Mateus 2:1-23
2 Zezusi hã ma tô podo, Belẽ na ꞌri nhoꞌõmo nhisi ãma, Zudéa na danhiptiꞌa nhoꞌõmo nhisi ꞌre, Erodi hã Izaraéu nhihudu norĩ nhiptiꞌai ꞌre, apito na ꞌre hâimana mono ré. Taha ré hã, nima norĩ aibâ norĩ wasi na romnhoréꞌwa norĩ hã ma tô aihutu bâtâ pusizém hawi, Zeruzalẽ u.
2 Ta norĩ hã ma tô anharĩ zaꞌra, ãne:
— E mame te tihâiba ꞌwatébrémi ipoto té hã, Zudeu norĩ nhibꞌapito da hã. Ite wasi hã wa wasiwi ꞌmadâꞌâ ni, bâtâ pusizéb ãma hã. Tahawa, wa tô we aiꞌabaꞌré ni, ãma wawata zaꞌra da.
3 Tawamhã ãne hã apito Erodi te te wapari wamhã, hâtâꞌâ uptabi di, duré uburé Zeruzalẽ ãma ꞌre idasiꞌubumroi mono norĩ zama.
4 Tahawa apito Erodi hã ma tô ꞌrãꞌõtõ, sasedoti norĩ tisiré norĩ ma ipire norĩ hã duré ꞌRe ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ zama. Ta norĩ hã ma tô sadanharĩ zaꞌra, nimame za poto zô, Danhoꞌreptuiꞌwa hã.
5 Tawamhã, ãne ma tô ãma siwi sadaꞌâ:
— Belẽ ãma te za podo, Zudéa tiꞌai ꞌre. Ãne ma tô ꞌRe ihâimana uꞌâsi mono zadawa ꞌmahârâꞌwa hã ãma robꞌuiꞌéré:
6 “A hã Belẽ, Zuda tiꞌai ꞌremhã, dama asurure na ꞌre aihâimana mono õ di, Zuda ꞌre, ꞌri waꞌõno dama isaꞌẽne ꞌre ihâimana zaꞌra mono norĩ wazarimhã.E marĩ wa. Aihawi te za podo danhibꞌapito hã, ĩnhibꞌaꞌuwẽ Izaraéu nhihudu norĩ, za te te ꞌre isimroi mono da hã.”
7 Tawamhã Erodi hã ma tô sô tihârâ zaꞌra piꞌuriwi, aibâ norĩ bâtâ pusizém hawi isihutu norĩ zô. Ma tô sadanharĩ zaꞌra, bâdâ hã iꞌuwaibaba na te te tãma wasuꞌu zaꞌra da, wasi isihâiꞌrézé hã. Tahawa, ma tô tãma wasuꞌu zaꞌra.
8 Taha pari ma tô tãma robꞌru zaꞌra, Belẽ u siꞌabaꞌré da, ãne:
— Mo oto aiꞌabaꞌréi waꞌaba. ꞌWatébrémi zô asinharĩ pese zaꞌra waꞌaba za. Sõpẽtẽ zaꞌra waꞌaba wamhã, we asiwi ĩpoꞌre puꞌu aba, ĩzama itẽme ĩmorĩ da, ãma ĩwata da.
9 Tawamhã apito te te siwi wapari parimhã, ma tô oto aiꞌabaꞌré, Belẽ u. Bâdâdi na siꞌabaꞌréi ré, ma tô duré wasi hã siwi ꞌmadâꞌâ, tô õ hã bâtâ pusizéb ãma tirob ãma ré te te iꞌmadâꞌâ zaꞌra hã. Ta hã isõwa te timorĩ zaꞌra. Tawamhã ma tô mazazâ, ꞌwatébrémi inomrozém nhisiwi.
10 Tawamhã wasi hã te te siwi ꞌmadâꞌâ wamhã, toi uptabi zaꞌra di. Duré tipẽꞌẽ ꞌremhã te ꞌre to zaꞌra.
11 Tawamhã ꞌri para u ma tô asisi. Tame ma tô siwi sõpẽtẽ ꞌwatébrémi hã, ina Maria hã iré sãmra ré. Tawamhã hiꞌrãtitõ ma tô asimro. Ma tô ãma tiwata zaꞌra. Taha pari, ma tô ꞌridawa zaꞌra, tinhimiroꞌwapézé tinhoprubzéb ré te te iꞌwasari hã. Ma tô tãma sõmri zaꞌra, tinhoprubzé hã; ẽtẽ waipo pré oru hã, wedewati isadaze hã, duré wedewati isadaze iꞌuꞌẽne hã, mirra na isisi hã.
12 Tawamhã ꞌRe ihâimana uꞌâsi mono hã ma tô poꞌre puꞌu zaꞌra, sõtõ ꞌrowi, Erodihi u apâ siꞌabaꞌré tõ da. Tahawa ma tô bâdâdi amo na apâ aiꞌabaꞌré, tinhiptiꞌai u hã.
