Salmu 132:1-18
132 Uburé Danhibꞌapito, maꞌãpé Davihi ãma aipoꞌre puꞌu, duré te te ꞌre irobzépata mono zém na zama.
2 Ta hã ma tô ãne aima ropisutu, Uburé Danhibꞌapito ma, Zacoho te Iwaihuꞌupese ma:
3 “ꞌRi u ĩmorĩ õ di za. Duré ĩwaꞌutu da hã mare di za.
4 Duré ĩnomro õ di za. Ĩnhotõ da hã, mare di za,
5 Uburé Danhibꞌapito ma, ro te ꞌmanhopẽtẽ õ ré hã, ꞌri wa Zacoho te Iwaihuꞌupe ꞌre isãmra mono zéb da hã.”
6 Asimiroti na robꞌuiꞌéré ré wedehâꞌre ꞌmanharĩ, Efrata ãma isam na, wa te waihuꞌu zaꞌra wamhã, wa tô duré Zearĩ na itehutu wamri ãma wasiwi sõpẽtẽ ni.
7 Tawamhã wa tô ãne wasima nharĩ zaꞌra ni:“Oto Uburé Danhibꞌapito nhorõwa u hã wasiꞌabaꞌréi waꞌaba. Oto ãma wawata zaꞌra waꞌaba, isimasisizém nhoꞌremhã.”
8 Uburé Danhibꞌapito, maꞌãpé we aimorĩ, asõrõwa ꞌri ꞌrãihâ u, asimiroti na robꞌuiꞌéré ré duré aiwaihuꞌu pese ré wedehâꞌre ꞌmanharĩ ré, tame õne uꞌâ ꞌre aihâimana mono da hã iré.
9 Ate sasedoti norĩ, õne uꞌâ marĩ iꞌuwaibaba na si te te ꞌre iꞌmanharĩ zaꞌra mono da si, iwẽ hã!Duré aima romhuriꞌwa norĩ, sena na aiꞌãma si ꞌre inomro mono hã rowẽ te, saꞌẽtẽ sadari sina hârâ ꞌrãihâ na te te sima ꞌre iromhuꞌu zaꞌra mono da si, iwẽ hã!
10 A hã aima romhuriꞌwa Davi we ꞌre isawi mono zéb uꞌâbâmhã, maꞌãpé apito ipisudu hã asiwi wẽꞌõ tõ.
11 Uburé Danhibꞌapito, Davihi ma ropisudu hã ma tô iꞌmanha, asimiropisutu na ãma isaprĩ waihuꞌu õ na, ãne:“Wa hã wa za asihudu hã tisã za, aiꞌuirĩ na apito na te te ꞌre daꞌaꞌmadâꞌâ mono da.
12 Aiꞌra norĩ, wa hã te dama iropisutuzém na duré ĩnhimiroti te tãma ꞌre isõmri zaꞌra mono na, sena na ãma ꞌre nomro mono wamhã, taha ꞌra norĩ zama te za apito te asãmrazém na hã ꞌre siꞌubumroi uꞌâsi, sidâpâsi.”
13 Uburé Danhibꞌapito, Siã hã ma tô pisutu, iwa ꞌre isãmra mono zéb da hã. Ãne te tinha:
14 “Ãme wa za õne uꞌâ ꞌre ĩhâimana. Duré ãme dama iꞌrãnhoꞌõmo na te ꞌre ĩdaꞌaꞌmadâꞌâ mono da hã, wa tô ĩsima wẽ.
15 Wa hã wa za danho ahâ na, ro te ipisutu ma hã ꞌre ĩnhoprub uꞌâsi. Duré isibrobꞌõ iwa ꞌre isiꞌubumroi mono norĩ ma, wa za dasa ahâ na te tãma ꞌre sõmri zaꞌra.
16 Sasedoti iwa te te ꞌre irobꞌmaꞌwamarĩ mono norĩ hã wa za iwẽ hã te tãma ꞌre pisutu zaꞌra, wẽ na te te ꞌre romhuri zaꞌra mono da. Tahawa, sena na tame iwa ꞌre idahâimana zaꞌra mono norĩ te za da te ãma dasima ꞌre romhuꞌu zaꞌra, dama irowẽ zaꞌẽtẽ zaꞌra zarina.
17 Tame wa za Davihi ne siptete na apito na te te ꞌre daꞌaꞌmadâꞌâ mono da, isihudu hã pisutu. Tame wa za duré ꞌmanha, apito te ipisudu te te dama ꞌre irobꞌuiwẽ mono da hã.
18 Wa za isitobꞌru norĩ ma rowazé hã tãma hiri zaꞌra. Tane nherẽ, te za õ hã te te ꞌre rowaꞌa uꞌâsi, pire na te te ꞌre idaꞌaꞌmadâꞌâ mono zém na hã.”
