Mateus 14:1-36
14 Taha bâtâ mono na hã, apito Erodi Galiléia ãma daꞌmadâꞌâꞌwa hã ma tô wapa, Zezusihi wasuꞌu hã.
2 Tahawa ma tô tite romhuriꞌwa norĩ ma tinha, ãne:
— Ã hã Zuwã Batista, apâ ihâiwaꞌudu. Tahawa, tãma waihuꞌu pese di, marĩ dama iꞌmanharĩ waihuꞌuꞌõ te te ꞌre iꞌabꞌmanharĩ mono da hã.
3 Erodi hã ma tô tiꞌru, Zuwã hã da te pawasisi da, duré dazazéb ꞌre, da te sẽrẽ da. Erodiaha uꞌâbâ ma tô ãne hã ꞌmanha. Ta hã, isisãnawã Filipihi mro.
4 Zuwã Batista hã ma tô aré te te tãma ꞌre waihuꞌu uꞌâsi, ãne: “ꞌRe ihâimana uꞌâsi mono nhimiroti zahi na Mozési te te irobꞌuiꞌérézém na hã, ãma aimro waihuꞌu õ di, Erodizaha ãma hã.”
5 Tahawa apito Erodi hã te te aré iwĩrĩ da si, Zuwã Batista hã. Tane nherẽ, dama hã pahi di, Zuwã Batista hã da te dasiwi ꞌre ꞌmadâꞌâ zaꞌra mono wa, ꞌRe ihâimana uꞌâsi mono zadawa ꞌmahârâꞌwa na.
6 Tawamhã apito Erodihi waptãꞌãzém na dato da te dasiwi iꞌmanharĩzém na hã, Erodiaha ꞌra sipiꞌõ hã ma tô apese*, uburé danhoꞌre. Tawamhã Erodihi ma, te te tãma rowẽ pese wa,
7 ma tô ropisutu zahi hã tãma ꞌmanha, siwaꞌru marĩ hã te te tiwi waptẽrẽ wamhã, za te te tãma isõmri na hã.
8 Tawamhã ina hã te te tãma irotizéb zarina, ma tô tiwi rowaptẽ, ãne:
— Wa ĩsima wẽ, Zuwã Batistaha ꞌrã hã ĩma sõmri da, pratu wa, ãhã na awaꞌawi.
9 Tawamhã apito Erodihi wi ma tô tirobzeiꞌõ pese. Tane nherẽ, ropisutu zahi isiré isaihuri norĩ nhoꞌa te te tãma ꞌmanharĩ wa, ma tô tiꞌru, te te iwaptẽrẽzéb uwaibaba, da te tãma ꞌmanharĩ da.
10 Ma tô tiꞌru, Zuwã Batista hã da te ꞌrãnhizâri da, dazazéb ꞌre sab ré.
11 Tawamhã Zuwãhã ꞌrã hã ma tô azarutu ma dasiwi âri ni, pratu wa. Ta hã ma tô tiꞌâ, tina ma.
12 Tawamhã Zuwãhã siré ꞌre inomro mono norĩ hã ma tô ihâiba hâ zô aiꞌabaꞌré. Ma tô siwi tiꞌâ. Ma tô duré ãma siwi tiꞌa. Taha parimhã ma tô aiꞌabaꞌré, Zezusihi ma, ãne na te te rowasuꞌu zaꞌra da.
Zezusi hã daꞌahâ uptabi hã, te te idaꞌasaihurizé
13 Tawamhã Zuwãhã ma iromhâimanazém na, Zezusi hã te te waihuꞌu wamhã, ma tô danhiti siwaprosi mo ubaꞌre na, aꞌubuni u. Tane nherẽ, daꞌahâ uptabi hã isãmrazé, da te waihuꞌu zaꞌra wamhã, ꞌri waꞌõtõ mono hawimhã ma tô itẽme aiꞌabaꞌré ni, tiꞌai baba daza na.
14 Tawamhã Zezusi hã ubaꞌre hawi watobro wamhã, duré daꞌahâ uptabi hã te te daꞌaꞌmadâꞌâ wamhã, ma tô daꞌãma aiwamri pese. Tahawa ihâzé ré norĩ hã ma tô apese, dawazari ihâimana zaꞌra hã.
15 Tawamhã hâiwahâ pesere wa oto, Zezusihi siré ꞌre inomro mono norĩ hã ma tô itẽme sina rotété zaꞌra. Ãne te tãma nharĩ zaꞌra:
— Rowahutuꞌwa. Ãme aꞌubuni wi, wa wahâimana zaꞌra ni. Ma tô duré oto tihâiwahâ pesere. Maꞌãpé dazatõrĩ zaꞌra na, ꞌri waꞌõno isimasa mono u dasiꞌabaꞌré da, dasa hã da te dasima uipra zaꞌra da.
16 Tane nherẽ, Zezusi hã ma tô ãne ãma sadaꞌâbâ zaꞌra:
— Mare di. Dasiꞌabaꞌréi õ di za. Maꞌãpé a norĩ waꞌwa hã, dasa dama azaꞌra waꞌaba.
17 Tawamhã ma siwi sadaꞌâ, ãne:
— Iꞌuꞌẽtẽ wapu hã imrotõ na, te wama tihâimana zaꞌra, duré maparanere peꞌa hã.
18 Tawamhã Zezusi hã ma ãma sadaꞌâbâ zaꞌra, ãne:
— Pé we ĩma waibui waꞌaba, iꞌuꞌẽtẽ wapu hã, peꞌa zama.
