Esteeri ari mwaamwali Nyuuda aakhala elapo ya oPeersiya esidadi ya oSusa. Esteeri akhala esidadi ele, okhala wiira amudhi-ye yaaruphariwa ni mwene Nabukodonosori okathi atuphenle iye oYerusaleemu. Owo aahuiwale ni mmudhi-ye Mordekayi, yoowo ari nrumeyi a mwene Asuweero a oPeersiya.

Mwene Asuweero aankoca pwiyamwene mpheya. Tivondho arumeyi-ye yaahinruuhela athiyana awaatta ni ooreera a elapo ele, onhela mpuwa Esteeri. Munnindhuwela taani mwene aanthanlale iye? Esteeri. Masi Mordekayi aahinleela Esteeri wiira ahinleele ntthu wiira aari Nyuuda.

Nlopwana mmodha awiidhinnuwiha yoowo aitthaniwa Amaani, ari nhooleli a makhulupale ootheene. Amaani atthuna wiira atthu ootheene ekankokhorela veene. Masi Mordekai aahikhootta onkokhorela Amaani. Ndho elo yaahimwiiriha Amaani onaanariwa vawaatta. Okathi Amaani adhuwenle iye wiira Mordekai ari Nyuuda, aahimpaka palano a owiipha aYuuda ootheene yakhala elapo ele. Owo aahinleela mwene wiira: ‘aYuuda atthu awoopiha, onnireerela wamalamaliha.’ Okathi mwene Asuweero aaiwala iye elo, aahinvaha owerya Amaani wa okhumihera nlamulo. Nlamulo nno naalotta wiira: ‘Yaahana wiiphiwa aYuuda ootheene nihiku 13 mweri wa ataari.’ Masi Yehova aanoona itthu idhe dhootheene dhairaneya.

Esteeri khaadhuwenle voohima dha nlamulo nne nakhumiheriwe. Nho Mordekai aahinroihela ekoopiya ya nlamulo nne Esteeri, ni anleela wiira: ‘Nrowe mwalotte ni mwene.’ Esteeri aahaakhula wiira: ‘Akhala ntthu on’ya wa mwene aahiitthaniwe, onaawiiphiwa. Ndho aavira mahiku 30 mwene ahikiitthanne! Masi kinoorowa, ndho akithoonya ni ekopo-ye kinookhala nkumi. Masi aahipake elo kinawiiphiwa.’

Esteeri aahirowa vaate wa empa ya mwene. Nuumala Esteeri ophiya, mwene aahinthoonya ni ekopo-ye. Esteeri aahimwaattamela mwene, ni mwene aahinkoha wiira: ‘Esteeri, eseeni muntthuna nnyu wiira kookhalihereni?’ Esteeri aahaakhula wiira: ‘Kintthuna woolaleyani nyuwo ni Amaani wiira atthu ere ece vamodha ni miyo, eyooca kikocihenraka yavameekhaaya.’ Okathi atthu yaaca awa, Esteeri aahinlaleya  mwene ni Amaani wiira ere-tho nihiku nikina wiira ece eyooca ekina. Ekwaha ya naaili mwene aahinkoha Esteeri wiira: ‘Eseeni muntthuna nnyu wiira kokhalihereni?’ Esteeri aahakhula wiira: ‘Ookhala nlopwana mmodha ontthuna okiipha miyo vamodha ni atthu aka, safatali nnaakihe.’ Mwene aahinkoha Esteeri wiira: ‘Taani owo ontthuna owiiphani?’ Esteeri aahaakhula wiira: ‘Nlopwana ola va ottakhala Amaani.’ Asuweero aahinanariwa vawaatta ni aahirumiha wiira Amaani aiphiwe.

Masi khaavo ntthu aawerya orukunsa nlamulo na Amaani, ata mwene khaawerya opaka elo. Tivondho mwene Asuweero aahinthanla Mordekai wiira akhale nhooleli a makhulupale ni aahinvaha owerya wa opaka nlamulo nikina. Nlamulo nno nalootta wiira aYuuda yaanwerya wiidhakiha mmatatani wa awanani-ya. Ndho nihiku 13 na mweri wa Ataari, aYuuda yaahaawerya awanani-ya. Okhuma vaavale, aYuuda yanitthapela nihiku yaapwetensa awa awanani-ya khuta mwaakha.