Hebreu 5:1-14
5 Duréihã ma tô niꞌwam norĩ hã ꞌRe ihâimana uꞌâsi mono hã te te ꞌre apisutu, tisiré sasedoti* norĩ nhipai u, pire uptabi na te te ꞌre romhuri zaꞌra mono da, tisiré Zudeu norĩ ãma, ꞌRe ihâimana uꞌâsi mono ma. Ta norĩ si ma tô ꞌRe ihâimana uꞌâsi mono ma, danhoprubzé hã te te tãma ꞌre sõmri zaꞌra daꞌupana, ãma ꞌre iwata zaꞌra mono zéb da hã. Danhimizama ma tô duré daꞌupana te te tãma ꞌre simro, dawasédé hã te te dama ãma ꞌre iꞌapari mono zéb da hã.
2 Ta norĩ hã sasedoti ipire uptabi norĩ hã ma tô hâimana nhibꞌuware na ꞌre hâimana zaꞌra, tiꞌai ãma dasiré ꞌre hâimana zaꞌra mono wa. Tahawa, niꞌwam norĩ hã tiwasédé te te ꞌre iꞌmanharĩ zaꞌra mono zém na ꞌrâwi ꞌre isiwaihuꞌu zaꞌra mono õ norĩ ãma, ma tô sasedoti norĩ hã ꞌre siwamri zaꞌra, sada hã ꞌre sahi suꞌu zaꞌra mono ãna. E marĩ wa. Ta norĩ hã aiwa tiwasété wi, ꞌre hâimana nhiptete waihuꞌu zaꞌra mono õ wa, ma tô tisiré norĩ ãma ꞌre siwamri zaꞌra sasedoti norĩ hã, aiwa ꞌre hâimana zaꞌra mono wa.
3 Duré ta norĩ hã dawasété uꞌâbâ si, marĩ hã ꞌRe ihâimana uꞌâsi mono ma, te te ꞌre sõmri zaꞌra mono õ di, dawasédé hã te te dama ãma ꞌre iꞌapari mono zéb da hã. Siꞌudâna zama ma tô marĩ hã te te tãma ꞌre sõmri zaꞌra sasedoti norĩ hã, dasine tiwasédé hã te te ꞌre ꞌmanharĩ zaꞌra mono wa.
4 E ma tô tawamhã niꞌwam norĩ hã ꞌrâwi ꞌre sipisutu zaꞌra siꞌuihâ na, sasedoti ipire uptabi na dama ꞌre ihâimana zaꞌra mono da hã. Mare di. Dasiꞌuihâ na ꞌre dasipisutu zaꞌra mono õ di, dapire da hã. ꞌRe ihâimana uꞌâsi mono nhimipisutu zarina si, ma tô sasedoti ipire uptabi na hã ꞌre hâimana zaꞌra. Duréihã Arã hã sasedoti ipire uptabi na tisiré norĩ ma, ꞌre hâimana mono da, ꞌRe ihâimana uꞌâsi mono te te ipisutu ne, ma tô ta norĩ hã te te ꞌre apisutu, tô õhõ si dapisutuꞌwai wa.
5 Tane duré, Cristu hã siꞌuihâ na sipisutu õ di, Sasedoti danhipai u Ipire uptabi na dama ꞌre ihâimana mono da hã. ꞌRe ihâimana uꞌâsi mono si ma tô pisutu. Duréihã ma tô niꞌwa hã ãne na ãma robꞌuiꞌéré, ꞌRe ihâimana uꞌâsi mono te te irotizém na hã, tiꞌra ma:“A hã ĩꞌra. Ã bâtâ na hã wa hã Aimama oto.”
6 Ãne duré, ꞌRe ihâimana uꞌâsi mono mreme na Ibaihâ iwazé pese na robꞌuiꞌéré amo hã, Cristuhu ãma:“A hã sasedoti norĩ, dama ꞌre ihâimana zaꞌra mono ne, te za dama ꞌre aihâimana uꞌâsi mo, duréihã Mequizédéqui hã sasedoti na pire na dama ꞌre ihâimana mono zéb zarina.”
7 Zezusi hã tiꞌai ãma ꞌre morĩ ré hã, ma tô wawa sina Timama wi rowaptẽ, mreme ꞌrãihâ na, za te te irobzépatazém na te te pawaptob da. Tawamhã ꞌRe ihâimana uꞌâsi mono, Zezusihi mreme te te wapari wamhã, ma tô sima wẽ tô, te te pawaptob da. Zezusi hã uburé marĩ hã Imama te te tãma ipisutuzéb uwaibaba si, te te ꞌre abꞌmanharĩ mono da, te te sima ꞌre wẽ uꞌâsi mono wa, ma tô Imama hã sima wẽ, te te pawaptob da. Duré ꞌRe ihâimana uꞌâsi mono, niha na hã te te sima wẽ ꞌwaꞌâhã, te aré tô tiwaihuꞌu pese na hã sõꞌreptu, dâꞌâ tõ da.
8 Zezusi hã ꞌRe ihâimana uꞌâsi mono ꞌra, ꞌre hâimana mono nherẽ, ma tô te te ꞌre robzépata, tiꞌai ãma ꞌre morĩ ré hã. Taha zarina ma tô ãne hã siꞌãma waihuꞌu: Niꞌwam norĩ hã, ꞌRe ihâimana uꞌâsi mono nhimiroti te te ꞌre ꞌmadâꞌâ pese zaꞌra mono da, te te sima ꞌre wẽ zaꞌra mono wamhã, taha zarina te za tô te te ꞌre robzépata zaꞌra, tiꞌab ré. Ãne ma tô Zezusi hã siꞌãma waihuꞌu.
