Mateus 6:1-34
6 — Ãma ꞌre pibui pese zaꞌra waꞌaba mono, marĩ iwẽ hã danhoꞌa ꞌre ꞌmanharĩ zaꞌra waꞌaba mono tõ da, da te ꞌre aiꞌmadâꞌâ wẽ zaꞌra waꞌaba mono zô. Ãne hã ꞌre ꞌmanharĩ zaꞌra waꞌaba mono wamhã, Aimama ꞌwa hâiwa ãma ꞌre isãmra mono nhimipawaꞌâbâzé hã ꞌre waibui waꞌaba mono õ di za.
2 — Tahawa, marĩ isibrobꞌõ norĩ ma, ꞌre sõmri zaꞌra waꞌaba mono wamhã, dama ꞌre wasuꞌu zaꞌra waꞌaba mono tõ, iꞌmanharĩ aba zé hã, hâimana siꞌamoi pese na ꞌre ihâimana zaꞌra mono norĩ, rowahutuzéb ãma duré ꞌri nhiꞌriti na te te ꞌre iꞌmanharĩ zaꞌra mono ne hã. Ãne te ta norĩ hã te te ꞌre ꞌmanharĩ zaꞌra, da te ꞌre uzei wẽ zaꞌra mono da. Tô sena wa za ãne hã aima waihuꞌu zaꞌra waꞌwa: Ta norĩ hã ma tô waibui pa, tiꞌai ãma tipawaꞌâ hã.
3 Tane nherẽ, a norĩ waꞌwa hã niꞌwai wi marĩ zô tiwi irowaptâ, pawapto waꞌaba wamhã, wasuꞌu aba tõ, asiwaihuꞌu uptabi ma hã, te te waihuꞌu tõ da, iꞌmanharĩ aba zé hã.
4 Marĩ dama ꞌre iꞌmanharĩ wẽ zaꞌra waꞌaba mono zé hã, piꞌuriwi ꞌre ihâimana mono da hã iꞌru zahi. Tawamhã Aimama ꞌwa hã, marĩ iꞌmanharĩ aba zé piꞌuriwi te te iꞌmadâ hã te za aima waꞌâbâ ꞌwa.
ꞌRe ihâimana uꞌâsi mono wi rowaptẽrẽzé
5 — ꞌRe rowaptẽrẽ zaꞌra waꞌaba mono wamhã, hâimana siꞌamoi pese na ꞌre ihâimana zaꞌra mono norĩ ne hã, ꞌre ꞌmanharĩ zaꞌra waꞌaba mono tõ. Ta norĩ ma hã, tãma iwẽ, sap sina te te ꞌre irowaptẽrẽ zaꞌra mono da hã, rowahutuzéb ãma hã duré ꞌri nhiꞌriti na bâdâdi nhiꞌoto ãma zama, da te ꞌre ꞌmadâꞌâ zaꞌra mono da. Tô sena wa za ãne hã aima waihuꞌu zaꞌra waꞌwa: Ta norĩ hã ma tô tipawaꞌâ waibui pa, tiꞌai ãma hã.
6 Tane nherẽ, a norĩ waꞌwa hã, ꞌre rowaptẽrẽ zaꞌra waꞌaba mono da wamhã, asibꞌriꞌre waꞌwa u ꞌre asisi aba mono. ꞌRidawa hã asiré ꞌre sitob zaꞌra waꞌaba mono. Taha parimhã ꞌre rowaptẽrẽ zaꞌra waꞌaba mono Aimama wi, ꞌmadâꞌâ waihuꞌu ãna ꞌre ihâimana mono wi. Tawamhã ta hã, uburé marĩ piꞌuriwi ꞌre iꞌmanharĩ zaꞌra waꞌaba mono zé, te te ꞌre iꞌabꞌmadâꞌâ mono hã, te za te te aima ꞌre awaꞌâbâ ꞌwa.
7 — ꞌRe rowaptẽrẽ zaꞌra waꞌaba mono wamhã, aimreme na ãma ꞌre sahu zaꞌra waꞌaba mono tõ, nharĩ pari aba nherẽ, ꞌRe ihâimana uꞌâsi mono nhimiroti te te ꞌre iꞌmadâꞌâ zaꞌra mono õ norĩ te te ꞌre iꞌmanharĩ zaꞌra mono norĩ ne hã. Ta norĩ hã te te ꞌre rosaꞌrata zaꞌra, ꞌRe ihâimana uꞌâsi mono za te te ꞌre iwapari zaꞌra mono na hã, rowaptẽrẽ hã, pa na te te ꞌre iꞌmanharĩ zaꞌra mono zarina.
