Salmu 22:1-31
Davihi nhoꞌre
22 Ĩte ꞌRe ihâimana uꞌâsi mono, ĩte ꞌRe ihâimana uꞌâsi mono, e marĩ da, ma tô ĩrẽ.E marĩ da, ma tô romhâ na ĩnhiti aihâiba.E marĩ wa, duré ĩpawaptob da, ĩmreme ꞌrãihâ na te aiwi iwaptẽrẽzém na hã ĩwapari õ di.
2 Ĩte ꞌRe ihâimana uꞌâsi mono, bâtâ sidâpâsi te ꞌre aiꞌmahârâ uꞌâsi mono nherẽ, ꞌre ĩzadaꞌâbâ mono õ di.Duré barana te ꞌre aiꞌmahârâ mono nherẽ, ꞌre ĩwaꞌutu waihuꞌu mono õ di.
3 Tane nherẽ, a hã marĩ iwasédé, aiꞌãma ꞌre ihâimana mono õ, Danhibꞌapito simasisizéb ãma ꞌre iꞌasãmra mono. Duré Izaraéu nhihudu norĩ, aiꞌãma ꞌre iwata zaꞌra mono zé hã te ꞌre iꞌawapari mo.
4 Wahiꞌrata norĩ hã ma tô sina te te ꞌre aiꞌumnhasi zaꞌra.Te te sina ꞌre aiꞌumnhasi zaꞌra mono wa, ma tô ꞌre iꞌanhoꞌreptui mo.
5 Ta norĩ hã asimipawaptobzéb zô, mreme ꞌrãihâ na te te aiwi ꞌre waptẽrẽ zaꞌra mono wamhã, ma tô marĩ isimimnhasi wi ꞌre wairébé.Te te sina ꞌre aiꞌumnhasi zaꞌra mono wamhã, te te sina ꞌre aiꞌumnhasi baba zaꞌra mono õ di.
6 Wa hã, tiꞌai ãma aꞌuwẽ na oto ĩhâimana õ di. Aiꞌuténhanarã pré ne hã wa oto ĩhâiba.Tahawa, te uburé na hã ĩꞌãma ꞌre dawaꞌẽ zaꞌra. Ma tô duré da te dasiwi ꞌre ĩwazébꞌõ.
7 Uburé da te dasiwi ꞌre ĩꞌmadâꞌâ zaꞌra mono hã, te ĩꞌãma hã ꞌre waꞌẽ zaꞌra.Te duré ĩma tizoto te te ꞌre sani zaꞌra. Te duré ĩma ꞌre ꞌrãsiwamnarĩ zaꞌra.
8 Te duré te te ĩma ꞌre nharĩ zaꞌra ãne:“A hã, ma tô Uburé Danhibꞌapito hã asina ꞌre iꞌumnhasi mo.Maꞌãpé ta hã te te asõꞌreptu.Taha ma, sena na asawi di pâ, pé te te asõꞌreptu.”
9 Tane nherẽ, aiwétési ma tô ĩna dubꞌre hawimhã ĩwaze. Ĩna hâ te duré ꞌre wapsõmri mono ré, ma tô ꞌre ĩꞌmadâꞌâ wẽ mo.
10 Ĩpotozém hawim haré, wa tô asimiꞌmadâꞌâ na ꞌre ĩhâimana.Ta hawim haré, te ĩte ꞌRe ihâimana uꞌâsi mono na ĩma ꞌre aihâimana mo.
11 Tahawa, ĩma aiꞌré tõ.E marĩ wa. Za te irobzépatazéb da hã ꞌrâwi pesere hâimana wa,duré za niꞌwa te te ĩpawaptob dai õ wa.
12 Powawẽ ibaꞌõmo ne, ma te ĩnhitobꞌru norĩ hã siwi ĩꞌuirĩ.Uburé pese te ĩmana wawimhã tihâimana zaꞌra, Basã na romnhisi ãma powawẽ ibaꞌu isahi ꞌre ihâimana zaꞌra mono ne hã.
13 Huꞌu zérépa, wairõ sina, tizadawa te te ꞌre poꞌo zaꞌra mono wa, te te oto ꞌre idanhiwazu zaꞌra mono ne, ma tô ĩzada hã tihâimana zaꞌra.
14 Wa tô siptete haiꞌutõ, â tiꞌa u da te ꞌre isaꞌwari zaꞌra mono ne.Uburé ma tô ĩhi hã ĩwi wairé.Duré ĩpẽꞌẽ ꞌremhã robꞌuiwẽzé ꞌre uwa pese mono wa, ꞌre iwaꞌui aꞌa zaꞌra mono ne, wa tô ĩhâiba.
15 Ĩnhoꞌre ꞌré hã ꞌré uptabi di, aiwa tiꞌa zaprum ne. Duré ĩzadaiꞌré hã te nasi ĩnhoto to.A hã ma tô robzaprui waꞌwa ĩrẽ, ĩdâꞌâ ne.
16 Aibâ iwasété norĩ hã ma tô siwi ĩꞌuirĩ zaꞌra.Ta norĩ hã ma tô oto siwi ĩꞌresuꞌu pese, wapsã norĩ ĩnhibꞌrada hã duré ĩpara hã te te siwi iwazui mono ne.
