Apocalipsi 22:1-21
22 Tawamhã hâiwa ãma ꞌRe ihâimana uꞌâsi mono ma romhuriꞌwa hã, tô õ hã ma tô duré ĩzaprõ, â uꞌâ hã te ꞌmadâꞌâ da. Â uꞌâ hã da te ꞌre âhuri mono wa, dato sina ꞌre idanomro uꞌâsi mono zé hã. Simhi zarobꞌa uptabi ne â zarobꞌa uptabi di, â uꞌâ hã. Panhoꞌu ꞌre ipraba zaꞌra mono ne, te ꞌRe ihâimana uꞌâsi mono norĩ simasisizéb zahâpâ hawi tipraba, Poneꞌẽrebâ simasisizéb zahâpâ hawi me.
2 ꞌRi nhoꞌõmo waꞌwa, ꞌri nhiꞌridi inomro waꞌwa, te tipraba. Duré wede hã â praba zadaꞌré siꞌuiwa na isãnaꞌrata siꞌuiwa sisaꞌridi hã te tame ꞌre sa, iꞌrã hã da te ꞌre huri mono wa, ꞌRe ihâimana uꞌâsi mono ꞌrata, dato sina ꞌre idanomro uꞌâsi mono zé hã. Aꞌamo sidâpâsi iꞌrãzé ta hã. Duré wahub sidâpâsi te ꞌre ꞌrãi uꞌâsi. Duré isu hã daro mono bâ apâ ãma ꞌre idazéptâꞌâ zaꞌra mono zéb da hã te ꞌre hâimana zaꞌra.
3 Duré marĩ iwasédé hã ꞌRe ihâimana uꞌâsi mono te te ꞌre iꞌawẽꞌõ pese mono hã, iwa ꞌre hâimana zaꞌra mono õ di za, ꞌri nhoꞌõmo ãma hã. Duré te te ꞌre idaꞌawẽꞌõ pese mono hã iwa ꞌre dahâimana zaꞌra mono õ di za.
Taha ꞌre te za ꞌRe ihâimana uꞌâsi mono norĩ simasisizé hã ꞌre hâimana, Poneꞌẽrebâi me iwa ꞌre isimasisi zahuré mono zéb da hã, danhibꞌapito simasisizém ne hã, te te ãma ꞌre idaꞌaꞌmadâꞌâ uꞌâsi zahuré mono zéb da hã. Tahawa, te za isibꞌaꞌuwẽ norĩ hã ãma ꞌre wata uꞌâsi zaꞌra.
4 Te za duré iꞌubu hã te te siwi ꞌre ꞌmadâꞌâ uꞌâsi zaꞌra. Duré isisi na uihâ uiꞌéré ré, te za ꞌre hâimana zaꞌra.
5 Tamemhã ꞌre mara waihuꞌu mono õ di za. ꞌRe robra waihuꞌu mono õ na dâꞌâsina, robꞌuiwẽzém na da te ꞌre robꞌuiwẽ zaꞌra mono õ di za oto. Duré bâdâ hã te te ꞌre robꞌuiwẽ mono õ di za oto. Uburé Danhibꞌapito ꞌRe ihâimana uꞌâsi mono si te za te te dama ꞌre rowaꞌa. Tawamhã isibꞌaꞌuwẽ norĩ hã te za isadawa para pire na ꞌre hâimana uꞌâsi zaꞌra, õne uꞌâsi.
