YOOSOMA YA MWAHA 42
NCIPO 103 Axitokweene: Yoovaha ya Yehova
Moonihere Wiira Munnixukhurela ‘Dhoovaha dha Alopwana’
“Okathi aawenle awe osulu . . . , aaharuma alopwana awo wiira ekhale soovaha.’ —AEEF. 4:8.
ETTHU NIN’YA NHU OHUDHA
Nin’ya woona moopora arumeyi ookhalihera, asitokweene mmulokoni ni asitokweene a esirkwiitu annikhalihera awa ni moopora nikhanle nhu owoonihera oxukhurela mwaha wa itthu dhootheene anipakela awa.
1. Dhoovaha seeni Yeesu onivanhe iye?
YEESU aari ntthu ovaha. Okathi aariiye valaponi, Yeesu aanipaka miirirya wiira aakhalihere atthu akina yaatthuna okhaliheriwa. (Luka 9:12-17) Nitho oxira itthu dhootheene, Yeesu ooleva ekumi-ye yoomalela yeelo eri yoovaha ya efaita yuulupale mwaha wa hiyo. (Yohani 15:13) Noomala ohihimusiwa, Yeesu khahin’ye okhala ntthu ovaha. Owo aalontte wiira ammuvekela Yehova munepa waawarya wiira onihudhihe ni onimaaliha. Moohakanyera elo, ehiiraneya. (Yohani 14:16, 17; 16:13) Nitho orweela wa mithukumano, Yeesu onninihudhiha moopora wa waapaka ahudheri olumwinku wootheene.—Math. 28:18-20.
2. Taani ari ‘dhoovaha dha alopwana’ anromoliwa aEefeso 4:7, 8?
2 Moone etthu ekina Yeesu onnivanhe iye. Nrummwa Paaulu aatinkhe wiira noomala Yeesu orowa wiirimu, ‘aahaaruma alopwana awo wiira ekhale dhoovaha.’ (Munsome aEefeso 4:7, 8.) Paaulu olonte wiira Yeesu ohaavaha alopwana awo wiira ekhalihere muloko mwa inamuna dhoovirikana. (aEef. 1:22, 23; 4:11-13) Olelo, ‘dhoovaha dha alopwana’ anihimmwa arumeyi ookhalihera, asitokweene a mmulukoni ni asitokweene a esirkwiitu. a Ndho nkhama nindhuwela nhu alopwana awo toohimalela ni ivaara dhikina annivonya. (Yak. 3:2) Masi Pwiya nhu Yeesu Kiristu onnaarumeela anna awo wiira enikhalihere. Awo dhoovaha Yeesu onnivanhe iye.
3. Nlotte nlikanyiho ninoonihera wiira ootheene nhu ninoowerya opaka etthu wiira naakhalihere anna ari ‘dhoovaha dha alopwana.’
3 Yeesu ohaathanla “alopwana awo” wiira elipihe muloko. (aEef. 4:12) Ndho khuta mmodha a hiyo onoowerya waakhalihera anna awo waakhwanihera miritti araawana. Wiira mwiiwasase saana elo, muupuwele nlikanyiho nna: Akina a hiyo annikhalihera otekiwa Empa ya Omwene. Masi atthu akina annikhalihera nteko owo mwa inamuna dhoovirikana nkhama waapeya eyooca, waapakhira alipa oteka aahiidho ovara miteko dhikina. Emodha-modharu, ootheene nhu ninoowerya waakhalihera orwela wa moolumo nhu ni miteko arumeyi okhalihera, asitokweene a mmulokoni ni asitokweene a esirkwiitu mwaha wa itthu ampaka awa. Vano nirowe noone moopora nteko anna awo anvara awa onnikhalihera awa ni moopora nikhanle nhu owoonihera waaxukhurela ni onxukhurela Yeesu, yoowo onivanhe anna awo nkhama ‘dhoovaha dha alopwana.’
ARUMEYI OOKHALIHERA ‘ANNAAKHALIHERA AKHWA’
4. Miteko seeni arumeyi ookhalihera yaavara awa eseekulu yoopacera?
4 Eseekulu yoopacera, anna akina yaanithanliwa wiira ekhale arumeyi ookhalihera. (1 Tim. 3:8) Woonawene Paaulu aalotta arumeyi ookhalihera vaavo aatinkhe iye voohima dha ‘ale anaakhalihera akhwa’. (1 aKor. 12:28) Okathi ole arumeyi ookhalihera yaanivara miteko dhawaatta wiira asitokweene eluttuweliwe nteko wa ohudhiha ni waalipiha anna. Mwa ntakihero, arumeyi ookhalihera okathi ole yaanirumeeliwa wiira epake ikoopiya dha iliivuru dha mBiibiliyani aahiidho wiira ethume itthu dhaarumeliwa wiira ipakiwe ikoopiya idho.