17 Uburé ĩhi hã sõꞌawi oto aiꞌuréiwi hâimana zaꞌra wa, saꞌrata waihuꞌu pese di.Duré ta norĩ hã te ĩꞌãma waꞌẽ zaꞌra sina siwi ĩꞌmadâꞌâ pese.
18 Ta norĩ hã ma tô duré ĩꞌuza hã te te sima sõmri zaꞌra.Duré ma tô ĩsiꞌubuzéb zô niha hã datozébre nasi siwi wabzu.
19 Uburé Danhibꞌapito, maꞌãpé ĩma aiꞌré tõ.Saꞌẽtẽ we ĩtẽme aimorĩ, ĩnhoꞌreptu da.
20 Sibꞌézé ꞌwa pa wi hã maꞌãpé ĩnhoꞌreptu na.Duré ã hã wapsã norĩ te te siwi ĩwĩrĩ da hã tãma ĩrẽme zaꞌra tõ.
21 Ã hã huꞌu zérépa norĩ zadaiꞌré wi hã ĩnhoꞌreptu na.Duré rom na powawẽ iꞌõmo ré norĩ isahi wi hã ĩsiꞌwawimhã ĩsimapa waihuꞌu õ di.
22 Tawamhã wa hã uburé marĩ ĩma ꞌre iꞌaꞌmanharĩ mono zé hã, wa za ĩsiré norĩ ma wasuꞌu zaꞌra.Duré ꞌre iwasiꞌrãꞌõtõ mono zéb ãma aiꞌãma ꞌre ĩwata mono sina, wa za ãne tinha:
23 “Uburé Danhibꞌapito ꞌre iwazéb zaꞌra waꞌaba mono norĩ, uburé te za ãma ꞌre aiwata zaꞌra waꞌaba mo.Zacoho nhihudu norĩ, ꞌRe ihâimana uꞌâsi mono ãma ꞌre aiwata zaꞌra waꞌaba mono!Izaraéu nhihudu norĩ, Uburé Danhibꞌapito hã asiwi ꞌre wazé pese zaꞌra waꞌaba mono!
24 Ta hã isimarĩꞌõ norĩ hã te te ꞌre arẽme waihuꞌu mono õ di.Duré ꞌre poꞌre simrami mono õ di, te te ꞌre irobzépata zaꞌra mono ãma hã.Tiwi hã ꞌre simaꞌuri waihuꞌu zaꞌra mono õ di. Mreme ꞌrãihâ na te te isõꞌreptu zaꞌra zé te te tiwi ꞌre waptẽrẽ zaꞌra mono wamhã, te za te te ꞌre amreme wapari.”
25 Uburé ꞌre idasiꞌrãꞌõtõ zaꞌra mono zéb ãma hã, marĩ ĩma ꞌre iꞌaꞌmanharĩ mono zém na, wa za aiꞌãma ꞌre ĩwata.Uburé te te ꞌre iꞌaiwazéb zaꞌra mono norĩ nhoꞌa hã, wa hã, danhimizama zata na hã wa za ãma aima ꞌre ĩnhopru, te aima iropisutuzéb zarina.
26 Isimarĩꞌõ norĩ te za tisa hã te te ãma ꞌre huri, te te ꞌre iꞌmahâpãrĩ zaꞌra mono zéb u.Duré Uburé Danhibꞌapito zô ꞌre isõpré mono norĩ si, te za ãma ꞌre wata uꞌâsi zaꞌra.Ta norĩ hã õne uꞌâ rowẽ sina ꞌre ihâimana zaꞌra mono da si, ĩma iwẽ hã.
27 Niwa aptoꞌo ré daro mono bâ ꞌre idahâimana zaꞌra mono norĩ, te za Uburé Danhibꞌapito ãma ꞌre poꞌre puꞌu zaꞌra.Te za duré apâ itẽme hã ꞌre dasipizari zaꞌra.Duré te za aꞌuwẽ mono bâ ãma ꞌre dawata zaꞌra.
28 Uburé Danhibꞌapito ma si, te te ꞌre idaꞌaꞌmadâꞌâ mono zé isiptede hã te ꞌre hâimana.Taha si te daꞌrãnhoꞌõmo na uburé aꞌuwẽ mono bâ te te ꞌre daꞌaꞌmadâꞌâ.
29 Uburé ꞌrâwi ꞌre isiꞌmadâꞌâ ze zaꞌra mono norĩ hã te za isõꞌre tãma ꞌre siwẽꞌẽ zaꞌra za. Uburé te za aihĩni idadâꞌâ zaꞌra norĩ hã duré za idadâꞌâ zaꞌra zama ãma ꞌre dawata zaꞌra.
30 Aptoꞌo ré dasiparabâsi ꞌre idasitébré zaꞌra mono hã, te za õhõ ãma si ꞌre nomro.Ta norĩ hã te za duré daro mono bâ dapoto tém norĩ ma, Uburé Danhibꞌapito hã te te tãma ꞌre wasuꞌu zaꞌra.
31 Zahadu ꞌre ipoto zaꞌra mono õ norĩ hã, te za niwamhã zahadu wapsi, ꞌRe ihâimana uꞌâsi mono te te ꞌre iꞌmanharĩ mono zé hã te te ꞌre wapari zaꞌra za:“ꞌRe ihâimana uꞌâsi mono, tinhibꞌaꞌuwẽ hã ma tô anhoꞌreptu!”
