WIIPA macipo yaari etthu yootepa otthuneya yoolema ya atthu a wiisarayeli akhalai. Nitho ivaara dhawaatta Biibiliya onnaalotta atthu yoopa ikaruma dha macipo aahiidho wiipa. Iliivuru dhikina dha mBiibiliyani dhinhela mpuwa macipo, mwa ntakihero eliivuru ya Masaliimu, Nsipo n’Ophentana ni Wiikhupanyera. Eliivuru emodha enlotta voohima dha makhalelo atthu okathi aatikhiwa iye Biibiliya, enlotta wiira Biibiliya “onnoonihera saana wiira atthu a wiisarayeeli yaaniipa macipo vaavo yaavara awa miteko dhawaatta.”

Macipo yaaipiwa khuta nihiku. Atthu a wiisarayeeli yaaniipa macipo wiira yoonihere ohakalala. (Yes. 30:29) Athiyana yaaniipa malapa, yaaniipa macipo voohakalala ni yaaniina mahiku yuupuweliwa, mwa ntakihero nkhama vaavo aathanliwa iye mwene, vaavo anakhotto yaawerya awa awanani-ya aahiidho nihiku na efeesta yookokhorela. (Makh. 11:34; 1 Sam. 18:6, 7; 1 Mam. 1: 39, 40) Nitho aisarayeeli yaaniipa macipo yoonihera owereya yoona awa vaavo yaakhweliwa awa. (2 Wah. 35:25) Nkhama enlotta awa eliivuru emodha, “voohakanyera aHeeberi yaari atthu yaadhivela wiipa macipo.”

Macipo a vaate va mwene. Mamwene a wiisarayeeli yaanaadhivela vawaatta macipo. Mwa ntakihero mwene Sawuli aahiruma oruuhiwa Davidi wiira akamoopela tthakare owannye. (1 Sam. 16:18, 23) Nuuvira okathi Davidi akhalihiwe mwene, aahipaka ikaruma dha macipo, aahiipa macipo ooreera ni aahipaka malope yaaipiwa mutempulu wa Yehova. (2 Wah. 7:6; Amosi 6:5) Nitho mwene Salomooni aahikhalana alopwana ni athiyana yaaipa owannye.—Mus. 2:8.

Macipo ookokhorela. Etthu yootepa otthuneya okhala wiira atthu a wiisarayeli yaaniipa macipo wiira enkokhorele Yehova. Wiira ndhuwele, alopwana yaaphiyera 4.000 yaaniipa ikaruma dha macipo mutempulu oYerusaleemu . (1 Wah. 23:5) Awo yaaniipa icaasi, tthakare ni viyola. (2 Wah. 5:12) Masi awo khiyaari meekha yaankokhorela Yehova erumeelaka macipo, atthu awaatta wiisarayeeli yaaniipa macipo mphuroni vaavo yeetta awa erowaka mithukumano oYerusaleemu. Macipo makina yaaipa awa yaaitthana macipo owelela. (Esal. 120-134) Nitho moovarihana ni iliivuru dha ayuuda, atthu a wiisarayeeli yaaniipa isaalimu dha Haleeli a aahiidho macipo onvuwiha Yehova okathi wa paasika.

Emodha-modharu olelo, atthu a Yehova annoona wiipa macipo okhala etthu yootthuneya. (Yak. 5:13) Wiipa oniirela mphantta okokhorela wihu. (aEef. 5:19) Nitho ninnitepa wiiraana vaavo niniipa nhu vamodha ni anna ni arokora macipo onvuwiha Yehova. (aKol. 3:16) Ohiya-vo, macipo anninikhalihera vaavo dhinniphwanya awa mixankiho. (Miteko 16:25) Voohaakanyera, wiipa macipo enamuna ninoonihera nhu omwaamini wihu Yehova ni ompheta.