Lucas 13:1-35
13 Tawamhã taha bâtâ na, niꞌwam norĩ tame ihâimana zaꞌra hã ma tô Zezusihi ma rowasuꞌu zaꞌra, Pilatu hã nima norĩ, Galiléia hawi aꞌuwẽ norĩ te te isimro na hã, danhimizama na ꞌRe ihâimana uꞌâsi mono ma, ãma tãma sõprub zaꞌra ré.
2 Tawamhã Zezusi hã ma tô aibâ norĩ ma nharĩ zaꞌra, ãne:
— E te ãma irosaꞌrata zaꞌra waꞌwa, Galiléia hawim norĩ ãma, danhipai u tiwasédé te te ꞌmanharĩ zaꞌra wa, ãne hã te te irobzépata zaꞌra na hã.
3 Mare di! Tô sena wa za ãne aima waihuꞌu zaꞌra waꞌwa: Aiwasété na asisãmri zaꞌra waꞌaba wa, ꞌRe ihâimana uꞌâsi mono u aipizari zaꞌra waꞌaba õ wamhã, ta norĩ isiꞌutõrĩ ne, te za uburé aiꞌutõrĩ ꞌwa za.
4 E niwamhã te duré ãma irosaꞌrata zaꞌra waꞌwa, aibâ norĩ 18 na ihâiba zaꞌra norĩ isiꞌutõrĩ ãma hã, Siloé ãma ꞌri ꞌrãihâ isisiwib zaꞌra sime wamhã. E ta norĩ hã danhipai u tiwasédé hã te te ꞌmanharĩ zaꞌra wa, uburé Zeruzalẽ ãma ꞌre idasiꞌubumroi mono norĩ nhipai u.
5 Mare di! Tazahã, aiwasété na asisãmri zaꞌra waꞌaba wa, ꞌRe ihâimana uꞌâsi mono u aipizari zaꞌra waꞌaba õ wamhã, aibâ norĩ isiꞌutõrĩ ne, te za tô uburé aiꞌutõrĩ ꞌwa za.
Robꞌrã figu wede iꞌrãi õ
6 Tawamhã Zezusi hã ma tô tãma rowasuꞌu zaꞌra, romnhimiréꞌé na, ãne:
— Aibâ te, uva ꞌru wazarimhã, te robꞌrã figu wede hã ꞌre sa. Tawamhã nimahã bâtâ na ma tô mo, iꞌrã zô rĩtĩ da. Tane nherẽ, iꞌrã hã te te ꞌmasãmri õ di.
7 Tahawa, ma tô tinha buru ꞌmadâꞌâꞌwai ma, ãne: “Siꞌubdatõ ma tô ĩꞌãma tiwahu, robꞌrã figu wede u, iꞌrã zô nasi te sabui ré hã. Tane nherẽ, ꞌrãi õ uꞌâsi di. Tahawa, maꞌãpé sizâri, te te roꞌwaꞌrutu tõ da!”
8 Tane nherẽ, tãma buru ꞌmadâꞌâꞌwa hã ma tô sadaꞌâ, ãne: “Apito, aꞌâ sa duré, misi wahum na. Wa za tiꞌa zu, imana wawimhã. Duré tiꞌai wazarizém na wa za tãma tiꞌai waza za.
9 Wahub amo na ꞌrãi wamhã, wẽ di za. Oto ꞌrãi õ wamhã, te za ĩma iꞌru za, te sizâri da.”
Zezusi hã, piꞌõ isihâbâ te te ipesezé, sabadu na
10 Tawamhã nimahã sabadu na Zezusi hã te duré dama rowahutu, Zudeu norĩ te, rowahutuzéb ãma.
11 Tame te piꞌõ hã dame tihâiba, 18 na ãma iwahu hâzé ré ꞌre hâimana mono ré hã, waꞌuburé iwa ꞌre hâimana mono wa. Tahawa sihâpâ na te ꞌre mo. Wãi wahutu waihuꞌu õ di.
12 Tawamhã Zezusi hã te te ꞌmadâꞌâ wamhã, dawaꞌwa u ma tô sô hâ. Ãne te tãma tinha:
— Piꞌõ, aihâzé wi, te za oto asima iwẽ na ꞌre aihâimana mo.
13 Tawamhã tinhibꞌrada hã ma tô ãma tino. Tahawa awaꞌawi pesere ma tô wãi wahudu. Taha pari ꞌRe ihâimana uꞌâsi mono ãma te tiwata.
