Daniéu 9:1-27
9 Dariu hã, Zersihi ꞌra, Média na tiꞌai waꞌõtõ nhoꞌõmo nhisi hawi aꞌuwẽ, Babilonia na dazaꞌru nhisi ãma, te apito na dama ꞌre hâimana.
2 Isiꞌapitozém na zahadu misi ãma iwahub ãma, wa hã Daniéu wa tô ibaihâ iwazéb zahi na hã ãma romnhoré. Uburé Danhibꞌapito, tizadawa ꞌmahârâꞌwa Zeremiaha ma, te te inharĩzéb zarina Zeruzalẽ ꞌri siprum haré za 70 na ãma iwahubzém na hã wa tô duré ãma rosaꞌrata.
3 Ĩma robzeiꞌõ zarina, daꞌuza ihâi hâzaꞌõtõ na wa tô ĩsiꞌuza. Taha wa, wa tô duré ꞌruꞌa wa nhamra. Ĩsa hã wa tô duré tirẽ. Wa tô Uburé Danhibꞌapito ꞌRe ihâimana uꞌâsi mono ma, saꞌẽtẽ mre, te tiwi iwaptẽrẽzé te te ĩma ꞌmanharĩ da.
4 Ãne wa tô Ĩnhibꞌapito, ĩte ꞌRe ihâimana uꞌâsi mono ma ĩsiwẽꞌõ sina hã tãma mre:
— Uburé Danhibꞌapito ꞌRe ihâimana uꞌâsi mono, a hã asaꞌẽtẽ uptabi di, duré asiptete uptabi di! A hã ma tô asimiropisutu zahi hã te te ꞌre iꞌasawi pese zaꞌra mono norĩ ma, duré asimiroti te te ꞌre iwapari pese zaꞌra mono norĩ ma, tãma ꞌre iꞌmadâꞌâ uꞌâsi zaꞌra mo. Õne uꞌâ te duré ta norĩ ma asimizawizé hã tãma ꞌre ihâiꞌré uꞌâsi zaꞌra mo.
5 Tane nherẽ, wa norĩ hã wa tô wawasédé wa te ꞌre ꞌmanharĩ zaꞌra. Wawasété zaꞌra wa, duré aiwi wasipizari zaꞌra wa, wa tô asimiroti wi wasina ꞌre wasiꞌré zaꞌra.
6 Duré asibꞌaꞌuwẽ asadawa ꞌmahârâꞌwa norĩ, wa te wasiwi ꞌre wapari zaꞌra mono õ di, asisi na wama iꞌrãnhoꞌõmo norĩ ma, duré wama ipire norĩ ma, duré wahiꞌrata norĩ ma, duré uburé Izaraéu nhihudu norĩ ma, te te ꞌre irowasuꞌu zaꞌra mono zém na hã.
7 Uburé Danhibꞌapito, a hã te õne uꞌâ iꞌuwaibaba na si dama ꞌre iꞌarowairébé mo. Tane nherẽ, ãhã na wa norĩ asibꞌaꞌuwẽ Zudéa na romnhisi ãma, duré Zeruzalẽ ãma, duré dazaꞌru ꞌrâwi ꞌre ihâimana zaꞌra mono u, duré romhâ na dazaꞌru ꞌre ihâimana zaꞌra mono u ãma iꞌaropéi mono norĩ zama tiꞌai waꞌõtõ nhoꞌõmo ꞌremhã, wa tô uburé ta norĩ me simisutu na aima ꞌre wanhiséb zara. Ãne hã ma tô wama iꞌmanharĩ zaꞌra, apâ aiwi ꞌre wasipizari zaꞌra mono wa.
8 Wanhibꞌapito, wama iꞌrãnhoꞌõmo norĩ me, duré wama ipire norĩ me, duré wahiꞌrata norĩ me, duré uburé wa norĩ hã wa tô wawasédé hã apâ wa te aiwi ꞌre ꞌmanharĩ zaꞌra. Tahawa, tô uburé aima ꞌre wanhiséb zaꞌra mono di.
