Ruti 3:1-18
3 Tawamhã nimahã bâtâ na ma tô Noẽmi hã Rutihi ma tinha:
— Ĩsaniꞌwa, aimro da hã aibâ te aima ꞌmasãmri da, wa ĩsima wẽ, asõrõwa aima hâimana da zama.
2 E ma tô ãma irosaꞌra, Boazihi ãma ĩmro sisãnawã siwadi na hã. Ta hã ma tô romhuri hã aima tiꞌru, ite romhuriꞌwa norĩ me romhuri da. Taha ta tô. Ã barana te za amnho hã préꞌé, trigu teihi ne hã.
3 Ãne te za iꞌmanha. Te za asiꞌupsõ. Taha parimhã, te za asisadaze. Te za duré asiꞌuza, aiꞌuza ihâi wẽ uptabi na. Taha pari, te za aimo, Boaz te te iromhurizéb u hã. Tane nherẽ, tãma asihâiꞌré õ di za aꞌâ, te te aiwaihuꞌu tõ da, iꞌrata iꞌaihâimana na hã. Aꞌâ tisa hã te te ꞌrãsutu, duré aꞌâ tisa te te simizâri.
4 Taha pari, Boaz oto sõtõ da wamhã, nimame nomro zô ꞌmadâꞌâ pese za. Sõtõ wapsi, te za itẽme aimo, inomrozéb u. Isisuwazé hã te za ihâzadaꞌré zaꞌo, ipara ãma hã. Tame te za ano. Tawamhã te za aima tinha, tiha hã za iꞌmanharĩ da hã.*
5 Tahawa Ruti hã te tãma tinha, ãne:
— Uburé wa za tiha hã ꞌmanha, ĩma iwaihuꞌuzéb zarina.
6 Tawamhã te nimahã na oto mo, amnho hã da te ꞌre ipréꞌé zaꞌra mono zéb u. Wisi wamhã, ma tô uburé marĩ abꞌmanha, imaprewa te te tãma iꞌruzéb zarina.
7 Tame Boaz oto sai pari wamhã, duré te te simizâri parimhã, tãma rowẽ di oto. Tahawa, te oto nhono, amnho zaꞌwari ꞌrata. Tawamhã Ruti te itẽme sahutu, atãma hâire. Itẽme wisi wamhã, isisuwazé hã ma tô sima hâzadaꞌré zaꞌo, ipara ãma hã. Tame ma tô oto nomro.
8 Tawamhã mara waꞌwa ma tô toporo waptu na, Boaz hã. Topoꞌo wamhã, sahâ na ma tô nhamra. Tame ma tô piꞌõ hã ꞌmadâ. Te te ꞌmadâꞌâ wamhã, ma tô ãma titobꞌuzu, ipara ãma inomro ãma hã.
9 Tahawa ma tô sadanha, ãne:
— E ꞌwa hã, a hã.
Tawamhã asa te tãma siwasuꞌu:
— Wa hã Ruti, aima romhuriꞌwa. Maꞌãpé aima romhuriꞌwa nhisiwimhã asisuwazé hã hâparapo na. E tihai wa. Ropire hawi wanhoꞌreptuiꞌwa na wama ꞌre aihâimana mono wa, a hã.
10 Tawamhã Boaz ma tô ãma tãma waꞌrã, ãne:
— Wa tô ĩsima wẽ, Uburé Danhibꞌapito si iwẽ hã te te aima ꞌre pisutu mono da. Tô sena na aihâimana wẽ zém na ma asihâiꞌré wẽ, aimaprebaba siꞌaibâ sisãnawã norĩ ma hã, aimaprebaba sipiꞌõ ipawapto wẽ zém nhipai u hã. E marĩ wa. A hã aibâ iprédupté isibro pese zô asima airĩtĩ õ wa, niha wamhã, duré isibrobꞌõ zô.
11 Tahawa, ãhã na hã aipahi tõ. ꞌRi nhoꞌõmo ãma hã dama aiwaihuꞌu pese di, a hã piꞌõ, robꞌuwaibaba na si ꞌre iꞌaihâimana mono zém na hã. Tahawa, uburé wa za abꞌmanha, ĩwi iwaptẽrẽzéb zarina.
12 Sena tô wa hã asisãnawã norĩ siwadi. Tahawa, duré a hã za oto ĩnhimiꞌmadâ. Tane nherẽ, iré hã aibâ asisãnawã siwadi ꞌrâwimhã, ĩnhipai u hã.
13 Ãme aꞌâ aihâimana za, awẽ u hã, mararé wa te sadaihuꞌu da, te te sima wẽ zô, te te iꞌaiꞌmadâꞌâ da hã. Te te sima wẽ wamhã, wẽ di. Duré te te sima wẽ õ wamhã, wa hã Uburé Danhibꞌapito ma, ꞌRe ihâimana uꞌâsi mono ma, wa za ropisutu ĩsiꞌãma hã, aiꞌmadâꞌâꞌwa na ꞌre ĩhâimana mono da. Tahawa, maꞌãpé apâ anomro, asõtõ da.
14 Tawamhã Rutihi ãma ma tô tiꞌawẽ, Boazihi para ãma nomro ré. Zahadu robzaꞌrã ré mara hâ prãi ré, ma tô udu Ruti hã, morĩ da, morĩ ré, da te dasiwi ꞌmadâꞌâ tõ da. E marĩ wa. Boaz hã te te sima wẽ õ di duré, piꞌõ itẽme imorĩ na hã da te iwaihuꞌu da hã.
15 Tawamhã Boaz ma tô tãma tinha, Rutihi ma, ãne:
— Asiꞌubuzé hã wazere, tiꞌai wa hiri da, hâparapo na.
Tame ma tô tihi, hâparapo na tisiꞌubuzé hã. Tahawa Boaz ma tô oto saꞌwa amnho hã iwa, 20 na ipire pibuzé hã. Taha pari, ma tô duré tiꞌâ, isisé te te tãma hiri da. Tawamhã Ruti te oto apâ mo, ꞌri nhoꞌõmo u.
16 Tinhorõwa u oto wisi wamhã, ma tô imaprewa hã sadanha, ãne:
— Ĩsaniꞌwa, e niha ma tô tiromhâiba.
Tahawa Ruti te tãma rowasuꞌu, Boaz hã uburé marĩ te te tãma iꞌabꞌmanharĩzém na hã. Te duré tãma rowasuꞌu aꞌâ:
17 — Ã hã uburé ma tô ĩma tisõ, amnho hã. Tahawa, te ãne ĩma tinha: “Asõrõwa u, aiꞌuba na apâ asina siri õ di za, marĩ hã âri ãna hã aimaprebaba ma.”
18 Tawamhã Noẽmi te tãma tinha, ãne:
— Tahawa, ĩsaniꞌwa, aꞌâ asimipari atãma, pé niha aiꞌãma romhâimana zô. E tihai wa. Boaz hã ã bâtâ na tiha na te te arowairébé õ nherẽ, iwaꞌutu da hã maze di.
Ĩwaꞌõtõ piꞌreba watsuꞌu mono
^ 3:4 Ipara ãma piꞌõ nomrozé hã iꞌwawi isimapazé te te tiwi iwaptẽrẽzé te wasuꞌu.