5. Miteko seeni arumeyi ookhalihera anvara awa olelo?
5 Muupuwele miteko dhawaatta arumeyi ookhalihera anvara awa muloko nnyu. (1 Ped. 4:10) Woonawene arumeeyi akina ookhalihera ankhapelela nsurukhu wa mmulokoni aahiidho mittetthe dha nteko woolaleerya, akina ankhapelela nteko wooveka ni okawa iliivuru, akina nteko woorumiha ni woonihera iviidiyu, akina anrumeela nkhama anamatoonyera aahiidho ankhalihera nteko wookocihera Empa ya Omwene. Ndho miteko idho dhootheene ti dhootthuneya wiira muloko okhale wookociheya saana. (1 aKor. 14:40) Ohiya-vo, arumeyi ookhalihera anipaka iphantte dha nthukumano wa Okumi ni Orummwa ni wookhidherani wa esumana annilotta miyaha. Woonawene nrumeyi ookhalihera mmodha pooti othaliwa wiira ankhalihere ntokweene onhoolela ekhurupu ya nteko woolaleerya. Nitho ivaara dhikina, arumeyi ookhalihera pooti ovekeliwa ni asitokweene waahoola vaavo an’ya awa waasekurya anna.
6. Seeni ninreerela nhu waaxukhurela arumeyi ookhalihera mwaha wa nteko anvara awa?
6 Nteko wa arumeyi ookhalihera onaakhalihera dhai anna mmulokoni? Beberly, b nrokora yoowo onkhala oBolívia onlotta wiira: “Miyo kinniwerya ottottela nreerelo mithukumano dhootheene mwaha wa nikhalihero na arumeyi ookhalihera. Ndho mwaha wa nteko anvara awa, kinniwerya wiipa macipo, ovaha ikomentaariyu, owiriyana miyaha ni ohudha itthu dhawaatta ni iviidiyu ni ifootu dhinooniheriwa onthukumanoni. Awo annikhapelela ophareleleya wa Empa ya Omwene ni anaakhalihera anna anoona mithukumano enrumeelaka viidiyukofereensiya. Noomala mithukumano, awo annikhalihera oreerihiwa Empa ya Omwene, anikhapela nsurukhu wa mmulokoni ni anninikawela iliivuru nintthuna nhu. Ndho kinnaaxukhurela vawaatta arumeyi okhalihera mwaha wa nteko anvara awa!” Nitho Leslie, yoowo onkhala oColombia ni otheliwe ni ntokweene mmodha onlotta wiira: “Amamunaka anniwerya ovara miteko dhawaatta ekhaliheriwaka ni arumeyi ookhalihera. Wahaari okhaliheriwa naawo, khiyaare ekakhalana okathi. Ndho miyo kinaaxukherela mwaha wa waakhulela okhalihera.” Woonawene nyuwo muniwoonela dhiidho arumeyi ookhalihera a muloko nnyu.—1 Tim. 3:13.
7. Nin’ya woonihera dhai wiira ninnivaha efaita miteko dhootheene arumeyi ookhalihera anvara awa? (Moone-tho efootu.)
7 Khomphiyera woona wiira ninnixukhurela mwaha wa itthu arumeyi ookhalihera ampaka awa, masi Biibiliya onninitumererya alottaka wiira: ‘Moonihere oxukhuru.’ (aKol. 3:15) Cristóvão, ntokweene yoowo onkhala oFinlândia, aalottaka voohima dha moopora onoonihera iye oxukhurela, onlotta wiira: “Miyo kinnaatikha ewarakha aahiidho winviyari mensaxe vamodha ni yawaatikhiwa ya mBiibiliyani, kilottaka mooluluwanya moopora nrumeyi ookhalihera mmodha okilipinhe iye aahiidho moopora kinvahaka efaita nteko onvara iye.” Pascal ni Jael yaawo ankhala oNova Caledônia, annavekelela arumeyi ookhalihera. Pascal onlotta wiira: “Okhalawene, hiyo ninninvekela Yehova ni onxukhurela mwaha wa okhalana arumeyi ookhalihera muloko nhu.” Moohaakanyera Yehova onnaakhula mavekelo nkhama ala, ndho elo ennikhalihera muloko wootheene.—2 aKor. 1:11.