9 Tane nherẽ, a hã daꞌãma ꞌre aiwamri pese mono di. Duré dawasété pari ꞌwa na te ꞌre aihâimana mo, wa norĩ hã aiwi ꞌre wasipizari zaꞌra mono nherẽ.
10 Uburé Danhibꞌapito, wate ꞌRe ihâimana uꞌâsi mono, wa te wasiwi ꞌre aiwapari mono õ di. Duré asibꞌaꞌuwẽ asadawa ꞌmahârâꞌwa norĩ asimiroti na te te ãma wama ꞌre irowasuꞌu zaꞌra mono na hã ãma ꞌre wanomro mono õ di.
11 Uburé Izaraéu nhihudu norĩ hã ma tô tihâimanazém na asimiroti hã siwi pru. Ma duré asimiroti nhiti apa zaꞌra. Wawasédé hã wa te aiwi ꞌre ꞌmanharĩ zaꞌra mono wa, ma tô wama ipisutu zaꞌra, ropire hã duré romhâimanazé ipipa hã Mozési te te ãma irobꞌuiꞌéré zarina wanhisiwib zaꞌra waptãꞌã da hã.
12 A hã wama ꞌre iꞌamhâzépa mono zém na hã ma tô wama ãma iꞌuwaimrami zaꞌra, wama iꞌrãnhoꞌõmo norĩ ma zama. Tahawa, tô itete na ma tô iwahâ zaꞌra. Niwamhã ãne hã ropipa ihâimanaꞌõ, Zeruzalẽ nhisiwi iwaptãꞌã sine hã.
13 Ãne na Mozési hã te te ãma irobꞌuiꞌéré zarina, ma tô oto marĩ ipipa hã wazô tiwatobro zaꞌra. Ãne nherẽ, wa norĩ wawasédé, wa te rẽme waihuꞌu zaꞌra õ di. Duré a hã Uburé Danhibꞌapito, wate ꞌRe ihâimana uꞌâsi mono apâ ꞌre iwaꞌawẽsãmri mono zô hã, wasima ꞌre wanhopré mono õ di, wawasété nhiti ꞌre iwasiꞌré zaꞌra mono zarina, duré sena na asimiroti hã wa te ꞌre iwapari pese zaꞌra mono zéb da hã.
14 Tahawa, Uburé Danhibꞌapito, za ãma iwahâ zaꞌra zéb da, waꞌãma iꞌmadâꞌâ zaꞌra zarina, ma tô wanhisiwi waptãꞌã zaꞌra da hã iꞌmanha. A hã Uburé Danhibꞌapito, wate ꞌRe ihâimana uꞌâsi mono, iꞌuwaibaba na si te uburé marĩ na dama ꞌre iꞌarowairébé mo. Tane nherẽ, asimiroti na wama ꞌre iꞌarowaihuꞌu mono zé hã wa te wasiwi ꞌre ꞌmadâꞌâ pese mono õ di.
15 Uburé Danhibꞌapito, wate ꞌRe ihâimana uꞌâsi mono, a hã ma tô Ezitu hawi asibꞌaꞌuwẽ norĩ iꞌawazere na asiptede isaꞌẽtẽ na ꞌre iꞌaihâimana mono zé hã ihâiꞌré. Tahawa, te duré asisi zaꞌẽne hã ãhã na zama zahadu ꞌre hâimana uꞌâsi. Tane nherẽ, wawasédé, wa tô wa te ꞌre ꞌmanharĩ zaꞌra. Tahawa tô wa norĩ, aiwi iꞌupaiꞌwa na wa tô ꞌre wahâimana zaꞌra.
16 Uburé Danhibꞌapito, a hã daꞌãma ꞌre aiwamri pese mono di. Tahawa, maꞌãpé Zeruzalẽ da, asitiꞌru na ꞌre iꞌaihâimana mono zém na hã ãma uzusi uꞌâsi mono tõ, ate ꞌri nhoꞌõmo zada hã duré ate saꞌa iwazéb zahi zada zama. Wawasété uꞌâbâb zaꞌra hã, duré wahiꞌrata norĩ wasété uꞌâbâ hã te uburé aꞌuwẽ tiꞌai waꞌõtõ nhoꞌõmo mono bâ, Zeruzalẽ waptoma ꞌre ihâimana zaꞌra mono norĩ hã ãma ꞌre waꞌẽ zaꞌra, Zeruzalẽ ãma aꞌuwẽ ãma hã, duré uburé asibꞌaꞌuwẽ norĩ ãma zama.
