1-2. (a) E niha Jeová nhimirotsaꞌrada niꞌwa dawatsété wi ĩtsiꞌruiwapari õ na hã. (b) E marĩ Jeová te tsima wẽ te te ãma ĩꞌupa dzaꞌra norĩ hã te te ꞌmanharĩ dzaꞌra da.

 JEOVÁ tãma wẽ õ di dahöimana watsédé, te ꞌruiwapa dawatsédé. (Sal. 5:4-6) Wahöimana upa dzaꞌra nherẽ, Jeová te tsima wẽ watsiwatsutu dzaꞌra da ĩtsimiroti dzarina ꞌre wahöimana dzaꞌra mono da. (Sal. 130:3, 4) Bíblia te tinha ãne: ‘Niꞌwam norĩ ꞌRe ĩhöimana uꞌötsi mono te te ꞌre wadzéb dzaꞌra mono õ hã ma tô aiwadzari dzaꞌra waꞌaba atsitsi tsaꞌretse ãna. Ta norĩ hã ꞌRe ĩhöimana uꞌötsi mono nhimidzawidzé watsuꞌu hã ma tô aimawi te te ꞌre watsuꞌu dzaꞌra, höimana nhitsébꞌõ na ꞌre ĩhöimana dzaꞌra dzém na ꞌre höimana dzaꞌra nherẽ te te ꞌre upa dzaꞌra mono õ newa.’ Ã norĩ hã tô tsena Jeová tãma wẽ õ di. (Judas 4) Bíblia te duré watsuꞌu ĩhöimana watsété norĩ dza te te ĩꞌuprotsi dzaꞌra dzéb u hã, tahã te dza watobro datsiꞌwapé Armagedom na ĩtsitsi ãma. — 2 Ped. 3:7; Apo. 16:16.

² Tadzahã Jeová te te tsima wẽ õ di da te uprotsi dzaꞌra da. Bíblia te te ĩnharĩdzéb dzarina ‘tãma ĩwẽ hã uburé dawatsété na datsitsãmri dzaꞌra wa, ĩtẽme ĩdatsipidzari dzaꞌra da tsi dawatsété hawi’. (2 Ped. 3:9) Daꞌmadöꞌöꞌwa norĩ te tsiwatsutu dzaꞌra Jeová ne ꞌre höimana dzaꞌra mono da, te te pawaptob dzaꞌra da te te ãma ĩꞌupa dzaꞌra norĩ Jeová tẽme te te tsina rotété dzaꞌra da duré ĩhöimana dzaꞌra dzé hã te te ãma tsaprĩ dzaꞌra da. Taha nherẽ niꞌwam norĩ tsiꞌruiwapari dzaꞌra õ di. (Isa. 6:9) Õ norĩ hã dawatsété na te ãma udzutsi uꞌötsi daꞌmadöꞌöꞌwa norĩ te te pawaptob dzaꞌra nherẽ. Ãne wamhã e marĩ daꞌmadöꞌöꞌwa norĩ te dza ꞌmanharĩ dzaꞌra.

‘NIꞌWA HÖIMANA WATSÉDÉ TE DZA OTO ATSITSITI TÃMA ꞌRE ĨROBꞌRU DZAꞌRA WAꞌABA MO, ATSIRÉ WAꞌABA ꞌRE HÖIMANA MONO TÕ DA’

3. (a) Bíblia dzarina, e marĩ daꞌmadöꞌöꞌwa norĩ te dza ꞌmanharĩ dzaꞌra ĩtsiꞌruiwapariꞌõ dzô. (b) E marĩ wa, õ hã te tsima pitsutu da te wadzere da atsitsãnawãi ubumroi hawi.

³ Niꞌwa tsiꞌruiwapari õ wamhã tiwatsété wi, daꞌmadöꞌöꞌwa norĩ te te ĩwapari dzaꞌra da tsi Bíblia nhimiroti 1 Coríntios 5:13 ãma hã: ‘te dza oto atsitsiti tãma ꞌre ĩrobꞌru dzaꞌra waꞌaba mo, atsiré waꞌaba ꞌre höimana dzaꞌra mono tõ da.’ Taha dzarina õhõ te tsima pitsutu da te wadzere da watsitsãnawãi ubumroi hawi, ĩhöimanadzéb dzarina. (Gál. 6:7) E marĩ wa. Te te tsima wẽ õ wa ĩhöimanadzé te te ãma tsaprĩ da, daꞌmadöꞌöꞌwa norĩ te te ꞌre pawaptob dzahu dzaꞌra mono nherẽ. (2 Reis 17:12-15) Ĩhöimanadzéb dzarina te höiꞌré te te tsima ĩwẽ õ na hã Jeová nhimiroti dzarina ꞌre höimana mono da. — Deut. 30:19, 20.