9 Tawamhã Zezusi hã tiꞌab ré, te te ꞌre robzépata mono nherẽ, Imama te te tãma iwẽzéb zarina si te te ꞌre abꞌmanharĩ mono wa, ma tô sina uwaimra, uburé isimiroti te te ꞌre iꞌmadâꞌâ pese zaꞌra mono norĩ hã te te ꞌre sõꞌreptu zaꞌra mono da, hâiwa ãma dâꞌâ ãna ꞌre hâimana uꞌâsi zaꞌra mono da.
10 Duréihã ꞌRe ihâimana uꞌâsi mono, ma tô Zezusi hã pisutu, Sasedoti danhipai u Ipire uptabi na dama ꞌre hâimana mono da, tãma daꞌãma romhuriꞌwa da, duréihã Mequizédéqui hã sasedoti na pire na dama ꞌre ihâimana mono ne, uburé ma, ꞌre hâimana mono da.
ꞌRe ihâimana uꞌâsi mono nhimiroti mono bâ ipire wasuꞌu
11 Ãne na te duré aima ãma rowasuꞌu zaꞌra waꞌaba da, wa tô aré ĩsima wẽ. Tane nherẽ, pire di, te aima ãma iwaihuꞌu zaꞌra waꞌaba zéb da hã. E marĩ wa. Aima rowasuꞌu hâtob zaꞌra waꞌaba wa.
12 A norĩ waꞌwa hã Cristu, ꞌre isaze naꞌrata zaꞌra waꞌaba mono zém na ma tô aiꞌãma tironomro pese zaꞌra waꞌwa. Ãhã wamhã, te aré oto isazeiꞌwa norĩ ma, romnhoréꞌwa da, ꞌre aihâimana zaꞌra waꞌaba mo, ꞌRe ihâimana uꞌâsi mono nhimiroti na rowasuꞌuꞌwa da, ta norĩ ma hã. Tane nherẽ, te zahadu a norĩ waꞌwa hã isazetéꞌwa ne, ꞌre aihâimana zaꞌra waꞌaba mo. ꞌRe ihâimana uꞌâsi mono nhimiroti hã duréihã da te aima ꞌre iwasuꞌu naꞌrata zaꞌra waꞌaba mono zé hã e aima waihuꞌu zaꞌra waꞌaba ã bâ, te za apâ iwasuꞌu na da te aima ãma ꞌre sahu zaꞌra waꞌwa. Aiꞌuté hã tisai uptabi na ꞌre saihuri waihuꞌu mono õ wa, te za tinhoꞌu na si hã ꞌre saihuri, ina norĩ hã isai uptabi hã te te tãma ꞌre ai waihuꞌu zaꞌra mono õ wa. Tane, a norĩ waꞌaba ma, te za tô ꞌRe ihâimana uꞌâsi mono nhimiroti hã duréihã da te aima ꞌre iwasuꞌu naꞌrata zaꞌra waꞌaba mono zép si, da te aima ꞌre wasuꞌu zaꞌra waꞌwa apâ, ꞌRe ihâimana uꞌâsi mono nhimiroti ipire hã zahadu aima pibui prã zaꞌra waꞌaba wa, ꞌre iwaihuꞌu pese zaꞌra waꞌaba mono zéb da hã, asiꞌuihâ na.
13 Aiꞌuté norĩ ma, tãma waihuꞌu õ di, ꞌRe ihâimana uꞌâsi mono ma iwẽ hã da te ꞌre iꞌmanharĩ zaꞌra mono zéb da hã, duré tãma iwẽꞌõ hã da te ꞌre ꞌmanharĩ zaꞌra mono tõ da hã. Tane te duré a norĩ waꞌwa hã zahadu ãne na ꞌre aihâimana zaꞌra waꞌaba mo. Aiꞌuté ne, te zahadu asimizaꞌreseꞌõ uꞌâsi ꞌre aihâimana zaꞌra waꞌaba mo, aima waihuꞌu zaꞌra waꞌaba õ wa.
14 Iprédum norĩ si te tisai uptabi na hã ꞌre saihuri. Tane duré, ꞌRe ihâimana uꞌâsi mono nhimiroti ipire hã tãma iwaihuꞌu pese zaꞌra norĩ si te za waihuꞌu zaꞌra, ꞌRe ihâimana uꞌâsi mono ma, iwẽ si da te ꞌre iꞌmanharĩ zaꞌra mono zé hã, duré tãma iwẽꞌõ hã da te ꞌre iꞌmanharĩ zaꞌra mono õ zé hã. Uburé marĩ hã niha iwẽ zô, duré niha iwasété zô, te te ꞌre ipibu zaꞌra mono zéb zarina si, te za te te ꞌre waihuꞌu pese zaꞌra, ta norĩ ma si waihuꞌu pese wa.
Ĩwaꞌõtõ piꞌreba watsuꞌu mono
^ 5:1 sasedoti ꞌRe ihâimana uꞌâsi mono nhorõwa ꞌri ꞌrãihâ ãma daꞌãma romhuriꞌwa.
