1. Mareeliho seeni ntthu omphwanya iye noomala opatisiwa?

 NIIRE nyuwo munnimpheta Yehova Muluku, yoowo oovanheni itthu dhootheene dhooreera ohela mpuwa ekumi? Niire munnitthuna woonihera wiira munnipheta ni onxukhurela? Enamuna yuulupale nkhanle nnyu opaka elo ori wiivahererya wa Yehova ni opatisiwa. Okhuma nihiku mumpatisiwa nnyu munnipacera wiirela mphantta emudhi ya Yehova. Ohiya-vo, nyuwo munnikhala nrumeyi a Yehova ni owo onnipacera weetthiha ekumi nnyu ni wookhapelelani nkhama Tiithi ni Nxirikha nnyu. (Esal. 73:24; Yes. 43:1, 2) Nitho wiivahererya ni opatisiwa anawoovahani eparakha ya okhalana nlipelelo na ophwanya ekumi yoohimala nhoolo.—1 Ped. 3:21.

2. Eseeni nin’ya nhu othokorerya yoosoma ela?

² Niire yookhala etthu enookhoottihani opatisiwa? Akhala wiira yookhala, nyuwo khanri meekhinnyu. Imilyawu dha atthu awaatta aawerya atthuruwa mweettelo-ya ni aapaka marukunuso mmuupuweloni wiira ephwanelele opatisiwa. Nenna-va, awo anninrumeela Yehova moohakalala ni mooluttuweliwa. Nitho elo yaahiiraneya ni atthu akina yaapatisiwe eseekulu yoopacera. Yoosoma ela, nin’ya othokorerya mixankiho yaavirinha awa ni etthu ennihudhiha awa ntakihero-na.

OPATISIWA WA ATTHU A OSAMARIYA

3. Mixankiho seeni asamariya akina yaareerela awa oxira wiira epatisiwe?

³ Mahiku a Yeesu, asamariya yaari ekhurupu ya atthu yeettela etiini emodha ni yaakhala onoorti wa oYudeya waattamenle oSikeemi wa khalai ni oSamariya. Ndho wiira awo epatisiwe, yaanireerela odhuwela saana Nuulumo na Muluku. Okhala wiira atthu a oSamariya yaakhupali pahi iliivuru thanu dhoopacera dha mbiibiliyani dhuupuseriwe ni Muluku, okhuma eliivuru ya Maphattuwelo mpakha Otumererya ni woonawene eliivuru ya Yooxuuwa. Ohiya-vo, awo yaanilipelela ora wa Mesiya, moovarihana ni yoolaihera ya Muluku eri Otumererya 18:18, 19. (Yohani 4:25) Masi wiira awo epatisiwe, yaahaana okhupali wiira Yeesu  aari Mesiya yoowo aalaiheriwe. Voohakalaliha ‘asamariya awaatta’ yaahiwerya opaka elo. (Yohani 4:39) Ohiya-vo, atthu akina woonawene yaanireerela oxira nxankiho wa nthalu waakhale eriyari ya asamariya ni ayuuda.—Luka 9:52-54.

4. Moovarihana ni Miteko 8:5, 6, 14, asamariya akina yoonenle dhai nhupi wa Filipi?

⁴ Eseeni yaakhalihenre asamariya opatisiwa? Noomala Filipi namalaleya, waalaleerya ‘voohima dha Kiriistu’ asamariya akina ‘yaahaakhulela nuulumo na Muluku.’ (Nsome Miteko 8:5, 6, 14.) Filipi aari nyuuda, masi hata eri dhiidho, elo khiyawiirinhe okhootta onwiriyana okathi aalaleerya iye. Woonawene asamariya yanuupuwela dhawaatikhiwa dhoopacera dha Biibiliya dheidho dhinoonihera wiira Muluku khaninthanla ntthu. (Otum. 10:17-19) Okathi wootheene, awo ‘yaaniwiriyana ni ephoole itthu Filipi aalotta iye’ voohima dha Kiriistu ni yaahoona itthu dhoonihera wiira Muluku aaninkhalihera Filipi. Nitho Filipi aahipaka miiriirya dhawaatta ohela mpuwa waapenusa aretta ni wiikara minepa dhootakhala.—Mit. 8:7.

