Colosu 4:1-18
4 Wadaꞌuri zarina romhuriꞌwa norĩ tedeꞌwa norĩ, maꞌãpé iꞌuwaibaba si tãma ꞌre ꞌmanharĩ zaꞌra waꞌaba mono, duré aihâimanazé tô sena na iwẽ na tãma ꞌre aihâimana zaꞌra waꞌaba mono, a norĩ waꞌaba zama Asibꞌapito zaꞌra waꞌwa hâiwa ãma ꞌre isãmra mono na, aima waihuꞌu zaꞌra waꞌaba sina.
Roti na dapawaptobzé iꞌrãsudu
2 Maꞌãpé asimiꞌẽ na rowaptẽrẽ na ꞌre aihâimana uꞌâsi zaꞌra waꞌaba mono. ꞌRe rowaptẽrẽ zaꞌra waꞌaba mono ré hã asimizaꞌrese sina ꞌre aihâimana zaꞌra waꞌaba mono, duré ꞌRe ihâimana uꞌâsi mono ãma ꞌre aiwata zaꞌra waꞌaba mono sina.
3 Ãne hã ꞌre ꞌmanharĩ zaꞌra waꞌaba mono wamhã, maꞌãpé duré waꞌãma zama ꞌre rowaptẽrẽ zaꞌra waꞌaba mono, ꞌRe ihâimana uꞌâsi mono hã te te wama ꞌridawa zaꞌra da, isadawa wasuꞌu na wa te ꞌre irobꞌmahârâ zaꞌra mono zéb da hã, Cristuhu wasuꞌuwẽ dama waihuꞌu ãna aré ꞌre ihâimana mono, wa te ꞌre wasuꞌu zaꞌra mono da oto. Ta hã te ꞌre iwasuꞌu mono uꞌâbâ, wa dazazéb ꞌremhã za, ãhã na hã.
4 Tahawa, maꞌãpé ĩꞌãma ꞌre rowaptẽrẽ zaꞌra waꞌaba mono, Cristuhu wasuꞌuwẽ dama waihuꞌu ãna aré ꞌre ihâimana mono hã, sõꞌawi sadaihuꞌu pese na te dama ꞌre wasuꞌu mono da, ĩma ipisutu zahi zarina te ãma ꞌre uwaimrami mono da.
5 Maꞌãpé aihâimana prédup sina duré aimreme zasi ãna ꞌre aihâimana zaꞌra waꞌaba mono, isazeiꞌõꞌwa norĩ ma hã. Duré bâdâ aima ꞌre sihutu aba mono ré, ꞌre pawapto wẽ zaꞌra waꞌaba mono, ta norĩ hã.
6 Aiwaimri na duré aimreme ise na dama ꞌre iꞌaimreme zusi aba mono da si, iwẽ hã, taha zarina iꞌuwaibaba si dahâiba mono bâ ꞌre dazadaꞌâbâ zaꞌra waꞌaba mono da.
Paulu hã, isazeiꞌwa norĩ iꞌrãi rẽme te te isawi zaꞌra zé robꞌuiꞌéré na
7 Tiquicu hã te za aima ĩwasuꞌu zaꞌra waꞌwa za. Ta hã wasisãnawã wama isawi pe duré romhuriꞌwa iꞌumnha duré wasiré romhuriꞌwa Wanhibꞌapito ma romhuri na hã.
8 Ta hã wa ãma atẽme satõrĩ zaꞌra waꞌwa, niha na iwahâimanazém na te te aima wawasuꞌu zaꞌra waꞌaba da, te te duré asiptete zaꞌra waꞌaba da zama.
9 Onezimu hã te za ãma isiré mo. Ta hã wasisãnawã wama isawi pe duré iꞌumnha, asiré zaꞌra waꞌaba hã. Ta norĩ hã te za aima rowasuꞌu pese zaꞌra waꞌwa, ãme iromhâimanazém na hã.
