Salmu 41:1-13
Davihi nhoꞌre
41 Tãma ꞌre rowẽ uptabi zaꞌra mono di, isimarĩꞌõ te te ꞌre ipawaptob zaꞌra mono norĩ ma hã. E marĩ wa. Ta norĩ hã ropire sô ꞌre wairébé mono wamhã, Uburé Danhibꞌapito te te ꞌre apawapto mono wa!
2 Uburé Danhibꞌapito, te za iꞌwawib zaꞌra hã ꞌre simapa.Te za hâiba ré ꞌre ihâimana zaꞌra mono zé hã te te tãma ꞌre apibui pese.Te za duré rowẽ hã te te tãma ꞌre anhomri, daro ꞌre ihâimana zaꞌra mono zéb ãma.Isitobꞌru norĩ nhiptetezé ma, te te rẽme zaꞌra õ di za.
3 Hâzé wa, tinhimiwaptâ wa, ꞌre simiꞌwara mono ré hã, te za Uburé Danhibꞌapito te te ꞌre anhiptete upari.Te za duré apâ ihâimanazé isiptede hã te te tãma ꞌre anhomri.
4 Wa hã tinha ãne:“Uburé Danhibꞌapito, wa hã wa tô aiwi ĩwasété.Ĩꞌãma aiwamri na, maꞌãpé ĩpese apâ.”
5 Ĩnhitobꞌru norĩ te te nasi ĩꞌãma wasété zaꞌra wamhã, te nasi ĩꞌãma sisadanharĩ zaꞌra ãne:“E niwa te za bété dârâ, isisi na dapoꞌre simrami zaꞌra da hã.”
6 Ta norĩ hawi te te ĩꞌmazabu da, wẽ ĩtẽme ꞌmaimorĩ wamhã,sena na hã te te ĩma ꞌre ꞌmairobzanhamri mono õ di.Te duré ĩhâiba na si romreme hã taré te te sima ꞌre aꞌubumro, apâ ĩhawi ꞌre pusi mono wa, te te ãma sima ꞌre ropé zaꞌra mono da hã.
7 Uburé ĩwẽꞌõꞌwa norĩ hã te tiꞌawi pesere sadawa ꞌrasi sina ĩhâiba na hã te te sima ꞌre robzanhamri zaꞌra.Te duré ropire hã ĩzô ꞌre ipusi mono da si, te te ĩꞌãma ꞌre rosaꞌrata wasété uꞌâsi zaꞌra.
8 Tahawa, te ãne te te sima ꞌre nharĩ zaꞌra, ĩꞌãma:“Ihâzé pire te te ꞌmorõwĩrĩ wa, duré apâ iwahutu zahu da hã mare di za.”
9 Ĩsiwaihu iwẽ te ꞌre iꞌumnhasi mono hã, ma tô taha zama ĩzada hã ꞌrãihaiwamna, ĩsiré ꞌre isai uꞌâsi mono hã.
10 Uburé Danhibꞌapito, maꞌãpé ĩꞌãma aiwamri na!Maꞌãpé apâ ĩwahutu, ĩnhitobꞌru norĩ da, ĩsiꞌruiwaꞌâbâ hâ!
11 Tawamhã ta norĩ te te ĩꞌãma aiꞌuté zaꞌra da hã mare di za. Ãne wamhã, wa za waihuꞌu za, a hã ĩwẽsãmri na hã.
12 Te za duré ꞌre ĩpawaptob uꞌâsi mo, iꞌuwaibaba na si marĩ te ꞌre abꞌmanharĩ mono wa.Duré õne uꞌâ asõꞌremhã te za ꞌre ĩnhimizusi mo.
13 Uburé Danhibꞌapito, Izaraéu nhihudu norĩ te, ꞌRe ihâimana uꞌâsi mono ãma si ꞌre wawata zaꞌra waꞌaba mono, õne uꞌâ siꞌutõrĩ ãna!Tane tô! Tane tô!