ASITOKWEENE A MMULOKONI ‘ANNIVARA NTEKO NI NTHITI’
8. Eseeni yaamwiirinhe Paaulu waatikha wiira asitokweene a eseekulu yoopacera ‘yaanivara nteko ni nthiti’? (1 aTesaloonika 5:12, 13)
8 Eseekulu yoopacera asitokweene a mmulokoni yaanivara nteko ni nthiti wiira ekhalihere muloko. (Munsome 1 aTesaloonika 5:12, 13; 1 Tim. 5:17) Awo ‘yaaniholela’ mmulokoni, ekociheraka mithukumano ni epakaka dhoothanla vamodha ni asitokweene akina. Nitho moopheta yaanavaha miruku anna ni arokora wiira ekhapelele muloko. (1 aTes. 2:11, 12; 2 Tim. 4:2) Ohiya-vo, asitokweene awo yaanitthuneya ovara itthu dhikina, nkhama ovara nteko wiira ecihe ettheko, olipiha waamini ni waatana-wa ni Yehova.—1 Tim. 3:2, 4; Tito 1:6-9.
9. Itthu seeni dhikina asitokweene ampaka awa olelo-va?
9 Olelo-va, asitokweene annivara miteko dhawaatta. Masi okathi omodharu awo anamalaleerya. (2 Tim. 4:5) Asitokweene anninivaha ntakihero nooreera ekhalaka ooluttuweliwa nteko woolaleerya. Awo annikocihera nteko woolaleerya wa muloko ni aninnihudhiha moopora woolaleerya ni ohudhiha saana. Nitho awo anrumeela mmulokoni nkhama aphuki oomoriwa ikharari ni axariya. Vaavo munna aahiidho nrokora ompaka iye etampi yuulupale, asitokweene anniilipihera onkhalihera wiira atthikele waataana ni Yehova. Nitho okathi omodharu, annipaka itthu dhootheene anwerya awa wiira ekhalihere muloko okhala wawaarya. (1 aKor. 5:12, 13; aGal. 6:1) Ohiya-vo, oxira itthu dhootheene annidhuweliwa okhala amakampusi. (1 Ped. 5:1-3) Awo annipaka elo, elokiheraka saana miyaha dhinkhuma mBiibiliyani ni yiilipiheraka waadhuwela saana atthu a mmulokoni ni waasekurya anna. Asitokweene akina annikhalihera nteko wooteka ni okocihera Mampa a Omwene, waakocihera akonkereesu ni asembeleiya, akina aniirela mphantta Ekomisawu Enlotta ni Ispitaali, Ekhurupu Enaasekurya Aretta ni akina annikhalihera miteko dhikina. Moohaakanyera asitokweene annivara miteko dhawaatta!
10. Seeni ninreerela nhu ovaha efaita ele asitokweene ampaka awa?
10 Yehova oolaihera waavaha arumeyi-ye amakampusi anrowa waakhapelela saana wiira ‘ehoove nnakhala ovelavela.’ (Yer. 23:4) Nrokora mmodha oniittaniwa Johanna yoowo onkhala oFinlândia, ohoona moolumo ala yiireyaka mweekumini-mwe noomala amaamaye owereiwa eretta yuulupale. Owo onlotta wiira: “Miyo okiliperya waaleela atthu akina moonelo aka, masi noomala onleela moonela aka ntokweene mmodha kahandhuwela aka saana ahikiwiriyana moopisa nrima, aahivekela vamodha ni miyo ni aahikoonihera wiira Yehova onnikipheta vawaatta. Miyo nkinuupuwela saana etthu aalonte iye munna ole, masi kinnuupuwela wiira noomala olotta nuuwo kaahiphwanya nrettele. Kinnikhupali wiira Yehova aahinruma munna ole wiira akikhalihere okathi ole kaatthunaka okhaliheriwa.” Ndho asitokweene a muloko nnyu yookhalihenreni dhai?
11. Nin’ya woonihera dhai wiira ninnaaxukhurela asitokweene? (Moone-tho efootu.)
11 Yehova onnihakalala vaavo ninoonihera nhu waaxukhurela ni nrima wootheene asitokweene mwaha wa ‘nteko anivara awa.’ (1 aTes. 5:12, 13) Henrietta, yoowo onkhala oFinlândia, onlotta wiira: “Asitokweene ari olikaneene wiira enikhalihere, masi elo khentaphulela wiira aakhalana okathi wawaatta ni ikuru aahiidho khankhalana mixankiho. Ndho ivaara dhikina kinnimwaattamela ntokweene mmodha kinleela wiira: ‘Moodhuwela etthu emodha? Nyuwo mwa ntokweene ooloka, kintthuna wiira ndhuwele elo’” Nitho nrokora mmodha oniitthaniwa Sera, yoowo onkhala oTurquia c onlotta wiira: “Wiira asitokweene ehihiye ovara miteko anvara awa annitthuneya okhalana ‘ikuru.’ Ndho hiyo ninoowerya waavaha ‘ikuru’ niwaatikhelaka iwarakha dhinoonihera waaxukhurela, naalaleyaka owannyihu wiira nicena vamodha aahiidho okhumana vamodha nteko woolaleerya.” Niire muloko nnyu ookhala ntokweene mmodha nnindhuwela nnyu oniilipihera okhalihera muloko? Akhala wiira ookhala, mwaadhye inamuna nkhanle nnyu omoonihera onxukhurela.—1 aKor. 16:18.