Zezusi apâ we timorĩzém na te te sina idapoꞌre puꞌuzé wasuꞌu
6 Tawamhã hâiwa ãma romhuriꞌwa hã tô õ hã te duré ĩma tinha, ãne:
— Ãhã wasuꞌu hã tô sena. Tô sena wa, te za robꞌumnhasi sina da te ꞌre sazei pese zaꞌra, da te ꞌre wawã zaꞌra mono ãna.Uburé Danhibꞌapito ꞌRe ihâimana uꞌâsi mono hã te tizadawa wasuꞌuꞌwa norĩ ma, Tipẽꞌẽzani hã te te tãma ꞌre anhomri, taha na te te dama ꞌre sadawa wasuꞌu zaꞌra mono da. Ta hã ꞌRe ihâimana uꞌâsi mono ma tô hâiwa ãma tãma iromhuriꞌwa hã we ĩzatõ, tô sena za iromhâimana mono zém na te aima awaihuꞌu siromo mono da, duré ĩnhipai u isibꞌaꞌuwẽ norĩ ma, te aima iꞌawaihuꞌu mono zéb zarina tãma ꞌre awaihuꞌu mono da.
7 Tawamhã Zezusihi mreme hã wa tô wapa, tizazeiꞌwa norĩ te te ipoꞌre puꞌu zaꞌra zém na hã. Ãne te tinha:
— Maꞌãpé, waihuꞌu pese zaꞌra waꞌaba. Wa za wei morĩ su za apâ hã. Ãhã wasuꞌu hã tô sena, ibaihâ na za iromhâimana mono zém na ãma irobꞌuiꞌéré hã niꞌwa ta hã te te ꞌre wapari pese mono wamhã, tãma ꞌre rowẽ uꞌâsi mono di za.
8 Wa hã Zuwã hã wa tô ãne uburé marĩ hã te awapari. Wa tô duré uburé marĩ hã te aꞌmadâꞌâ. Tawamhã ãne te awapari mono pari, duré ãne marĩ te aꞌmadâꞌâ mono pari, wa tô hâiwa ãma romhuriꞌwai papara aime, ãma ĩwata da, za iromhâimana mono zém na te te ĩma iꞌawaihuꞌu mono ãma.
9 Tane nherẽ, te siꞌãma ĩma tinha, ãma ĩwata tõ da. Ãne te tawamhã ĩma tinha:
— Tôꞌã. Ãne hã ꞌmanharĩ tõ. Wa hã asine, ꞌRe ihâimana uꞌâsi mono ma romhuriꞌwa, wa ꞌre ĩhâimana, duré asisãnawã norĩ ne hã, duré isadawa wasuꞌuꞌwa mono norĩ ne hã. Duré ãhã wasuꞌu na iꞌarobꞌuiꞌéré mono wapari pese ꞌwa norĩ ne hã wa hã, ꞌRe ihâimana uꞌâsi mono ma romhuriꞌwa. Tahawa, maꞌãpé ꞌRe ihâimana uꞌâsi mono ãma si ꞌre aiwata uꞌâsi mono.
10 Tawamhã te duré ĩma tinha, ãne:
— Ãhã wasuꞌu hã za iromhâimana mono zém na iꞌarobꞌuiꞌéré mono hã asima sawi õ di za. Sõꞌawi te za dama ãma ꞌre iꞌarowasuꞌu mo, iromhâimanazéb da hã za ãma ronomro õ wa.
11 Ãne na za romhutu na iromhâimana mono zém na dama ꞌre awaihuꞌu mono nherẽ, niꞌwam norĩ hã tiwasété si õne haré te te ꞌre ꞌmanharĩ uꞌâsi zaꞌra mono wamhã, õhõ na si tô ãma ꞌre hâimana zaꞌra mono, wẽ te bâ. Duré niꞌwam norĩ hã tihâiba na ꞌre hâimana siwamnarĩ uꞌâsi zaꞌra mono wamhã, õhõ na si tô duré ꞌre hâimana zaꞌra mono tinhimiꞌmanharĩzém na, te te ãma ꞌre iꞌuzusi zaꞌra mono zém na hã wẽ te bâ, robꞌrãsutu u hã. Duré niꞌwam norĩ hã te te ꞌre ꞌmanharĩ wẽ uꞌâsi zaꞌra mono wamhã, wẽ uꞌâsi ãma ꞌre hâimana uꞌâsi zaꞌra mono. Duré niꞌwam norĩ hã ꞌRe ihâimana uꞌâsi mono ãma si ꞌre nomro uꞌâsi mono wamhã, tô õhõ na si ꞌre nomro uꞌâsi mono tô, robꞌrãsutu u hã.
