Lucas 2:1-52
2 Taha bâtâ mono na hã, Roma te apito Céza Agustu hã ma tô tiꞌru, dahâiba mono bâ te te ꞌre idaꞌaꞌmadâꞌâ mono zéb ꞌremhã, danhisi na da te robꞌuiꞌéré zaꞌra da, dazaꞌrada ité hã hâimana da.
2 Quirino hã rotiꞌwa na hâimana ré, ma tô ã hã imorĩꞌrada danhisi na dazaꞌrada hã tihâiba, Siria na tiꞌa nhisi ꞌremhã.
3 Tahawa, uburé pese danhisi na da te robꞌuiꞌéré zaꞌra da, ma tô aiꞌabaꞌré ni, date ꞌri nhoꞌu, ꞌre idapoto zaꞌra mono zé mono bâ.
4 Tahawa, Zuzé hã ma tô mo Nazaré hawi, Galiléia danhiptiꞌa nhoꞌõmo ꞌremhã, ꞌri nhoꞌu Belẽ na isisi u, Zudéa na danhiptiꞌa nhoꞌõmo nhisi ꞌremhã, apito Davi hã ipotozéb u. Tamomo ma tô mo Zuzé hã, tinhisi na te te dame robꞌuiꞌéré da, apito Davihi nhihudu wa.
5 Maria hã ma tô siré saprõ, ãma mro da, ropisutu zahi zarina isimiꞌmadâꞌâ na tãma ihâimana hã, isisi na da te dame robꞌuiꞌéré zahuré da. Wasã ré te saprõ.
6 Tawamhã Belẽ ãma hâimana zahuré ré, bâdâ hã ma tô oto iwa waptãrã, aiꞌuté ipotozéb da hã.
7 Tahawa Mariaha ma, ma aiꞌuté hã oto podo, iꞌra ipotoꞌrada hã. Poto wamhã, zazahâ hâiwaré na ma tô ubu, ꞌwatébrémi hã. Ma tô duré tihi, wedeꞌre danhimizama ꞌre isaihuri mono zé wa, dazaꞌwarizéb ãma isaꞌwarizéb da hã, ꞌriꞌre baba tãma ꞌmaihâimana zahuré õ wa.
Poneꞌẽrebâ ꞌmadâꞌâꞌwa norĩ ma, hâiwa hawi romhuriꞌwa norĩ te te irowasuꞌu zaꞌra zé
8 Tamemhã poneꞌẽrebâ ꞌmadâꞌâꞌwa norĩ hã te mara bâre poneꞌẽrebâ hã ꞌmadâꞌâ zaꞌra, rom na Belẽ ꞌrata.
9 Tawamhã hâiwa hawi Uburé Danhibꞌapito ma romhuriꞌwa hã ma tô tãma sihâiꞌré zaꞌra. Uburé Danhibꞌapito te, rowaꞌa zaꞌẽne hã ma tô duré imana wawi rowaꞌa zaꞌra. Tawamhã ma tô tãma tipahi pese zaꞌra.
10 Tane nherẽ, hâiwa hawi romhuriꞌwa hã ma tô tãma nharĩ zaꞌra, ãne:
— Aipahi zaꞌra waꞌaba tõ! Rowasuꞌuwẽ Ité, wa we aima âri zaꞌra waꞌwa, uburé dapoto mono bâ ãma dama irowẽ zaꞌẽtẽ uptabi zaꞌra da hã.
11 Ã bâtâ na Danhoꞌreptuiꞌwa hã ma podo, Davihi zaꞌrui ãma. Ta hã Cristu*, Uburé Danhibꞌapito.
12 Ã hã, tô sena ãma iwaihuꞌu zaꞌra waꞌaba zéb da hã: Aiꞌuté pré hã te za asiwi isõpẽtẽ ꞌwa, zazahâ na ubu na nomro ré, duré wedeꞌre danhimizama ꞌre isaihuri mono zéb ꞌre, nomro ré.
13 Tawamhã waptu na rosaꞌrese õ ré, ma tô hâiwa hawi romhuriꞌwa siré, isiré hâiwa hawi romhuriꞌwa norĩ hã sihâiꞌré zaꞌra, ahâ uptabi na. Ta norĩ hã te tinhoꞌre na ꞌRe ihâimana uꞌâsi mono ãma tiwata zaꞌra, ãne:
14 — ꞌRe ihâimana uꞌâsi mono, hâiwa ãma ꞌre isãmra mono ãma si, tô iꞌru zahi, ãma ꞌre idawata zaꞌra mono da hã!Duré tiꞌai ãma rowẽ hã dama ꞌre ihâimana zaꞌra mono da si, rowẽ uꞌâsi ꞌre nomro mono da, te te sima ꞌre iꞌawẽ mono norĩ hã!