17 Wate ꞌRe ihâimana uꞌâsi mono, maꞌãpé wapari, te ãma aiwi iwaptẽrẽzé hã. Prédu ma, asibꞌaꞌuwẽ te te ãma aiwi iwaptẽrẽzé hã maꞌãpé wapari. Danhibꞌapito, asisi zaꞌẽtẽ ma ropibu ma, maꞌãpé asõrõwa ꞌri ꞌrãihâ apâ wẽsãmri, da te dasiwi irẽme hã.
18 Ĩte ꞌRe ihâimana uꞌâsi mono, ãma aima ĩmremezé hã, maꞌãpé wapari. Duré maꞌãpé ato hã ꞌridawa, wama iropsiwamnarĩ zaꞌra zé hã ãma ꞌmadâꞌâ da, ate ꞌri nhoꞌõmo ãma hã. Ãne wa tô wanhimirowaptẽrẽzé hã aima ꞌmanharĩ zaꞌra ni, a hã daꞌãma ꞌre aiwamri pese mono zarina, wawẽ na, duré sena na ꞌre wahâimana zaꞌra mono õ nherẽ.
19 Wanhibꞌapito maꞌãpé wawapari zaꞌra na! Wanhibꞌapito, duré wawasédé hã waꞌãma ꞌmadâꞌâ zaꞌra õ di za! Wanhibꞌapito, ãma aima iwamreme zusizé hã maꞌãpé wapari. Duré maꞌãpé we wapawaptob zaꞌra na. ꞌRe ihâimana uꞌâsi mono na, a hã uburé da te dasiwi aiwaihuꞌu da, duré za iwanhoꞌreptu zaꞌra na hã ronomro tõ, ĩte ꞌRe ihâimana uꞌâsi mono. E marĩ wa. Wa norĩ asibꞌaꞌuwẽ wa, duré Zeruzalẽ hã ate ꞌri nhoꞌõmo wa.
Gabriéu, rosawẽrẽ na te te ãma isaprĩzé wasuꞌu
20 Tawamhã wa zahadu tãma mre. Zahadu wa duré ĩwasété na tãma ĩsiwẽꞌõzém na, duré ĩnhibꞌaꞌuwẽ norĩ wasété zaꞌra zém na zama hã te tiwi irowaptẽrẽ na ãma uzusi, Uburé Danhibꞌapito, ĩte ꞌRe ihâimana uꞌâsi mono wi, saꞌa ite iwazéb zahi ma ropibu ma.
21 Zahadu te rowaptẽrẽ ré, tô õ hã hâiwa ãma romhuriꞌwa Gabriéu, ĩnhotõ ꞌrowim ne ĩtõmo na te iꞌmadâ hã, ma tô hâiwa hawi saꞌẽtẽ we wara. Ma tô ĩꞌrata mazazâ ꞌrâwi, siꞌubdatõ ãma bâtâ zaꞌratazéb ãma, marĩ zata na ꞌre idanhoprub zaꞌra mono zé bâtâ ãma hâiwahâ.
22 Ãne te ĩma tinha:
— Daniéu, asõtõ ꞌrowim ne marĩ iꞌaꞌmadâꞌâzém na te ãma aima saprĩ da, wa we atẽme mo.
23 A hã tiwi irowaptẽrẽzém na ãma sãnaꞌrata wi, ma tô ꞌRe ihâimana uꞌâsi mono hã ãma asadaꞌâ. Tãma hã asawi uptabi di. Tahawa, ma tô we ĩma robꞌru, marĩ iꞌaꞌmadâꞌâ mono zém na te ãma aima saprĩ da. Tahawa, maꞌãpé ĩwapari pese, te aima ãma isaprĩzé hã waihuꞌu pese da.