12 Tawamhã Zezusihi mreme hã wa tô duré wapa, tizazeiꞌwa norĩ te te ipoꞌre puꞌu zaꞌra zém na hã. Ãne te tinha:
— Maꞌãpé waihuꞌu pese zaꞌra waꞌaba. Wa za wei morĩ su za apâ hã. We ĩmorĩ wamhã, ĩnhimipawaꞌâbâzéb da hã wa za we ĩsiré âri siro za, da te ĩma ꞌre iromhuri wẽ zaꞌra mono zéb zarina te ãma idaꞌapawaꞌâbâ mono zéb da hã.
13 Wa hã duréihã marĩ õ ré hã wa tô ꞌre ĩhâimana. Uburé marĩ hã siꞌutõrĩ pese nherẽ, marĩ norĩ zarina ĩsiꞌutõrĩ õ di za wa hã. Õne uꞌâsi, wa za ꞌre ĩhâimana uꞌâsi.
14 Duré, niꞌwam norĩ hã tiꞌuzazé hâirã da, te te ꞌre iꞌupsõi pese zaꞌra mono norĩ ma si hã tãma ꞌre rowẽ uptabi zaꞌra mono di za. Tane tiwasété wi, ꞌre isipizari zaꞌra mono hã, ꞌRe ihâimana uꞌâsi mono, iwasédé te te tãma ꞌre iꞌaꞌupsõi mono zé, te wasuꞌu, iꞌuza hâirã hã. Ta norĩ si te za robꞌrãi uꞌâ hã te te ꞌre huri, da te ꞌre huri mono wa, ꞌRe ihâimana uꞌâsi mono ꞌrata ãma ꞌre idanomro uꞌâsi mono zé hã. Ta norĩ si te za duré õne haré ꞌri nhoꞌõmo u ꞌre sisisi, ꞌridawa zaꞌẽtẽ na, niꞌwa te te tiwi sitob zaꞌra ãna.
15 Niꞌwam norĩ si ꞌri nhoꞌõmo u ꞌre sisisi waihuꞌu mono õ di za, marĩ iwasété uptabi na ꞌre idahâimana wasété uptabi zaꞌra mono norĩ hã, duré simiꞌâ na ꞌre idahâimana zaꞌra mono norĩ hã, duré dahâiba na ꞌre idahâimana wasété zaꞌra mono norĩ hã, duré dapãrĩꞌwa norĩ hã, duré romhâiba ꞌmanharĩ ãma, ꞌRe ihâimana uꞌâsi mono upana ꞌre idawata zaꞌra mono norĩ hã, duré sadawa nhipese ze te, uburé dama ꞌre isadawa nhipese zaꞌra mono norĩ hã. Ta norĩ hã ꞌre sisisi waihuꞌu mono õ di za, ꞌri nhoꞌõmo u hã.
16 Tawamhã Zezusihi mreme hã wa tô duré wapa. Ãne te ĩma tinha:
— Wa hã Zezusi, wa tô hâiwa ãma ĩma romhuriꞌwa hã we atẽme satõ, ã hã te iꞌawaihuꞌu mono hã te te aima awaihuꞌu mono da, ꞌri nhoꞌõmo mono bâ ĩzazeiꞌwa norĩ, siré ꞌre isiꞌrãꞌõtõ uꞌâsi mono norĩ ma, awaihuꞌu mono da, isipai u. Wa hã apito Davihi nhihudu, za isine ĩpire na te ꞌre idaꞌaꞌmadâꞌâ mono. Wa hã awẽ u, wasi wawẽ ꞌre roꞌo pese mono ré, daꞌãma ꞌre iꞌawẽ zaꞌra mono ne, wa za romhâimanazép té, te dama ꞌre apisutu, Ĩmama nhibꞌaꞌuwẽ norĩ ma.