5. Eseeni ninhudha nnyu ni ntakihero na asamariya?

⁵ Woonawene asamariya yaanwerya ohiya nthalu ni ohidhuwela itthu dhawaatta owiirihaka ohirowa vahoolo. Masi awo khahin’ye elo yiiraneyaka. Noomala asamariya okhupali wiira Filipi aalaleya eekhweeli, mwawaakuveya awo yaahipatisiwa. Biibiliya onlotta wiira: ‘Okathi Filipi aalaleya iye ihapari dhooreera dha Omwene wa Muluku, ni aalaleya iye ndhina na Yeesu, alopwana ni athiyana yaahimwaamini, ni yaahipatisiwa.’ (Mit. 8:12) Niire nyuwo munnikhupali wiira nuulumo na Muluku ti neekhweeli? Niire munnikhupali wiira Anamoona a Yehova khaana nthalu ni anniilipihera woonihera ophetana nkina ni nkhwe, weiwo waaya waakhalihera atthu waadhuwela Makiristau eekhweeli? (Yohani 13:35) Akhala wiira ti dhiidho, nhoovelele wiivahererya wiira mpatisiwe. Ohiya-vo, nkhupali wiira mwapaka elo Yehova onawoovahani mareeliho.

6. Mun’ya owerya dhai otthara ntakihero na Ruben?

⁶ Ruben a wAlemanha, ohuiwale ettheko ya Anamoona a Yehova. Okathi aariiye rapasi, owo khaakhupali wiira Muluku ookhala. Eseeni yaankhalihenre omaliha muupuwelo owo? Noomala woona wiira dhookhala itthu ahaadhuwela iye, owo aahilakela othokodha voohima dha mwaha owo. Owo onlotta wiira: “Okathi kaapaka aka yoosoma aka yoomwaneene, kaaniilipihera omaliha itthu kaakanyeraka. Tivondho kaanisoma ivaara dhawaatta miyaha dhaalotta voohima dha othatuwa.” Noomala Ruben aahisoma eliivuru eni: Existe um Criador Que Se Importa com Voce? Eliivuru ela yaahinkhalihera Ruben okhupali wiira Muluku ookhala. Noomala odhuwela elo, owo aahihakalala akalotta wiira: ‘Waau! Yehova manki ookhala.’ Ohiya-vo, noomala Ruben orowa osekurya Eseeti ya Olumwinku Wootheene ya Anamoona a Yehova, elo yaahimwiiriha waacerera opheta emudhi nhu yawiiraana ya olumwinku wootheene. Okathi Ruben aatthikenle iye elapo ya wAlemanha, aahipatisiwa arina iyaakha 17. Ndho akhala wiira nyuwo mookhalana etthu nnaakanyera nnyu, nthokodhe iliivuru dhihu wiira mmalihe muupuwelo owo. Okhalana ‘odhuwela weekhweeli’, onoowerya wookhaliherani omaliha itthu nnaakanyera nnyu. (aEefe. 4:13, 14) Nitho vaavo mun’ya nnyu wiiwa dhaawiiraneya dhinlotta wiiraana ni opheta wa anna ni arokora ankhala ilapo dhikina ni woona elo yiireyaka muloko nnyu, enawaacerera oxukhurela winyu wiirela mphantta emudhi ya olumwinku wootheene.

OPATISIWA WA SAULU A OTAARSU

7. Moonelo seeni woohiloka Saulu areerela iye ohiya?

⁷ Vano, nirowe nithokorerye ntakihero na Saulu a oTaarsu. Owo aahisoma eskola yuulupale ya ayuuda ni aanitepa orowa ohoolo ni etiini ya ayuuda. (aGal. 1:13, 14; aFil. 3:5) Okathi ole, ayuuda awaatta yanaathokorerya Makiristau okhala anamavirikanya. Tivondho  Saulu aahiilipihera waattharatthara Makiristau moowali. Owo aanipaka elo ni moonelo woohiloka, uupuwelaka wiira aapaka yootthuna ya Muluku. (Mit. 8:3; 9:1, 2; 26:9-11) Ndho vaakhala wiira Saulu aammwaamini Yeesu ni apatisiwa akhala nkiristau, owo anreerela okhala oolikaneene wiira avilele nxankiho wa ottharatthariwa.

8. (a) Eseeni yaankhalihenre Saulu opatisiwa? (b) Moovarihana ni Miteko 22:12-16, Ananiiya ankhalihenre dhai Saulu? (Moone-tho efootu.)