15 Tawamhã hâiwa hawi romhuriꞌwa norĩ hã apâ hâiwa u siꞌabaꞌré zaꞌu hã, poneꞌẽrebâ ꞌmadâꞌâꞌwa norĩ hã ma tô sima nharĩ zaꞌra, ãne:
— Oto wasiꞌabaꞌréi waꞌaba Belẽ u, Uburé Danhibꞌapito te te wama iwaihuꞌu zaꞌra hã, wa te sabu zaꞌra da, marĩ ihâimanazé hã.
16 Tahawa siꞌabaꞌré na ma tô aiꞌabaꞌré, Belẽ u. Tame ma tô sõpẽtẽ zaꞌra, Maria hã duré Zuzéhé zama. Ma tô duré siwi ꞌmadâ, aiꞌuté wedeꞌre danhimizama ꞌre isaihuri mono zé wa, inomro hã.
17 Te te siwi ꞌmadâꞌâ wamhã, imama norĩ ma, ma tô rowasuꞌu zaꞌra, hâiwa hawi romhuriꞌwa norĩ te te tãma irowasuꞌu zaꞌra zé hã, ꞌwatébrémi ãma.
18 Tawamhã poneꞌẽrebâ ꞌmadâꞌâꞌwa norĩ nhimirowasuꞌu, uburé da te iwapari zaꞌra norĩ hã ma tô ãma tatobꞌuzu zaꞌra ni.
19 Tane nherẽ, Maria hã tipẽꞌẽ ꞌre, ma tô sima tété isimirowasuꞌu zaꞌra hã. Te duré ãma rosaꞌrata uꞌâsi.
20 Taha pari, poneꞌẽrebâ ꞌmadâꞌâꞌwa norĩ hã ma tô apâ aiꞌabaꞌré, ꞌRe ihâimana uꞌâsi mono ãma wata zaꞌra mono sina, uburé marĩ te te iꞌmadâꞌâ zaꞌra zém na duré te te iwapari zaꞌra zém na zama, hâiwa hawi romhuriꞌwa norĩ hã te te tãma iwaihuꞌu zaꞌra zéb zarina.
ꞌWatébrémi, Zezusi na imama norĩ te te isisi zahuré zé
21 Tawamhã ipotozém na 8 na bâdâ ãma ne parimhã, ꞌwatébrémi da te isihâiwata nhizârizé bâtâ na ma tô imama norĩ hã sisi zahuré Zezusi na, ã hã isisi hã poto õ ré, hâiwa hawi romhuriꞌwa te te ipisutu siromo zéb zarina.
22 Tawamhã Maria duré Zuzé isihâiba pese zahuré zéb da hã bâdâ iwa waptãꞌã wamhã, Mozésihi nhimiroti zahi te te ãma uwaimrami zahuré da hã, ma tô aiꞌuté hã siré subzari zahuré, Zeruzalẽ u, Uburé Danhibꞌapito ma, apâ te te sõmri zahuré da,
23 Uburé Danhibꞌapito nhimiroti zahi hã nomro wa, ãne: “Uburé daꞌra siꞌwatébrémi ipotoꞌrata norĩ hã te za aimawi ꞌre hâimana zaꞌra mono da hã da te ꞌre sõmri zaꞌra, Uburé Danhibꞌapito ma.”
24 Tinhoprubzé te te duré sõmri zahuré da, ma tô tineb zahuré, Uburé Danhibꞌapito nhimiroti zahi zarina, ãne: “maparane naire hã niwamhã maparane utuꞌure hã.”
Simiã hã ꞌRe ihâimana uꞌâsi mono ãma iwatazé
25 Tawamhã Zeruzalẽ ꞌremhã te ꞌre sãmra, Simiã na aibâ isisi hã. Ta hã aibâ ꞌre imorĩ wẽ, duré ꞌRe ihâimana uꞌâsi mono te te ꞌre iwazé pese mono, duré Izaraéu nhihudu norĩ nhoꞌreptuzéb zô ꞌre isimipari mono. ꞌRe ihâimana uꞌâsi mono Pẽꞌẽzani hã te isiré ꞌre hâimana.
26 Taha ma, ma tô ꞌRe ihâimana uꞌâsi mono Pẽꞌẽzani hã tãma ropisutu, dâꞌâ õ ré, Cristu za te te iꞌmadâꞌâ na hã, Uburé Danhibꞌapito za we te te isatõrĩ hã.
