Timootiyu ari rapasi a muloko wa oLiistra. Apaapa-ye yaari nKereku ni amaama-ye yaari nYuuda. Amaama-ye yaitthaniwa Euniise ni apiipi-ye a wuumaamani yaawo yaaitthaniwa Looidi, yahinhudhiha Timootiyu voohima dha Yehova okhuma enaahima-ye.

Okathi nrummwa Paaulu aronwe iye osekurya oLiistra ekhwaha ya naaili, ahoona wiira Timootiyu anaapheta vawaatta anna ni anipaka dhootheene awerya iye wiira akhalihere. Nrummwa Paaulu ahinvekela Timootiyu wiira anveleele mikwaha-dhe dhootheene dha olaleerya. Nuuvira okathi, nrummwa Paaulu ahinhudhiha Timootiyu moopora woolaleerya ni ohudhiha saana.

Nnepa wawaarya, waaninkhalihera Paaulu ni Timootiyu khula opuro yarowa awa. Ohiyu omoodha, moolohani nrummwa Paaulu ahimoona nlopwana mmodha anvekelaka wiira arowe oMasedooniya aakhalihere atthu. Ndho Paaulu, Timootiyu, Siila ni Luuka yaahirowa olaleerya elapo ele ni yaahipaka milooko.

oTesaloonika esidadi ya oMasedooniya, alopwana ni athiyana awaatta yaahikhala makiristau. Masi aYuuda akina, yaaninnyokha Paaulu vamodha ni axirikha-ye. Ndho mwaha wa elo, awo yahithukumana emphara Paaulu vamodha ni axirikha-ye yaaroiha wamakhulupale a esidadi ele ekakhuwela yiiraka: ‘Alopwana ala awaanani a nkhulupale a oRooma!’ Paaulu ni Timootiyu yaahilakeliwa wiiphiwa, ndho mwaha wa elo yaahitthyawa nuuhiyu erowaka oBereiya.

Atthu awaatta a esidadi ya oBereiya yaanitthuna vawaatta wiiwa ihaapari dhooreeraa ni akereku ni aYuuda yahikhala makiristau. Masi okathi aYuuda akina oTesaloonika yaronwa awa oBereiya okhumihera onyakuluhana, nrummwa Paaulu ahirowa wAateene. Masi Timootiyu ni Siila yaahihala oBereiya wiira ekalipiha waamini wa anna. Noovira okathi, nrummwa Paaulu ahinvekela Timootiyu otthikela oTesaloonika wiira aakhalihere anna ovileela mixankiho yaaviriha awa. Mwa okathi vakhani, nrummwa Paaulu ahimvekela Timootiyu orowa wasekurya anna a milooko dhikina ni waalipiha.

 Nrummwa Paaulu aahinleela Timootiyu wiira: ‘Ale anlakela onrumeela Yehova, okathi wootheene ekaannyokhiwa.’ Okathi-ya yoole, Timootiyu ahiviriha nxankiho wa ottharatthariwa mwaha wa wamini-we. Masi hata ori dhiidho, Timootiyu aanitteeliwa nrima mwaha wa ohihiya orooromeleya wa Yehova.

Nrummwa Paaulu ahaleela aFilipi wiira: ‘Miyo koonvekela Timootiyu wiira are weeiwo. Owo atthu onawaahudhiha moopora wa weetta moororomeleya ni moopora woolaleerya ihaapari dhooreera.’ Nrummwa Paaulu aaninroromela vawaatta Timootiyu. Paaulu ni Timootiyu yaahivara nteko woolaleerya vamodha mwa miyaakha dhawaatta nkhama axirikha ni arummwa.