10 Aristarcu hã ĩsiré dazazéb ꞌre isa hã te ãma asawi zaꞌra waꞌwa, duré Marcus, Barnabéhé siwadi. Ma tô iwasuꞌu waihuꞌu zaꞌra waꞌwa Marcus hã. Ta hã te te ãma asabu zaꞌra waꞌaba wamhã, maꞌãpé asiwi âri wẽ waꞌaba za.
11 Zezus, Zustu na isisi amo hã te duré ãma asawi zaꞌra waꞌwa. Zudeu norĩ Cristuhu zazeiꞌwa na ꞌre ihâimana zaꞌra mono norĩ ꞌremhã, ã norĩ si te te ĩsiré ꞌre romhuri zaꞌra, ꞌRe ihâimana uꞌâsi mono daꞌãma ꞌre isibꞌaꞌuwẽ mono zé saꞌẽtẽ uꞌâsi mono da hã. Ã norĩ hã te te duré ꞌre ĩnhiptete waptob zaꞌra.
12 Epafra, rowahutuzéb ꞌre ꞌre ihâimana mono duré Cristu Zezusihi ma romhuriꞌwa hã te duré ãma asawi zaꞌra waꞌwa. Ta hã te te aiꞌãma ꞌre rowaptẽrẽ uꞌâsi zaꞌra waꞌwa. ꞌRe ihâimana uꞌâsi mono wi te te ꞌre rowaptẽrẽ uꞌâsi, te te ꞌre asiptete uꞌâsi zaꞌra waꞌaba mono da duré aipẽꞌẽ ꞌre, ꞌre aiprédu wẽ zaꞌra waꞌaba mono da duré ꞌre asisaꞌra pese zaꞌra waꞌaba mono da, ꞌRe ihâimana uꞌâsi mono te te sima ꞌre iwẽ mono zé hã uburé ãma ꞌre uwaimrami zaꞌra waꞌaba mono da.
13 Ta hã ĩma waihuꞌu pese di, te te aiꞌãma ꞌre iromhuri pese zaꞌra waꞌaba mono na hã duré Laudiséa ãma ꞌre isiꞌubumroi mono norĩ ãma duré Ierapoli ãma ꞌre isiꞌubumroi mono norĩ ãmab zama.
14 Lucas dawedeꞌwa wama isawi pe hã te ãma asawi zaꞌra waꞌwa, Demasihi zama.
15 Maꞌãpé wama sawi zaꞌra waꞌaba, wasisãnawã norĩ Laudiséa ãma ꞌre isiꞌubumroi mono norĩ hã, duré Nifa, duré uburé isazeiꞌwa norĩ isõrõwa ãma ꞌre isiꞌrãꞌõtõ mono norĩ zama.
16 Ã hã robꞌuiꞌéré asima sõré zaꞌra waꞌaba parimhã, maꞌãpé asiwi sõmri aba isazeiꞌwa norĩ Laudiséa ãma ꞌre isiꞌubumroi mono norĩ zama te te sima sõré zaꞌra da. Tane duré asima sõré zaꞌra waꞌaba za, Laudiséa hawi robꞌuiꞌéré ãma wisi wamhã.
17 Tawamhã duré tãma rowasuꞌu zaꞌra waꞌaba za, Arquipuhu ma hã, ãne: “Maꞌãpé asima sô ꞌre airĩtĩ uꞌâsi mono, ãma ꞌre uwaimrami wẽ mono da, Wanhibꞌapito romhuri te te aima isõmri hã ꞌre abꞌmanharĩ mono da.”
18 Wa hã, Paulu, wa duré ãma asawi zaꞌra waꞌwa. Ĩsiꞌuihâ na ĩnhibꞌrata na wa oto ãma aima robꞌuiꞌéré zaꞌra waꞌwa. Maꞌãpé ĩꞌãma aipoꞌre puꞌu zaꞌra waꞌaba, dazazéb ꞌre ĩzam na, ãhã na hã.
ꞌRe ihâimana uꞌâsi mono nhimizawizé aiꞌãma ꞌre ihâimana uꞌâsi zaꞌra waꞌaba mono da si, iwẽ hã!
