Ruti 1:1-22
1 Izaraéu na tiꞌai waꞌõtõ nhoꞌõmo nhisi ãma, Mozésihi nhimiroti zarina, daꞌãma rowairébéꞌwa norĩ te te ꞌre daꞌmadâꞌâ zaꞌra mono ré, ma tô mra hã da te ꞌre sépata zaꞌẽtẽ zaꞌra. Tahawa, Belẽ hawimhã aibâ hã, Zuda na danhiptiꞌa nhoꞌõmo hawimhã, ma tô timro me tineb zahuré. Duré iꞌra norĩ te isiré hã tineb zahuré, Moabi na tiꞌai waꞌõtõ nhoꞌõmo nhisi ãma aꞌâ ꞌre hâimana zahuré mono da.
2 Aibâ nhisi hã Elimelequi na, duré imro nhisi hã Noẽmi na. Iꞌra norĩ nhisi hã Marõ na duré Quiriꞌõ na. Ã norĩ hã Efrata na ꞌri waꞌõtõ nhisi hawimhã, Belẽ na ꞌri nhoꞌõmo nhisi ꞌratamhã, Zuda ãma hã. Moabi u ma tô aiꞌabaꞌré, tame ꞌre hâimana zaꞌra mono da aꞌâ.
3 Tame ꞌre hâimana zaꞌra mono ré, ma tô Elimelequi hã dârâ. Tahawa, te Noẽmi hã tiꞌra norĩ ma siwaprosi oto ꞌre hâimana.
4 1:4-5 Tawamhã iꞌra siꞌaibâ norĩ ma tô oto timro zahuré, moabita norĩ nhipiꞌõi hâzarutu na. Azarutu hâiba amo nhisi hã Orpa na, duré ihâiba amo nhisi hã Ruti na. Tawamhã tame ꞌre ihâimana zaꞌra mono zém na 10 na ãma wahub zaꞌra pari, ma tô Marõ norĩ hã tidâꞌâ zahuré, Quiriꞌõhõ me hã. Tahawa, te Noẽmihi si siwaprosi oto ꞌre hâimana, ꞌra ãna, duré mro ãna.
5 ꞌMadâꞌâ 1:4
Belẽ u apâ te te sina isiri zaꞌra zé wasuꞌu
6 Nimahã bâtâ na ma tô Noẽmi hã waihuꞌu, Uburé Danhibꞌapito tinhibꞌaꞌuwẽ te te ꞌre iꞌapawapto mono zém na hã, amnho ꞌrãi pese na. Tahawa, ma tô sima robzaꞌra pese, Moabi hawi tisaniꞌaba norĩ ré, watobro da hã.
7 Tahawa, ma tô oto wairé, Zuda u te te sina siri zaꞌra da. Tane nherẽ, bâdâdi na siꞌabaꞌréi ré,
8 te Noẽmi hã tisaniꞌaba norĩ ma tinha ãne:
— Apâ te za asina isiri ꞌwa, asaꞌru u, ana siré ꞌre aimasisi aba mono da. Ĩma hã Uburé Danhibꞌapito te za iwẽ na aima ꞌre sõprub uꞌâsi ꞌwa. A norĩ waꞌwa hã ꞌre ĩpawapto wẽ waꞌaba mono ne, duré ĩwi idâꞌâ zahuré norĩ hã ꞌre ipawapto wẽ waꞌaba mono ne, te za Uburé Danhibꞌapito hã te te ꞌre aipawapto wẽ uꞌâsi ꞌwa.
9 Wa aiꞌãma rosaꞌrata ꞌwa, Uburé Danhibꞌapito aibâ hã te te aima sõmri aba da, aimro té waꞌaba da apâ, aihâiba siꞌuiwa na waꞌaba, duré asiré ꞌre aihâimana zaꞌra waꞌaba mono da.
Tawamhã Noẽmi ma tô tisaniꞌaba norĩ, sisaꞌu tobꞌrata hârâ na irẽme ma sawi zahuré, tãma pâ zahuré da oto. Tane nherẽ, ma tô tiwawa zahuré, wawa ꞌrãihâ na.
10 Tahawa, ma tô timaprebaba ma nharĩ zahuré, ãne:
— Waneb õ di za apâ. Wa za tô ãma asiré wanem ni, asiré aꞌuwẽ norĩ ꞌrata ꞌre wahâimana mono da.
11 Tane nherẽ, Noẽmi ma tô tãma nharĩ zahuré, ãne:
— Ĩsaniꞌaba norĩ, apâ te za ane waꞌwa. E tihai wa, te bété asima iwẽ waꞌwa, ĩsiré ãma ane waꞌaba da. E ma tô ĩꞌãma irosaꞌrata ꞌwa, apâ za ĩꞌra zahu wa, ta norĩ ãma si aimro waꞌaba da hã.
