Okathi Moise aariye Omwaako Sinaayi, Yehova aahinleela wiira ateke etenta, yeelo yaaitthaniwa etabernaakulu, opuro yoowo Aisarayeeli yaaya-wa ekankokhorelavo. Etabernaakulu ele yaatthuneya oteekiwa mwa enamuna yookhweya omontari ni odismontari wiira ekaweryaneya otthempwa.

Wiira okhaliheriwe nteko wooteka, Yehova aahaavekela Aisarayeeli ovaha itthu yaawerya awa. Ndho Aisarayeeli yaahivaha eworu, eparatha, ekoopiri, maluku ooreera, exapala ya enama ni itthu dhikina. Awo yaahivaha itthu dhawaatta mpakha Moise waaleela wiira: ‘Dhoophiyera! Atthu khantthuneya-tho oruuha itthu dhikina.’

Alopwana ni athiyana yaadhuwela ovara miteko dhoovirikana yaahikhalihera oteka etabernaakulu. Okathi atthu akina yaatthava-wa ikuwo, akinaku yaavara nteko ni maluku ooreera, akina ewooru ni akinaku yaavara ni ithaapwa. Yehova aahaavaha Aisarayeeli odhuwela wa opaka itthu dhootheene yaatthuna awa wiira eweerye oteka etabernaakulu.

Aisarayeeli yaahiwerya oteka etabernaakulu ele nkhama dhiidhale Yehova aaruminhe iye. Vaate wa etabernaakulu waaitthaniwa n’yate. Opuro owo yaahikhalavo epasiya ya ekoopiri ni altaari muuluupale. Mpaani wa etabernaakulu ele yaahikhala-mo ekurtina yooreera, yeelo yaakawanya etabernaakulu iphante piili, opuro wawaarya ni opuro wawaaryasa. Nipuro nawaarya yaahikhalawo ekandelaabro ya ewooru, meesa ni altaari. Nipuro nawaaryasa yaahikhalawo Ekaaxa ya nivarihano yeelo yaapakiwe ni ithaapwa ni ewooru. Munnidhuwela nivarihano eseeni?  Yoolaihera yaavameekhaya. Ekaaxa ele ya nivarihano, yaaniwuupusera Aisarayeeli wiira yaahilaihera onkokhorela ni omwiiwelela Yehova pahi.

Yehova aahaathanla anamwane a Arooni wiira ekhale anankuttho. Awo ti yaakhapelela etabernaakulu ni dhoovaha aaruuheliwa Yehova. Nitho aahinthanla Arooni wiira akhale nankuttho muuluupale. Owo pahi taavolowa nipuro nawaaryasa ekhwaha emoodha vamwaakhani. Mwaha awa seeni? Wiira anvekele Yehova onlevelela dhoottheka-dhe, dhoottheka dha ane ni dha Anaisarayeeli ootheene.

Etabernaakulu yaahikapariwa otekiwa noomala oviira mwaakha ntero Aisarayeeli ekhumme wEexiitu. Moohakalaliha awo yaahikhalana opuro wa onkokhorelamo Yehova.

Yehova aahiiriha okhumelela neeku vadhulu wa etabernaakulu. Okathi neeku nne neemela awa vamodha, Anaisarayeeli yaanikhala opuro yoowo. Masi vaavo neeku nne naapacera awa weetta, awo yaanidhuwela wiira wahiphiya okathi wiira itthikela weetta nkhwaha. Ndho yaanidismontari etabernaakulu ele ekatthaara neeku.