8 Isine hã ꞌre aihâimana zaꞌra waꞌaba mono tõ. E marĩ wa. Aimama ꞌwa hã te te waihuꞌu pese di, marĩ hã asima ꞌre iwẽ zaꞌra waꞌaba mono zé hã, tiwi ꞌre waptẽrẽ zaꞌra waꞌaba mono wana ré.
9 Tahawa, ãne te za ꞌre aimreme zusi aba mo, ꞌRe ihâimana uꞌâsi mono ma:“Wamama, hâiwa ãma ꞌre iꞌasãmra mono, iwẽ hã asisi iwazé pese na, da te ꞌre iwaihuꞌu zaꞌra mono da si.
10 Daꞌãma ꞌre iꞌasibꞌaꞌuwẽ mono zé hã we iwisi da si, iwẽ hã. Asima ꞌre iwẽ mono zé hã uburé da te ꞌre iꞌmanharĩ zaꞌra mono da si, iwẽ hã, ãme tiꞌai ãma hâiwa ãma ne.
11 Ãhã na dasa hã wama sõmri zaꞌra na, ã bâtâ na da, sô iwanhimnhasi zaꞌra hã.
12 Wawasédé hã waꞌãma ꞌre abꞌmadâꞌâ mono tõ, dawasédé hã da te waꞌãma ꞌre iꞌmanharĩ zaꞌra mono zé hã wa te daꞌãma ꞌre iꞌmadâꞌâ zaꞌra mono õ ne.
13 Duré waꞌru zaꞌra tõ, ꞌre warereꞌe mono da hã, wapibuzéb ꞌre. Maꞌãpé ꞌre waꞌanhoꞌreptui mono, uburé marĩ iwasété wi hã. [E marĩ wa. Ate hã ꞌre idaꞌaꞌmadâꞌâ mono zé, aiwaihuꞌu pe hã duré ate rowẽ isaꞌẽne hã, õne uꞌâ. Tane tô.]”
14 — A norĩ waꞌwa hã, da te aima ꞌre iꞌmanharĩ wasété zaꞌra waꞌaba mono zé hã, asiꞌãma ꞌre ꞌmadâꞌâ zaꞌra waꞌaba mono õ wamhã, Aimama ꞌwa hâiwa ãma ꞌre isãmra mono hã te te duré aiwasédé hã aiꞌãma ꞌre abꞌmadâꞌâ aba mono õ di za.
15 Tazahã, marĩ da te aima ꞌre iꞌmanharĩ wasété zaꞌra waꞌaba mono zé hã, daꞌãma ꞌre ꞌmadâꞌâ uꞌâsi zaꞌra waꞌaba mono wamhã, Aimama ꞌwa hã te za duré te te aiꞌãma ꞌre abꞌmadâꞌâ uꞌâsi ꞌwa, marĩ iwasédé ꞌre iꞌmanharĩ zaꞌra waꞌaba mono zé hã.
Dasai ãna aꞌâ ꞌre idahâimana zaꞌra mono zé*
16 — ꞌRe ihâimana uꞌâsi mono ma, ꞌre aimreme zusi aba mono da, asai ãna aꞌâ ꞌre aihâimana zaꞌra waꞌaba mono wamhã, aiꞌubu zei ãna dama ꞌre asihâiꞌré zaꞌra waꞌaba mono tõ, hâimana siꞌamoi pese na ꞌre ihâimana zaꞌra mono norĩ te te ꞌre iꞌmanharĩ zaꞌra mono ne hã. Ta norĩ hã te ãne te te ꞌre ꞌmanharĩ zaꞌra, da te ꞌre waihuꞌu zaꞌra mono da, sai ãna aꞌâ te te ꞌre irowaptẽrẽ zaꞌra mono na hã. Tô sena wa za aima waihuꞌu zaꞌra waꞌwa, ãne: Ta norĩ hã ma tô waibui pa, tiꞌai ãma tipawaꞌâ hã.