27 Tawamhã ꞌRe ihâimana uꞌâsi mono Pẽꞌẽzani te te tãma iwaihuꞌuzéb zarina, ma tô mo, ꞌri ꞌrãihâ* u. ꞌWatébrémi Zezusi hã, ꞌri ꞌrãihâ u imama norĩ ꞌRe ihâimana uꞌâsi mono nhimiroti zahi te te ãma uwaimrami zahuré da, te te ãwisi zahuré wamhã,
28 Simiã hã ma tô saꞌra tipa, ꞌwatébrémi hã. Tawamhã ꞌRe ihâimana uꞌâsi mono ãma te tiwata, ãne:
29 — Uburé Danhibꞌapito, maꞌãpé ãhã na hã oto waprosi, aima romhuriꞌwa hã rowẽ sina siꞌré da, tãma iropisutuzé hã ãma tãma uwaimrami wa.
30 E marĩ wa. Asiminhoꞌreptuzé hã ĩtõmo na te oto sabui wa,
31 uburé dapoto mono bâ datõmo nhoꞌa sada irobzaꞌra pese zé hã.
32 Ta hã rowaꞌa, zudeuꞌõ norĩ, bâdâdi iwẽ na te te ꞌre iꞌanhimroi mono da hã, duré ta hã asibꞌaꞌuwẽ norĩ Izaraéu nhihudu norĩ ma, rowaꞌaꞌwa da hã.
33 Tawamhã imama norĩ hã ma tô ãma titobꞌuzu zahuré, Simiã mreme ꞌwatébrémi ãma te te inharĩzé, te te wapari zahuré wamhã.
34 Tawamhã Simiã, iwẽ hã ma tô tãma pisutu zahuré. Ãne ma tô duré Mariaha ma tinha, Zezusihi na ma:
— Ã hã ꞌwatébrémi hã, ꞌRe ihâimana uꞌâsi mono ma tô pisutu, daꞌahâ na te te ꞌre idaꞌaꞌmoropãrĩ mono da hã, duré daꞌahâ na te te ꞌre idaꞌawahutu mono da hã, Izaraéu nhihudu norĩ ꞌremhã. Ta hã te za ꞌRe ihâimana uꞌâsi mono te, rowaꞌõno hã dama hâiꞌré. Tawamhã daꞌahâ na te za sada ꞌre dahâimana zaꞌra.
35 Ãne wamhã, da te ꞌre irosaꞌrata zaꞌra mono zé hã te za sõꞌawi ꞌre hâimana zaꞌra. Tawamhã robzeiꞌõ hã, sibꞌézé iꞌwa pese uptabi ne, te za aipẽꞌẽ ꞌremhã roꞌrazâ, Maria.
Ãnahã wasuꞌu
36 Tawamhã tame te duré ꞌre sãmra, ꞌRe ihâimana uꞌâsi mono zadawa ꞌmahârâꞌwa sipiꞌõ, Ãna na isisi hã. Ta hã Fanuéu ꞌra sipiꞌõ, Aséhé nhihudu. Duré ta hã ãma wahub zaꞌẽtẽ di. Imro hã tiwi dâꞌâ parimhã, ma tô mro ãna ꞌre sãmra, 7 na wahum na siré ꞌre simasisi zahuré mono pari, siꞌãma mro zahuré parimhã.
37 Tawamhã taha ãma ma tô oto ãma tiwahu, 84 na. ꞌRe ihâimana uꞌâsi mono nhorõwa ꞌri ꞌrãihâ ꞌwawi waꞌra ꞌre, ma tô ꞌre sãmra uꞌâsi, niwa watobro ãna. Te duré ꞌre wata uꞌâsi, ꞌRe ihâimana uꞌâsi mono ãma si, barana duré bâtâ na zama. Sai ãna te duré ꞌre hâimana, ꞌRe ihâimana uꞌâsi mono wi te te ꞌre rowaptẽrẽ mono da hã.
38 Taha bâtâ na hã ma tô itẽme zaꞌra sina rotété. ꞌRe ihâimana uꞌâsi mono ãma ma tô tiwata. ꞌWatébrémi hã ma tô duré tãma wasuꞌu zaꞌra, Zeruzalẽ ãma ꞌre idasiꞌubumroi mono norĩ nhoꞌreptuzéb zô, ꞌre isimipari zaꞌra mono norĩ ma hã.