24 — Daniéu, asibꞌaꞌuwẽ ma, duré ate ꞌri nhoꞌu iwazéb zahi ma, ꞌRe ihâimana uꞌâsi mono nhimihâzé aiꞌãma zaꞌra waꞌaba ihâimanazéb ãma hã te za ãma tiwahu, 70 x 7 na ãma iwahum na, õhõ wi ꞌre iꞌaiwasété zaꞌra waꞌaba mono zé hã isiꞌutõrĩzéb u. Tahawa, te za isibꞌaꞌuwẽ norĩ, ꞌRe ihâimana uꞌâsi mono, iwasédé te te oto ãma ꞌre iꞌaꞌmadâꞌâ mono õ zé hã te te sina ꞌre uwaimrami zaꞌra. Te za duré ꞌRe ihâimana uꞌâsi mono, iꞌuwaibaba na te te dama ꞌre iꞌarowairébé mono zé isiꞌutõrĩꞌõ hã dama pisutu. Duré uburé marĩ we iꞌaꞌmadâꞌâ mono zém na, duré ꞌRe ihâimana uꞌâsi mono zadawa ꞌmahârâꞌwa nhimirowasuꞌu na te za te te ãma aꞌuwaimrami. Te za duré isõrõwa ꞌri ꞌrãihâ iwazéb zahi na apâ ãma da te dasima ꞌre romhuꞌu zaꞌra.
25 Daniéu, marĩ waihuꞌu da, maꞌãpé ĩwapari pese. Zeruzalẽ apâ za da te dasiwi ꞌri da, te te dama ꞌrui parimhã, te za 7 x 7 na wahu hã aiꞌutõ, ꞌRe ihâimana uꞌâsi mono dama iꞌrãnhoꞌõmo da hã te te ipisutuzéb u. Tawamhã Zeruzalẽ ꞌre, ꞌri nhiꞌridi ité ihâimana zaꞌra ãma hã, duré ꞌri ꞌwawi waꞌra ꞌrãihâ ãma hã te za wahu hã aiꞌutõ, 62 x 7 na. Tane nherẽ, taha ré hã te za we romhâimana mono, robzépata zaꞌẽtẽ na hã.
26 Tawamhã ã hã romhâimanazé oto isiꞌutõrĩ ãma, ꞌRe ihâimana uꞌâsi mono dama iꞌrãnhoꞌõmo da, te te ipisudu hã te za dasiwi wĩrĩ ni, marĩ iwasédé te te ꞌmanharĩ õ nherẽ. Taha pari te za danhibꞌihâꞌa hã tite dasiꞌwapéi ꞌmanharĩꞌwa norĩ siré ꞌri nhoꞌu hã duré ꞌRe ihâimana uꞌâsi mono nhorõwa ꞌri ꞌrãihâ hã siwi te te prub zaꞌra. Tawamhã romhâimana ꞌrãsutuzé hã ꞌre iꞌâpusi mono ne te za datẽme wi. Tahawa, te za dasiꞌwapé hã duré datẽme ãwisi, ꞌRe ihâimana uꞌâsi mono te te sima irowairébézéb zarina, marĩ te te iꞌuprosi da hã.
27 Duré ã hã apito, dapoto mono bâ dasiwazari daꞌahâ uptabi na idahâimana zaꞌra mono ma, te za marĩ na dasisazezé hã dama ꞌmanha. Tawamhã ãhã ré hã te za 7 na daꞌãma tiwahu. Duré 7 wahub u aiwa ãma isipoꞌo ãma, te za abaze zata na ꞌre idanhoprub zaꞌra mono zé hã, duré ꞌRe ihâimana uꞌâsi mono nhorõwa ꞌri ꞌrãihâ ꞌre, amnho na ꞌre idanhoprub zaꞌra mono zé hã oto dawi sizâ. Duré “marĩ ipipa iwasété uptabi hã” te za ꞌRe ihâimana uꞌâsi mono nhorõwa ꞌri ꞌrãihâ ꞌre hâimo tisã. Tawamhã tame te za aꞌâ za, ã hã apito hã ꞌRe ihâimana uꞌâsi mono te te iꞌuprosizéb u, te te ãma sima irowairébézéb zarina.