4. E marĩ wa, daꞌmadöꞌöꞌwa norĩ te dama romahörö dzaꞌra watsitsãnawãi ubumroi hawi da te wadzere wamhã.

⁴ Niꞌwa da te wadzere wamhã watsitsãnawãi ubumroi hawi, daꞌmadöꞌöꞌwa norĩ te dza dama roꞌmahörö dzaꞌra, õ hã Jeová watsuꞌuꞌwai õ na hã oto. E da te tiwi rowadzéb da. Mare di, tahã te dza pawaptob dzaꞌra watsitsãnawã norĩ Bíblia nhimiroti te te wapari dzaꞌra da, ĩtsiré ꞌre höimana dzaꞌra mono tõ da, duré ‘ĩtsiré ꞌre tsaihuri mono tõ da’. (1 Cor. 5:9-11) Ãhã roti hã te waꞌwawi aimapa dzaꞌra. Apóstolo Paulo ma tô ãma tsimiréꞌé dawatsédé ĩꞌuꞌẽtẽ wapu wapudzém ne: ‘Tsuru na da te ãma ꞌre tsaꞌwari mono nherẽ tsaꞌẽtẽ di dza oto ĩꞌuꞌẽne hã.’ (1 Cor. 5:6) Ĩtsiꞌruiwapari dzaꞌra õ norĩ hã watsitsãnawãi ubumroi ꞌre ꞌre höimana dzaꞌra ꞌwaꞌöhã, watsitsãnawã norĩ ãté te aré rotsaꞌrata dzaꞌra te te ĩwapari dzaꞌra dai õ na hã Jeová nhimiroti, duré te aré rétsi dzaꞌra ni dawatsété u hã. — Pro. 13:20; 1 Cor. 15:33.

5. Niꞌwa watsitsãnawãi ubumroi hawi da te wadzere wamhã e niha ĩbö dzarina wa dza wahöimana dzaꞌra ni, duré e marĩ wa.

⁵ E niha wa dza wahöimana dzaꞌra ni niꞌwai ma da te wadzere wamhã watsitsãnawãi ubumroi hawi. Tô tsena ĩtsiré wahöimana dzaꞌra õ di dza. Tadzahã Jeová nhimirotsaꞌrata dzarina wa dza wahöimana dzaꞌra ni, õ hã poneꞌẽrebö ĩtsimani ne hã. Taha dzarina tsada hã Jeová watsuꞌuꞌwa da apö. Õ hã duréihã ma tô tsitsõmri Jeová ma. Awaꞌawi hã ĩtsimiroti dzarina ꞌre höimana mono õ di duré dawatsété na te ꞌre höimana, tô tsena tahã tãma pipa di. (Eze. 18:31) Tadzahã robꞌrãtsudu wei morĩ õ ré hã tsada hã te te ãma tsaprĩ da ĩhöimanadzé duré Jeová tẽme te te tsina rotété da. Taha dzarina e niha daꞌmadöꞌöꞌwa norĩ te dza pawaptob dzaꞌra watsitsãnawãi ubumroi hawi da te ĩwadzere dzaꞌra norĩ hã.

E NIHA DAꞌMADÖꞌÖꞌWA NORĨ TE DZA PAWAPTOB DZAꞌRA DA TE ĨWADZERE DZAꞌRA NORĨ HÃ.