19 Tawamhã ma tô dama robꞌru, duiroire wa dasiꞌubumro da. Taha pari ma tô waibu, imrotõ na iꞌuꞌẽtẽ wapu norĩ hã duré maparane peꞌa hã. Hâiwa u ma tô robꞌmadâ. ꞌRe ihâimana uꞌâsi mono ãma te duré tiwata. Taha pari iꞌuꞌẽtẽ wapu hã ma tô te te wẽꞌẽ. Isiré ꞌre inomro mono norĩ ma, ma tô te te sõmri. Ta norĩ hã ma tô te te dama sõmri zaꞌra.
20 Uburé ma tô tasaihuri ni. Ma tô duré da te ꞌmahâpãrĩ. Tawamhã isiré ꞌre inomro mono norĩ hã 12 na siꞌõno hã ma tô ubumro zaꞌra, iwẽꞌẽ isiꞌatarẽme ré hã.
21 Tawamhã dasiré isaihuri hã 5 miu na aibâ norĩ si hã, piꞌõ norĩ duré aiꞌuté norĩ zaꞌrata zamai ãna hã.
Zezusi hã â nhisi baba imorĩzé
22 Tawamhã ãma ronomro õ ré, Zezusi hã ma tô robꞌru, isiré ꞌre inomro mono norĩ ma, ubaꞌre wa sisisi da, iwana sisaꞌrei mono da â zara u, te te daꞌazatõrĩ ré, oto dasiꞌabaꞌré da hã.
23 Tawamhã te te daꞌazatõrĩ parimhã, Zezusi hã ma tô saiꞌu ẽtẽ ꞌrãihâ u, siwaprosi te te rowaptẽrẽ da. Mara wamhã oto, tame te tihâiba siwaprosi.
24 Taha ré hã, ubaꞌre hã te oto tihâiba, â waꞌwa. Â sisasi hã ma tô ubaꞌre hã te te ahâri, rowaꞌu hã iwaꞌrãmi te te rowapõrĩ wa.
25 Tawamhã robzaꞌrã ré, Zezusi hã ma tô itẽme timorĩ zaꞌra, â nhisi baba.
26 Tawamhã â nhisi baba itẽme imorĩ zaꞌra na te te ꞌmadâꞌâ zaꞌra wamhã, isiré ꞌre inomro mono norĩ hã ma tô tãma aꞌrãmi pese zaꞌra. Ãne ma tô hârâ ꞌrãihâ na sima ꞌmahârâ zaꞌra:
— Dahâiba warõ te wei mo.
Tawamhã pahi te, ma tô duré tizadari zaꞌra.
27 Tane nherẽ, Zezusi hã awaꞌawi ma tô ãne ꞌmahârâ zaꞌra:
— Aꞌrãmi zaꞌra waꞌaba tõ! Wa hã! Aipahi zaꞌra waꞌaba tõ!
28 Tawamhã Pedru hã ma tô ãne ꞌmahâ:
— Uburé Danhibꞌapito, tô a hã wamhã, maꞌãpé ĩma ꞌru na, ãma atẽme ĩmorĩ da, â nhisi baba.
29 Tawamhã Zezusi hã ma sadaꞌâ, ãne:
— Maꞌãpé we aimorĩ!
Tawamhã Pedru hã ubaꞌre hawi ma tô siꞌra. Â nhisi baba ma tô mo, Zezusihi nhoꞌõmoi baba.
30 Tane nherẽ, rowaꞌu te te iꞌâsisasisizé hã te te ꞌmadâꞌâ wamhã, ma tô tãma tipahi. Tahawa, ma tô aré ãzé. Tawamhã, hârâ ꞌrãihâ na ma tô sina ꞌmahâ, ãne:
— Wanhibꞌapito, maꞌãpé ĩnhoꞌreptu na!
31 Tawamhã awaꞌawi pesere, ma tô Zezusi hã sô mawẽ. Ma tô paꞌâ. Ãne te tãma tinha:
— E niha bâ, asina ĩꞌumnhasizé hã surure di. E marĩ wa, ma tô asiwawã.
32 Tawamhã ubaꞌre wa, ma tô tizasi zahuré. Zasi wi, ma tô rowaꞌu hã sazâ.
33 Tawamhã isiré ꞌre inomro mono norĩ hã ma tô ãma tiwata zaꞌra, Zezusihi ãma, ãne:
— Tô sena uptabi, a hã ꞌRe ihâimana uꞌâsi mono ꞌra!
Zezusi hã ꞌri waꞌõno Zenezaré ãma te te idaꞌapesezé
34 Tawamhã Zezusi hã isiré ꞌre inomro mono norĩ me, isõꞌu na zara u te te saprĩ zaꞌra wamhã, ma tô aihutu, Zenezaré na tiꞌa nhisi u.
35 Tamemhã, Zezusi hã da te dasiwi waihuꞌu wamhã, iwasuꞌu na ma tô ãma dasima ropé zaꞌra ni, daro mono bâ. Tahawa ma tô itẽme ãwisi zaꞌra ni, ihâzé ré norĩ hã.
36 Tawamhã ma tô tiwi waptẽrẽ zaꞌra ni, ihâzé ré norĩ hã iꞌuza nhisutu si te te tiwi upi zaꞌra da. Tawamhã iꞌuza hâ nhisutu si te te nasi iꞌupi zaꞌra hã ma tô uburé tipese zaꞌra.
Ĩwaꞌõtõ piꞌreba watsuꞌu mono
^ 14:6 apese “apese” na damreme “dasiꞌrẽne” na hã