17 Tazahã, ꞌRe ihâimana uꞌâsi mono wi rowaptẽrẽ da, asai ãna aꞌâ aihâimana wamhã, asiwarĩrĩ wẽ na duré asiꞌubu upsõ na,
18 da te aiwaihuꞌu zaꞌra tõ da, asai ãna aꞌâ iꞌaihâimana na hã ꞌRe ihâimana uꞌâsi mono wi, rowaptẽrẽ da. Ãne wamhã, Aimama hã, piꞌuriwi te te iꞌaiꞌmadâ hã te za aima waꞌâ.
Hâiwa ãma, danhibro iwẽ uptabi ꞌre ihâimana zaꞌra mono
19 — Tiꞌai ãma asibro waꞌâbâ zaꞌẽtẽ na ꞌre ihâimana zaꞌra mono hã asima ꞌre ubumroi pese zaꞌra waꞌaba mono tõ, piroꞌo wawẽ za marĩ te te dawi iwamnarĩzéb ãma hã, duré uꞌre wa, za marĩ isiwamnarĩzéb ãma hã, duré isimisaihuri norĩ hã danhibrob zô, te te ꞌre simiꞌuri zaꞌra mono da, ꞌre isisisi mono zéb ãma hã.
20 Tazahã, marĩ iwẽ uptabi hã asima ꞌre ubumroi pese zaꞌra waꞌaba mono, hâiwa ãma hã. Tame piroꞌo wawẽ za te te iwamnarĩ waihuꞌuꞌõ ãma hã, duré za iꞌuꞌre waihuꞌu õ ãma hã, duré isimisaihuri za sô isébré waihuꞌu õ ãma hã, te te isimiꞌuri da hã.
21 E marĩ wa. Nimame asibro aima ꞌre ihâimana zaꞌra waꞌaba mono ãma, te za aipẽꞌẽ na ꞌre aihâimana zaꞌra waꞌaba mo.
Dahâiba na robꞌuiwẽzé
22 — Dato hã robꞌuiwẽzé, dahâiba ma hã. Atõmo zaꞌra waꞌwa hã wẽ wamhã, aihâiba zaꞌra waꞌaba na, te za uburé rowaꞌa hã ãma tihâiba.
23 Tanei õ di, atõmo zaꞌra waꞌwa hã wasété wamhã, aihâiba zaꞌra waꞌaba na te za uburé robra hã ãma tihâiba. Tahawa rowaꞌa hã aihâiba ꞌre, hâimana da nherẽ, robra si hâimana wamhã, ta hã pipa uptabi di za, robra hã.
Robꞌuiprazéb zô si da te dasima ꞌre irobꞌruiwapari zaꞌra mono zé
24 — Dama romhuriꞌwa hã te te romhuri waihuꞌu õ di aiwamhã, isibꞌapito maparane tãma hâimana zahuré wamhã. E marĩ wa. Ihâiba amo hã te za te te ꞌre ꞌruiwapari. Ihâiba amo si te za te te sima ꞌre sawi pese. Niwamhã, ihâiba amo hã te za te te ꞌre wapari pese. Ihâiba amo si te za te te siwi ꞌre wẽꞌõ pese. Tane a norĩ waꞌwa hã ꞌRe ihâimana uꞌâsi mono ma, duré robꞌuiprazé ma, ꞌre romhuri waihuꞌu zaꞌra waꞌaba mono õ di, aiwamhã.
Marĩ na ꞌre idahâtâꞌâ zaꞌra mono zé
25 — Tahawa, wa za ãne aima waihuꞌu zaꞌra waꞌwa: ꞌRe aihâtâꞌâ zaꞌra waꞌaba mono tõ, ꞌre iꞌaihâimana zaꞌra waꞌaba mono zém na hã, marĩ ꞌre ihuri aba mono zém na hã, duré za ꞌre iꞌâhuri aba mono zém na hã. Duré aihâiba na ꞌre aihâtâꞌâ zaꞌra waꞌaba mono tõ, za ꞌre iꞌasiꞌuza zaꞌra waꞌaba mono zém na hã. E dahâimanazé hã, dasa nhipai u ipire ã bâ. Duré e dahâiba hã pire na daꞌuza nhipai u ꞌre hâimana mono ã bâ bété.