6. E niha daꞌmadöꞌöꞌwa norĩ te dza pawaptob dzaꞌra datsiꞌrãꞌõtõ hawi da te ĩwadzere dzaꞌra norĩ hã.

⁶ Niꞌwa da te wadzere wamhã, e tsiwaprotsi te dza tsina rotété Jeová tẽme, e niꞌwa te te pawaptob dzaꞌra õ di dza. Mare di. Daꞌmadöꞌöꞌwa norĩ te dza tãma watsuꞌu dzaꞌra da te ĩwadzere na hã, duré te dza tãma watsuꞌu dzaꞌra te te ĩꞌmanharĩ dzéb da hã Jeová watsuꞌuꞌwa da apö. Tadzahã taha tsi õ di. Te dza tãma tsadanharĩ dzaꞌra ĩtsada hã apö te te tsabu dzaꞌra da, te te waihuꞌu dzaꞌra da ĩhöimanadzé te te ãma ĩtsaprĩ dzô. Te te tsima wẽ wamhã, tô te dza tsabu dzaꞌra, te dza pawaptob dzaꞌra tsiꞌruiwapari da duré Jeová tẽme te te tsina rotété da. Dzahadu tsiꞌruiwapari õ ré hã nimahã na hã daꞌmadöꞌöꞌwa norĩ te dza tsabu dzahu dzaꞌra ĩtsiꞌruiwaparidzéb u hã.

7. E niha daꞌmadöꞌöꞌwa norĩ te dza tsidzutsi dzaꞌra Jeová nhimidzawidzé niꞌwai ma watsitsãnawã norĩ ubumro da te ĩwadzere na hã. (Jeremias 3:12)

⁷ Daꞌmadöꞌöꞌwa norĩ te tsiwatsutu dzaꞌra Jeová te te tsidzutsi dzaꞌra da. E niha. Ãma rotsaꞌrata Israel ãma ĩwatobrodzé hã. Jeová ĩmorĩꞌrata na ma tô pawaptob dzaꞌra tsiꞌruwapari dzaꞌra õ ré nherẽ. Ĩwaꞌõno maparane wa te ĩromnhoré na hã ãhã ĩtsõrédzém na, Jeová ma tô tiwi waptẽ Oseias timro ĩhöimana watsédé tsiré höimana da apö ꞌre watsété mono nherẽ. Taha dzarina Jeová ma tô höiꞌré ãma ĩtsibadzé ĩtsibꞌaꞌuwẽ norĩ ma hã duré te te tsima ĩwẽ na hã tiwatsété dzaꞌra hã te te pari dzaꞌra da. (Ose. 3:1; Mal. 3:7) Jeová ne hã daꞌmadöꞌöꞌwa norĩ te tsima wẽ dzaꞌra ĩꞌupaiꞌwa ĩtsiꞌruiwapari na hã duré Jeová watsuꞌuꞌwa da apö. Taha da, te te tãma pire dzaꞌra õ di dza. — Tsõré na Jeremias 3:12.

8. E niha ĩprédupté, timama te te ĩrẽmedzém na romnhimiré, te wapawaptob dzaꞌra wa te waihuꞌu dzaꞌra da Jeová nhimidzawidzé. (Lucas 15:7)

⁸ E ãma aipoꞌre puꞌu waihuꞌu petse di romnhimiré ĩprédupté timama te te ĩrẽmedzém na hã. Damama tiꞌra te te tsabui wamhã ‘ma tô wara ĩtẽme, ma tô tsawi, duré te te ubu uptsõ’ danhimidzawi petse na. (Lucas 15:20) Damama te te tsapari õ di tiꞌra hã tsõꞌawi te te höiꞌré da ĩtsiꞌruiwaparidzé. Taha waꞌrãmimhã ĩmorĩꞌrata na danhimidzawi petse na ma tô mo ĩtẽme. Ĩtsine daꞌmadöꞌöꞌwa norĩ te dza ꞌre höimana dzaꞌra da te ĩwadzere dzaꞌra norĩ ma hã. Õ norĩ hã poneꞌẽrebö ĩtsimani ne hã. Daꞌmadöꞌöꞌwa norĩ te tsima wẽ dzaꞌra waꞌubumroi ꞌre, ꞌre höimana dzaꞌra mono da apö. (Lucas 15:22-24, 32) Ĩꞌupaiꞌwa tsiꞌruiwapari wamhã Jeová, Jesus, dawatsuꞌuꞌwa norĩ duré watsitsãnawã norĩ ubumro te tsima rowẽ petse dzaꞌra. — Tsõré na Lucas 15:7.