⁸ Eseeni yaankhalihenre Saulu opatisiwa? Okathi Saulu waankhumelenla awa waarya wa Pwiya Yeesu, owo aahihiya woona. (Mit. 9:3-9) Noomala oviriha mahiku mararu atthunke, voohaakanyera owo anuupuwelela etthu yaankhumelenle. Ndho Saulu aahikhupali ni nrima wootheene wiira Yeesu aari Mesiya ni Makiristau yeettela etiini yeekhweeli. Nkuupuwelani moopora Saulu aathananne iye mwaha wookhalihera wiiphiwa wa Esteevau! (Mit. 22:20) Noovira mahiku mararu, nhudheri mmodha aaitthaniwa Ananiiya ahimwaattamela Saulu alotta nuuwo mooreera nrima, ampenusa ni antumererya wiira apatisiwe mwawaakuveya. (Nsome Miteko 22:12-16.) Mwa wiiyeviha, Saulu aahaakhulela nikhalihero na Ananiiya apatisiwa akhala nkiristau.—Mit. 9:17, 18.

9. Eseeni ninhudha nhu ni ntakihero na Saulu?

⁹ Eseeni ninhudha nhu ni ntakihero na Saulu? Woonawene Saulu anwerya ohiya wiikuserera ni owoova atthu onkhoottihaka opatisiwa. Masi owo khaahin’ye elo yiiraneyaka. Mwawaakuveya ni mwawiiyeviha owo aahipaka marukunusu mweekumini-mwe akhala ntthareli a Kiriistu. (Mit. 26:14, 19) Hata aadhuwela wiira anttharatthariwa, Saulu aahilakela okhala nkiristau. (Mit. 9:15, 16; 20:22, 23) Noomala opatisiwa, owo khaahin’ye onroromela Yehova wiira ammukhalihera owerya ovilela mixankiho dhaaya okhumelela nhoolo. (2 aKor. 4:7-10) Woonawene noomala nyuwo opatisiwa nkhala Namoona a Yehova, pooti okumanana dhaweeha dhawaatta dhin’ya weehererya waamini winyu. Masi nkhupali ni nrima wootheene wiira Yehova ni Yeesu anawoovahani nikhalihero munramela nnyu wiira nwerye ovilela ni ohihiya okhala oororomeleya.—aFil. 4:13.

10. Mun’ya owerya dhai otthara ntakihero na Anna?

 ¹⁰ Anna ohuiwe amudhi emodha ya elottelo ya ekurda elapo emodha ya wEuropa Oriental. Noomala amaamaye opatisiwa, apaapaye yaahaakhulela Anna opacera onsoma Biibiliya arina iyaakha 9. Ndho, vaavo amudhi aakhalaiyena vamodha yaadhuwenla awa wiira aahipacera onsoma Biibiliya awo yaahipacera onkhumihera mixankiho. Amudhi akina a Anna yoona okhala etthu yawuuliha muru ntthu ohiya weettela itiini ya anhavinre-ya. Okathi Anna aariiyena iyaakha 12, ahaavekela apaapaye wiira emwaakhulelihe opatisiwa. Apaapaye yaahinkoha wiira edhuwele akhala wiira ti veene aathanlale aahiidho arookhanyereriwa ni ntthu nkina opaka elo. Owo aahiwaakhula wiira: “Miyo kinnimpheta Yehova.” Ndho awo yaahimwaakhuleliha opatisiwa. Noomala Anna opatisiwa, amudhi-ye yaantepa onkhumihera mixankiho dhawaatta ni onthokorerya vootakhala. Mmudhi mmodha aahinleela wiira: “Fataari mwaarina mweettelo woohiloka aahiidho onvura sikaro ohiya okhala Namoona a Yehova.” Eseeni yaankhalihenre Anna ovilela mixankiho idhe? Owo onlotta wiira: “Yehova ookikhalihera okhala oolipa, nitho amma ni apaapa aakikhalihera vawaatta.” Anna anaatikha inamuna dhoovirikina Yehova ankhalihera iye mooluluwanya mweekumini-mwe. Ivaara dhikina owo onnisoma eliista elo aatinke iye wiira uupuwele moopora Yehova ankhalihenre iye. Akhala wiira etthu enookhootthihani opatisiwa nnoova ottharatthariwa nhoolo, nhiliyale wiira Yehova onawookhaliherani.—aHeb. 13:6.

OPATISIWA WA KORNEELIYU

11. Itthu seeni woonawene dhaakhanle omwiiriha Korneeliyu olekela opatisiwa?

¹¹ Nitho Biibiliya onnilotta ntakihero na Korneeliyu. Owo aari ‘nhooleli,’ a ekhurupu ya atoropa 100 a oRooma. (Mit. 10:1) Woonawene owo aari ntthu aattittimihiwa mmuttettheni ni aari nakhotto aaroromeliwa. Owo ‘aanaakhalihera alipa-oohaawa.’ (Mit. 10:2) Yehova aahiruma nrummwa Pheeduru wiira anlaleerye Korneeliyu ihapari dhooreera. Niire mwaha wa okhala nkhulupale a anakhotto elo yaahimwiiriha Korneeliyu olekela opatisiwa?