26 ꞌMadâꞌâ zaꞌra waꞌaba, si norĩ hã hâiwa na ꞌre isisaꞌrei mono hã. Ta norĩ hã te te ꞌre robzuri mono õ di. Duré amnho hã te te ꞌre tehâri zaꞌra mono õ di. Tisa hã dasai ubumrozéb ꞌremhã te te duré ꞌre ubumro zaꞌra mono õ di. Tane nherẽ, Aimama ꞌwa hâiwa ãma ꞌre isãmra mono hã te isa hã te te tãma ꞌre anhomri. E a norĩ waꞌwa hã si norĩ nhipai u aiwaꞌâbâ zaꞌẽtẽ zaꞌra waꞌaba ã bâ bété.
27 Aiꞌreb zaꞌra waꞌaba hã, e ꞌwa hã ꞌre hâimana hâ mono da, bâdâ hã te te sima apraba waihuꞌu pese bâ, tihâimanazém na ꞌre ihâtâꞌâ mono zéb zarina.
28 — E marĩ wa, te bété ꞌre aihâtâꞌâ zaꞌra waꞌaba mo, ꞌre iꞌasiꞌuza zaꞌra waꞌaba mono zém na hã. Maꞌãpé, ꞌmadâꞌâ zaꞌra waꞌaba, romnhirãrã rom na niha, ꞌre iprédub zaꞌra mono zé hã. Ta norĩ hã te te ꞌre romhuri zaꞌra mono õ di. Tiꞌuza hã te te duré sima ꞌre ꞌmanharĩ zaꞌra mono õ di.
29 Tane nherẽ, wa za tô sena ãne aima waihuꞌu zaꞌra waꞌwa. Apito Saloma hã sibro pese uptabi nherẽ, ã hã romnhirãrã ne hã ꞌre siꞌuza mono õ di, iꞌmadâꞌâ zei uptabi na hã.
30 Ãne te ꞌRe ihâimana uꞌâsi mono hã du, rom na ꞌre isimasa mono hã te te ꞌre abꞌmanharĩ, ꞌmadâꞌâ ze na, bâtâ na ꞌre sirãrã wairébé mono nherẽ, awẽm na, za da te ãma isazu hã roꞌo da. Iꞌasimiꞌumnhasi suru zaꞌra waꞌaba norĩ, e tawamhã te te bété ꞌre aiꞌuza zaꞌra waꞌaba mono õ di za.
31 Tahawa, marĩ na asina ꞌre aihâtâꞌâ zaꞌra waꞌaba mono tõ, ãne hã ꞌre asisadanharĩ zaꞌra waꞌaba mono sina: “E marĩ wa za ꞌrẽne zaꞌra ni. E marĩ wa za âhuri ni.” Duré niwamhã, “E ma hawim na wa za wasiꞌuza zaꞌra ni.”
32 ꞌRe ihâimana uꞌâsi mono waihuꞌuꞌõꞌwa norĩ si, te sô ꞌre sõpré, ã norĩ hã uburé marĩ tãma ꞌre hâimana zaꞌra mono da hã. Aimama ꞌwa hâiwa ãma ꞌre isãmra mono hã te te waihuꞌu pese di, uburé marĩ zô aiwi ꞌre irowaptâꞌâ zaꞌra waꞌaba mono na hã.
33 Tahawa, ꞌRe ihâimana uꞌâsi mono daꞌãma ꞌre Isibꞌaꞌuwẽ mono zép si, asima ꞌre sõré waꞌaba mono, uburé marĩ nhipai u, duré uburé marĩ ꞌRe ihâimana uꞌâsi mono te te sima ꞌre iꞌawẽ mono zé hã. Tawapsi uburé marĩ aihâimanazéb da hã te za te te aima ꞌre anhomri ꞌwa.
34 Tahawa, ꞌre aihâtâꞌâ zaꞌra waꞌaba mono tõ, za iꞌawẽzém na hã. Ta hã te za tô ropire hã sina ãwisi. Waihuꞌu zaꞌra waꞌaba, awẽ sidâpâsi te tô ropire hã ꞌre hâimana zaꞌra, bâtâ mono te hã.
Ĩwaꞌõtõ piꞌreba watsuꞌu mono
^ 6:16 Dasai ãna ꞌre idahâimana zaꞌra mono zé hã, “jejum” te wasuꞌu.