9. Danhimidzawi petse na e marĩ Jeová te tinha te te ãma ĩꞌupa dzaꞌra norĩ ma hã.

⁹ Wa te ĩwaihuꞌu dzaꞌra dzéb dzarina, tô tsena Jeová te te tsaꞌréi õ di dza ĩꞌupaiꞌwa dawatsédé te te ĩrẽme õ hã, watsitsãnawãi ubumroi ꞌre höimana da. Tadzahã Jeová te te rẽme õ di. Te tsima wẽ waꞌubumroi ꞌre, ꞌre ĩhöimana mono da apö. Oseias 14:4 ãma hã Jeová ma tô höiꞌré tinhimirotsaꞌrada dawatsété wi ĩtsiꞌruiwapari dzaꞌra norĩ ma hã, Jeová te tinha: “Wa dza petse atsimirẽmedzé. Wa dza ĩ̱tsima atsawi dzaꞌra waꞌwa, te ĩ̱tsima ĩwẽdzéb dzarina, ĩ̱nhitiꞌru tsiꞌréi wa Israel nhiti.” Jeová nhimirotsaꞌrata dzarina daꞌmadöꞌöꞌwa norĩ te dza tirĩtĩ dzaꞌra ĩtsiꞌruiwaparidzém naꞌrata dzéb dzô. Tawamhã Jeová watsuꞌuꞌwai ubumroi ꞌre aihöimana õ wamhã, rotsaꞌrata petse Jeová te te ĩnharĩdzém na, tô tsena tãma atsawi petse di duré te tsima wẽ ĩtsibꞌaꞌuwẽ norĩ ubumroi ꞌre aihöimana da apö.

10-11. E niha daꞌmadöꞌöꞌwa norĩ te dza pawaptob dzaꞌra niꞌwa wahub ahö na da te ĩwadzere na hã.

¹⁰ E niha daꞌmadöꞌöꞌwa norĩ te dza pawaptob dzaꞌra niꞌwa wahub ahö na da te ĩwadzere na hã. Ãté ꞌre watsété õ di oto. Niwamhã poꞌre puꞌu õ di e marĩ wa ma tô wadzere ni. Tadzahã Jeová watsuꞌuꞌwai õ wahub ahö nherẽ, daꞌmadöꞌöꞌwa norĩ te dza tsô tirĩtĩ dzaꞌra duré te dza tsabu dzaꞌra. Ĩme tsiꞌrãꞌõtõ wamhã ĩtsiré te dza rowaptẽrẽ dzaꞌra duré danhimidzawi petse na te dza tãma watsuꞌu dzaꞌra Jeová watsuꞌuꞌwa da apö. Tô tsena tinhimidzadze tsibꞌuware di oto. Tadzahã te te tsima wẽ wamhã Jeová watsuꞌuꞌwa da apö, daꞌmadöꞌöꞌwa norĩ te dza pitsutu dzaꞌra nimahã watsitsãnawã niwamhã wahidiba Bíblia na te te tãma romnhoré da.

¹¹ Daꞌmadöꞌöꞌwa norĩ te tsima wẽ dzaꞌra te te tsidzutsi dzaꞌra da Jeová nhimidzawidzé duré ãma ĩtsibadzé. Taha wa, te tsiwatsutu dzaꞌra ꞌre rĩtĩ dzaꞌra mono da, da te ĩwadzere dzaꞌra norĩ dzô, duré te tãma watsuꞌu dzaꞌra tsada hã Jeová tẽme te te tsina rotété dzaꞌra da. Ĩꞌupaiꞌwa nhimirotsaꞌrada duré tihöimanadzé te te ãma tsaprĩ wamhã, tsada hã Jeová watsuꞌuꞌwa da apö. — 2 Cor. 2:6-8.

12. (a) E ꞌwam norĩ dzô daꞌmadöꞌö ꞌwa norĩ te dza ãma pibui petse dzaꞌra. (b) E marĩ wa, wa te rotsaꞌrata dzaꞌra õ di dza niꞌwam norĩ watsédé hã Jeová te te ĩpari dzaꞌra õ na hã. (Madöꞌö ĩtsihötö piꞌreba.)