Zuzé hã Mariaha me, Nazaré u apâ inebzé
39 Zuzé norĩ Mariaha me, Uburé Danhibꞌapito nhimiroti zahi, te te uburé ãma aꞌuwaimrami zahuré parimhã, apâ ma tô sina siri zahuré Nazaré u, Galiléia ꞌremhã, ꞌre isimasisi zahuré mono zéb u.
40 Tawamhã ꞌwatébrémi hã ma tô prédu mono. Isiptede hã te te duré tãma sina hâimo uꞌâsi. Te te duré rowaihuꞌu pese uptabi di. ꞌRe ihâimana uꞌâsi mono nhimipawaptobzé hã te duré isiré ꞌre hâimana.
ꞌWatébrémi Zezusi hã, ꞌRe ihâimana uꞌâsi mono nhorõwa ꞌri ꞌrãihâ ãma isãmrazé
41 Wahup sidâpâsi, te Zezusihi mama norĩ hã ꞌre neb zahuré Zeruzalẽ u hã, Pascoa na dato nhisi ꞌre ihâimana mono u.
42 Tawamhã Zezusihi ãma 12 na ãma wahu wamhã, imama norĩ hã ma tô duré tineb zahuré datoi u, te te ꞌre iꞌmanharĩ uꞌâsi zahuré mono zéb zarina.
43 Tawamhã dato hã siꞌutõrĩ parimhã, te oto apâ tineb zahuré, tinhorõwa u. Tane nherẽ, ꞌwatébrémi Zezusi hã te Zeruzalẽ ãma nhamra uꞌâ, isaꞌu zahuré, imama norĩ te te waihuꞌu zahuré ãna.
44 Ma tô ãma rosaꞌrata zahuré, isiré idasiꞌabaꞌré norĩ siré morĩ newa. Tawamhã ineb zahuré zé, misi bâdâ wahuré ãma imorĩ zahuré zém na ma tô oto sô amrami zahuré. Tahawa te sô tirĩtĩ zahuré, tisiwadi norĩ wazari, duré tisiwaihuꞌu norĩ wazarib zama.
45 Tawamhã te te sõpẽtẽ zahuré õ wa, ma tô apâ sina siri zahuré Zeruzalẽ u hã, sô rĩtĩ zahuré da.
46 Tawamhã siꞌubdatõ bâdâ ãma ne parip si, ma tô sõpẽtẽ zahuré, ꞌRe ihâimana uꞌâsi mono nhorõwa ꞌri ꞌrãihâ ãma. Tame te Zezusi hã nhamra, Re ihâimana uꞌâsi mono nhimiroti zahi na robꞌuiꞌéré na dama rowahutuꞌwa norĩ wazari. Ta norĩ hã te awapa. Te duré nasi azadanha.
47 Tawamhã uburé iwapariꞌwa norĩ hã ma tô ãma titobꞌuzu zaꞌra isimirowaihuꞌu na, duré te te nasi ãma iꞌazadaꞌâbâzém na zama.
48 Imama norĩ hã te te duré ꞌmadâꞌâ zahuré wamhã, ma tô ãma titobꞌuzu zahuré. Tawamhã ina hã ma tô ãne tãma tinha:
— Ĩꞌra, e tiha da, ma tô ãne hã wama iꞌmanha. Aimama me wa wahâtâꞌâ sina asô ꞌre warĩtĩ.
49 Tawamhã Zezusi hã ma tô ãne sadaꞌâbâ zahuré:
— E marĩ da, te ĩzô ꞌre airĩtĩ aba mo. E ĩꞌãma rosaꞌrata waihuꞌu aba ã bâ, Ĩmama nhorõwa ãma, za ĩnhamra na hã ĩma iꞌru zahi zarina.
50 Tane nherẽ, te te sadaihuꞌu zahuré õ di, te te tãma inharĩ zahuré zém na hã.
51 Tawamhã Zezusi hã timama norĩ siré ma tô apâ mo, Nazaré u. Te te duré ꞌre wapari pese uꞌâsi zahuré. Tawamhã ina hã te uburé ãne na ãma iromhâimanazém na te te ãma ꞌre rosaꞌrata uꞌâsi, tipẽꞌẽ ꞌre.
52 Zezusi hã iprédu mono siré, te rowaihu iwẽ hã te te tãma sina hâimo uꞌâsi. Taha na ꞌRe ihâimana uꞌâsi mono te te iwẽsãmrizé hã te te sina hâimo uꞌâsi. Da te iwẽsãmri zaꞌra zéb zama te dama saꞌẽtẽ uꞌâsi zaꞌra.
