Aisarayeeli yaahiviriha miyaakha 40 yeettaka moothakoni. Awo yaahipwetesa ipooma dhawaatta. Nuumala weetta okathi vakhaani yaahiphiya epooma yaaitthaniwa oMowaabi. Nuumala Balaakhi mwene a epoma ele owoona, owo aahiwoova vawaatta Aisarayeeli. Tivondho, aahinruma nlopwana mmodha aitthaniwa Balaamu orowa waaleela Aisarayeeli wiira yaamwakhumelela etthu yootakhala.

Masi Yehova, aahinleela Balaamu wiira: ‘Nhaatakhalihe Aisarayeeli.’ Ndho mwaha wa moolumo ale a Yehova, Balaamu aahitthika Omowaabi. Mwene Balaakhi aahinruma-tho ekwaha ya naaili ni aahinlaihera onvaha Balaamu khuta etthu aaya iye otthuna. Ata eri dhidho, Balaamu kharonwe Omowaabi. Ndho Yehova aahinleela wiira: ‘Pooti oroowa, masi mwalotte pahi etthu kin’yaka wooleelani.’

Balaamu aahinkocihera puuru iye apacera weetta nkhwaha wa Omowaabi. Masi Balaamu aahilakela waatakhaliha Aisarayeeli, ata Yehova aanlenle wiira ahipake elo. Tivondho eettaka nkwaha ole naahinkhumelela nlaikha na Yehova ivaara tthaaru. Balaamu khaawerya woona nlaikha nne, masi Puuru-ye aaniwerya woona. Evaara yoopacera, Puuru aahihapuwela mwiini wiira aviteere nlaikha nne, masi Balaamu aahipacera ommana. Yeettaka vakhaani para ohoolo nlaikha nne naahikhumelela ekhwaha ya naaili. Okathi Puuru ole ehererya iye oviteera nlaikha nne, aahiphita mwetto wa Balaamu ni epareti yaari waattamela vaavale. Ndho Balaamu aahitthikela-tho ommana. Moottharelana nlaikha nne naahikhumelela-tho ekwaha ya neeraru. Masi ekhwaha ela Puuru ole khaawenrye oviteera, tivondho aahimpathi eriyari ya ephuro; ndho Balaamu ahimmana-tho Puuru ole.

Moottharelana, Yehova aahimwiiriha Puuru ole olotta. Ndho owo aahinkoha Balaamu wiira: ‘Seeni munkimana nnyu?’ Balaamu aahimwakhula Puuru wiira: ‘Okhala wiira munkettiha nkhama nlolo. Wakhanle wiira kookhalana ekatana kaanwiiphani.’ Puuru aahimwaakhula Balaamu wiira: ‘Mwa miyaakha dhawaatta hiyo niheetta mikwaha vamodha. Niire kootaka woopakelani etthu nkhama ela?’

Wookhidheran-wa Yehova aahimwiriha Balaamu woona nlaikha nne. Ni nahinkoha wiira: ‘Yehova khooleenleni wiira nrowe Omowaabi masi mwaaleele Aisarayeeli pahi ele on’ya iye wooleelani?’ Balaamu aahaakhula wiira:  ‘Koottheka. Kintthikela owaani.’ Masi nlaikha naahimwaakhula wiira: ‘Nhitthike, nrowe Omowaabi, masi mwalotte pahi ele Yehova on’ya iye wooleelani.’

Niire Balaamu aahihudha etthu ni yawiiraneya ele? Naari. Nuumala owo ophiya Omowaabi, aahatakhaliha Aisarayeeli ivaara thaaru. Masi Yehova ahimwiiriha Balaamu olotta wiira dhaamwakhumelela itthu dhooreera Aisarayeeli. Nuumala Aisarayeeli otuphela Omowaabi, Balaamu aahuukhwa. Moohakanyera yaaya okhala etthu yooreera waakhanle wiira Balaamu aahimwiiwelela Yehova woopacerani. Nyuwo khamunkhupali elo?