Nrowe nitthikele ottuli miyaakha vakhaani ivinre. Nehemiiya nrumeyi a mwene Artaserse, ari mwiisarayeeli ni akhala elapo ya oPeersiya nttetthe wa oSusa. Nihiku nimodha munnawe Nehemiiya aakhala oYuuda aahinruuhela ihapari dhooriipiha nrima. Owo aanleenle wiira wiira: ‘Atthu atthikenle oYerusaleemu ari mmaxakhani. Makokoro yaale yapwesiwe ni aBabilooniya nanlelo khatekiwe.’ Ihapari idho dhaahinriipiha nrima vawaatta Nehemiiya. Owo aanitthuna orowa oYerusaleemu wiira aakhalihere atthu, masi khaadhuwela akhala wiira mwene ammwakhuleliha orowa. Tivondho aahinvekela Yehova wiira ankhalihere.

Nihiku nimodha, mwene aahoona wiira Nehemiya aahiriipiwa nrima. Ndho aahinkoha wiira: ‘Seeni nriipiwe nnyu nrima?’ Nehemiiya aahilotta itthu dhootheene dhaaireya oYerusaleemu ni moopora mikhora dha makokoro dhaari awa. Ndho mwene aahinkoha etthu aareerela iye opaka wiira ankhalihere. Okathi-ya yoole, Nehemiya aahinvekela Yehova moomaaleleya, ni aahinkoha mwene wriira: ‘Nnoonela dhai, nnooweerya okihiya wiira kirowe oYerusaleemu katthikele-tho etteka makokoro awo?’ Mwene Artaserse aahimwaakhuleliha Nehemiya orowa, ni aahipaka itthu dhootheene aawerya iye wiira nkwaha ole okhumele saana. Nuumala-vo, mwene aaninkhaliha Nehemiya Kuvernatoore a oYuuda ni aahinvaha ithaapwa wiira apakele mikhora dha esidadi ele.

Nuumala ophiya, Nehemiiya aahirowa wettelela moopora yaarawa makokoro. Nuumala-vo ahaathukumanya makhulupale ootheene akaaleela wiira: ‘Ela etthu yootepa wuuliha muru, nihaana oteka makokoro ala.’ Atthu ootheene yaahaakhulela ni yaahipacera ovara nteko.

Masi awanani-ya yaahipacera waatheya yiiraka: ‘Makokoro ala khavantte, ata okwannyiwa vakhaani pahi anoomora.’ Masi alipa ooteka ale khiyacanli etthu, yaahilipihera ovara nteko ni makokoro ale yaanirowa odhulu ni yaanivatta.

Ndho awanani ale, yaahilakela watuphela mwawiipitheya. Okathi aYuuda yaadhuwenla wa elo, yaahova vawaatta. Masi Nehemiiya aahaaleela wiira: ‘Atthu ehoove, Yehova ori nihiyo.’ Mottharelana Nehemiiya aahaathanla makwaarta wiira ekaakocela atthu ale yaateka. Tivondho awanani-ya khiyaawenrye otuphela oYerusaleemu.

 Mpuwa wa mahiku 52 pahi, makokoro ni mikhora dhaahikapariwa otekiwa. Nehemiya aahaakusa atthu ootheene a nloko na aleevi oYerusaleemu wiira etthukuleliwe makokoro ale. Ndho Nehemiiya aahaakawanya ikhurupu piili, Nehemiya aari ekhurupu ekina, ni Eezira aari ekhurupu yanaaili. Ikhurupu dhoopiili dhahiwela makokoro ale ni khutta ekhurupu yaahirowa elaatu yathanleliwa awa. Awo yaaheetta erukureryaka esidadi ele yoopaka malope ni entthapelaka Yehova mpakha ikhurupu dhopiili okumana ntempulu. Atthu ootheene, alopwana, athiyana, ni anamwane yaahinvaha nkuttho Yehova ni yaahipaka efeesta. Awo yaahihakalala ni okhuwela-wa waaniweya ottaiwene.