12 1:12-13 Apâ te za tô ane waꞌwa, asõrõwa waꞌaba u. E tihai wa. Wa hã oto ĩhire. Apâ ĩmro téb zahu da hã maze di. Ĩmro téb da, ĩsiꞌmadâꞌâ wamhã, duré ã barana ĩmro da wamhã, duré ĩꞌra da wamhã apâ, e te aré ꞌre isapari zei waꞌaba mo, iprédub zahuré zéb u, ãma aimro waꞌaba da hã. Maze di. Aré ꞌre sapari zei waꞌaba mono õ di. Uburé Danhibꞌapito hã ma tô ĩzada tihâiba. Tahawa, wa hã ĩma rosaꞌrata zé uptabi di. E tihai wa. A norĩ waꞌaba zama ĩsiré robzépata waꞌaba wa.
13 ꞌMadâꞌâ 1:12
14 Ãne wa, ma tô duré isaniꞌaba norĩ hã tiwawa na sahu zahuré, wawa ꞌrãihâ na. Tawamhã Orpa hã ma tô sisaꞌu timaprewa hã sawi, tobꞌrata hârâ na. Taha pari, te oto mo, tisiré aꞌuwẽ u. Rutihi si te isaꞌu za.
15 Morĩ zaꞌu si, te Noẽmi hã Rutihi ma tinha, tisaniꞌaba ma:
— Maꞌãpé ꞌmadâꞌâ. Asidaimama mro hã apâ te oto mo, tisiré aꞌuwẽ norĩ u, duré ihâibaꞌõ norĩ ãma ꞌre iwata zaꞌra mono norĩ u hã. Tahawa, azama maꞌãpé apâ isiré aimorĩ, asaꞌru u hã.
16 Tane nherẽ, ma tô Ruti tãma tinha, ãne:
— Ĩwi rosawi õ di za, asiré ãma ĩmorĩ tõ da hã. Duré ĩꞌãma rosaꞌrata õ di za, za te iꞌairẽmezém na hã. Nimomo aimorĩ da wamhã, wa za tô ãma asiré mo. Duré nimomo ꞌre aihâimana mono da wamhã, wa za wa hã asiré ꞌre ĩhâimana. Asiré aꞌuwẽ norĩ hã ĩsiré aꞌuwẽ te za ꞌre hâimana zaꞌra. Duré Asibꞌapito ãma wa za wa hã ĩnhibꞌapito, ꞌRe ihâimana uꞌâsi mono ãma.
17 Nimame atâꞌâ wamhã, wa za tamemhã wa hã dârâ, atâꞌâzéb ãma. Tame te za ĩnherẽ ni za. Ĩdâꞌâ õ ré, te airẽme da wamhã, Uburé Danhibꞌapito te te tô ĩꞌazâri za. Tihai õ di. Tahawa, te iꞌairẽme da hã, maze uptabi di.
18 Ãne wamhã, Ruti hã te te sima irowairébézém na Noẽmi hã te te waihuꞌu wamhã, niha hã te te tãma nharĩ zahu õ di oto.
19 Tawamhã ma tô timorĩ na ãma uzusi zahuré oto, Belẽ u. Tamomo oto simasisi wamhã, ꞌri ahâ ꞌre, ꞌre idahâimana zaꞌra mono norĩ hã ma tô nemo ꞌre dasiwairõtõ, simasisi zahuré wẽ te. Tame ma tô piꞌõ norĩ hã ãma sisadanharĩ zaꞌra, ãne:
— E õ hã tô Noẽmi.
20 Tawamhã Noẽmi te te sina daꞌawapari wamhã, ma tô dama siꞌmahâ, ãne:
— Noẽmi na hã asiwi ĩꞌmahârâ aba tõ, Robzezém na hã. Mara na si te za oto asiwi ꞌre ĩꞌmahârâ aba mo, Robzé na ĩnhisi tém na si. E tihai wa. ꞌRe ihâimana uꞌâsi mono hã danhipai u iwaihuꞌu pese uptabi hã ĩhâimanazé isé hã te te ĩma pisutu wa.
21 Ã hawi ĩwatobro wamhã, uburé te tiha hã ĩma tihâimana zaꞌra. Tazahã Uburé Danhibꞌapito ma tô ãne hã ĩma ꞌmanha, ĩnhiptihai ãna we apâ te ĩsina siri da. E tihai wa, ma tô bété nasi asiwi ĩꞌmahârâ ꞌwa, Robzezém na hã. ꞌRe ihâimana uꞌâsi mono hã danhipai u iwaihuꞌu pe hã ma tô ĩma pisutu, robzépatazé hã, duré robzeiꞌõ zépatazéb zama.
22 Ãne Noẽmi te te sina isirizé wasuꞌu hã, Moabi na darom nhisi hawimhã, Rutihi me, isaniꞌwa hã, moabita norĩ nhipiꞌõ. Amnho itehâri na da te dasima ãma isãnaꞌrata zaꞌra zém na ma tô aimasisi zahuré, Belẽ u hã oto.
