Nlopwana mmodha ahaawerya weetta mwaha wa orakala, khuta nihiku aanikilaathi vankhora wa etempulo akaveka nsurukhu. Nihiku nimodha Peedru ni Yoohaani evolowaka ntempulu mmwe owo ahaavekela airaka: ‘Safatali kivahiwe nsurukhu.’ Peedru ahimwaakhula wiira: ‘Miyo kinawovahani etthu yootepa otthuneya oxira nsurukhu. Mwa ndhina na Yeesu, nvenye mweette!’ Okathi-ya yoole nlopwana ole aahivenya akeetta. Atthu awaatta yaahihakalala mwaha wa mwiiriirya ole ni atthu akina awaatta yaahamini ni yahikhala ahudheri a Yeesu.

Masi alipa a nkuttho ni aSatuki yaahinanariwa. Awo yahimphara Peedru ni Yoohaani enroiha opuro waaphukiwa milattu ekakoha wiira: ‘Taani oovanheni owerya wa ompenusa nlopwana ola?’ Peedru ahaakhula wiira: ‘Nivahiwe ni Yeesu Kiriistu, yoowo mmwiphale nnyu.’ Ndho alipa nkuttho ni aSatuki yaahinleela Peedru ni Yoohaani wiira: ‘Atthu ehitthikele olaleya mwa ndhina na Yeesu!’ Masi moolipa nrima, Peedru ni Yoohaani yaahaakhula wiira: ‘Hiyo khaninhiya olaleya mwa ndhina na Yeesu.’

Nuumala otaphuliwa Peedru ni Yoohaani yaahirowa waleela ahudheri akina etthu yakhumelenle. Ndho nuumala otakaihana awo yaahinvekela Yehova yiiraka: ‘Safatali Yehova nnikhalihere.’ Yehova aahaavaha nnepa wawaarya, ndho awo khiyaahin’ye olaleerya moolipa nrima ni waapenusa aretta. Ni khula okathi waatta wa ahudheri wantepa waacerereya. Masi aSatukhi khiyaahakalala hata vakhaani, ndho mwaha wa elo yaahaakusa ahudheri ale yaatthukela nkateya. Masi ohiyu omodha Yehova aahiruma nlaikha-ne nitthukula mikhora dha ekateya, nikaleela ahudheri ale wiira: ‘Atthu erowe otempulo yaalaleerye atthu.’

Mmeelommwa ohihiyu, aSatukhi yaehileeliwa wiira: ‘Ahudheri aakhumamo nkateya ni nenna-va anaalaleerya atthu ntempulo!’ Ahudheri yaahitthikela otthukeliwa nkateya ni yaahikusiwa erooihiwa oSineetiriyu ekaleeliwa wiira: ‘Hiyo atthu nihaaleela wiira atthu ehitthikele olotta voohima  dha Yeesu!’ Masi Peedru ahakhula wiira: ‘Hiyo nihaana toko omwiwelela Muluku ohiya atthu.’

Okathi-ya yoole ahooleli a itiini yaahinanariwa vawaatta ni ekatthuna owiipha ahudheri ale ootheene. Masi nlopwana mmodha Nfarise aaitthaniwa Gamaliyeeli aahivenya eemeela ni alotta wiira: ‘Phoole! Muluku ori ni alopwana ala. Atthu veena antthuna owana ni Muluku?’ Atthu ale yaahiwelela moolumo a Gamaliyeeli. Nuumala waamana ahudheri ale yaahitthikela tho waaleela wiira ehitthikele olaleerya, nuumala-vo yahaataphula. Masi elo khiyaawiirinhe ahudheri ale ohiya olaleerya. Yahivikaniha olaleerya ihapari dhooreera ntempulo ni empa ni empa moolipa nrima.