17 ꞌRe ihâimana uꞌâsi mono Pẽꞌẽzani hã te Poneꞌẽrebâi mro da me, dazô ꞌre hârâ uꞌâsi zahuré, ãne:
— We ꞌre anomro aba mono, â uꞌâsi u.
Tawamhã niꞌwam norĩ hã ãne hã te te ꞌre wapari zaꞌra mono wa, â uꞌâsi u ꞌre nomro mono wamhã, te za duré ihârâ zahuré na dazô ꞌre hãsi uꞌâsi.
Da te ꞌre ꞌrubu zaꞌra mono wa, da te ꞌre iꞌâhuri mono ne, niꞌwam norĩ hã te te sima ꞌre wẽ zaꞌra mono wamhã, te za tô â uꞌâsi u ꞌre nomro, te te ꞌre âhuri uꞌâsi mono da, waꞌâbâ ãna. Â uꞌâ hã da te ꞌre âhuri mono wa, ꞌRe ihâimana uꞌâsi mono ꞌrata ꞌre idanomro uꞌâsi mono zé.
Zuwã, te te dama ãma irobꞌuiꞌéré ꞌrãsutu zé wasuꞌu
18 Wa hã Zuwã hã, wa za oto ãma aipoꞌre puꞌu siromo zaꞌra waꞌwa ĩmreme pire na, ãhã wasuꞌu na, ã ibaihâ na, za iromhâimana mono zém na te ãma iꞌarobꞌuiꞌéré mono, ꞌre iwapari zaꞌra waꞌaba mono norĩ hã. Niꞌwam norĩ hã ãhã wasuꞌu hã siwaꞌru sihawim na te te ãma ꞌre saꞌẽtẽ zaꞌra mono wamhã, te za ꞌRe ihâimana uꞌâsi mono hã te te ꞌre hâ zaꞌra, ã ibaihâ na te te dama ꞌre irobꞌmanharĩ pipa mono zé isimiꞌwara mono zarina. Taha na, te za te te tãma ãma ꞌre sisiwi zaꞌra, iꞌahâri na hã.
19 Duré niꞌwam norĩ hã ãhã wasuꞌu hã za iromhâimana mono zém na te iꞌarobꞌuiꞌéré mono hawimhã tô senai õ newa, te te ꞌre sani zaꞌra mono wamhã, te za ꞌRe ihâimana uꞌâsi mono hã robꞌrãi uꞌâ hã te te tiwi ꞌre sawi zaꞌra, te te dame ꞌre huri tõ mono da, ꞌRe ihâimana uꞌâsi mono ꞌratamhã rowẽ na ꞌre danomro uꞌâsi tõ mono da. Te za duré ꞌri nhoꞌu ité hã iwẽ uptabi hã te te tiwi ꞌre sawi zaꞌra, iwasédé hã iwa ꞌre ihâimana mono õ hã. Ãhã na, wa tô ã ibaihâ na ãma robꞌuiꞌéré pa, ã ꞌri nhoꞌõmo na hã, duré ã robꞌrãi uꞌâsi na hã.
20 Tawamhã Zezusi hã te duré irẽme ma siwasuꞌu, ã te ãma iꞌarobꞌuiꞌéré mono na te te ĩma iꞌawaihuꞌu mono ꞌwa hã. Ãne te siwasuꞌu:
— Tô sena, wa za wei morĩ su za apâ.
Tane tô. Uburé Wanhibꞌapito Zezusi apâ we aimorĩ suꞌu za tô.
21 Wa hã Zuwã hã wa za oto asawi zaꞌra waꞌwa, irẽme ma. Wa ĩsima te ꞌre aiwẽ uꞌâsi zaꞌra waꞌwa, Uburé Wanhibꞌapito Zezusi te te ꞌre asawi pese zaꞌra waꞌaba mono da, duré te te ꞌre aipawaptob uꞌâsi zaꞌra waꞌaba mono da.
