Dhaahivira miyakha 70 okhuma vaavale aIsarayeeli akina yaatthikenla awa oYerusaleemu. Masi atthu akina nanlelo yaakhala ipaarti dhoovirikana dha olamulelo wa oPeersiya. Mmodha atthu awo aari Eezira, yoowo aahudhiha atthu Malamulo a Yehova. Eezira aahiwa wiira aIsirayeeli yaahihiya weettela Malamulu a Muluku, tivondho aahuuphuwela orowa wakhalihera. Mwene Artaserse aahinleela Eezira wiira: ‘Muluku ohookhalihani ndhuweli wiira nhudhihe Malamulo-ye. Ntthikele oYerusaleemu ni akhala ntthu ontthuna woottharani pooti orowa ninyuwo.’ Eezira aahaathukumanya atthu ootheene yaatthuna otthikela oYerusaleemu. Awo yaahinvekela Yehova wiira aakhalihere okathi yaayawa ekeetta nkwaha ole, nuumala-vo yahipacera orowa.

Noovira miyeeri misese, awo yahiphiya oYerusaleemu. Makhulupale yaahinleela Eezira wiira: ‘Anaisarayeeli akina yahaathela athiyana yaakokhorela amuluku eetteru.’ Eseeni Eezira apanke iye? Owo aahikokhora ohoolo wa atthu, ni aahinvekela Yehova airaka: ‘Oo Yehova, nyuwo munniniirela itthu dhawaatta dhooreera, masi hiyo ninnootthekelani.’ Atthu yaahinleela Yehova dhottheka-dha, masi khiyaahin’ye opoka itthu dhootakhala. Tivondho Eezira aahaathanla makhulupale ni alipa ophuka wiira ekaphuka miyaha idho. Noovira miyeeri miraru atthu ootheene yaale yahaankokhorela Yehova, yaahiikariwa oYerusaleemu.

Dhahivira miyaakha 12. Mpuwa wa miyakha idho, yahikociheriwa makokoro a Yerusaleemu. Ndho Eezira ahaathukumanya atthu ootheene wiira asome Nlamulo na Muluku. Noomala Eezira okhunla eliivuru, atthu ootheene yaaheemela. Okathi Eezira aapacenre iye osoma ni otaphulela nlamulo na Muluku, atthu ootheene yaahittukhulela matata-ya odhulu yooniheraka ovaaha ephoole ni owiriyana ele yaasommwa. Atthu yaahoona wiira yaahinhiya Yehova, tivondho yaanla-wa. Mmelom-mwa, Eezira aahisoma-tho Nlamulo na Muluku ohoolo wa atthu ootheene. Awo yaahoona wiira waahala okathi vakhaani wiira epake Efeesta ya Masasa. Tivondho moohilekela yaahipacera okocihera efeesta elo.

Efeesta ele yaahiviriha mahiku 7. Ndho atthu yaahihakalala ni onxukhurela Yehova mwaha wa okhalana iyooca dhawaatta. Khiyaatanke opakiwa Efeesta ya Masasa nkhama ele okhuma mahiku a Yooxuuwa. Nuuvira Efeesta ele, atthu  yaahithukumana, ndho Eezira aahinvekela Yehova airaka: ‘Oo Yehova, nyuwo moonikhumiha weepotthani Weexiitu ni moonivaha elapo ela yooreera. Nyuwo mwanineettiha moothakoni ni mwaaninivaha eyooca yawaatta. Masi hata ori dhiidho, hiyo nanihiya owiiwelelani ivaara dhawaatta. Nyuwo mwanaruma maprofeeta nnyu wiira enilopole, masi hiyo naanikhotta waawiriyana. Masi ata eri dhiidho, nyuwo mwaninipisera nrima ni nhaakhwanihera nivarihano mwapanke nnyu ni Abrahamu. Nenna-va, hiyo ninnilapha wiira okhuma olelo-vaava hiyo nikaanwiiwelelani .’ Mottharelana atthu yaahatikha vawarakhani etthu yaalaihenra-wa. Ni yoonihereka wiira atthu yaamwakwanihera ele yaalaihenra awa, ewarakha elo yaahitthittiwa ni makhulupale, aLevi, ni anankhuttho.