Salmu 104:1-35
104 Uburé Danhibꞌapito, ĩpẽꞌẽ na wa ĩnhoꞌre na aiꞌãma si ꞌre ĩwata!Ĩte Uburé Danhibꞌapito ꞌRe ihâimana uꞌâsi mono, e niha tô sena iꞌasaꞌẽtẽ uptabi!Daꞌuza wẽ na ꞌre idasiꞌuza zaꞌra mono ne, te õne uꞌâ aiwaihuꞌu pese na duré aiwẽ uptabi na ꞌre aihâimana mo.
2 Te duré rowaꞌa na ꞌre asiꞌubu mo.A hã ma tô duré hâiwa, romhâ ꞌmanharĩ na ꞌri, da te ꞌre iꞌwani zaꞌra mono ne, iꞌwani misi haré.
3 Â ꞌre isaꞌwari mono nhisiwimhã ꞌre iꞌasãmra mono zé ꞌri hã ma tô isã.Duré wedewara zapore na dasiꞌwapézém na ꞌre idasisaꞌrei mono ne, te hâiwaꞌa na ꞌre ane mo. Te duré asaripi na ne rowaꞌuꞌu nhisiwi ꞌre asamroi mo.
4 A hã te duré rowaꞌuꞌu ma, asadawa wasuꞌuꞌwa da hã tãma ꞌre iꞌapisutu mo.Te duré tã siꞌubuzi ma, aima romhuriꞌwa da, tãma ꞌre iꞌapisutu mo.
5 Tiꞌa, a hã ma tô isãnaꞌrata nhisiwimhã ihi, tete na ꞌre saꞌwari mono da, rési ãna.Ãne wa, niwamhã sirési waihuꞌu õ di za.
6 Tiꞌa, â poré na ma tô isuwa, dasiꞌubuzé ihâ pa na ãma ꞌre idasiꞌubu zaꞌra mono ne.Ãne wa, ma tô â hã ẽtẽ nhisiwi wahuré ꞌre saꞌwari.
7 Tane nherẽ, tãma nharĩ pipa te, ma tô â hã aima aimani.Tãi rãrãꞌã ne, aimreme rãrã te te wapari pipa zaꞌra wa, ma tô siꞌabaꞌré na tiꞌâpraba zaꞌra, â hã.
8 Ẽtẽ mono na â hã ma tô te te saiꞌuri. Duré ta hawimhã ẽtẽ siwaꞌaba wa romharé ꞌre ihâimana mono na hã ma tô tipraba, ro hã tãma iꞌapisutu mono zéb u.
9 A hã, â sisuꞌu pese na isadaꞌré ꞌre simiꞌwara mono da hã ma tô tãma ipisutu zaꞌra, niwa tiꞌa te te upsibi na sahu zaꞌra tõ da.
10 A hã ma tô duré â nhanaꞌrata u siro ẽtẽ siwaꞌaba mono na iꞌaꞌâpuꞌu mo.Tahawa, te oto pa nhoꞌõmo norĩ hã ꞌre âpraba zaꞌra, ẽtẽ nhiꞌriti mono waꞌwaibaba.
11 Taha â na te oto uburé abaze norĩ hã te te ꞌre âhuri.Duré taha na te awaru poꞌre pore iꞌabaꞌẽiꞌõ, ꞌrubu hã te te sima ꞌre simro.
12 Pa zaihâi mono na te si norĩ hã wede na te te sima ꞌre zasi zaꞌra. Te duré wede panhipti mono na ꞌre sadawasituri.
13 Hâiwa ãma ꞌre iꞌaihâimana mono zém hawi, te tãi ma hã we ꞌre irobꞌrui uꞌâsi mo, ẽtẽ nhisi ꞌre taꞌa mono da hã.Tahawa, te tiꞌa hã marĩ iwẽ na ꞌmasisi na ꞌre saꞌwari, asimiromhuri wẽ zéb zarina.
14 A hã te duré dui ma hã ꞌre inharĩ mo, ꞌre prédub zaꞌra mono da, powawẽ, ãma ꞌre saihuri mono da.Te duré robꞌre ma ꞌre inharĩ mo, da te ꞌre zuri mono wa, dasazé hã da te ãma dasima ꞌre sani zaꞌra mono da.
15 Te duré tiꞌai ma ꞌre inharĩ mo, uva ꞌru ꞌre ꞌrãi pese mono da, iwaꞌu zô, taha na dama ꞌre rowẽ zaꞌẽtẽ zaꞌra mono da.Azeitona waꞌu tob zô zama, te duré tãma ꞌre inharĩ mo, te te sina ꞌre daꞌubu waipo zaꞌra mono da.Te duré iꞌuꞌẽtẽ wapu zô zama tãma ꞌre ĩnharĩ mo, danhiptede hã te te dama ꞌre sõmri zaꞌra mono da.
16 Uburé Danhibꞌapito te, wede norĩ hã te tã te te ꞌre diꞌi wẽ pese zaꞌra, Libanu na romnhisi ãma wede nhinihã cedru na wede nhisi norĩ te te ꞌre iꞌaꞌre mono hã.
17 Tame te si norĩ hã tizasi te te sima ꞌre ꞌmanharĩ zaꞌra.Te duré sõꞌrehõ norĩ hã tizasi, pinheiru na wede nhisi na te te sima ꞌre ꞌmanharĩ zaꞌra.