Nyuwo nnoowerya waavaha “ikuru” anna awo wiira ewerye ovilela (Moone ettima 7, 11, 15)
ASITOKWEENE A ESIRKWIITU ANNILIPIHA MILOKO
12. Taani Yeesu aarumeela iye wiira elipihe miloko eseekulu yoopacera? (1 aTesaloonika 2:7, 8)
12 ‘Dhoovaha dha alopwana’ Yeesu ovanhe iye muloko dhinnirumeela mwa inamuna dhoovirikana. Asitokweene oYerusaleemu yaahinthanla Paaulu, Baarnaba ni akina wiira ekhale asitokweene aweettetta. (Miteko 11:22) Eseeni yaawiirinhe opaka elo? Awo yaatthuna wiira asitokweene aweettetta elipihe miloko nkhama dhiidhale ampaka awa arumeyi ookhalihera ni asitokweene mmulokoni. (Miteko 15:40, 41) Alopwana awo, annaakhulela okhuma opuro yaakhala awa saana erowaka opuro nkina ni ivaara dhikina annileva ekumi-ya wiira yaahudhihe ni waalipiha anna.—Munsome 1 aTesaloonika 2:7, 8.
13. Miteko seeni ntokweene esirkwiitu onvara iye?
13 Asitokweene a esirkwiitu anneetta mikwaha dhawaatta. Akina anneetta ikiloomo dhawaatta ekhumaka muloko mmodha erowaka muloko nkina. Noomala ophiya muloko mmodha, esumana yootheene ntokweene esirkwiitu onnipaka miyaha dhoovirikana, waasekurya anna, onnipaka nthukumano wa mapiyoneeru, nthukumano wa asitokweene ni nthukumano wa nteko woolaleerya. Ohiya-vo, onnilokihera miyaha, opaka mareheryo a asembeleiya a esirkwiitu ni akonkereesu. Nitho khuta mwaakha onnihudhiha eskola ya mapiyoneeru ni opaka mareheryo a nthukumano wavameekhaya wa mapiyoneeru. Oxira itthu idho dhootheene, ntokweene esirkwiitu onnivara-tho ni nvayi miteko dhikina dhootthuneya onrummwa iye ni efiliyaali.
14. Seeni ninlotta nhu wiira asitokweene a esirkwiitu mareeliho a mmulokoni?
14 Seeni ninlotta nhu wiira asitokweene a esirkwiitu dhoovaha dha mmulokoni? Alottaka voohima dha moopora onttottela iye nreerelo osekurya wa ntokweene esirkwiitu, munna mmodha onkhala oTurquia onlotta wiira: “Khuta ekwaha ninsekuriwa nhu ennikitumererya waakhalihera anna ni arokora a muloko aka. Ndho khaavo munna ori ntokweene esirkwiitu kinindhuwela aka otanke okiiriha woona wiira tawaatteliwa miteko aahiidho khaana okathi woovaanela.” Johanna, yoowo ninlontte nhu ottuli, ahikhuma nteko woolaleerya ni ntokweene esikwiitu masi khiyawenrye olotta ni ntthu. Owo onlotta wiira: “Miyo kinnuupuwela nihiku nne. Noomala ahimaaka othamela opuro woottaivela, yaahikinkhela vawaatta. Masi ntokweene ole a esirkwiitu aahikilipiha ni aahikikhalihera woona wiira ottaivelana kaarakana miyo ni ahimaka waari wa okathi vakhaani. Vano kahi etthu yookweha okhala vamodha ni amudhi ni axirikha nhu masi elapo epheya ninookhalana okathi wawaatta wiira nivirihe niri vamodha naawo.” Ala matakihero vakhaani anoonihera wiira asitokweene a esirkwiitu mareeliho a atthu anaasekurya awa.—Miteko 20:37–21:1.
15. (a) Moovarihana ni 3 Yohani 5-8, nin’ya woonihera dhai waaxukhurela asitokweene a esirkwiitu? (Moone-tho efootu.) (b) Seeni ninreerela nhu waavaha efaita adhaariya anna awo, ndho nin’ya owerya dhai opaka elo? (Moone ekwaaturu eni: “ Nwuupuwele Adhaariya.”)
