Yehova ahaathanla makhulupale wiira ekaakhapelela ni oweettiha aIsarayeeli, masi okhala wiira isidadi dhikina dhahikhalana mamwene-ya, awo yaahinvekela Samuweeli wiira: ‘Maloko ootheene akhalana mamwene-ya, ni hiyo-tho ninintthuna mwene nhu.’ Samuweeli aahona elo okhala etthu yootthekeya, ndho mwaha wa elo Samuweeli aahinvekela Yehova, ni Yehova ahimwakhula wiira: ‘Samuweeli atthu awo khanoorukunuwelani nyuwo masi ankirukunuwela miyo.’ Mwaaleele wiira: ‘Atthu anookhalana mwene, masi atthu ekanhaawa mmatatani wa mwene owo!’ Awo yaahimwakhula wiira: Khaninloha hata etthu, masi hiyo ninintthuna mwene nhu.

Yehova aahinleela Samuweeli wiira nlopwana aitthaniwa Sawuli taaya okhala mwene. Okathi Sawuli aaronwe iye onsekurya Samuweeli oRama, Samuweeli aahimwiitthela makhura mmuruni, yooniheraka wiira Yehova aahinthanla wiira akhale mwene a wIsarayeeli.

Moottharela Samuweeli ahiwiitthana atthu ootheene a wIsarayeeli wiira awoonihere mwene-ya oopaacera. Masi khaavo amphwannye Sawuli. Moodhuwela nthowa-na? Okhala wiira owo aari wiipitha. Ndho noomala atthu onkoca vawaatta, awo yahimphwanya enkhumihera vaate ni emphweha eriyari ya atthu. Sawuli ari othaiva, ahaaxira atthu ootheene ni aari ophwaneliwa. Samuweeli aahaaleela atthu ale wiira: ‘Atthu yoone, ola mwene Yehova onthanlale iye.’ Noomala omoona mwene-ya atthu yaahikhuwela mohakalala yiiraka: ‘Avuwihiwe mwene!’

Woopacerani Sawuli animwiwelela Yehova ni aanipaka itthu dhootheene arumwa iye ni Samuweeli. Masi noovira okathi ahiihiya okhala ntthu awiiwelela. Nihiku nimodha Sawuli aatthuna onvaha nkuttho Yehova, masi owo khakhulelihiwa opaka elo. Samuweeli aahinleela wiira anlipelele aphiye, masi Samuweeli khaphin’ye mwawaakuveya. Ndho Sawuli khanlipelenle Samuweeli ni ahipaha nkuttho. Tivondho Samuweeli ahinlopola Sawuli airaka: ‘Nyuwo khammwiwelenle Yehova.’ Niire Sawuli ahitharuwa atthikela omwiwelela Yehova? Naari.

Nihiku nimodha Sawuli aaya iye owaana ni atthu a wAamaleeki, Samuweeli aahinleela wiira awiiphe atthu ootheene. Masi Sawuli ahinhiya mwene a wAamaleeki yoowo aitthaniwa Akaaxi. Yehova aahinleela Samuweeli wiira:  ‘Sawuli khantthuna okiiwelela.’ Samuweeli ahiriipiwa nrima ni aahirowa olootta ni Sawuli, anleelaka wiira: ‘Okhala wiira nyuwo khammwiwelenle Yehova, owo onoowakhani omwene ni anvahe ntthu nkina.’ Okathi Samuweeli arukununwe iye wiira atthikele owaani, Sawuli aahiphara nlaya na Samuweeli ni aahipera. Tivondho Samuweeli aahinleela Sawuli wiira: ‘Yehova onoowakhani omwene nnyu.’ Evaara ela taani Yehova aya iye ontthanla wiira akhale mwene? Yehova aya onthanla ntthu ampheta ni aamwiwelela.