12. Eseeni yankhalihenre Korneeliyu opatisiwa?

¹² Eseeni yaankhalihenre Korneeliyu opatisiwa? Okathi ninninsoma nhu Biibiliya ninnoona wiira ‘owo vamodha ni atthu ootheene a ettheko-ye yaaninkokhorela Muluku.’ Nitho Korneeliyu aninvekela Muluku mahiku ootheene. (Mit. 10:2) Noomala Pheeduru onlaleerya Korneeliyu ihapari dhooreera, owo vamodha ni a ettheko-ye yaahipatisiwa. (Mit. 10:47, 48) Voohaakanyera, Korneeliyu aari oolikaneene opaka marukunuso ootheene wiira apacere onrumeela Yehova vamodha ni atthu ettheko-ye.—Yox. 24:15; Mit. 10:24, 33.

13. Eseeni ninhudha nhu ni ntakihero na Korneeliyu?

¹³ Nkhama Saulu, Korneeliyu anwerya ohiya miritti aariiyena mmuttettheni dhikhoottihaka okhala nkiristau. Masi owo khaahin’ye elo yiiraneyaka. Niire aakhala marukunusu muulupale munreerela nnyu opaka mweekumini mwinyu wiira mpatisiwe? Akhala wiira ti dhiidho, Yehova onawookhaliherani ni onooreeliha yoolakela nnyu ya ovarihela nteko malakihero a mbiibiliyani wiira munrumeele.

14. Mun’ya owerya dhai otthara ntakihero na Tsuyoshi?

¹⁴ Tsuyoshi yoowo onkhala oJapão, aahipaka marukunuso voohima dha nteko aavara iye wiira aphwanelele opatisiwa. Owo aari namakhalihera a tereitore a eskola yoovuwa ya owIkenobo yeelo ehudhiha moopora woopaka ifoloori. Tereitore owo aanipaka ifoloori dha omakhwelo ni aniirela mphantta dhoolema dha itiini butiista. Ndho akhala wiira mahiku makina owo khaawerya orowa, Tsuyoshi aaninranttela ahoolelaka dhoolema dha etiini butiista. Noomala Tsuyoshi ohudha ekhweeli aahoona wiira aanireerela ohiya dhoolema idhe wiira apatisiwe. Ndho owo aahilakela ohiya wiirela mphantta dhoolema  dha itiini butiista. (2 aKor. 6:15, 16) Noomala Tsuyoshi aahinleela tereitore mwaha owo. Eseeni yaakhumelenle? Tereitore ole aahimwaakhuleliha ovikaniha ovara nteko ahiirela mphantta dhoolema dha ittiini butiista. Noovira mwaakha mmodha ansomaka Biibiliya, aahipatisiwa. a Akhala wiira nyuwo munnireerela opaka marukunuso voohima dha nteko munvara nnyu wiira munhakalalihe Yehova, nkhupali wiira owo onawoovahani itthu dhinoothowani, nyuwo ni emudhi nnyu.—Esal. 127:2; Math. 6:33.

OPATISIWA WA ATTHU A OKORINTO

15. Itthu seeni woonawene dhaakhanle waakhoottiha atthu yaakhala epooma ya oKorinto opatisiwa?

¹⁵ Atthu awaatta yaakhala epooma ya oKorinto wa khalai dhanaadhivela mihakhu ni yaanipaka itthu dhoohiloka. Ohiya-vo, awo yaahikhala mweettelo oninnanara Yehova. Ndho, woonawene elo yaanwiiriha atthu akina yaakhala epooma ele waaliperya opaka marukunuso ni opacera nrumeela Yehova. Masi noomala nrummwa Paaulu ophiya nttetthe ole alaleya ihapari dhooreera voohima dha Kiriistu, ‘akorinto awaatta yaaiwale ihapari dhooreera, yaahaamini, epatisiwa.’ (Mit. 18:7-11) Moottharelana, Pwiya Yeesu aahinkhumelela Paaulu moolohani, anleela wiira: ‘Aakhala atthu awaatta epooma ela anrowa okaamini.’ Ndho elo yaahimwiiriha nrummwa Paaulu olaleya ihapari dhooreera epooma ele mwaakha ntero ni emeya.

