Atus 20:1-38
20 Tawamhã roꞌwaꞌrudu siꞌutõrĩ wamhã, Paulu hã isazeiꞌwa norĩ zô ma tô hâ. Ma tô pawaptob zaꞌra, siptete zaꞌra da. Taha pari ma tô sisaꞌu sawi zaꞌra. Te te sawi zaꞌra pari, ma tô oto mo, Masédonia u.
Paulu hã Masédonia ãma ihâimanazé duré Acaia ãma zama
2 Paulu hã Masédonia na tiꞌa nhisi na ma tô mo. Tinhimirowasuꞌu na ma tô te te anhiptete, isazeiꞌwa norĩ hã. Tawamhã ma tô oto wi, Grécia na tiꞌa nhisi u.
3 Tame siꞌubdatõ aꞌamo hã sãmra ré, ma tô ãma aiꞌutõ. Siria na tiꞌa nhisi u oto imorĩzéb u, ma tô sina waihuꞌu, Zudeu norĩ te te ãma sima irowaꞌõtõ zaꞌra zé hã. Tahawa ma tô sima rowairébé, Masédonia waꞌwaibaba apâ morĩ da.
4 Morĩ wamhã, ã norĩ hã ma tô isiré aiꞌabaꞌré: Sopatru hã, Piruhu ꞌra Béréia na ꞌri nhoꞌõmo nhisi hawimhã; Aristarcu duré Secuduhu me Tesalonica hawib zahuré; Gaiu Dérbi hawimhã; Timotiu, Tiquicu duré Trofimu, Azia na tiꞌa nhisi hawimhã.
5 Ã hã aibâ norĩ hã wanhowa ma tô aiꞌabaꞌré. Tawamhã Troadi ãma ma tô wazô asimro.
6 Iꞌuꞌẽtẽ wapu mapuꞌõ na dasa da te ꞌre ihuri mono zém na dato hã hâimana parimhã, wa tô wawairébé ni, ꞌri waꞌõno Filipu hawimhã. Imrotõ na bâdâ siꞌutõrĩ pari, wa tô wasisõpẽtẽ zaꞌra ni Troadi ãma. Tame wa tô wahâimana zaꞌra ni, misi romhuri na.
Paulu hã Troadi ãma ihâimanazé
7 Sabadu bâdâ iwa waptãꞌã wamhã, barana wa tô wasiré wasiꞌrãꞌõtõ ni, wasisãnawã norĩ me, iꞌuꞌẽtẽ wapu wẽꞌẽ na wasiré wasaihuri da*. Tawamhã Paulu hã ma tô rowahutu mara waꞌwab u, awẽ za oto morĩ dâꞌâsina.
8 Tawamhã robꞌuiwẽzé hã ahâ di, ꞌriꞌre waꞌwa iwasiꞌrãꞌõtõzéb ãma hã. Hâimo ꞌriꞌre waꞌwa ihâimana ãma wa wasiꞌrãꞌõtõ ni.
9 Tawamhã aibâ ihâiba té, Euticu na isisi hã ma tô nhamra, zanela na. Paulu hã te te rowasuꞌu hâ wamhã, ihâiba té hã ma tô aptâ hã azâri pese. Tahawa ma tô nhono. Tawamhã ma tô waptãrã, zanela hawi. Te te siwi wahutu wamhã, dâꞌâ di oto.
10 Tawamhã Paulu hã ma tô itẽme siꞌra. Tinhoꞌutu ma tô tiꞌâ. Ãne te dama tinha:
— Aihâtâꞌâ zaꞌra waꞌaba tõ. Hâiba ré te tihâiba.
11 Taha parimhã, Paulu hã ma tô duré apâ saiꞌu. Iꞌuꞌẽtẽ wapu hã ma tô te te wẽꞌẽ. Ma tô duré oto tiꞌrẽ. Taha parimhã, ma tô duré ãma uzusi rowahutu na, iꞌawẽzéb u. Taha pari ma tô oto mo.
12 Tawamhã aibâ ihâiba té hã hâiba ré ma tô siwi saprõ, isõrõwa u. Ta hã ma tô tãma rowẽ pese zaꞌra, isazeiꞌwa norĩ ma.
Paulu hã Troadi hawi Miletu u imorĩzé
13 Pauluhu wana wa tô aiꞌabaꞌré ni. Rowaꞌuꞌu na ubaꞌrenem na, wa tô asisi ni, Asosi na ꞌri nhoꞌõmo nhisi u hã, tame sô wanhimipari zaꞌra da, te te iꞌruzéb zarina te te sima wẽ wa, tiꞌai baba ãma morĩ da, Asõ u hã.
14 Tawamhã Asosi ãma te te wanhopẽtẽ zaꞌra wamhã, ubaꞌre na ma tô watẽme tizébré zaꞌra. Ta hawi wamorĩ na wa ãma uzusi zaꞌra ni, ꞌri nhoꞌu Miletu u hã.
