Nuuvira efeesta ya Paaskowa, Yeesu ni ahudheri-ye yaahivira oSamariya erowaka oGalileeya. Yaattamelaka esidadi ele, Yeesu aheemela opuro yaari ehime wiira amumule. Masi ahudheri-ye yaakele osidadi otthuma eyooca.

Nthiyana mmodha Nsamariya aahuura veehimeni vaavale wiira arike maadhi. Yeesu ahimwiirela wiira: “Nkivahe maadhi kiwurye.” Nthiyana ole ahimwaakhula Yeesu wiira: ‘Seeni nyuwo munkilottiha nnyu kiri Nsamariya? Ayuuda ni Asamariya khanlottihana.’ Yeesu ahimwaakhula wiira: ‘Nyuwo mwaakidhuwenle mwaankivaha maadhi. Ndho miyo kaamoovahani maadhi anvaha ekumi.’ Nthiyana ole aahinkoha-tho Yeesu wiira: ‘Muntthuna oolottani ni moolumo awo?’ ‘Nyuwo khimwaana ata ekoopho para orikana maadhi.’ Yeesu aahimwaakhula wiira: ‘Ole onwurya maadhi miyo kinvahaaka khanvoliwa-tho ntthona.’ Ndho nthiyana ole ahaakhula wiira: “Pwiya, nkivahe maadhi yaawo.”

Yeesu ahimwiirela wiira: ‘Nrowe mwawiitthane amamuninyu.’ Owo ahaakhula wiira: ‘Miyo nkitheliwe.’ Yeesu aahilootta wiira: ‘Munlotta eekhweeli. Nyuwo mootheliwa ivaara tthanu, nitho nenna-va nlopwana nrinnyuna kahi mamuninyu.’ Nthiyana ole ahaakhula wiira: ‘Pwiya kinoona wiira nyuwo mwa profeeta. Hiyo Asamariya ninkhupali wiira nipuro nikhanle nhu onkokhorela Muuku mwaako yoola, masi vena atthu ari Ayuuda ankhupali wiira nipuro akhanle awa onkokhorela Muluku oYerusaleemu pahi. Kinnikhupali wiira Mesiya ara onoonidhuweliha saana opuro onreerela onkokhorela Muluku.’ Yeesu aahinleela nthiyana ole etthu ahaatanka iye onleela ntthu nkina airaka: ‘Mesiya-ya ti miyeena.’

Nthiyana ole ahitthimaka arowaka osidadi ni ahaaleela Asamariya wiira: ‘Koolotta ni nlopwana ondhuwela  dhoottheene voohima dha ekumi aka; kinoona wiira yoowo Mesiya. Nikarowa atthu yamoone!’ Atthu ale yaahintthara weehimeni ni yaahiwiriyana itthu Yeesu aalootta iye.

Asamariya yaahinvekela Yeesu wiira akhale esidadi yeele. Yeesu ahiviriha mahiku maili ahudhihaka itthu dhawaatta. Ndho atthu awaatta yaahikhupali wiira veene aari Mesiya. Nuumala atthu omwiiwa Yeesu, yaahinleela nthiyana ole wiira: ‘Hiyo ninnikhupali wiira nlopwana ola, moopoli a atthu ootheene.’