16. Eseeni yaakhalihenre atthu a oKorinto opatisiwa? (2 aKorinto 10:4, 5)

¹⁶ Eseeni yaakhalihenre atthu a oKorinto opatisiwa? (Munsome 2 aKorinto 10:4, 5.) Nuulumo na Muluku ni owerya wa munepa wawaarya waahaakhalihera atthu a oKorinto opaka marukunuso muulupale mweekumini-mwa. (aHeb. 4:12) Ale yaakhulenle ihapari dhooreera voohima dha Kiriistu epooma ya oKorinto, yaahihiya itthu dhootakhala ni yaahittharuma dhoolema dhoonanara nkhama ohapaliwa, wiiya ni orupihana alopwanaru aahiidho athiyanaru.—1 aKor. 6:9-11. b

17. Eseeni ninhudha nhu ni ntakihero na atthu a oKorinto?

¹⁷ Nkhama noonne nhu, atthu akina a oKorinto yaanitthuneya opaka marukunuso muulupale. Masi hata eri dhiidho, awo yaanikhupali wiira yaanwerya opaka marukunuso awo wiira ekhale Makiristau. Tivondho yaahipaka itthu dhootheene yaawerya awa wiira epacere weetta ephuro yoophunyeya emphwanyiha ekumi yoohimala. (Math. 7:13, 14) Niire yookhala yoolema  yoohiloka munreerela nnyu ottharuwa wiira mpatisiwe? Akhala wiira ti dhiidho, nhihiye wiilipihera! Munvekele Yehova munepa wawaarya wiira wookhalihereni owerya ottharuwa yoolema yoohiloka.

18. Mun’ya owerya dhai otthara ntakihero na Monika?

¹⁸ Monika, yoowo onkhala elapo ya oGeógia, ohiilipihera vawaatta wiira attharuwa olotta moolumo ooruwana ni maraarelo oohiloka wiira arowe vahoolo mpakha opatisiwa. Owo onlotta wiira: “Okathi kaari aka mwali, opaka mavekevo waahikikhalihera opaka marukunuso. Yehova aanidhuwela wiira kaanitthuna opaka etthu yooreera ndho okathi wootheene owo aanikikhalihera ni aanikikhapelela.” Monika apatisiwe arina iyaakha 16. Niire dhookhala dhoolema munreerela nnyu ottharuwa wiira nwerye onrumeela saana Yehova? Nhihiye onvekela Yehova woovahani ikuru wiira nwerye opaka marukunuso. Owo onnivaha munepa wawaarya ni nrima wootheene.—Yohani 3:34.

WAAMINI WINYU ONOOWERYA OTHAAMIHA MIYAAKO

19. Eseeni en’ya wookhaliherani owerya oxira mixankiho dhuulupale dhinlikana ni miyaako? (Moone-tho efootu.)

¹⁹ Safatali, nkhupali ni nrima wootheene wiira voohixikha mixankiho munviriha nnyu wiira mpatisiwe, Yehova onnoophetani ni ontthuna wiira mpacere mwiirele mphantta emudhi-ye. Okathi Yeesu aariiye valaponi, aahaaleela ahudheri-ye wiira: ‘Mwakhalana waamini onlikana ni etthaka ekhaani ya mostaarta, nnooruma mwaako ola wiira: ‘Nkhume-va nthaamele vale,’ ndho mwaako owo onookhuma, ni khiyaavo etthu mun’ya nnyu wooceela.’ (Math. 17:20) Ndho okhala wiira Yeesu aaleela moolumo ala ahudheri yaawo yaavirinhe iyaakha dhawaatta yeettaka nuuwo, elo enoonihera wiira awo yaanireerela owaacerera waamini-wa. Masi Yeesu aahalaihera wiira yaakhalana wiira yaamwacerere waamini-wa, Yehova amwaakhalihera oxira mixankiho dhuulupale dhinlikana ni mwaako. Nitho Yehova onawookhaliherani opaka etthu emodharu!

20. Eseeni anootumereryawani opaka, matakihero noonne nhu yoosoma ela a Makiristau a eseekulu yoopacera ni a mahiku ala?

²⁰ Akhala wiira yookhala etthu enookhoottihani opatisiwa, mpake etthu mwawaakuveya wiira mmalihe nxankiho owo ni nhilekele opatisiwa. Matakihero noonne nhu yoosoma ela, a Makiristau a eseekulu yoopacera ni a mahiku ala, anoowerya woovahani nimaaliho ni woolipihani. Tivondho ninlipelela wiira ntakihero Makiristau awo yoonihenra awa noolipiheni ni wootumereryani wiivahererya wa Yehova ni opatisiwa. Elo yoothanla yootepa otthuneya munreerela nnyu opaka!