¹² Nimahã na hã daꞌmadöꞌöꞌwa norĩ te dza ãma pibui petse dzaꞌra te te tsaꞌré dzaꞌra wana ré niꞌwa Jeová watsuꞌuꞌwa da apö. E ꞌwam norĩ dzô. Ĩprédubꞌõ ma robꞌmanharĩ watsété norĩ dzô, wadzada ĩtsipidzari norĩ dzô duré te te tsima ĩrowaꞌõtõ norĩ dzô tsina ĩmrodzé te te uprotsi dzaꞌra da. Daꞌmadöꞌöꞌwa norĩ tsõꞌawi te te ĩwaihuꞌu dzaꞌra da tsi ĩtsiꞌruiwaparidzé tô ĩꞌuptabi dzô. (Mal. 2:14; 2 Tim. 3:6) Daꞌmadöꞌöꞌwa norĩ poneꞌẽrebö ꞌmadöꞌöꞌwa ne hã, taha wa poneꞌẽrebö ꞌwawi re ĩtsimapari dzaꞌra mono da tsi ĩhöimana watsété norĩ. Tadzahã ĩtsiꞌruiwapari dzaꞌra norĩ watsédé hã Jeová te te pari waihuꞌu petse dzaꞌra di. Taha dzarina daꞌmadöꞌöꞌwa norĩ niwa te te rotsaꞌrata dzaꞌra õ di dza, Jeová te te ĩpari waihuꞌu õ na hã nimahã ĩtsiꞌruiwapariꞌwa, tiwatsédé pipa uptabi nherẽ. a — 1 Ped. 2:10.

E NIHA WA DZA WAHÖIMANA DZAꞌRA NI

13. (a) E niha wa dza wahöimana dzaꞌra ni da te tãma ĩpẽtẽ dzaꞌra norĩ ma hã. (b) E niha wa dza wahöimana dzaꞌra ni da te ĩwadzere dzaꞌra norĩ ma hã.

¹³ Romnhoré ꞌrata na wa te ĩwaihuꞌu dzaꞌra dzéb dzarina, nimahã na hã ãté niꞌwa te dza tãma pẽtẽ ni, ãne wamhã ĩtsiré wa dza ꞌre wahöimana uꞌötsi dzaꞌra, wa te waihuꞌu dzaꞌra wa ĩtsiꞌruiwapari na hã duré dawatsété na ꞌre ĩhöimana õ na hã. (1 Tim. 5:20) Õhõ Jeová watsuꞌuꞌwai ubumroi ꞌre da te wadzere õ di, taha wa, wa te ĩꞌupari dzaꞌra da tsi ĩꞌuwaibaba na ꞌre höimana da. (Heb. 10:24, 25) Taha waꞌrãmimhã, da te wadzere dzaꞌra wamhã ãnei õ di. Tahã watobro wamhã ĩtsiré ꞌre wahöimana dzaꞌra mono õ di dza duré ĩtsiré watsaihuri õ di dza. — 1 Cor. 5:11.

14. E marĩ, wa dza watsima pitsutu dzaꞌra ni da te ĩwadzere dzaꞌra norĩ ma hã wahöimana dzaꞌra dzéb da. (ꞌMadöꞌö dapodo duré.)

¹⁴ Da te wawi tsawi dzahi dzaꞌra õ di wa te tsawi dzaꞌra da, niwamhã tsô wahörö dzaꞌra da datsiꞌrãꞌõtõ da hã, da te ĩwadzere dzaꞌra norĩ hã. Tô tsena ĩtsiré ꞌre wahöimana dzaꞌra mono õ di dza oto. Tadzahã wa norĩ hã watsitsãmridzéb dzarina, wa dza watsima pitsutu dzaꞌra ni taha na. Ãma rotsaꞌrata, ãté niꞌwa atsiwaihuꞌu niwamhã niꞌwa ate família ꞌremhã ma tô wadzere ni, õhõ Jeová watsuꞌuꞌwai õ di oto, atsima wẽ wamhã tsô aihörö da datsiꞌrãꞌõtõ da, atsiꞌuihö na duré atsitsãmridzéb dzarina te dza atsima ĩpitsu. Bété morĩ wamhã datsiꞌrãꞌõtõ u. Duréihã wa te tsawi dzaꞌra õ di, tadzahã awaꞌawi hã watsiꞌuihö na, watsitsãmridzéb dzarina, wa dza watsima pitsutu dzaꞌra ni wa te tsawi dzaꞌra dzô. Ãté niꞌwam norĩ te dza tsawi dzaꞌra rowẽ na witsi da. Taha nherẽ wa te ꞌre robdzanhamri uꞌötsi dzaꞌra õ di dza.