14 Tane nherẽ, rowahutuzé ꞌmadâꞌâꞌwa hã ma tô tizahi, Zezusi hã sabadu na te te pese wa. Tahawa ma tô ãne dama tinha:
— Imrotõ na bâdâ hã te ꞌre hâimana zaꞌra, romhurizéb da hã. Taha bâtâ na si te za we ꞌre anomro aba mo, da te ꞌre aipese zaꞌra waꞌaba mono da hã. Mare di, sabadu na hã.
15 Tawamhã Wanhibꞌapito hã ma tô sadaꞌâ, ãne:
— Aihâimana siꞌamoi pese na ꞌre iꞌaihâimana zaꞌra waꞌaba mono norĩ! E sabadu na, ate zaꞌra waꞌwa powawẽ ibaꞌu hã duré niwamhã awaru poꞌrepore hã, waꞌra hawi ꞌre wasihu zaꞌra waꞌaba mono a bâ, â te te ꞌre âhuri mono da, ꞌre simroi waꞌaba mono da hã.
16 Tawamhã, ã hã piꞌõ Abraꞌãhã nhihudu hã, Satanasi 18 wahum na te te ꞌre itété mono hã, e sabadu na te te pese ãna, te te ꞌre itété mono wi hã.
17 Tawamhã Zezusi hã ãne te te nharĩ wamhã, iꞌruiwapariꞌwa norĩ hã ma tô aséb zaꞌra. Tane nherẽ, daꞌahâ hã te ãma dasima rowẽ pese zaꞌra ni, marĩ iwẽ te te ꞌre iꞌabꞌmanharĩ mono zém na hã.
Romnhamare mostarda na, isisi na romnhimiré
18 Tawamhã Zezusi hã te duré dama rowahutu, ãne:
— E marĩ ne, aiwa ꞌRe ihâimana uꞌâsi mono daꞌãma ꞌre isibꞌaꞌuwẽ mono zé hã. E marĩ na, wa za ãma romnhimiréꞌé.
19 Ta hã aiwa, romnhamare mostarda na isisi ne, aibâ tiburu ãma te te iꞌaꞌre ne hã. Prédu wamhã, ma tô tiꞌrãihâ pese. Wede ne ma tô tihâiba. Tahawa, si norĩ hã ma tô tizasi hã sima ꞌmanharĩ zaꞌra, ipanhipti na.
20 Tawamhã ma tô duré dazadanharĩ zahu, ãne:
— E marĩ na, wa za duré ãma romnhimiréꞌé, ꞌRe ihâimana uꞌâsi mono daꞌãma ꞌre isibꞌaꞌuwẽ mono zém na hã.
21 Ta hã aiwa piꞌõ hã iꞌuꞌẽtẽ wapu mapuzém na amnho trigu za te te iwazari ne saꞌẽtẽ na, uburé te te iwazari pese zéb u.
ꞌRidawa iꞌre suꞌure
22 Tawamhã Zezusi hã Zeruzalẽ u morĩ wa oto, ma tô te te dama rowahutu ꞌri nhoꞌõmo mono na, duré ꞌri waꞌõtõ mono na zama.
23 Tawamhã niꞌwa hã ma tô sadanha, ãne:
— Apito, e daꞌumro na si te za danhoꞌreptuzé hã dasina uwaimrami zaꞌra ni.
Tahawa, Zezusi hã ma tô uburé dama tinha, ãne:
24 — Maꞌãpé, sada ꞌre asiptete zaꞌra waꞌaba mono, ꞌridawa iꞌre suꞌure na ꞌre asisisi aba mono da hã. Tô sena wa za ãne aima waihuꞌu zaꞌra waꞌwa: Daꞌahâ na te za da te dasima ꞌre wẽ zaꞌra, iwa ꞌre danhisisi mono da. Tane nherẽ, ꞌre danhisisi waihuꞌu mono õ di za.
—
25 ꞌRi tedeꞌwa hã nimahã na ꞌridawa te te sitob da, sô wahutu wamhã, rowi te za aimasa waꞌwa. Tawamhã te za nasi iꞌridawa taꞌa zaꞌra waꞌwa sô. Ãne te za nasi asiwi iꞌmahârâ ꞌwa: “Apito, ãma wama ꞌridawa zaꞌra na.” Tane nherẽ, te za ãne asadaꞌâbâ zaꞌra waꞌwa: “Ĩma aiwaihuꞌu zaꞌra waꞌaba õ di. E ma hawimhã a norĩ waꞌwa hã.”
26 Tawamhã ãne te za tãma asiwasuꞌu zaꞌra waꞌwa: “Wa norĩ hã wa tô asiré ꞌre wasaihuri. Wate ꞌri nhiꞌriti ãma te duré ꞌre irowahutu mo.”