Zuzé norĩ hã Ezitu u tiꞌra ré isimani zahuré zé
13 Aibâ norĩ apâ tirob u siꞌabaꞌré zaꞌu hã, hâiwa hawi Uburé Danhibꞌapito ma romhuriꞌwa hã ma tô Zuzéhé ma sihâiꞌré, isõtõ ꞌrowi. Ãne te tãma tinha:
— Maꞌãpé aiwahutu. Saꞌra na ꞌwatébrémi hã. Ina hã iré saprõni. Ezitu u aimani waꞌaba, tame aimasisi aba da, apâ te iꞌaipoꞌre puꞌuzéb u. E marĩ wa. Erodi hã aiꞌuté zô rĩtĩ wa, te te wĩrĩ da.
14 Tawamhã Zuzé hã ma tô udu, barana. Ma tô saꞌra aiꞌuté hã. Ina hã ma tô iré saprõ, Ezitu u.
15 Tawamhã tame ma tô aimasisi zahuré, Erodi hã idâꞌâzéb u. Ãne hã ma tô tiromhâiba, te te sina uwaimrami da, Uburé Danhibꞌapito tizadawa ꞌmahârâꞌwai ma, te te iwaihuꞌuzéb zarina: “Wa hã ĩꞌra zô, wa tô hâ, Ezitu hawi morĩ da.”
ꞌWatébrémi norĩ, da te isõꞌrebzârizé
16 Erodi hã aibâ norĩ bâtâ pusizém hawimhã te te tãma irobꞌrãmi zaꞌra na te te waihuꞌu wamhã, ma tô abꞌrui pese. Tahawa ma tô tiꞌru, da te simro da, uburé ꞌwatébrémi norĩ hã, zahadu maparane ãma iwahub õ norĩ hã, Belẽ ꞌremhã duré isababa daro isisõré mono na hã. Ãne hã ma tô ꞌmanha, rowasuꞌu te te iwaihuꞌuzéb zarina, wasi isihâiꞌrézém na hã.
17 Tawamhã ãne ma tô sina uwaimra, ꞌRe ihâimana uꞌâsi mono zadawa ꞌmahârâꞌwa Zeremia te te irobꞌuiꞌérézé hã, ãne:
18 “Rama na romnhisi ãma dawawa hã ma tô wapari zaꞌra ni, ꞌre idazadari ꞌrãihâ zaꞌra mono zé hã.Ta hã Raqueu hã te aiwaꞌõ, tiꞌra norĩ ãma. Pẽꞌẽzé uptabi wa, te te sima wẽ õ di, da te ipẽꞌẽtété da hã, iꞌra norĩ hã uburé tiwi siꞌutõrĩ wa.”
Ezitu hawi, Zuzé norĩ hã apâ inebzé
19 Erodi hã dâꞌâ parimhã, Zuzéhé ma isõtõ ꞌrowi ma tô Uburé Danhibꞌapito ma hâiwa hawi romhuriꞌwa hã sihâiꞌré, Ezitu ãma.
20 Ãne te tãma tinha:
— Aiwahutu. Saꞌra na ꞌwatébrémi hã. Ina hã iré saprõni apâ, Izaraéu nhihudu norĩ nhiptiꞌai u. Aibâ norĩ hã ꞌwatébrémi te te siwi wĩrĩ da, te te sima iwẽ zaꞌra hã ma tô tidâꞌâ zaꞌra.
21 Tawamhã Zuzé hã ma tô wahudu. Ma tô saꞌra ꞌwatébrémi hã. Ina hã ma tô iré saprõ apâ, Izaraéu nhihudu norĩ nhiptiꞌai u.
22 Tane nherẽ, Arquelau, apito Erodihi ꞌra timama nhibrobꞌre, Zudéa ãma te te ꞌre daꞌaꞌmadâꞌâ mono da, isébré na te te waihuꞌu wamhã, pahi di, tamomo imorĩ da hã. Tawamhã sõtõ ꞌrowi marĩ te te iꞌmanharĩ da hã ꞌRe ihâimana uꞌâsi mono te te duré poꞌre puꞌu parimhã, Zuzé hã ma tô mo, Galiléia na danhiptiꞌa nhoꞌõmo nhisi u.
23 Tame ma tô ꞌre simasisi zahuré, Nazaré na ꞌri waꞌõtõ nhisi ãma. Ãne hã ma tô tiromhâiba, te te sina uwaimrami da, ꞌRe ihâimana uꞌâsi mono zadawa ꞌmahârâꞌwa te te irobꞌuiꞌérézé hã, ãne: “Te za oto da te ꞌre sisi zaꞌra, Nazaré ãma iprédum na.”