15. E ꞌwa hã ĩꞌupaiꞌwa 2 João 9-11 dzarina. (ꞌMadöꞌö duré ĩtsihötö waꞌõno “ E ꞌwam norĩ ãma Paulo duré João ma tô watsuꞌu dzahuré.”)

¹⁵ Ãté niꞌwam norĩ te dza nharĩ dzaꞌra ãne: ‘E Bíblia merẽ te te nharĩ õ di dza, niꞌwa hã timreme na te te tsawi nherẽ, dza ĩtsiré oto ĩwatsété na hã.’ (Tsõré na 2 João 9-11.) Bíblia 2 João na, te wama höiꞌré dzaꞌra ãhã roti hã te te ĩwatsuꞌu na hã wadzada ĩtsipidzari norĩ ma hã duré te te ĩdarétsi dzaꞌra norĩ ma hã dawatsété u hã. (Apo. 2:20) Taha wa, wadzada ĩtsipidzari norĩ hã duré te te ĩdarétsi dzaꞌra norĩ dawatsété u hã, daꞌmadöꞌöꞌwa norĩ te te tsabu dzaꞌra õ di dza. Taha nherẽ ãté tsada hã tinhimirotsaꞌrada duré tihöimanadzé te te ãma tsaprĩ dzaꞌra da. Tadzahã te te ãma tsaprĩ õ ré hã, wa te tsawi dzaꞌra õ di dza duré tsô wahörö dzaꞌra õ di dza datsiꞌrãꞌõtõ da hã.

TSIDZUTSI JEOVÁ NHIMIDZAWIDZÉ DURÉ TITSIBADZÉ

16-17. (a) E marĩ Jeová te tsima wẽ te te ãma ĩꞌupa dzaꞌra norĩ hã te te ꞌmanharĩ dzaꞌra da. (Ezequiel 18:32) (b) E niha daꞌmadöꞌöꞌwa norĩ Jeová tsiré te dza romhuri dzaꞌra, te te ãma ĩꞌupa dzaꞌra norĩ hã te te pawaptob dzaꞌra da.

¹⁶ E marĩ, wa ꞌmadöꞌö dzaꞌra ni ãhã ĩtsõrédzém na hã. Wama waihuꞌu petse dzaꞌra di Jeová tô tsena te te tsima ĩwẽ õ na hã niꞌwa te te uprotsi da. (Tsõré na Ezequiel 18:32.) Te tsima wẽ te te ãma ĩꞌupa dzaꞌra norĩ hã ĩtẽme te te tsina rotété dzaꞌra da. (2 Cor. 5:20) Taha wa duréi hawi, Jeová ma tô dawi waptẽrẽ dzahu dzaꞌra, dawatsété wi ꞌre datsipidzari dzaꞌra mono da duré ĩtẽme da te tsina rotété dzaꞌra da. Ãne Jeová ma tô ꞌre höimana Israel ãma ꞌre ĩhöimana dzaꞌra norĩ ma hã duré nima norĩ ma hã. Ãhã na hã daꞌmadöꞌöꞌwa norĩ Jeová tsiré te romhuri dzaꞌra, te te pawaptob dzaꞌra da, te te ãma ĩꞌupa dzaꞌra norĩ hã dawatsédé ĩpipa wi tsiꞌruiwapari dzaꞌra da. — Rom. 2:4; 1 Cor. 3:9.

¹⁷ Ãma rotsaꞌrata e niha rowẽ dzaꞌẽtẽ ĩꞌuptabi na te tiromhöiba höiwa ãma, ĩꞌupaiꞌwa tsiꞌruiwapari wamhã! Wamama hã höiwa ãma Jeová, te tsima rowẽ petse poneꞌẽrebö ĩtsimani na da te tsõpẽtẽ wamhã, duré ĩtẽme te te tsina rotété wamhã. Wa te ãma rotsaꞌrata dzaꞌra wamhã Jeová nhimidzawidzém na, titsibadzém na duré dama höimana wẽ dzém na, tô tsena wanhimidzawi Jeová ãma te te tidzaꞌẽtẽ. — Luc 1:78.