15 Nrummwa Yoohaani ahintumererya Kaayo owaakhela saana anna yaronwe olipiha muloko. Owo aatinkhe wiira: ‘Mwaakhalihere vanwerya nnyu, okathi ankhuma awa, ni nkhalelo ommudhivela Muluku.’ (Munsome 3 Yohani 5-8.) Nin’ya owerya dhai opaka elo? Ninowerya opaka elo, ninvahaka eyooca ntokweene esirkwiitu. Enamuna ekina wiirela mphantta nteko woolaleerya esumana muloko nhu onsekuriwa awa. Leslie, yoowo ninlotte nhu ottulu, onnoonihera waaxukhurela asitokweene a esirkwiitu mwa inamuna dhoovirikana. Owo onlotta wiira: “Miyo kinninvekela Yehova wiira aavahe itthu dhinaathowa. Nitho miyo namamunaka, ninniwaatikhela iwarakha naaxukhurelaka mwaha woonisekurya ni ninnaaleela moopora anikhalihenra awa.” Nhiliyale wiira asitokweene a esirkwiitu atthu nkhama hiyo. Ivaara dhikina pooti owereiwa, oxanka ni oriipiwa nrima. Ndho akhala wiira ninawaareerela nrima aahiidho waavaha etthu ekhaani Yehova pooti onirumeela wiira aakhule mavekelo asitokweene a esirkwiitu!—Mir. 12:25.
NINNAARAMELA ANNA AWAATTA WIIRA ERUMEELE NKHAMA ‘DHOOVAHA DHA ALOPWANA’
16. Moovarihana ni Miruku 3:27, makoho seeni khuta munna onreerela iye wiipakela?
16 Olumwinku wootheene, annitthuneya anna wiira erumeele nkhama ‘dhoovaha dha alopwana.’ Ndho akhala wiira nyuwo mwa munna oopatisiwa, niire ‘munoowerya ookhalihera’? (Nsome Miruku 3:27.) Niire nyuwo munniilipihera wiira nkhale nrumeyi ookhalihera? Akhala wiira nenna mwa nrumeyi ookhalihera munnitthuna okhala ntokweene ni ovara miteko dhawaatta mmulokoni? d Niire nnoowerya opaka marukunuso mweekumini mwinyu wiira nrowele Eskola ya Anamalaleerya Omwene? Eskola elo enawoohudhihani wiira nwerye orumeeliwa saana ni Yeesu. Akhala wiira nnoona wiira khamunwerya ophwanelela waakhela iparakha idho, munvekele Yehova wiira ovaheni munepa wawaarya on’ya wookhaliherani waakhwanihera dhoothanleliwa nnaakhela nnyu.—Luka 11:13; Miteko 20:28.
17. ‘Dhoovaha dha alopwana’ dhinooniherani voohima dha Mwene nhu Yeesu Kiristu?
17 Yeesu onnoonihera wiira khahin’ye onikhapelela vaavo onaarumeela iye anna ari nkhama ‘dhoovaha dha alopwana’ mahiku ala ookhidhera. (Math. 28:20) Niire nyuwo khamunxukhurela mwaha wookhalana Mwene oopheta, oovaha ni ondhuwela mixankiho dhihu, yoowo onnivaha anna oophwanelela wiira enikhapelele? Ndho mwaadhye okathi wiira moonihere wiira munnixukhurela wiilipihera wa anna awo. Nitho nhiliyale onxukhurela Yehova, yoowo onnivaha ‘dhoovaha dhootheene dhooreera ni dhoomalela.’—Yak. 1:17.
NCIPO 99 Nookhalana Anna Imilyau Sinceene
a Asitokweene yaawo anrumeela nkhama anna a Nikhuru Noolamulela, anamakhalihera a Nikhuru Noolamulela, anna Ekomisawu ya Efiliyaali ni anna arina dhoothaleliwa dhikina dha nteko naawo ari nkhama ‘dhoovaha dha alopwana.’
b Maadhina makina aamotariwa.
c Khalai waitthaniwa oTurquia.
d Wiira ndhuwele etthu munreerela nnyu opaka wiira nkhale nrumeyi ookhalihera aahiidho ntokweene, moone mwaha oni: “Niire Munna Munniilipihera Wiira Nkhale Nrumeyi Ookhalihera?” ni “Niire Munna Munniilipihera Wiira Nrumeele Nkhama Ntokweene?” omphwanyaneya Wiikocela a Novembro a 2024.