27 Tane nherẽ, te za ãne aima nharĩ zaꞌra waꞌwa: “Ĩma aiwaihuꞌu zaꞌra waꞌaba õ di, nima hawim na hã a norĩ waꞌwa. Mo oto uburé ĩnhiti aiꞌabaꞌréi waꞌaba, marĩ iwasété si ꞌre iꞌmanharĩ zaꞌra waꞌaba mono hã.”
28 Tawamhã Abraꞌã norĩ hã, Izaqui, Zaco duré uburé ꞌRe ihâimana uꞌâsi mono zadawa ꞌmahârâꞌwa norĩ hã, ꞌRe ihâimana uꞌâsi mono daꞌãma ꞌre isibꞌaꞌuwẽ mono zéb ãma te za iꞌmadâꞌâ zaꞌra waꞌwa. Tane nherẽ, a norĩ waꞌwa hã rob u te za asãmra waꞌaba ni za. Tawamhã te za ꞌre aiꞌruꞌru uꞌâsi waꞌaba mo. Te za duré ꞌre aiꞌwa hi sitete uꞌâsi zaꞌra waꞌaba mo.
29 Daꞌahâ na te za aihutu ni, bâtâ pusizém hawimhã, duré bâtâ zasizém hawimhã, duré hâiwa nhimire hawimhã duré hâiwa nhimiꞌe hawib zama. Tawamhã ta norĩ hã te za aiꞌubumro, saihuri da, ꞌRe ihâimana uꞌâsi mono daꞌãma ꞌre isibꞌaꞌuwẽ mono zéb ãma hã.
30 Tahawa, ãhã na daꞌrãsutuꞌu ꞌre ihâimana zaꞌra mono hã, imorĩꞌrata na te za oto tihâimana zaꞌra za. Duré ãhã na imorĩꞌrata na ꞌre ihâimana zaꞌra mono hã, daꞌrãsutuꞌu te za oto tihâimana zaꞌra za.
Zezusi hã, Zeruzalẽ ãma ipẽꞌẽzézé
31 Tawamhã tô taha bâtâ pibuzém na awaꞌawi, nima norĩ farizeu norĩ hã ma tô ꞌrâwi sina rotété zaꞌra Zezusihi u. Ãne ma tô tãma robꞌru zaꞌra:
— Mo oto aimorĩ ã hawi, nimomo. Apito Erodi hã te sima wẽ, te te aiwĩrĩ da.
32 Tawamhã Zezusi hã ma tô asa tãma robꞌru zaꞌra, ãne:
— Mo oto aiꞌabaꞌréi waꞌaba, tãma ĩzadawa wasuꞌu zaꞌra waꞌaba da, wapsã wawẽre ne ꞌre imorĩ ma, ãne: Ãhã na hã duré awẽmhã wa za waꞌuburé hã dama anhamra. Wa za duré daꞌapese. Tawamhã siꞌubdatõ bâtâ ãma wa za ꞌrãsutu, ĩnhimiromhuri hã.
33 — Tane nherẽ, wa amnhasi ãhã na ĩmorĩ na te ãma uzusi da, duré awẽmhã, duré awẽ amo na hã. E marĩ wa. ꞌRe ihâimana uꞌâsi mono zadawa ꞌmahârâꞌwa hã, da te ꞌmaiwĩrĩ waihuꞌu õ wa za, Zeruzalẽ nhiti hã.
34 — Zeruzalẽ, Zeruzalẽ, a hã te ꞌre iꞌanhimroi mo, ꞌRe ihâimana uꞌâsi mono zadawa ꞌmahârâꞌwa norĩ hã! Ẽtẽ na te duré ꞌre iꞌanhimroi mo, ꞌRe ihâimana uꞌâsi mono timreme ꞌwapéiꞌwa te te atẽme ꞌre iꞌazatõrĩ mono hã! Wa tô aré õne uꞌâ te ĩsima ꞌre wẽ uꞌâsi, uburé aiꞌra norĩ hã te ubumro da, siꞌa hã tiꞌra zawi te, ꞌre ipapo zaꞌra mono ne. Tane nherẽ, asima wẽ zaꞌra waꞌaba õ di.
35 Tahawa, asõrõwa zaꞌra waꞌaba na, niꞌwa hã ãma sapaꞌa õ di za oto. Tô sena wa aima waihuꞌu zaꞌra waꞌwa: Asiwi ĩꞌmadâꞌâ aba õ di za oto, ãne inharĩ zaꞌra waꞌaba zéb u: “Uburé Danhibꞌapito nhisi na we imorĩ ma hã tãma ꞌre irowẽ uptabi mono da si, iwẽ hã!”