15 Tawamhã ta hawi awẽm na wa tô aiꞌabaꞌré ni, ubaꞌre na. Tawamhã Quiu na robꞌré zaꞌiti ꞌrata, wa tô roꞌrahâri zaꞌra ni. Awẽm na hã Samo na robꞌré zaꞌiti u wa tô duré aihutu ni. Ta hawimhã awẽm na hã wa tô aihutu ni, Miletu u.
16 Tawamhã Paulu hã ma tô sima rowairébé, Éfézu u hã sipa tõ da, te te sima wẽ õ wa, Azia na tiꞌa nhisi ãma, ãma ironomro da hã. Wapu wamhã, tãma iwẽ hã Zeruzalẽ u wisi suꞌu da, Pẽtécosti na bâtâ wana ré.
Paulu hã Éfézu ãma daꞌmadâꞌâꞌwa norĩ ma, te te irobꞌuiꞌérézé
17 Tawamhã Miletu ãma sãmra ré, Paulu hã ma tô sitẽme sô tihârâ zaꞌra, Éfézu ãma isazeiꞌwa norĩ ꞌmadâꞌâꞌwa norĩ zô.
18 Itẽme sihutu wamhã, Paulu hã ma tô ãne tãma nharĩ zaꞌra:
— Aima waihuꞌu pese zaꞌra waꞌaba di, niha na asiré ꞌre ĩhâimana zaꞌra waꞌaba mono zé hã, imorĩꞌrata na ĩwisizém hawimhã Azia na tiꞌa nhisi u hã.
19 Wanhibꞌapito ma si wa tô te ꞌre romhuri, ĩsiꞌmadâꞌâ zei ãna duré ĩtõmoꞌui ꞌrowi, Ãne hã ropire hã tô ĩma ꞌre hâimana mono nherẽ, Zudeu norĩ hã ĩzada ꞌre ihâimana zaꞌra mono uꞌâbâmhã.
20 Duré aima waihuꞌu pese zaꞌra waꞌaba di, uburé marĩ hã te ꞌre iꞌaꞌmanharĩ mono na hã aiꞌãma ꞌre ĩsime zaꞌra waꞌaba mono da. Wanhibꞌapito wasuꞌu na, wa tô te ꞌre rowasuꞌu sõꞌawi dama duré ꞌri mono na.
21 Tô sena wa tô te ꞌre rowasuꞌu Zudeu norĩ ma hã duré zudeuꞌõ norĩ ma zama, tiwasété na ꞌre siꞌruiwapari zaꞌra mono wa, ꞌre sipizari zaꞌra mono da, ꞌRe ihâimana uꞌâsi mono u hã duré te te ꞌre saze zaꞌra mono da, Wanhibꞌapito Zezusi hã.
22 Ãhã na hã wa za oto mo Zeruzalẽ u, ꞌRe ihâimana uꞌâsi mono Pẽꞌẽzani te te ĩma iꞌruzéb zarina, marĩ za ĩꞌãma ihâimanazé hã te waihuꞌu ãna, tame.
23 Misire ĩma iwaihuꞌu pe hã, ꞌri nhoꞌõmo mono bâ, ꞌre ĩne mono wa, ꞌRe ihâimana uꞌâsi mono Pẽꞌẽzani te te ꞌre ĩpoꞌre puꞌu mono hã dazazé hã duré robzépada hã ĩzô ꞌre ihâimana zaꞌra mono na.
24 Tane nherẽ, ĩma hã marĩ dai õ di, ĩhâimanazé hã. Ĩma ipire hã ĩnhimiromhuri te iꞌuprosi wẽ da si, duré te iꞌrãsutu wẽ da si, Wanhibꞌapito Zezusi te te ĩma ipisudu hã te iꞌmanharĩ da hã. Ĩte romhuri hã ã hã: Rowasuꞌu wẽ ité hã te ꞌre iwasuꞌu mono da si, ꞌRe ihâimana uꞌâsi mono nhimipawaptobzé iwaꞌâbâꞌõ hã.
25 — Aiwazari wa tô ꞌre ĩhâimana zaꞌra waꞌwa. Wa tô te ꞌre rowasuꞌu, ꞌRe ihâimana uꞌâsi mono daꞌãma ꞌre isibꞌaꞌuwẽ mono zém na. Ãhã na hã ĩma waihuꞌu pese di, niwa za oto asiwi ĩꞌmadâꞌâ waꞌaba õ na hã.
