ntthu onooleva itthu dhootheene oriiyena wiira oopole ekumi-ye.’ (Yobi 2:4) Moolumo ala Satana aatthuna olotta wiira ntthu onoowerya onrumeela Yehova akhala wiira itthu dhinnimweettela saana mweekumini-mwe, masi dhamphwanya mixankiho onoohiya onrumeela Yehova. Yoobi aahoonihera wiira Satana nawoothe. Nkhama Yoobi, hiyo nookhalana eparakha ya woonihera wiira voohixikha mixankiho Satana okhanle iye onikhumihera, khaninkhala-khala nihiyaka onrumeela Yehova. Tivondho nikhupali ni nrima wootheene wiira Yehova khankhala-khala ahiyaka onikhapelela mwaha wa ndhina-ne.—Yohani 17:11.
17. Moovarihana ni 1 Pedru 2:12, enamuna seeni ekina nin’ya nhu ovuwiha ndhina na Yehova?
17 Hiyo ninnittittimiha ndhina na Yehova. (Mir. 30:9; Yer. 7:8-11) Okhala wiira ninnithoonyera Yehova ni ninnikusa ndhina-ne, elo enoonihera wiira mweettelo nhu pooti ovuwiha aahiidho oveihiha ndhina-ne. (Munsome 1 Pedru 2:12.) Ndho nikhalena yoolakela ya opaka itthu dhootheene ninwerya nhu wiira ninvuwihe Yehova oreela wa moolumo ni mweettelo nhu. Ndho napaka elo, hata niri atthu ohimalela, ninoowerya ovuwiha ndhina na Yehova.
18. Enamuna seeni ekina nikhanle nhu woonihera wiira ninnivaha efaita yuulupale ndhina na Yehova? (Moone-tho enoota.)
18 Hiyo ninnoona ndhina na Yehova okhala nootepa otthuneya voohixikha ele atthu akina anuupuwela awa voohima dha hiyo. (Esal. 138:2) Seeni opaka elo eri awa etthu yootthuneya? Okhala wiira vaavo niniilipihera nhu opaka itthu wiira ninhakalalihe Yehova, ivaara dhikina atthu awaatta pooti ohaadhivela ni onilottela itthu dhootakhala. a Moone etthu yaankhumelenle Yeesu. Owo aahaakhulela okhwa mwa enamuna yawuuliha muru athokoreriwaka nkhama nakirime wiira avuwihe ndhina na Yehova. Yeesu “khuuliwe muru” uupuwelaka moopora atthu akina yaaya awa omoonela. (aHeb. 12:2-4) Okhala wiira owo aahilakela opaka yootthuna ya Yehova.—Math. 26:39.
19. Nyuwo nnoonela dhai ndhina na Yehova ni mwaha wa seeni?
19 Hiyo ninniittottopa mwaha ndhina na Yehova ni ninnoona okhala eparakha yuulupale wiitthaniwa okhala Anamoona a Yehova. Ndho niri oolikaneene wiira nivilele oveiha ni othanyiwa ni atthu akina. Hiyo ninnoona ndhina na Yehova okhala nootepa otthuneya mweekumini mwihu voohixikha ele atthu akina anuupuwela awa voohima dha hiyo. Tivondho voohixikha etthu Satana on’ya iye opaka wiira anihiihe, hiyo khaninkhala-khala nihiyaka ovuwiha ndhina na Yehova. Ndho napaka elo, ninawoonihera wiira ndhina na Yehova ti nootepa otthuneya wa hiyo, nkhama nri awa nootepa otthuneya wa Yeesu.
NCIPO 10 Ninvuwihe Yehova, Muluku Ahu!
a Hata Yoobi aari oororomeleya, owo anixanka mwaha wa itthu atthu akina yuupuwela awa vaavo axirikha-ye araru yaamoothenra awa opaka itthu dhootakhala. Woopacerani, nuumala Yoobi oyeleela mireerelo-dhe ni okhweliwa ane, ‘owo khaatthenke nnakhala khaamoothenre Muluku opaka etthu yootakhala.’ (Yobi 1:22; 2:10) Masi nuumala Yoobi wootheriwa wiira aahipaka etthu yootakhala, owo aahipacera wiidhaakiha ni olotta ‘moolumo oololo.’ Owo aatthuna waakihera ontthu-ye ohiya ootteeliha ndhina na Yehova.—Yobi 6:3; 13:4, 5; 32:2; 34:5.