18 Ẽne iꞌrãihâ norĩ nhisiwi te poneꞌẽrebâ zéré uzé iꞌmadâꞌâꞌõ norĩ hã iwamhã ꞌre simasa.Te duré ꞌrupoꞌrere norĩ hã ẽtẽ nhiꞌriti wa tizaꞌrui ꞌre, simaꞌuri sina ꞌre hâimana zaꞌra.
19 A hã ma tô duré aꞌamo hã iꞌmanha, robꞌré waihuꞌuzéb da hã, duré aꞌẽ taꞌa waihuꞌuzéb da hã.Duré bâtâ ma hã waihuꞌu pese di, niha hã ꞌre izasi mono zéb da hã.
20 A hã ꞌre mara mono da hã ma tô duré ipisu.Tawamhã oto ꞌre mara mono sidâpâsi, te uburé abaze norĩ hã robra na ꞌre sihâiꞌré zaꞌra.
21 Huꞌu zérépa ihâiba tém norĩ hã te duré wairõ sina te te ꞌre aba zaꞌra, ꞌRe ihâimana uꞌâsi mono isa te te tãma ꞌre isõmri zaꞌra mono zô ꞌre rĩtĩ zaꞌra mono sina.
22 Tane nherẽ, bâdâ oto ꞌre pusi mono wamhã, te duré apâ ꞌre nomro, tinhorõwa u.
23 Tô tawamhã, te danhimiromhuri u ꞌre dawairébé, hâiwahâ tẽme da te ꞌre romhuri zaꞌra mono da.
24 Uburé Danhibꞌapito, a hã ma tô marĩ ahâ uptabi na iꞌaꞌmanharĩ mo! Asimirowaihuꞌu zaꞌẽtẽ na ma tô uburé marĩ hã iꞌapoto mo.Tahawa, tiꞌa asimipoto mono na hã ꞌmasisi uptabi di.
25 Tame te â poré isadaꞌré waihuꞌuꞌõ isaꞌẽtẽ uptabi hã ꞌre saꞌwari.Taha ꞌre, te asimipodo ihâiba ré norĩ hã iwa ꞌre nomro isaꞌẽtẽ norĩ, duré isurure norĩ, saꞌrata waihuꞌu ãna.
26 Taha na, te duré ubaꞌre wawẽ te te ãma ꞌre roꞌrahâri zaꞌra.Leviatã na asimipoto siwamnarĩ nhisi norĩ hã te duré iꞌremhã sima te ꞌre rowẽ zaꞌra.
27 Uburé te abaze norĩ hã aihawim na si ꞌre hâimana zaꞌra.Tahawa, bâtâ uwaibaba isa tãma ꞌre isõmri zaꞌra mono zô hã, te duré ꞌre sõpré.
28 A hã te tô isa hã tãma ꞌre iꞌanhomri mo.Tahawa, tisa te te ꞌre huri mono wa, te te ꞌre ꞌmahâpãrĩ zaꞌra mono wamhã, te duré te te sima ãma ꞌre rowẽ zaꞌra.
29 A hã tiwi ꞌre aiꞌrã sipizari zaꞌra mono wamhã, te pahi na ꞌre hâimana zaꞌra.Duré aipẽꞌẽzani tãma ꞌre iꞌanhomri mono, tiwi ꞌre anhihâri mono wamhã, te za ꞌre dâꞌâ zaꞌra. Tawamhã te za apâ ꞌre sitiꞌazaprub zaꞌra.
30 Tane nherẽ, duré ꞌre azaꞌuri mono wa, aipẽꞌẽzani tãma ꞌre anhomri mono wamhã, te za ta norĩ hã hâiba ré ꞌre poto zaꞌra.Ãne wamhã, te za tiꞌai manawawi ma, marĩ ité hã tãma ꞌre iꞌanhomri mo.
31 Uburé Danhibꞌapito waihuꞌu pe iwẽ uptabi hã ꞌre ihâimana uꞌâsi mono da si, iwẽ hã!Tahawa, duré tinhimiꞌmanharĩzé ma, ꞌre itoi mono da si, iwẽ hã!
32 Uburé Danhibꞌapito, tiꞌa te te ꞌre ꞌmadâꞌâ nhibꞌrui mono wamhã, te za ꞌre popoꞌo.Duré ẽne te te ꞌre aꞌupi nhibꞌrui mono wamhã, te za romnhizé ihawimhã ꞌre wairébé.
33 Uburé Danhibꞌapito ãma, ꞌre ĩhâimana mono ré, wa za ĩnhoꞌre na hã ãma ꞌre ĩwata, ĩte ꞌRe ihâimana uꞌâsi mono ãma hã.
34 Uburé Danhibꞌapito, ĩnhoꞌre na te te ãma sima ꞌre irowẽ mono da si, wa ĩsima te ꞌre wẽ. E marĩ wa. Ihawi wa, rowẽzé ĩma ꞌre ihâimana mono hã.
35 Tiꞌai ãmab ré, tiwasété si te te ꞌre iꞌmanharĩ zaꞌra mono norĩ hã tô siꞌutõrĩre, iwasété uptabi norĩ hã!Ĩpẽꞌẽ na, Uburé Danhibꞌapito ãma ꞌre ĩwata mono da si, ĩma iwẽ hã!