26 Tahawa ãhã na hã ãne te aima nharĩ zaꞌra waꞌaba da, asõꞌreptuzé hã ꞌmanhimini waꞌaba wamhã, wa hãi õ di za oto.
27 E marĩ wa. Te sazâri õ wa, te aima iwasuꞌu zaꞌra waꞌaba na hã, uburé ꞌRe ihâimana uꞌâsi mono nhimirowaꞌõtõzé hã.
28 Asiꞌmadâꞌâ pese zaꞌra waꞌaba. Duré uburé asimiꞌubumro norĩ hã ꞌRe ihâimana uꞌâsi mono Pẽꞌẽzani te te aima isõmri zaꞌra waꞌwa hã ꞌre ꞌmadâꞌâ pese zaꞌra waꞌaba mono, poneꞌẽrebâ ꞌmadâꞌâꞌwa ne, rowahutuꞌwa na isazeiꞌwa norĩ ꞌRe ihâimana uꞌâsi mono te na ꞌre aihâimana zaꞌra waꞌaba mono wa, te te sima iꞌaꞌuipra norĩ, tiꞌra wapru na.
29 Ãne hã wa aima nharĩ zaꞌra waꞌwa, ĩma waihuꞌu pese wa, ãne: Ĩmorĩ zaꞌu hã te za we sihâiꞌré zaꞌra, abaze zahi isahi uptabi norĩ hã, aiwazari zaꞌra waꞌaba hã. Ta norĩ hã poneꞌẽrebâ norĩ ãma ꞌre pẽꞌẽzé zaꞌra mono õ di za.
30 Tawamhã bâdâ hã te za duré wi za, asiré zaꞌra waꞌwa niꞌwam norĩ hã tizadawa nhipese na te te ꞌre irowasuꞌu zaꞌra mono hã, niꞌwam norĩ isazeiꞌwa norĩ hã isiniwĩ ꞌre hâimana zaꞌra mono da.
31 Tahawa, maꞌãpé ꞌre asõpré uꞌâsi waꞌaba mono! Duré ãma aipoꞌre siꞌâri zaꞌra waꞌaba tõ, siꞌubdatõ wahub ꞌremhã, bâtâ na duré mara na hã, wa hã ĩwawa sina nherẽ, te aima ꞌre iroti zaꞌra waꞌaba mono zé hã te sazâri õ di.
32 — Ãhã na hã ꞌRe ihâimana uꞌâsi mono ma, wa asõmri zaꞌra waꞌwa, te te ꞌre aiꞌmadâꞌâ zaꞌra waꞌaba mono da, duré isimipawaptobzé iwaꞌâbâꞌõ na isadawa wasuꞌu hã te te ꞌre asiptete zaꞌra waꞌaba mono da, duré marĩ iwẽ uptabi hã romhutuꞌõ te te aima sõmri zaꞌra waꞌaba da, dapoto mono bâ tinhibꞌaꞌuwẽ ma, te te ꞌre iꞌapisutu mono hã.
33 Date nherẽ, te dawi ꞌruiwapari õ di, ẽtẽ waipo prã prata hã ẽtẽ waipo pré oru hã duré niꞌwai uza hã.
34 Aima waihuꞌu pese zaꞌra waꞌaba di, ĩnhibꞌrata na romhuri na marĩ hã te ꞌre iꞌazani mono na hã duré ĩsiré romhuriꞌwa norĩ ma hã, marĩ zô wawi ꞌre rowaptâꞌâ zaꞌra mono wamhã.
35 Uburé marĩ te ꞌre iꞌaꞌmanharĩ mono zéb zarina, wa tô te aima ꞌre hâiꞌré zaꞌra waꞌwa, ãne wa te ꞌre romhuri zaꞌra mono wamhã, marĩ zô tiwi ꞌre irowaptâꞌâ zaꞌra mono norĩ, wa te ꞌre ipawaptob zaꞌra mono na hã. Wanhibꞌapito Zezusihi mreme na ãma ꞌre aipoꞌre puꞌu zaꞌra waꞌaba mono, ãne te te inharĩzém na hã: “Marĩ hã niꞌwai ma, da te sõmri wamhã, ãma rowẽ uptabi di, niꞌwa marĩ te te dama isõmri, da te iꞌâri, ãma rowẽ nhipai u.”
36 Tawamhã Paulu hã timreme te te ꞌrãsutu parimhã, hiꞌrãtitõ ma tô nhamra, uburé daꞌmadâꞌâꞌwa norĩ me. Ma tô duré rowaptẽ, isiré zaꞌra.
37 Tawamhã saꞌẽtẽ na ma tô tiꞌruꞌru. Tinhoꞌutu ma tô siwi tiꞌâ, Paulu hã. Ma tô duré siwi tobꞌrata hârâ.
38 Tiwi irobzeiꞌõ pese zaꞌra zé hã, Paulu hã te te nharĩ wa, za oto niwa te te siwi iꞌmadâꞌâ õ na hã. Taha pari ubaꞌre u ma tô isiré aiꞌabaꞌré.
Ĩwaꞌõtõ piꞌreba watsuꞌu mono
^ 20:7 Iꞌuꞌẽtẽ wapu na wẽꞌẽ na duré isiré hã dasa da te ihuri na hã te wasuꞌu.
